Mé

O 1^é syèk, moun té ka mò-fen « toupatou asi latè » é sé krétyen-la ki té ka viv a épòk-lasa pran plon adan sa osi. Sé paran-la dwèt té enkyèt é sèten yo té ka mandé-yo ka yo ké ba fanmi a yo manjé. Sonjé osi sé jenn-la ki té anvi fè plis biten pou Bondyé. Pétèt kè yo té ka di an tchè a yo kè yo té’é oblijé fè sa apré. Men kèlkèswa sa ki pasé, sé prèmyé krétyen-la adapté-yo. Yo kontinyé fè tousa yo té pé pou préché é yo té kontan pawtajé sa yo té ni èvè frè é sè a yo ki té ka rété Jidé (Akt 11:29, 30). Moun pòté-yo sèkou é séla ki pwofité dè sa vwè on mannyè ki klè kè Jéova pòté mannèv pou édé-yo (Mat. 6:31-33). Sèten yo dwèt touvé-yo enmé pli fò ankò frè é sè a yo ki té pòté mannèv pou yo. Anplisdisa, sé frè é sè la ki fè on don é séla ki fè ondòt biten pou pòté sèkou té ni tchè-kontan davwa yo ba frè é sè a yo on biten (Akt 20:35). w23.04 16 § 12-13.

Délè, pou réponn priyè a sèwvitè a-y, Jéova ka sèvi èvè moun ki pa ka adoré-y pou édé-yo. Pa ègzanp, i sèvi èvè wa Awtagzèwsès pou édé Néémi viré Jérizalèm. Konsa Néémi té’é pé édé pèp a Jéova woukonstwi vil-la (Néém. 2:3-6). Menmjan-la, jòdijou, Jéova pé pousé moun ki pa ka sèvi-y vin a sèkou an nou. An jénéral, Jéova pa’a fè on biten èstraòwdinè pou réponn priyè an nou. Men i ka réponn-nou é répons-la i ka ban-nou la sé ègzaktèman sa nou bizwen pou nou rété fidèl a-y. Sé pousa, fò ou toujou chèché a vwè kijan Jéova ka réponn priyè a-w. Dètanzantan, pran on ti tan pou gadé pou vwè kijan Jéova ka réponn priyè a-w (Sòm 66:19, 20). Fò nou ni fwa pou nou priyé Jéova é fò nou ni fwa osi pou nou aksèpté répons-la i ka ban-nou la, kèlkèswa répons-la (Ébr. 11:6). w23.05 11 § 13 ; 12 § 15-16.

Nou pwomèt Jéova kè nou ké sèvi-y pou touttan. Lè nou ba Jéova vi an nou, nou pwomèt-li kè nou ké adoré-y é kè nou ké fè volonté a-y. Fò-nou tchenn a mo an nou. A pa on chaj ki two lou pou nou. Poukwa nou ka di sa ? Sé paskè Jéova kréyé-nou pou nou fè volonté a-y (Rév. 4:11). Nou anvi konnèt Jéova é nou anvi adoré-y. É sa toutafè nòwmal, piskè lè Jéova kréyé-nou, i mèt sa andidan tchè an nou. É anplisdisa, i kréyé-nou pòtré a-y. Kifè ni mwayen vin bon zanmi èvè-y é ni mwayen fè volonté a-y èvè plézi. Anplisdisa, lè nou ka fè volonté a Bondyé é lè nou ka suiv ègzanp a Jézi, sa ka ‘konsolé-nou’ (Mat. 11:28-30). Alò kontinyé fè sa ki fo pou ou enmé Jéova pi fò. Pousa, pran tan réfléchi asi sa Jéova ja fè ba-w, asi sa i ka fè ba-w é asi sa i ké fè ba-w. Pi ou ké enmé Jéova, é pi ou ké touvé kè komandman a-y pa fòsan (1 Jan 5:3). Jézi toujou té ka mandé Pap’a-y édé-y é i toujou té ka sonjé rékonpans-la i té’é risivwè la. É sé pousa i rivé fè volonté a Jéova (Ébr. 5:7 ; 12:2). Menmjan ki Jézi, priyé Jéova pou i ba-w fòs é toujou sonjé kè si ou rété fidèl a-y, ou ké ni lavi étèwnèl. w23.08 27-28 § 4-5.

Noutout ka aprésyé moun ki ni pasyans. Lèwvwè on moun ka rivé atann on biten san i fè kòlè, nou ni onlo rèspé pou-y. Lè nou fè on érè, nou ka byen kontan osi lè yo ka pran pasyans èvè nou. Pétèt kè onlo adan nou té ni dimal a konprann sèwten biten yo aprann adan Labib, oben yo té ni dimal a aksèpté ou a apliké sa yo aprann la. Men moun-la ki fè étid an nou la pran onlo pasyans èvè nou é sèten nou ni onlo rèkonésans pou sa toubònman. É pi enpòwtan la sé kè Bondyé an nou, Jéova, ka pran pasyans èvè nou é a pa ti kontan nou kontan sa ! Sé vré nou ka touvé sa bèl lè on moun ni pasyans. Men lè sé nou ki dwètèt aji èvè pasyans, délè nou ka touvé sa on ti jan rèd. Pa ègzanp, lèwvwè nou pri adan on anboutéyaj é kè anplisdisa nou té ja anrèta, pétèt sé goumé nou ka goumé pou nou pa fè kòlè. Lè on moun ka tigonné-nou, pétèt nou ka lévé cho. Délè, nou pé ni lenprésyon kè nouvo mond-la Jéova pwomèt-nou la ka tadé, é sa ka pran tèt an nou. w23.08 20 § 1-2.

