Jen

O 1^é syèk, Jéova béni sé krétyen-la pas yo fè kò èvè plizyè chanjman. Yo jwenn onlo pèwsékisyon, é dépawfwa sa té ka rivé-yo lè yo pa té ka atann-yo a sa menm. An-nou palé dè sa ki rivé Bawnabé é Pòl lè yo té ka préché pa owa on vil yo ka kriyé Lis. Odépa, onlo moun akéyi-yo byen é yo kouté-yo. Men apré, dé moun ki té kont yo vin pran tèt a sé moun-la ki té an foul-la. Kifè, sèwten moun pawmi séla ki té byen akéyi-yo la lapidé Pòl é yo lésé-y atè-la pas yo konpranndèdi i té mò (Akt 14:19) Men Bawnabé é Pòl pati ondòt koté é yo kontinyé préché. Ki rézilta sa bay ? Grasa yo, onlo moun vin disip a Jézi. Anplisdisa, sa yo fè é sa yo di ba sé frè é sè la bon fòs (Akt 14:21, 22). Magré yo pèwsékité Bawnabé é Pòl alòskè yo pa té ka atann-yo a sa, yo pa lagé é sa fè sé moun-la ki té alantou a yo la dibyen toubònman. Nou osi, siwvwè nou pa’a lagé travay-la Jéova ban-nou fè la, i ké béni-nou. w23.04 16-17 § 13-14.

Toutolon a vi a-y, wa David té ni onlo moun ki té kont li, é i priyé Jéova pou i té mandé-y édé-y bon tibwen fwa. David té sèten kè Jéova té ka kouté priyè a-y é kè i té ka réponn-li. Vou osi, ou pé sèten dè sa. Labib ka montré kè Jéova pé ban-nou sajès-la é fòs-la nou bizwen la pou nou pé sa andiré. I pé sèvi èvè frè é sè an nou adan lasanblé-la é i pé jous sèvi èvè moun ki po’o ka adoré-y pou édé-nou. A pa toutlè Jéova ka réponn-nou kon nou té’é vé men i toujou ka réponn-nou. I ka ban-nou ègzaktèman sa nou bizwen é i ka fè sa o bon moman. Alò kontinyé priyé Jéova èvè onlo fwa. Mèt fon an tèt a-w kè i ké toujou pran swen a-w dépi konnyéla é kè adan nouvo mond-la, i ké « rasazyé anvi a tousa ki ka viv » (Sòm 145:16). w23.05 8 § 4 ; 13 § 17-18.

Ki bon biten sa ké pòté ba-w si ou ka rivé atenn òbjèktif a-w ? Ou ja ni labitid li Labib é priyé, men si òbjèktif a-w sé vin pibon adan sé domenn-lasa, sonjé kè sa ké édé-w vin pibon zanmi èvè Jéova ankò (Sòm 145:18, 19). Si ou vé imité on kalité Jézi té ni, sonjé kè lèwvwè ou ké rivé ni kalité-lasa, ou ké antann-vou pibyen èvè lézòt (Kol. 3:14). Pétèt ou ni plizyè rézon ki ka ba-w anvi atenn òbjèktif a-w. É si ou té ka maké tout sé rézon-lasa asi on ti lis ? Aprésa, pran labitid gadé lis-lasa toutlè. Anplisdisa, fè ansòt pou-w pasé tan èvè frè é sè ki ké ankourajé-w (Pwov. 13:20). An réyalité, fò-nou rèkonnèt kè ni dé jou nou pa tèlman anvi fè sèwten biten. Men lè sa ka rivé, ès sa vé di kè pa ni mwayen nou fè pa menm onsèl pli pou atenn òbjèktif an nou ? Awa. Nou pé kontinyé fè sèwten biten pou atenn òbjèktif an nou menmsi nou pa ni balan. Sé vré, sa ké mandé kè nou karé adan sa nou ka fè, men sa vo lapenn. w23.05 27-28 § 5-8.

