Évanjil a Jan
3 Té ni on farizyen non a-y sé té Nikodèm ; sé té on chèf juif. 2 I ay vwè Jézi lannuit, é i di-y : « Rabi*, nou sav kè ou sé on anségnan, é kè sé Bondyé ki voyé-w, pas ponmoun pé pa fè sé mirak-la ou ka fè la si Bondyé pa èvè-y. » 3 Alò Jézi di-y : « Ou pé kwè-mwen : si on moun pa fèt ondòt fwa ankò, i pé pa rantré adan wayòm a Bondyé. » 4 Nikodèm mandé-y : « Kijan on moun pé wouviré fèt on dézyèm fwa alòskè i ja vyé ? I pé pa wouviré rantré an vant a manman-y pou yo mété-y si tè on dézyèm fwa ? » 5 Jézi réponn : « Ou pé kwè-mwen : pou on moun fèt on dézyèm fwa ankò, fò i batizé adan dlo, é fò Bondyé ba-y lèspri sen. Si a pa sa, i pé pa rantré adan wayòm a Bondyé. 6 Sa ki fèt grasa lachè, sé chè, é sa ki fèt grasa lèspri, sé lèspri. 7 Pa touvé sa fò pas an di-w : “Fò-zò fèt on dézyèm fwa ankò.” 8 Van-la ka souflé la i vlé, é ou ka tann bri-la i ka fè la, men ou pa sav ola i ka sòti ni ola i k’ay. Sé menm biten pou tout moun ki fèt grasa lèspri sen. »
9 Alò Nikodèm mandé-y : « Kijan sé biten-lasa pé fèt ? » 10 Jézi réponn-li : « Ou ka anségné moun an Israèl é magrésa ou pa konnèt sé biten-lasa ? 11 Ou pé kwè-mwen : nou ka palé dè sa nou konnèt é nou ka rakonté sa nou vwè, men zò pa’a kwè sa nou ka rakonté-zòt. 12 An palé-zòt dè biten ki asi latè é jousalè zò pa’a kwè-mwen. Alò, si an palé-zòt dè biten ki an syèl-la, kijan zò ké fè pou kwè-mwen ? 13 Anplis, pon nonm po’o jen monté an syèl-la sòf sila ki sòti an syèl-la é ki désann, kivédi Gason a lòm. 14 Menmjan Moyiz mèt sèwpan-la anho a on poto an dézè-la, sé menmjan-la osi, fò-yo mèt Gason a lòm anho*. 15 Konsa, tout moun ki ka kwè adan-y ké viv pou touttan.
16 « Pas tèlman Bondyé té enmé mond-la, i bay sèl Gason-la i té ni la* ; sé pou tout moun ki ka montré yo ni fwa adan Gason a-y pa détwi men viv pou touttan. 17 Pas Bondyé pa voyé Gason a-y an mond-la pou i pé sa kondanné mond-la, men sé pou Gason a-y pé sa sové mond-la. 18 Si on moun ka montré kè i ni lafwa, yo pé’é kondanné-y*, men si on moun pa ka montré kè i ni lafwa, yo ja kondanné-y* pas i pa montré kè i ni lafwa adan* sèl Gason-la Bondyé ni la*. 19 Limyè-la vin an mond-la, men olyé sé moun-la té enmé limyè-la, yo té pisimé nwèsè-la pas yo ka fè biten ki pa bon. Mi sé pousa yo ké jijé-yo ! 20 Pas si on moun ka fè biten ki pa bon, i hay limyè-la é i pa’a vin la limyè-la yé. Kifè, limyè-la pé pa fè moun konnèt* sé mové biten-la moun-la ka fè la. 21 Men on moun ki ka fè sa ki bon ka vin la limyè-la yé. Konsa, toutmoun ka vwè kè sa i ka fè annakò èvè volonté a Bondyé. »
22 Aprésa, Jézi é disip a-y pati é yo ay adan sé vilaj-la ki an Jidé la. Jézi rété la déotwa tan èvè yo, é i té ka batizé moun. 23 Men Jan osi té ka batizé moun a Énòn, toupré Salim, pas té ni onlo dlo la. Moun té ka vin la toutlè pou pran lèbatèm ; 24 a moman-lasa yo poto’o mèt Jan lajòl.
25 Lèwgadé, disip a Jan mèt-yo ka babyé èvè on Juif. Yo té ka palé dè sa on moun dwèt fè pou Bondyé konsidéré kè i pwòp. 26 Alò yo vin owa Jan, é yo di-y : « Anségnan*, boug-la ki té èvè-w lòt koté a Jouden-la, sila ou té ka palé dè-y la, ében mi i ka batizé moun, é toutmoun ka vin owa a-y. » 27 Jan di-y : « On moun pé pa ni ayen si a pa Bondyé ki ba-y-li. 28 Zòmenm a zòt, zò tann lè an di : “A pa mwen ki Lèkris, men Bondyé voyé-mwen avan-y.” 29 Madanm-mayé-la sé ta boug-la ki sòti mayé la. Men lè zanmi a boug-mayé-la doubout akoté a-y, é i ka tann-li ka palé, tchè a-y ka kontan toubònman. Alò konnyéla, an pé pa pi kontan ki sa ! 30 Li, fò i kontinyé fè douvan, men mwen, fò an kontinyé diminyé. »
31 Sila ki sòti anhola ni plis otorité ki toutmoun. Sila ki ka vin dè latè ka palé dè biten ki asi latè, pas sé dè la i ka vin. Sila ki sòti an syèl-la ni plis otorité ki toutmoun. 32 I ka palé dè sa i vwè é dè sa i tann, men ponmoun pa’a kwè sa i ka di. 33 Si on moun ka kwè sa i ka di, moun-lasa ka montré kè sa Bondyé ka di sé lavérité. 34 Pas sila Bondyé voyé la ka di pawòl a Bondyé, piskè lèwvwè Bondyé ka ba moun lèspri sen, i pa chich. 35 Papa-la enmé Gason-la, é i mété tout biten an men a-y. 36 Si on moun ka montré kè i ni lafwa adan Gason-la, i ni lavi étèwnèl. Si on moun pa’a kouté Gason-la, i pé’é ni lavi, é Bondyé ké rété kòlè èvè-y.