Jéova té mandé Jédéon woté plis ki 99 % a sé moun-la ki té adan lawmé a-y la. I dwèt mandé-y : « Ès chanjman-lasa vréman nésésè ? Ès sa ké maché ? » Magrésa Jédéon obéyi. Jòdijou, sé ansyen-la ka imité Jédéon lèwvwè yo ka obéyi lè lòwganizasyon ka mandé-yo fè sèwten chanjman (Ébr. 13:17). Jédéon obéyi Jéova magré i té pè é magré misyon a-y té danjéré (Jij 9:17). Lè Jéova rasiré-y, Jédéon vin sèten a san pou san kè Bondyé té’é soutyenn-li toupannan i té ka pwotéjé pèp a-y. Sé ansyen-la ki ka rété dé koté yo ka entèwdi aktivité an nou ka imité Jédéon. Yo prèmyé douvan adan sé réinyon-la é adan prédikasyon-la magré yo pé arété-yo, magré yo pé entérojé-yo, magré yo pé fè-yo pèd travay a yo oben ba-yo kou. Pannan gwo tribilasyon-la, sé ansyen-la ké bizwen ni kouraj pou obéyi sé enstriksyon-la yo ké rèsèvwa la menmsi sa danjéré. w23.06 5-6 § 12-13.

Jéova onoré Joad poudèbon menm I fè ansòt pou yo maké adan Labib jan gran prèt-lasa té fidèl. Konsa, sa pé sèvi-nou ègzanp (Wom. 15:4). É Lèwvwè Joad mò, Jéova fè-yo ba-y on bèl lonnè toubònman : « Yo téré-y adan Vil a David owa sé wa-la, pas i té fè onlo bon biten an Israèl pou vré Bondyé-la é pou tanp a-y » (2 Kron. 24:15, 16). Istwa a Joad pé édé-noutout krenn Jéova plis ankò. Sé ansyen-la pé imité Joad lèwvwè yo ka fè tousa yo pé pou yo pwotéjé lasanblé-la (Akt 20:28). Ègzanp a Joad pé itil pou frè é sè an nou ki ja ni on bèl laj. Sa ka montré-yo kè siwvwè yo ka krenn Jéova é kè yo ka kontinyé rété fidèl a-y, i pé sèvi èvè yo pou akonpli pwojé a-y.Jan-la Jéova aji la èvè Joad pé itil pou sé jenn-la osi. Sa ka montré-yo kijan yo pé aji épi onlo rèspé èvè frè é sè ki ja ni on bèl laj, siwtou si sé frè é sè lasa ka sèvi Jéova dépi onpakèt lanné (Pwov. 16:31). An-nou imité-yo, an-nou kouté ‘séla ki ka dirijé-nou la’ pou montré-yo kè nou ka soutyenn-yo (Ébr. 13:17). w23.06 17 § 14-15.

Lè nou ka gadé pou vwè konmen fwa nou ké lévé men an nou adan on réinyon, fò-nou ni bon jijman. Si nou ka lévé men an nou two souvan, sa pé mèt présyon asi frè-la ki ka dirijé pawti-la nou ka étidyé la. Pétèt i ké santi kè i oblijé ban-nou réponn a plizyè rèpriz alòskè ni dòt moun ki po’o pawtisipé. Akòz dè sa, ni sèwten moun ki pé rivé a di kè yo pa’a lévé men a yo ankò (Ékl. 3:7). Lè on frè ka dirijé on pawti a réinyon-la é kè ni onlo pwoklamatè ki ka lévé men a yo, pétèt i pé’é pé fè-nou réponn chakfwa nou ka lévé men an nou. É pétèt kè délè, i pé’é pé ban-nou réponn ditou-ditou. Sa pé rivé a désèvwa-nou. Men lèwvwè sa ka rivé, fò pa nou mèt an tèt an nou kè frè-la ka fè sa pa èspré (Ékl. 7:9). Siwvwè ou pa ni lokazyon bay tout sé komantè-la ou té vlé la, lèwvwè frè é sè a-w ka réponn, sa té’é byen si ou té ka kouté-yo byen pou ou ay félisité-yo lèwvwè réinyon-la fin. Sé vré kè lè nou ka bay on ti komantè, sa ka ankourajé frè é sè an nou. Men lèwvwè nou k’ay félisité-yo, sa ka fè menm travay-la osi. w23.04 23-24 § 14-16.