Si nou byen konprann kè fò nou asimé lè nou pran on désizyon, sa ké pousé-nou a di sa nou fè ki pa bon, a réparé tout déga nou fè é a fè éfò pou nou pa woukoumansé. Si sé konsa nou ka aji, nou ké pé kontinyé kouri kous-la nou ka kouri la pou nou pé sa ni lavi étèwnèl.Si ou té pran on mové désizyon é kè pa ni mwayen ou wouvin asi-y, fò ou aksèpté sitiyasyon a-w kon i yé. Alò pa pèd tan a-w ka chèché èskiz é pa pran tèt a-w parapòt a sa ki pasé. Pa chèché a montré kè sé dòt moun ki fè si sa rivé-w, pas si ou fè sa sé tan a-w ou ké pèd é ou ké fatigé-w initilman. Okontrè, admèt kè ou fè érè, aksèpté sitiyasyon-la ou adan-y la é éséyé gadé ki bon biten ou pé fè konnyéla la. Si konsyans a-w ka bat-vou parapòt a on érè ou fè, priyé Jéova èvè onlo imilité pou di-y ka ou fè é mandé-y padon (Sòm 25:11 ; 51:3, 4). Si akòz dè érè-la ou fè la ou fè moun ditò, mandé-yo padon é si sa nésésè, mandé sé ansyen-la édé-w (Jak 5:14, 15). Éséyé vwè ka érè-la ou fè la ka aprann-vou é fè éfò pou-w pa viré fè menm fòt-la. Si ou suiv sé konsèy-lasa, ou pé sèten kè Jéova ké padonné-w é kè i ké soutyenn-vou (Sòm 103:8-13). w23.08 28-29 § 8-9.

Lèwvwè Joas koumansé gouvèné, Joad té ka édé-y maché dwèt. Sé pousa, tout tan-la Joad té la pou ba Joas konsèy, Joas té ka chèché a fè Jéova plézi. Men lèwvwè Joad mò, i mété-y ka kouté sé prens-la, alòskè sé moun-lasa sé té dé apòsta (2 Kron. 24:4, 17, 18). Sa fè Jéova lapenn, men magrésa i « té ka voyé pwofèt anmitan a yo pou fè-yo wouvin owa a-y […] men yo pa té vé kouté ». Pa menm Zakari, gason a Joad, yo pa kouté. É poutan sé té pwofèt a Jéova é i té prèt, anplisdisa sé té kouzen a Joas. Magré tousa, Joas fè-yo tchouyé Zakari ! (2 Kron. 22:11 ; 24:19-22). Joas pa té ka krenn Jéova. Jéova té ja avèti-y. I té di-y konsa : « Moun ki ka méprizé-mwen, an ké fè-yo wont » (1 Sam. 2:30). Sé Siriyen-la té ni on toupiti lawmé men yo ba lawmé a Joas on plich alòskè lawmé a-y « té ni onpakèt sòlda adan ». Yo jous blésé Joas « oséryé menm » (2 Kron. 24:23-25). Pwòp sèwvitè a Joas tchouyé-y pas i té tchouyé Zakari. w23.06 18-19 § 16-17.

Lapòt Pòl té pasé bon enpé tan Éfèz pou i té préché é anségné bon nouvèl-la (Akt 19:1, 8-10 ; 20:20, 21). I té enmé frè é sè a-y onlo é i té vlé ankourajé-yo rété fidèl a Jéova. Onlè, sé krétyen Éfèz la té èsklav a fo-adorasyon la é yo té ka kwè adan lamaji. Toutmoun té sav kè sé Éfézyen-la té ka viv adan on gran manjé-kochon. Té ni vyé pawòl ki adan sé pyès-téat-la, ki adan fèt ki lyanné èvè rèlijyon a yo (Éféz. 5:3). Onlo adan sé Éfézyen-la pa té « konnèt ka ki byen é ka ki mal ankò », kivédi yo « pa té ka pran penn a ayen ankò » (Éféz. 4:17-19). Avan yo té aprann konnèt vréman sa ki byen oben sa ki mal, konsyans a sé Éfézyen-la pa té ka bat-yo é yo té ka kwè kè yo pa té ni pon kont a rann Bondyé. Sé pousa Pòl té pé di kè « lèspri a yo an nwèsè é yo lwen vi-la ki ka vin dè Bondyé ». Men sèwten adan sé Éfézyen-la pa rété an nwèsè. w24.03 20 § 2, 4 ; 21 § 5-6.

Fò Jédéon té travay rèd toubònman pou akonpli misyon-la i té ni la antankè jij. Lèwvwè Jédéon té ka goumé èvè sé Madyanit-la pannan lannuit, sé Madyanit-la chapé kò a yo. Men Jédéon kouri dèyè do a yo dépi ravin a Jézréèl pou rivé jous an Jouden-la (Jij 7:22). Ès Jédéon arété douvan Jouden-la ? Non ! Menmsi yo té las, li é sé 300 nonm-la ki té èvè-y la travèsé é yo kontinyé kouri dèyè yo. Finalman, yo ratrapé sé Madyanit-la é yo gangné-yo (Jij 8:4-12). Jédéon té sèten kè Jéova té’é ba-y fòs é Jéova pa désèvwa-y (Jij 6:14, 34). On jou, Jédéon é lawmé a-y té ka kouri apyé dèyè 2 wa Madyanit alòskè sé wa-lasa dwèt té asi do a chamo (Jij 8:12, 21). Men Bondyé édé sé Israélit-la trapé-yo é gangné konba-la. Menmjan-la, sé ansyen-la pé konté asi Jéova ki « pa’a jen las, é ki pa jen about-souf ». I ké ba-yo fòs lèwvwè yo ké bizwen (Iz. 40:28, 29). w23.06 6 § 14, 16.

Nou pé fè ansòt pou nou ni on tchè ki solid kèlkèswa sé éprèv-la nou ka jwenn la. Alò, fè Jéova konfyans. Barak gangné on konba pas i té ni konfyans adan dirèksyon-la Jéova té ba-y la. A épòk-lasa, pa té ni pa menm onsèl boukliyé oben onsèl lans an Israèl. Magrésa, Jéova mandé-y ay goumé èvè on lawmé ki té ni zàm kon zàm fèt. Sé té lawmé a sé Kananéyen-la é sé Siséra ki té chèf a yo (Jij 5:8). Débora, on madanm ki té pwofèt, di Barak désann adan on savann pou ay goumé èvè Siséra é sé 900 cha-la i té ni la. Konm téren-la té plat adan savann-la, sé moun-la ki té adan sé cha-la té’é alèz a yo é sé Israélit-la té’é ni dimal a goumé èvè yo. Barak té sav sa byen men i obéyi kanmenm. Sé Israélit-la té asi Mòn Tabò la. Lèwvwè yo mèt-yo ka désann, Jéova fè on kalté gwo lapli tonbé. Tout cha a Siséra touvé-yo pri adan labou-la é Jéova ba Barak laviktwa (Jij 4:1-7, 10, 13-16). Nou osi, Jéova ké ban-nou laviktwa si nou ka fè-y konfyans é siwvwè nou ni konfyans adan dirèksyon-la òwganizasyon a-y ka ban-nou la. w23.07 19 § 17-18.

Nou bizwen ni pasyans pou nou pé sa ni lavi pou touttan. Menmjan ki sèwvitè fidèl a Bondyé an tan lontan, fò-nou atann èvè pasyans kè Jéova réyalizé pwomès a-y (Ébr. 6:11, 12). Bib-la ka di kè nou adan menm sitiyasyon ki on kiltivatè (Jak 5:7, 8). On kiltivatè ka travay rèd. I ka planté, i ka wouzé, men i pa sav ègzaktèman kitan sé plant-la ké pousé. Alò i ka pran pasyans, i ka atann, men i sèten on jou i ké rékòlté. Menmjan-la, nou ka pòté bon mannèv pou nou suiv Lèkris, menmsi nou ‘pa sav ki jou Ségnè an nou ka vin’ (Mat. 24:42). Nou ka atann èvè pasyans pas nou sèten kè lè lè-la ké rivé, Jéova ké fè tout pwomès a-y réyalizé. Si nou ka koumansé di kè ja ni two lontan nou ka atann, sa pé rivé a lasi-nou é nou pé jous kité Jéova piti-a-piti. Pétèt nou anvi tchè an nou kontan alèla, alò nou ka kouri dèyè tout biten ki pé fè-nou santi-nou konsa. Men si nou ni pasyans, nou ké andiré jiskatan lafen rivé, é nou ké sové (Mich. 7:7). w23.08 22 § 7.