Étidyé Pawòl a Bondyé é médité asi sa ou ka aprann. Pou on pyébwa pé sa rété doubout, fò rasin a-y ka désann fon an tè-la. Menmjan-la, pou nou pé sa rété doubout pikan, fò fwa an nou byen chouké adan Pawòl a Bondyé. Pli on pyébwa ka grandi, pli rasin a-y ka kouri atè-la é ka plonjé désann fon an tè-la. Menmjan-la, lè nou ka étidyé Pawòl a Bondyé é kè nou ka médité anlè-y, nou ka fè fwa an nou vin pi fò, é nou ka vin pi sèten ankò kè pa ni ayen ki pibon ki sa Bondyé ka mandé-nou fè (Kol. 2:6, 7). Sonjé jan Jéova soutyenn sèwvitè a-y ki té ka viv an tan a Labib. Délè i di-yo ka pou yo té fè ègzaktèman, i ba-yo déotwa konsèy é i pwotéjé-yo. Pa ègzanp, Ézékyèl vwè on zanj adan on vizyon. Zanj-la té ka miziré tanp-la é i té ka pran travay-lasa oséryé menm. Toupannan Ézékyèl té ka gadé sa, i té byen konsantré pou éséyé konprann tousa zanj-la té ka fè. Grasa vizyon-lasa, fwa a Ézékyèl vin pi fò, é jòdila, vizyon-lasa ka aprann-nou jan sa enpòwtan kè nou rèspèkté sé prensip-la Jéova mèt anplas la anrapò èvè vré adorasyon-la (Ézék. 40:1-4 ; 43:10-12). Nou osi, sa ka fè-nou dibyen toubònman lè nou ka étidyé Pawòl a Bondyé, lè nou k’ay an nannan a-y é lè nou ka médité anlè-y. Nou pé ni on tchè ki solid, kivédi nou pé fè Jéova konfyans a san pou san (Sòm 112:7). w23.07 18 § 15-16.

Adan Labib ou pé touvé onlo ègzanp a jenngason ou pé imité. Sé nonm-lasa té enmé Bondyé é yo té ni onlo rèsponsabilité diféran adan pèp a-y. Ou pé touvé onlo bèl ègzanp osi a frè ki byen doubout adan lavérité adan fanmi a-w é adan lasanblé-la (Ébr. 13:7). É asirésèten, méyè ègzanp nou pé ni sé ta Jézi (1 Pyè 2:21). Pran tan étidyé sé ègzanp-lasa é réfléchi asi sé bèl kalité-la yo té ni la é kè ou ka aprésyé (Ébr. 12:1, 2). Aprésa, mandé-w kijan ou pé imité sé nonm-lasa. Pa fè on biten présé-présé men pran tan a-w pou-w réfléchi avan ou désidé sa ou kay fè. Pou pwogrésé adan domenn-lasa, fò ou ké fè onlo éfò. Prèmyé biten ou pé fè, sé byen konnèt sé prensip-la ki an Bib-la. Konsa ou ké sèten kè sa yo ka di bon pou-w. Aprésa, sèvi èvè sé prensip-lasa pou pran désizyon ki ké fè Jéova plézi (Sòm 119:9). Sa ké édé-w toubònman pou vin on frè ki byen doubout adan lavérité (Pwov. 2:11, 12 ; Ébr. 5:14). w23.12 24-25 § 4-5.

Sé paran-la pé aprann timoun a yo aji épi dousè èvè moun ki ka kritiké-yo pou kwayans a yo (Jak 3:13). Ni sèwten paran ki ka òwganizé-yo pou fè dé ti ègzèwsis èvè sé timoun-la pannan yo ka fè étid familyal la. Yo ka chwazi palé dè sèwten sijé yo pé palé sé timoun-la lékòl é tout fanmi-la ka gadé pou vwè ka sé timoun-la té’é pé di asi sa. Sé paran-la ka fè sa pou aprann timoun a yo palé pou lézòt èvè dousè é èvè jantiyès. Lèwvwè sé fanmi-la ka fè dé ti ègzèwsis konsa, sa itil pou sé jenn-la toubònman. Konsa yo ka pi sèten dè sa yo ka kwè é yo ka pé èspliké kanmarad-lékòl a yo pou kibiten yo ka kwè adan sa. Asi jw.org ni ribrik-la « Les jeunes s’interrogent » é ni ribrik-la « Fiches de réflexions ». Yo fè sé fich-lasa pou édé sé jenn-la konsolidé fwa a yo é pou yo pé sa réponn on moun èvè mo a yo ki ta yo. Lèwvwè sé fanmi-la ka ègzaminé sé fich-lasa ansanm, toutmoun ka aprann kijan pou yo défann fwa a yo èvè dousè é èvè onlo jantiyès. w23.09 17 § 10 ; 18 § 15-16.

Ès sa ja rivé-w chwazi on òbjèktif èspirityèl, men kè ou ni dimal a atenn-li ? Si ou adan ka-lasa, fò ou sav kè ou pa tousèl. Pa ègzanp, Philip té vé priyé Jéova pi souvan é i té vé priyé-y pibyen osi, men i té ni dimal a touvé tan pou fè sa. Erika té vé òwganizé-y pou rivé alè lèwvwè té ni on réinyon pou prédikasyon-la, men près touttan i té anrèta. Si ou chwazi on òbjèktif èspirityèl men kè ou pa ka rivé atenn-li, pétèt kè ou ni lenprésyon kè ou pa vo ayen. Menm lèwvwè on moun ka chwazi on òbjèktif ki tousenp, sa pé pran onlo tan é sa pé mandé onlo éfò pou i rivé atenn-li. Lèfètkè ou anvi atenn òbjèktif-lasa toujou, sa ka montré kè ou ka ba lanmityé-la ou ni la èvè Jéova onlo valè é kè ou vé ba-y sa ou ni dè méyè. É pou Jéova, tout sé éfò-la ou ka fè la ni onlo valè. Pa oubliyé, Jéova pé’é jen mandé-w fè plis ki sa ou pé fè (Sòm 103:14 ; Mich. 6:8). Alò tchenn kont dè sitiyasyon a-w é lè ou ka chwazi òbjèktif a-w, fè atansyon pou ou pa pann chapo a-w two ho. w23.05 26 § 1-2.