Lèwvwè nou ka konparé pwofési-lasa èvè dòt pwofési ki adan liv a Danyèl é adan liv a Révélasyon, nou ka rivé konprann kè pyé a èstati-lasa ka rèprézanté alyans-la Langlètè é Lamérik ka fòwmé la. Sé-y ki sé pi gran puisans mondyal ki ka gouvèné a épòk an nou. Danyèl anonsé kè ‘on pawti a wayòm-lasa té’é fò é kè lòt pawti-la té’é fèb’. Poukwa on pawti a-y té’é fèb ? Pas popilasyon-la, kivédi awjil-la, ka anpéché-y aji èvè menm fòs ki on mòso fè ki byen rèd. Lèwvwè nou ka ègzaminé sa Danyèl di asi èstati-la, nou ka aprann onlo biten enpòwtan. Puisans mondyal la Langlètè é Lamérik ka fòwmé la ni lokazyon montré a plizyè rèpriz kè i fò toubònman. Pa ègzanp, puisans-lasa té pawmi sé nasyon-la ki gangné sé 2 gè mondyal la, é i jouwé on wòl enpòwtan adan sa. Men i pèd fòs é i ké kontinyé pèd fòs pas ki an Anglètè, ki an Amérik, sé moun-la ka goumé yonn èvè lòt é yo ka lévé kont gouvènman-la. Dézyèmman, puisans-la Langlètè é Lamérik ka fòwmé la ké dènyé puisans mondyal ki ké ka gouvèné lèwvwè wayòm a Bondyé ké vin. A moman-lasa, Wayòm-la ké détwi tout sé gouvènman-la ki asi latè la. w23.08 10-11 § 12-13.

David té ka jwenn onlo éprèv é onlo pwoblèm. Kifè, délè, i té angwasé bon angwasé la (Sòm 18:4-6). Men konm Jéova té ni on lanmou ki plen tandrès pou-y é konm i té ka pran swen a David, sa té ka wouba David bon fòs. Lèwvwè David té byen las, Jéova té ka menné-y « adan savann ki plen zèb » é « dé koté ni plen dlo pou pozé kò [a-y] ». Sé konsa, David té ka woupran fòs é i té ka kontinyé sèvi Bondyé a-y èvè tchè-kontan (Sòm 18:28-32 ; 23:2). Jòdijou osi, lèwvwè nou ka pran bon gaz adan vi an nou ‘sé pas Jéova ni on lanmou ki fidèl pou nou kè nou pa ka disparèt’ (Lam. 3:22 ; Kol. 1:11). Souvantfwa, vi a David té andanjé é i té ni lènmi ki té ni onlo pouvwa. Men konm Jéova té enmé-y, i té ka santi-y ansékirité é i té sav kè Jéova té ka pwotéjé-y. I té ka vwè on mannyè ki klè kè Jéova té èvè-y adan tout sitiyasyon i té ka jwenn é sa té ka rasiré-y. Sé pousa, mi sa i chanté : « [Jéova] woté-mwen anba tousa ki té ka fè-mwen pè » (Sòm 34:4). Sé vré, délè David té pè toubònman men konm i té sav kè Jéova té enmé-y, i pa té ka lésé sa ki té ka fè-y pè pran lanmen asi-y. w24.01 30 § 15-17.

Joas pran mové désizyon. Ka sa ka aprann-vou ? Lèwvwè Joad, gran prèt la mò, sé zanmi-la Joas chwazi la fè-y fè dé mové biten (2 Kron. 24:17, 18). I désidé kouté sé prens a Jida la ki pa té enmé Jéova. Sèten ou ké dakò pou di kè konm sé moun-lasa té ka fè dé mové biten i pa té dwèt mélanjé-y èvè yo. Men olyé dè sa, i lésé sé zanmi-lasa détenn asi-y. É lèwvwè Zakari, kouzen a-y, éséyé fè-y rézonné, i fè-yo tchouyé-y (2 Kron. 24:20, 21 ; Mat. 23:35). Mésyé ! Mi on mové désizyon mi ! Vi a Joas té byen koumansé, men malérèzman i vin apòsta é i tchouyé moun. Anfinaldikont, sé moun ki té ka travay pou-y ki tchouyé-y (2 Kron. 24:22-25). Siwvwè Joas té kouté Jéova é si i té kouté moun ki té ka sèvi Jéova, tousa pa té’é rivé-y ! w23.09 9 § 6.

Jézi té sav kè Pyè té pé rété fidèl a-y. Alò sé pousa i di-y èvè onlo jantiyès : « ou pa bizwen pè ankò. » Jézi fè Pyè konfyans é sa chanjé vi a-y. Pyè é André té maren-péchè men aprésa yo lagé travay-la yo té ka fè la pou suiv Mési-la é yo pa jen arété suiv-li. É konm sé sa yo désidé fè, Bondyé vidé onpakèt bénédisyon asi yo (Mawk 1:16-18). Konm i té ka maché èvè Jézi, Pyè viv dé biten ki té èstraòwdinè toubònman. I vwè Jézi géri moun ki té malad, i vwè-y woté démon asi moun é i jous vwè-y résisité moun ki té mò (Mat. 8:14-17 ; Mawk 5:37, 41, 42). Anplisdisa, adan on vizyon, i vwè glwa-la Jézi té’é ni la adan Wayòm-la é sa touché-y onlo (Mawk 9:1-8 ; 2 Pyè 1:16-18). Si i pa té vin disip a Jézi, i pa té’é jen vwè sé biten-lasa. A pa ti kontan i dwèt té kontan davwa i pa lagé menmsi i té ka pansé kè i pa té on bon moun ! Grasa sa, i risivwè onpakèt bénédisyon. w23.09 21 § 4-5.