On moun ki ni kouraj pé rivé a pè men i pa’a lésé sa anpéché-y fè sa ki byen. Danyèl sé té on jennboug ki té ni onlo kouraj toubònman. I té ka étidyé sa sé pwofèt-la maké, kifè, i étidyé sa Jérémi maké osi. Pa ègzanp, rivé onlè, sa i aprann adan étid a-y édé-y konprann kè adan on ti moman, yo té’é libéré sé Juif-la yo té chayé Babilòn pa fòs (Dan. 9:2). Sèten kè lè Danyèl vwè sé pwofési-la réyalizé, i mété-y ka fè Jéova konfyans plis ankò é nou sav kè moun ki ka fè Jéova konfyans a san pou san pé ni onlo onlo kouraj (gadé Women 8:32, 37-39). Men on biten ki pi enpòwtan ankò, sé kè souvantfwa Danyèl té ka priyé Pap’a-y ki an syèl-la (Dan. 6:10). I té ka di-y sé péché-la i té fè la. I té ka di-y sa i té ka rèsanti osi é i té ka mandé-y édé-y (Dan. 9:4, 5, 19). Danyèl sé té on moun kon toutmoun. Sa vé di kè lèwvwè i fèt, i pa té ni kouraj. Men konm i té ka étidyé, i té ka priyé é i té ka fè Jéova konfyans, i vin ni onlo kouraj. w23.08 3 § 4; 4 § 7.

Lèwvwè nou ka kouté séla ki ni otorité-la, sa ka fè-nou dibyen é sa ka fè frè é sè an nou dibyen osi. Poukwa nou ka di sa ? On prèmyé biten ki ka fè-nou di sa, sé kè yo pé’é pini-nou pas nou pa suiv lwa-la (Wom. 13:1, 4). Anplisdisa, lè nou ka obéyi, sé otorité-la ka vwè kè nou sé dé bon moun. Pa ègzanp, ni plizyè lanné dè sa, o Nijérya, onpakèt sòlda rantré adan on sal di Wayòm pannan on réinyon. Yo té ka chèché moun ki ka lévé gaoulé pas yo vé pa péyé enpo a yo. Men chèf a yo di-yo sòti an sal-la. Mi sa i èspliké-yo : « Sé Témwen a Jéova la toujou ka péyé enpo a yo. » Chakfwa ou ka obéyi sé lwa-la, sé Témwen a Jéova la ka kontinyé ni on bèl répitasyon é pétèt grasa sa, on jou sa ké pwotéjé frè é sè a-w. w23.10 9 § 13.

Pawmi sèwvitè a Jéova, ni sa ki ka atann kè mond-lasa bout dépi on bon moman. Ni dé moun ki ka pansé kè ni lontan mond-lasa té dwèt ja disparèt. Men konm Jéova ka konprann sa sèwvitè a-y ka rèsanti, mi sa i di pwofèt Abakik : « Pas vizyon-la ké réyalizé a lè a-y, i ké rivé vit, é a pa on manti. Menmsi i ka tadé, kontinyé atann-li. Asiré pa pétèt, i ké réyalizé. I pé ké anrèta ! » (Abak. 2:3). Ès sa Jéova di la, sé té pou Abakik tousèl ? Oben ès sa valab pou nou osi ? Grasa lèsprisen a Bondyé, lapòt Pòl sèvi èvè sé menm pawòl-lasa pou i té ankourajé sé krétyen-la ki té présé vwè nouvo mond-la rivé (Ébr. 10:36, 37). Menmsi nou ni lenprésyon kè pwomès a Jéova ka pran tan pou i réyalizé, « asiré pa pétèt, i ké réyalizé » ; « i pé ké anrèta ! » w23.04 30 § 16.

Jéova fè ansòt pou sé Israélit-la té vwè an 2 zyé a yo kè sé Moyiz i té chwazi pou palé an non a-y. Men yo pa tchenn kont dè sa (Nonb 14:10, 11). Yo montré a plizyè rèpriz kè yo pa té vlé aksèpté kè sé èvè Moyiz Jéova té ka sèvi pou gidé-yo. Alò Jéova pa lésé-yo rantré adan péyi-la i té pwomèt-yo la (Nonb 14:30). Men ni sèwten Israélit ki soumèt-yo douvan Jéova é yo lésé-y gidonné-yo. Pa ègzanp, mi sa Jéova ni lokazyon di : « Kalèb […] kontinyé kouté-mwen èvè tout tchè a-y » (Nonb 14:24). Bondyé rékonpansé Kalèb é i jous lésé-y chwazi on koté pou i rété Kanaan (Joz. 14:12-14). Sé Israélit-la ki rantré adan Péyi-la Jéova té pwomèt-yo la lésé Jéova gidonné-yo osi é yo ka ban-nou on bèl ègzanp adan domenn-lasa. Labib ka di kè lè Jéova mèt Joziyé chèf a pèp-la anplas a Moyiz, « pannan tout vi a Joziyé, sé Israélit-la rèspèkté-y » (Joz. 4:14). Alò, Jéova béni-yo é i fè-yo rantré adan péyi-la i té pwomèt-yo la (Joz. 21:43, 44). w24.02 21 § 6-7.