Adan 1^é lèt-la lapòt Pyè maké la, i di kè fò-nou ni « on lanmou ki fò toubònman ». On lanmou konsa, a pa déotwa péché i ka kouvè tousèl, men i « ka kouvè onpakèt péché » (1 Pyè 4:8). Kèlkè lanné avan, Jézi té di Pyè kijan sa enpòwtan kè yonn padonné lòt é pétèt Pyè té ka sonjé sa. Pyè té di Jézi kè on moun pé padonné ondòt moun « jiska 7 fwa », é pou-y, i té donan lèwvwè i té ka di sa. Men Jézi té èspliké-y kè fò i té padonné frè a-y « jiska 77 fwa », kivédi a pa on biten moun dwètèt konté (Mat. 18:21). Si ou ka touvé kè pou apliké konsèy-lasa, sa on ti jan rèd, pa dékourajé-w. Délè, noutout ni dimal a padonné. Men aprézan, sa ki ka konté, sé kè ou fè tousa ou pé pou-w padonné frè a-w é pou-w wouvin byen èvè-y. w23.09 29 § 12.

Lèwvwè Jonas té adan vant a pwason-la, i rèpanti-y é i té sèten kè Jéova té’é kouté priyè a-y é kè Jéova té’é sové-y. É konmdi-konmfèt, Jéova sové-y é kèlkè tan apré, i té paré pou fè travay-la i té ba-y fè la (Jonas 2:10 – 3:4). Délè, lèwvwè ou anba on éprèv, tèlman ou ka santi-w angwasé, ou pa menm ni fòs pou priyé oben pou étidyé. Ès sé ka a-w ? Si sé sa, sonjé kè pa ni ponmoun ki ka konprann sitiyasyon a-w pibyen ki Jéova. Alò, menmsi ou ka fè on ti priyè tousenp, ou pé sèten kè i ké ba-w ègzaktèman sa ou bizwen (Éféz. 3:20). Si ou ni dimal a li Labib oben a étidyé-y pas ou malad, pas ou fatigé oben pas ou ka santi-w angwasé, ou pé kouté on anrèjistrèman a Bib-la oben ta ondòt piblikasyon. Ou pé kouté on chanson, on kantik oben ou pé gadé vidéo ki asi jw.org. Sa osi, sa pé ba-w bon fòs. Jéova vé ba-w fòs é i ké fè sa siwvwè ou ka priyé-y é siwvwè ou ka gadé pou vwè kijan i ka réponn-vou adan Labib é adan tousa i ka mèt anba men a-w. w23.10 13 § 6 ; 14 § 9.

Tabèwnak-la é tout sé tanp-la yo fè Jérizalèm apré té fèt menmjan-la andidan. Té ni enki 2 pyès : « Koté-la ki Sen la » é « Koté-la ki Pli Sen la ». On rido té ka séparé-yo (Ébr. 9:2-5 ; Ègz. 26:31-33). Andidan a Koté-la ki Sen la té ni on chandèlyé an lò, on lotèl pou yo brilé lansan anlè-y é on tab pou sé pen-la yo té ka mèt douvan Jéova la. Sé sé prèt-la yo té chwazi la tousèl ki té ni dwa rantré Koté-la ki Sen la pou fè travay sakré la yo té ni a fè la (Nonb 3:3, 7, 10). Adan Koté-la ki Pli Sen la té ni awch a alyans la ki té fèt annò é ki té ka rèprézanté koté-la Jéova té yé la (Ègz. 25:21, 22). Té ni on rido ki té ka séparé Koté-la ki Sen la èvè Koté-la ki Pli Sen la, é sé enki gran prèt-la ki té ni dwa pasé pa rido-lasa. I té pé fè sa 1 fwa an lanné-la, jou a Rékonsilyasyon-la (Lév. 16:2, 17). I té ka rantré èvè san a zannimo pou Bondyé té padonné péché a-y é pou Bondyé té padonné péché a tout nasyon-la. Plita, Jéova èspliké ka sé 2 pyès-lasa té ka rèprézanté (Ébr. 9:6-7). w23.10 27 § 12.