Lè on mèdsen ka gadé pou vwè kijan tchè an nou ka bat, i ka rivé sav si tchè an nou ka fonksyonné byen konm i fo. Menmjan-la, nou pé sav si nou enmé Bondyé fò lè nou ka gadé jan nou enmé frè é sè an nou. Si nou ka rann-nou kont kè nou pa enmé frè é sè an nou fò kon avan, sa vé di kè nou pa enmé Bondyé fò kon avan osi. Pawkont, siwvwè nou ka aji épi lanmou èvè frè é sè an nou toutlè, sa ké montré kè nou enmé Bondyé fò. Siwvwè nou pa enmé frè é sè an nou fò kon avan, fò sa enkyété-nou. Poukwa nou ka di sa ? Pas sa pé vé di kè nou andanjé é kè nou pé rivé a pèd lanmityé an nou èvè Jéova. Lapòt Jan ka di sa on mannyè ki klè lè i ka di : « On moun ki pa enmé frè a-y, kè i ka vwè, pé pa enmé Bondyé, kè i pa ka vwè » (1 Jan 4:20). Ka sa ka aprann-nou ? Nou ké fè Jéova plézi enki siwvwè nou « ni lanmou yonn pou lòt » (1 Jan 4:7-9, 11). w23.11 8 § 3 ; 9 § 5-6.

Lèwvwè i té jenn, wa Joas pran on désizyon ki té plen sajès. I pa té ni papa, kifè i lésé Joad, on gran prèt ki té fidèl a Bondyé, gidé-y. Prèt-lasa lévé-y konsi sé té gason a-y. Grasa bèl ègzanp-la Joad ba-y la, Joas désidé sèvi Jéova é édé pèp-la sèvi Jéova osi. I jous fè ansòt pou yo réparé Tanp-la (2 Kron. 24:1, 2, 4, 13, 14). Si sé fanmi a-w oben ondòt moun ki ka aprann-vou enmé Jéova é ki ka aprann-vou rèspèkté prensip a-y, ou sav, sé on bèl kado yo ka fè-w la (Pwov. 2:1, 10-12). Fanmi a-w pé fòwmé-w diféran mannyè. Yo ka ba-w dé konsèy ki sòti an Bib-la é si ou ka suiv sé konsèy-lasa, ou ké fè tchè a yo kontan. Men pi enpòwtan ankò, Jéova ké kontan é ou ké vin pibon zanmi èvè-y (Pwov. 22:6 ; 23:15, 24). Lè ou ka réfléchi asi sa, ès sa pa’a ba-w anvi fè menm biten ki sa Joas fè lèwvwè i té jenn ? w23.09 8-9 § 3-5.

Jéova ka pwomèt-nou kè i ké kouté priyè an nou. Konm nou fidèl a Jéova, Bondyé an nou enmé-nou é i pé’é jen pa kouté priyè an nou (Sòm 10:17 ; 37:28). Men apapousa Jéova ké ban-nou tousa nou ka mandé-y. Pétèt kè fò nou ké atann nouvo mond-la pou nou trapé sèwten biten nou mandé-y. Toupannan Jéova ka kouté priyè an nou, i ka sonjé pwojé a-y (Iz. 55:8, 9). On biten Jéova vé sé kè latè plen èvè moun ki kontan obéyi-y é ki ka aksèpté kè i gouvèné-yo. Men konm Satan di kè moun té’é pi kontan si yo té ka gouvèné-yo yomenm a yo, Jéova ka lésé-yo fè zafè a yo pou toutmoun vwè kè Satan sé on mantè (Jén. 3:1-5). Konm sé lézòm ki ka gouvèné, nou ni pwoblèm si pwoblèm (Ékl. 8:9). Nou sav kè Jéova ja désidé kitan i ké fè sé pwoblèm-lasa disparèt men i pé’é fè sa avan jou-la i prévwa la. w23.11 21 § 4-5.

Jéova té pwomèt Abraam kè « onlo nasyon » té’é risivwè bénédisyon grasa-y. Men lè Abraam té ni 100 an é Sara 90 an, yo poto’o ni timoun-la Jéova té pwomèt-yo la. Kifè, moun té’é pé pansé kè yo pa té’é jen ni timoun on jou. Sé té on gwo éprèv pou Abraam. Men « èspérans a-y pèwmèt-li ni fwa kè i té’é vin papa a onlo nasyon » (Wom. 4:18, 19). É anfinaldikont, sa Abraam té ka èspéré la réyalizé : Izaak, gason-la i té ka atann la fin pa vwè jou (Wom. 4:20-22). Menmjan ki Abraam, nou pé fè Jéova plézi, i pé konsidéré-nou kon moun ki jis é nou pé vin zanmi èvè-y. Sé sa sé pawòl-la Pòl di la ka montré-nou. Mi sa i di : « Men, a pa pou [Abraam] tousèl yo maké sé pawòl-lasa : “Grasa sa, Bondyé konsidéré-y”, men, yo té maké-yo pou nou osi, davwa Bondyé ké konsidéré-nou kon dé moun ki jis paskè nou ka kwè adan Sila ki résisité Jézi Ségnè an nou » (Wom. 4:23, 24). Kon Abraam, fò-nou ni lafwa, fò-nou fè dé bon biten é fò-nou sèten a san pou san kè Bondyé ké réyalizé sé biten-la nou ka atann la. w23.12 7 § 16-17.

Lèwvwè ou ka jwenn on difikilté é kè ou pè, sonjé kè Jéova sav sa ou ka viv é kè i sav sa ou ka rèsanti. Pa ègzanp, non sèlman Jéova té sav jan yo té ka maltrété sé Israélit-la lè yo té an Éjipt, men anplisdisa, i té konnèt byen ‘kijan yo té ka soufè’ (Ègz. 3:7). Pétèt kè ou ka viv on sitiyasyon ki ka angwasé-w bon angwasé la é ou pa’a vwè ka Jéova ka fè pou soutyenn-vou. A moman-lasa, ka pou-w fè ? Ében mandé Jéova ba-w bon jijman pou ou pé sa vwè tousa i ka fè pou édé-w (2 Wa 6:15-17). Aprésa, pran on tan pou réfléchi asi sa : Ès ou tann on biten ki ankourajé-w adan on diskou oben adan on komantè pannan on réinyon ? Adan tousa lòwganizasyon ka pwodui, ès ni on piblikasyon, on vidéo oben on chanson ki ankourajé-w ? Ès on moun pawtajé on vèwsé èvè-w oben on lidé ki ba-w fòs ? Nou pé rivé a oubliyé jan frè é sè an nou enmé-nou é jan Pawòl a Bondyé pé ankourajé-nou é pé édé-nou. Poutan, tousa sé dé bèl kado Jéova ka fè-nou (Iz. 65:13 ; Mawk 10:29, 30). Sa ka montré jan Jéova ka enkyété-y pou nou é jan i mérité kè nou fè-y konfyans (Iz. 49:14-16). w24.01 4-5 § 9-10.

On ti moman avan Jézi té viré an syèl-la, i fè disip a-y sonjé kè fò yo té sèvi-y « témwen a Jérizalèm, adan tout Lajidé é Lasamari, é jis koté-la ki pli lwen la asi latè » (Akt 1:8 ; Lik 24:46-48). Men kèlkètan apré, sé chèf a rèlijyon juif la arété Lapòt Pyè é Lapòt Jan é yo menné-yo douvan Sannédren-la. Yo di-yo kè fò-yo arété préché é yo jous mennasé-yo (Akt 4:18, 21). Mi sa Pyè é Jan réponn-yo : « Sé zòt pou jijé si, pou Bondyé, sa jis kè nou kouté-zòt olyé nou kouté Bondyé. Men nou, nou pé pa arété palé dè sé biten-la nou vwè la é dè sé biten-la nou tann la » (Akt 4:19, 20). Lè Pyè é Jan sòti lajòl, sé disip-la priyé Jéova pou yo té pé sa fè volonté a-y. Yo priyé Jéova èvè tout tchè a yo é Jéova réponn a priyè a yo (Akt 4:31). w23.05 5 § 11-12.

Ni milya é milya lanné Jéova é Jézi kon bag é dwèt. Pa ni lanmou ki pi fò ki ta Jéova é ti Gason chéri a-y. Jéova di jan i enmé Jézi é i pa té pè fè sa douvan toutmoun. Nou ka touvé sa i di adan tèks a jòdila. I té pé di : « Mi sila ki ka fè-mwen plézi la. » Men konm i té anvi nou sav jan i enmé Gason a-y, i di : « Gason an mwen, sila an enmé onlo la ». A pa ti fyèw Jéova fyèw dè-y siwtou pas i té dakò pou bay vi a-y an sakrifis (Éféz. 1:7). Li Jézi aprézan té sav Pap’a-y té enmé-y é i pa té ni pon dout asi sa. I té sèten dè sa a san pou san. A plizyè rèpriz, i ni lokazyon di kè Pap’a-y enmé-y é ou té ka santi jan i té sèten dè sa i té ka di (Jan 3:35 ; 10:17 ; 17:24). w24.01 28 § 8.

Imajiné sitiyasyon-lasa : On moun ou enmé onlo ka di on vyé biten asi-w. Sa pa menm vré, men ni sèwten moun ki ka pran sa pou lajan-kontan. É sa ki pi rèd la, sé kè yo ka mèt-yo ka répété sa ba dòt moun é onlo moun ka fin pa kwè sa. Ka sa ké fè-w ? Sèten manti-lasa ké fè-w mal toubònman. Pa vré ? Ti ègzanp-lasa ka édé-nou konprann ka sa fè Jéova lèwvwè yo sali répitasyon a-y. On pitit a-y, on zanj, ba Èv on manti asi Bondyé. I di-y on vyé biten asi Bondyé, é Èv kwè sa. Akòz dè manti-lasa, Adan é Èv ba Bondyé do. É ki rézilta sa bay ? Toutmoun ka péché é ka fin pa mò (Jén. 3:1-6 ; Wom. 5:12). Tout sé pwoblèm-la nou ka vwè adan mond-lasa, kon lanmò, lagè é soufrans, ka ègzisté akòz dè sé manti-la Satan simé la. Lè Jéova ka tann tout sé manti-la yo ka di asi-y la é lè i ka vwè pwoblèm sa ka menné, ou ka di sa pa’a fè-y lapenn ? Pa ni pon dout asi sa. Men, Jéova pa égri pou sa é i pa ni ponmoun si tchè nonplis. Okontrè, i ka rété « Dyé-la tchè a-y kontan la » (1 Tim. 1:11). w24.02 8 § 1-2.