Jéova ka di-nou kè « fò yonn enmé lòt » é i ka di-nou sa a plizyè rèpriz (Jan 15:12, 17 ; Wom. 13:8 ; 1 Tés. 4:9; 1 Pyè 1:22 ; 1 Jan 4:11). Men lanmou sé on kalité ki andidan tchè an nou é ponmoun pé pa vwè sa ki ka pasé adan tchè an nou. Alò kijan nou pé montré frè é sè an nou kè nou enmé-yo ? Nou pé montré-yo sa adan sa nou ka di é adan sa nou ka fè. Nou pé montré frè é sè an nou kè nou enmé-yo plizyè fason diféran. Mi déotwa ègzanp Labib ka ban-nou : « fò yonn di lòt lavérité » (Zak. 8:16), « fò yonn anpé èvè lòt » (Mawk 9:50), « fò zò toujou prèmyé douvan lè sé pou yonn onoré lòt » (Wom. 12:10), « fò yonn akéyi lòt byen » (Wom. 15:7), « fò yonn kontinyé padonné lòt volontyé » (Kol. 3:13), « fò yonn kontinyé édé lòt pòté sa ki two lou ba-y » (Gal. 6:2), « fò yonn kontinyé konsolé lòt » (1 Tés. 4:18), « fò yonn kontinyé fòwtifyé lòt » (1 Tés. 5:11), é « fò yonn priyé pou lòt » (Jak 5:16). w23.11 9 § 7-8.

Chakjou nou ni désizyon a pran. Sé pé pou chwazi kimoun nou ké frékanté, kijan nou ké anmizé-nou oben ki étid nou ké fè. Sé pé osi anrapò èvè mayé an nou, timoun an nou é travay an nou. Pou nou pran bon désizyon, fò-nou ni on fwa ki solid. Sé pousa fò-nou pozé-nou sé kèsyon-lasa : « Èskè sé chwa-la an ka fè la ka montré kè an sèten kè mond-lasa ké disparèt é kè toutalè Bondyé ké mèt on nouvo mond an plas a-y ? Oben ès an ka chwazi fè menm biten ki moun ki ka pansé kè apré lanmò sé tibèt ? » (Mat. 6:19, 20 ; Lik 12:16-21). Nou ké pran méyè désizyon ki tini si nou ka kontinyé fè éfò pou nou sèten a san pou san kè nouvo mond-la toupré. Fò-nou ni on fwa ki solid osi lèwvwè nou ka jwenn éprèv. Pèwsékisyon, on maladi ki pa’a géri oben dòt sitiyasyon ki rèd a sipòté pé rivé a dékourajé-nou. Lè nou ka jwenn on éprèv konsa, pétèt kè odépa nou ka santi kè nou ké pé kenbé. Men konm an jénéral, sé éprèv-lasa ka diré lontan, nou bizwen ni on fwa ki solid pou nou pé sa andiré é pou nou pé sa kontinyé sèvi Jéova èvè on tchè ki kontan (1 Pyè 1:6, 7). w23.04 27 § 4-5.

Jéova vé kè nou aji annakò èvè priyè an nou. An-nou pran on ègzanp : On frè ka mandé Jéova édé-y pou i pé sa ni déotwa jou konjé pou i ay lasanblé réjyonal. Kijan Jéova pé réponn a priyè a-y ? I pé ba frè-la kouraj-la i bizwen la pou i pé sa palé ba patron a-y. Men fò frè-la fè on biten osi, fò i mandé patron-la bay déotwa jou konjé é pétèt a pa onsèl fwa i ké ni a mandé-y sa. Pétèt i ké pwopozé patron a-y travay ondòt jou, oben ranplasé on kolèg-travay, oben di patron a-y palapenn péyé-y sé jou konjé lasa. Jéova vé kè nou kontinyé priyè pou sa ki ka trakasé-nou. Lè nou ka ègzaminé sa Jézi di, nou ka konprann kè a pa toutlè nou ké mandé Bondyé on biten kè nou ké ni-y tousuit (Lik 11:9). Men pa lagé ! Priyé toutlè é fè sa èvè tout tchè a-w (Lik 18:1-7). Lèwvwè nou ka fè sa, nou ka montré Jéova kè biten-lasa vréman enpòwtan pou nou. Sa ka montré osi kè nou ni fwa adan lèfètkè i kapab édé-nou. w23.11 22 § 10-11.

Jéova pwomèt Abraam, zanmi a-y, kè tout sé nasyon-la asi latè ké risivwè on bénédisyon grasa gason a-y (Jén. 15:5 ; 22:18). Abraam té sèten a san pou san kè pwomès-lasa té’é réyalizé pas i té ni onlo fwa. Lè i té ni 100 an é kè madanm a-y té ni 90 an, yo po’o té ni on tigason (Jén. 21:1-7). Poutan, mi sa Labib ka di : « Èspérans a [Abraam] pèwmèt-li ni fwa kè i té’é vin papa a onlo nasyon, kon sa té anonsé » (Wom. 4:18). É kon nou sav, sa Abraam té ka èspéré la réyalizé. I fin pa ni tigason-la i té ka atann la : Izaak. Poukwa Abraam té sèten Bondyé té’é tchenn pwomès a-y ? Konm i té konnèt Jéova byen menm, i té « sèten a san pou san kè sa Bondyé té pwomèt » té’é réyalizé (Wom. 4:21). Bondyé té kontan-y é i konsidéré kè i té jis grasa fwa a-y (Jak 2:23). w23.12 8 § 1-2.

On jennfrè yo pé fè konfyans ka fè tousa yo ka ba-y fè é i ka fè sa byen konm i fo. Pran on ti tan pou réfléchi asi ègzanp a Jézi, ki té pawfè. I té séryé adan tousa i té ka fè. I fè tousa Jéova mandé-y fè, menmsi sé biten-la i té ni a fè la té rèd toubònman. I bay vi a-y pas i té enmé disip a-y é pas i té enmé lézimen (Jan 13:1). Pou imité Jézi, fè éfò pou fè tousa yo ka ba-w fè. Si ou pa sav kijan pou fè on biten vréman, montré ou ni imilité é mandé on frè ki byen doubout adan lavérité édé-w. Pa kontanté-w dè fè sa ki nésésè tousèl men chèché a fè plis, é lèwvwè yo ka ba-w fè on travay, ay jous an bout a-y (Wom. 12:11). Toujou fè ‘konsi sé pou Jéova ou ka travay, pa fè-y konsi sé pou lézòm ou ka fè-y’ (Kol. 3:23). É konm ponmoun pa pawfè, aji èvè imilité é rèkonnèt sé érè-la ou ka fè la (Pwov. 11:2). w23.12 26 § 8.

Lèwvwè on moun ka pran lèbatèm i ka rantré adan fanmi a Jéova é a pa ti kontan moun-lasa ka kontan. Aprézan i ni on bèl lonnè toubònman : i bon bon zanmi èvè Jéova. É sèten i dakò èvè sa David maké adan on Sòm : « Tchè-kontan pou moun-la ou ka chwazi la é kè ou ka fè vin owa a-w pou i pé sa rété an lakou a-w ! » (Sòm 65:4). A pa nenpòt kimoun Jéova ka aksèpté adan lakou a-y. I ka chwazi moun ki ka montré kè yo anvi vin bon zanmi èvè-y (Jak 4:8). Lè ou ka ba Jéova vi a-w é kè ou ka pran lèbatèm, ou pé sèten kè aprésa, i ké ‘dévidé on bénédisyon asi-w joustan pa manké-w ayen’ (Mal. 3:10 ; Jér. 17:8). Lè ou ka pran lèbatèm sé koumansé ou ka koumansé sèvi Jéova. Fò ou fè tousa ou pé pou viv annakò èvè pwomès-la ou fè la, menm lè ou ka touvé-w douvan on tantasyon oben on éprèv (Ékl. 5:4, 5). Davwa ou sé on disip a Jézi, fò ou suiv ègzanp a-y é fò ou fè tousa ou pé pou suiv komandman a-y osi (Mat. 28:19, 20 ; 1 Pyè 2:21). w24.03 8 § 1-3.