Jozèf montré kè i té byen désidé a fè sa ki byen. Kijan ou pé imité-y ? Ében sé lè ou ka désidé dépi konnyéla ka ou ké fè lèwvwè ou ké touvé-w douvan on tantasyon. Dépi ou ka touvé-w douvan on biten Jéova hay, aprann di non tousuit é fè éfò pou pa menm sonjé sé biten-lasa ankò (Sòm 97:10 ; 119:165). Konsa lèwvwè ou ké jwenn on tantasyon, ou ké pé aji san pèd tan. Pétèt ou sav kè ou adan lavérité é ou vé sèvi Jéova èvè tout tchè a-w, men ou pa’a santi-w kè ou paré pou ba Jéova vi a-w é pou pran lèbatèm. Si sé ka a-w, ou pé fè kon wa David. Ou pé sipliyé Jéova. Mi sa ou pé di-y : « O Bondyé, ègzaminé-mwen pou ou pé sa konnèt sa ki an tchè an mwen. Ègzaminé-mwen, pou ou pé sa konnèt sa ki ka trakasé-mwen. Gadé pou ou vwè si i ni on biten ki pa bon andidan mwen, é menné-mwen asi chimen a létèwnité » (Sòm 139:23, 24). Jéova ka béni moun ki ka « chèché-y vréman ». Òbjèktif a-w, sé ba Jéova vi a-w é pran lèbatèm. É ou ké montré Jéova kè ou ka chèché-y vréman si ou ka fè éfò pou atenn òbjèktif-lasa (Ébr. 11:6). w24.03 6 § 13-15.

Gran prèt-la té ka rèprézanté pèp-la douvan Bondyé. Prèmyé gran prèt ki té tini, sé té Aawon. Jéova té ba-y fè travay-lasa lèwvwè yo té fè on sérémoni pou yo té ofè Jéova tabèwnak-la. Men aprésa, lapòt Pòl èspliké kè « onlo moun té oblijé vin prèt […] pas lè yo té ka mò, yo pa té pé kontinyé travay antankè prèt » (Ébr. 7:23-26). É konm yo té enpawfè, sé gran prèt-lasa té oblijé ofè Jéova sakrifis pou pwòp péché a yo. Men ni on gran gran diférans èvè pi Gran Prèt-la, Jézikris. Jézikris, pi Gran Prèt an nou, « ka sèvi adan […] vré tant-la. Tant-lasa, a pa on nonm ki monté-y, men sé Jéova » (Ébr. 8:1, 2). Pòl èspliké kè « konm li i ka kontinyé viv pou touttan, yo pa bizwen mèt ponmoun an plas a-y ». Pòl di osi kè nou ni on Gran Prèt « ki pa ni pon tach, ki pa ni ayen a vwè èvè moun ki ka fè péché ». Anplisdisa, i di kè Jézikris « pa bizwen ofè sakrifis chakjou » pou péché a-y kon sé gran prèt-la té ka fè an Israèl. w23.10 26 § 8-9.

Lè yo ka di « ansyen syèl-la », sé pou palé dè sé gouvènman-la ki anba dominasyon a Dyab-la é anba dominasyon a sé démon-la (Mat. 4:8, 9 ; 1 Jan 5:19). Adan Labib, lè yo ka palé dè « tè-la », délè sé pou palé dè sé moun-la ki ka viv asi-y la (Jén. 11:1, nòt an fransé ; Dét. 32:1). Sa vé di kè « ansyen tè-la » sé sé moun-la ki ka viv asi latè jòdijou é ki méchan. Jéova té’é pé ranjé déotwa biten adan syèl-la é asi tè-la ki la la aprézan. Men a pa sa i ké fè. Non, i k’ay pi lwen ki sa. I ké ranplasé ansyen syèl-la é ansyen tè-la èvè on nouvo syèl é on nouvo tè kivédi on nouvo gouvènman ki ké gouvèné asi dé moun ki jis. Jéova ké pasé men a-y asi latè é asi lézimen pou géri-yo é lèwvwè i ké fè sa, tout biten é toutmoun ké vin pawfè. Kon Izayi té ja anonsé, Jéova ké fè tout latè vin on bèl jaden toubònman kon Jadendédèn-la té yé avan. Jéova ké géri-nouchak. A moman-lasa, sé konsi nouchak ké vin nèf. I ké géri moun ki ka bwété, moun ki avèg, moun ki soud é i ké fè moun ki mò wouvin a lavi (Iz. 25:8 ; 35:1-7). w23.11 4 § 9-10.

‘Gwo tribilasyon-la’ ké koumansé onsèl kou (Mat. 24:21). Men gwo tribilasyon-la pé’é ni ayen a vwè èvè sé katastwòf-la ki ka fèt la, pas nou sav kè i ka vin alòskè onlo adan sélézòt katastwòf-la pé rivé a siwprann-nou. Ni 2000 an dè sa apépré, Jézi avèti disip a-y é i di-yo préparé-yo pou jou-lasa. Siwvwè nou préparé-nou, nou ké rivé pasé sé moman difisil lasa pi fasilman é nou ké pé édé lézòt fè menm biten-la osi (Lik 21:36). Nou ké bizwen andirans pou nou obéyi Jéova é fò-nou ké sèten kè i ké pwotéjé-nou. Ka nou ké fè siwvwè frè é sè an nou pèd on pawti a zéfé a yo oben siwvwè yo pèd tousa yo té ni ? (Abak. 3:17, 18). Konm nou ni konpasyon pou yo, sa ké ban-nou balan pou fè on biten pou édé-yo. An-nou imajiné aprézan kè sé nasyon-la ka mèt-yo ansanm pou ataké-nou é kè nou oblijé viv èvè plizyè frè é sè adan on toupiti pyès, kijan nou ké réyaji ? (Ézék. 38:10-12). Si nou vé andiré sé moman difisil lasa, fò-nou ké enmé frè é sè an nou fò toubònman. w23.07 2 § 2-3.

Ègzanp a Akilas é Prisil pé aprann sé moun-mayé-la onlo biten. Akilas é Prisil té mayé é sé frè é sè la ki té ka viv a épòk a yo la té enmé-yo onlo (Wom. 16:3, 4). Yo té ka travay, lè yo té ka préché é lè yo té ka édé lézòt, yo té ka fè sa ansanm (Akt 18:2, 3, 24-26). An réyalité, lèwvwè Labib ka palé dè Akilas é dè Prisil, i pa’a jen ka palé dè yonn si i pa’a palé dè lòt la osi. Kijan 2 moun-mayé pé imité-yo ? Moun-mayé, sonjé tousa zò ni a fè adan on jouné. Ès zò té’é pé fè sèwten adan sé biten-lasa ansanm olyé zò fè-yo zòchak dè koté a zòt ? Akilas é Prisil té ka préché ansanm. Ès zò ni labitid préché ansanm ? Anplisdisa, Akilas é Prisil té ka travay ansanm. Pétèt kè vou é moun-la ou mayé èvè-y la pa ka fè menm travay-la men lè zò ka fè sèwten biten an kaz-la, ès zò pa té’é pé fè-y ansanm ? (Ékl. 4:9). Siwvwè yonn ka édé lòt konsa, zò ké santi kè zò adan menm ékip-la é zò ké ni lokazyon palé yonn èvè lòt. w23.05 22-23 § 10-12.

Noutout pé rivé a pè on biten. Pa ègzanp, on jou, lè wa Sayil té ka kouri dèyè David pou tchouyé-y, David ay kaché adan on vil yo ka kriyé Gat. Vil-lasa té ka touvé-y adan téritwa a sé Filisten-la. Men Akich, wa a Gat, vin sav kè David sé té on vayan sòlda é kè i té ja tchouyé plizyè milyé Filisten. Kifè, lafrous pran David (1 Sam. 21:10-12). I té ka mandé-y ka Akich té’é fè-y é sa té ka pran tèt a-y. Ka ki édé David ni kouraj ? David palé dè sa i rèsanti lèwvwè i té Gat adan Sòm 56 la. David té pè é i pa kaché sa. Men i di osi ka i fè pou i pa té pè ankò. Lèwvwè i té pè, David té ka mèt konfyans a-y an Jéova (Sòm 56:1-3, 11). É i té byen fèt fè Bondyé konfyans ! Grasa Jéova, i mèt on plan si pyé. I mété-y ka fè konsi i té fou. Sa té on ti jan bizaw men sa maché. Lè Akich vwè sa, olyé i té tchouyé David i lésé-y pati é sé konsa David rivé chapé kò a-y (1 Sam. 21:13 – 22:1). w24.01 2 § 1-3.

Dè kimoun yo ka palé la adan tèks a jòdila ? Dè frè é sè ki wen é ki résisité ! Sa vé di kè lèwvwè gwo tribilasyon-la ké toupré fin é kè rèstan a sé wen-la ké monté an syèl, yonn adan sé 1^é biten-la yo ké fè la sé goumé èvè sé lènmi-la. Lèwvwè yo ké résisité an syèl-la, yo ké owa Jézi é zanj a-y pou goumé pannan dènyé lagè-la yo ké fè la kont lènmi a Bondyé. Mi on biten pou ou sonjé : Sèwten wen ki asi latè toujou, ja ni on bèl laj é pétèt kè santé-la pa two flanbo. Men lèwvwè Bondyé ké résisité-yo an syèl-la, yo ké vin dé kréyati ki puisan é lanmò pé’é ni pon pouvwa asi yo ankò. 1^é biten yo ké ba-yo fè, sé goumé owa Wa Jézikri, Gran Sòlda-la. Lèwvwè lagè a Awmagédon ké fin, yo ké travay èvè Jézi pou édé sé moun-la ki asi latè la wouvin pawfè. Lè yo té asi latè, ni dé biten sé krétyen wen la pa té pé fè pou frè é sè a yo. Men toupannan yo ké an syèl-la, yo ké pé fè onlo biten pou frè é sè a yo ki toupatou asi latè é kè yo enmé onlo. w24.02 6-7 § 15-16.

Ni sèwten moun ki paré pou ba Jéova vi a yo é pou pran lèbatèm é poutan yo ka ézité. Pétèt yo ka di an tchè a yo : « Vinvwè an pran lèbatèm é kè aprésa an fè on péché ki grav, yo ké èskominyé-mwen. » Si vou osi sa ka fè-w pè, ou pé sèten kè Jéova ké ba-w tousa ou bizwen pou-w ‘maché on mannyè ki ka onoré-y é ki ka fè-y vréman plézi’ (Kol. 1:10). Anplisdisa i ké ba-w fòs pou ou pé sa fè sa ki byen. I ja édé onlo moun fè sa (1 Kor. 10:13). Dayè, sé tibwen pousa osi kè yo pa ka èskominyé tèlman moun. Asirésèten, Jéova ka édé-nou pou nou pé sa rété fidèl a-y. Davwa nou enpawfè, noutout pé anvi fè dé biten ki pa bon (Jak 1:14). Kanmenmsa, lèwvwè on tantasyon ka vin touvé-w ou pé chwazi sa ou ké fè. Anfinaldikont sé vou ki ka désidé jan ou ké menné vi a-w. Onlo moun ka di kè nou pé pa métrizé sa nou ka rèsanti é sa nou ka fè men a pa vré. Ou pé aprann métrizé mové lanvi ou pé ni. w24.03 5 § 11-12.