Vinvwè vou é moun-la ou mayé èvè-y la pa enmé pasé tan ansanm, ka zò pé fè ? Pétèt kè yonn pa enmé menm biten ki lòt oben kè lèwvwè yonn èvè lòt, zò ka fè kòlè vit. Adan ka-lasa, ka zò pé fè ? An-nou woupalé dè ègzanp a difé-la nou palé an koumansman a awtik-la. Lèwvwè nou sòti limé difé-la, i po’o ka voyé gwo flanm. Pou nou ba-y plis fòs, fò-nou mèt bwa adan-y piti-a-piti, é chaklè, fò-nou chwazi dé mòso bwa ki pi gwo ki séla nou té ja mèt la. Menmjan-la, pétèt ou té’é pé pasé déotwa ti moman sèlman èvè moun-la ou mayé èvè-y la é pétèt ou té’é pé fè sa chakjou. A moman-lasa, zò pé éséyé fè on biten kè zò toulédé enmé (Jak 3:18). Konsa, piti-a-piti, yonn ké vin enmé lòt pi fò. Pou on mayé touné won fò yonn ni rèspé pou lòt. Nou pé konparé rèspé-la èvè òksijèn-la ki an lèw-la. Siwvwè on difé pa ni òksijèn, i ka étenn adan on ti moman. Menmjan-la osi, menmsi 2 moun-mayé enmé-yo, siwvwè pa ni rèspé, lanmou-lasa ké fébli adan on batzyé. Pawkont, pi yonn ni rèspé pou lòt adan mayé-la, pi yonn ké enmé lòt. Men on biten pou ou mèt fon an tèt a-w, sé kè sa ki pi enpòwtan, a pa kè vou ou di kè ou ka rèspèkté moun-la ou mayé èvè-y la men sé kè moun-la ou mayé èvè-y la santi kè ou ka rèspèkté-y. w23.05 22 § 9 ; 24 § 14-15.

Sèwten sèwvitè a Jéova ki té fidèl é ki viv antan a Labib touvé-yo adan dé sitiyasyon ki té ka fè-yo pè toubònman é ki té ka angwasé-yo bon angwasé la. Sé té akòz dè lènmi a yo oben akòz dè dòt pwoblèm ankò (Sòm 18:4 ; 55:1, 5). Jòdila, nou pé jwenn pwoblèm akòz dè moun ki kont nou adan lékòl an nou oben adan travay an nou. Sé pé osi présyon fanmi an nou oben sé otorité-la ka mèt asi nou. Oben nou ni on maladi é pétèt nou pè mò. Adan tout sé sitiyasyon-lasa nou pé ni lenprésyon kè nou kon on tibébé ki bizwen yo édé-y. Kijan Jéova ka édé-nou adan dé sitiyasyon konsa ? I ka konsolé-nou é i ka trankilizé-nou. Alò fè ansòt pou pasé tibwen tan èvè Jéova. Pousa pran on tan pou priyé-y é pou li Pawòl a-y (Sòm 77:1, 12-14). Konsa, lèwvwè ou ké anba présyon, prèmyé biten ou ké fè sé kriyé Pap’a-w ki an syèl-la pou i édé-w. Di-y ka ki ka fè-w pè é ka ki ka enkyété-w pou i édé-w. Aprésa, lésé Jéova palé ba-w pou i konsolé-w grasa Pawòl a-y (Sòm 119:28). w24.01 24-25 § 14-16.

Si nou anvi atenn sé òbjèktif-la nou chwazi la pou vin pi bon zanmi èvè Jéova, fò-nou ni bon balan pou atenn-yo. On moun ki vréman anvi fè on biten, présé pou atenn òbjèktif a-y. Si nou vréman anvi atenn on òbjèktif, nou pi fasil a atenn-li. Alò, lè ou ni on òbjèktif, ka ou pé fè pou ou anvi atenn òbjèktif-lasa plis ankò ? Mandé Jéova ba-w plis ‘balan’. Grasa lèspri sen a-y, Jéova pé ba-w balan pou atenn òbjèktif a-w. Délè, nou ka chwazi on òbjèktif pas nou sav kè sé sa pou nou fè, é sé on bon biten. Men sa pa vé di kè nou vréman anvi atenn òbjèktif-lasa. Pran tan réfléchi asi sa Jéova ja fè ba-w (Sòm 143:5). Jéova té ba lapòt Pòl favè-la i pa té mérité la é lè i té ka pran tan réfléchi asi sa, sa té ka ba-y balan pou travay rèd pou Jéova (1 Kor. 15:9, 10 ; 1 Tim. 1:12-14). Menmjan-la, pi ou ké pran tan réfléchi asi sa Jéova ja fè ba-w, pi ou ké anvi atenn òbjèktif a-w (Sòm 116:12). w23.05 27 § 3-5.

Lèwvwè nou ka ba non a Pap’an nou ki an syèl-la louwanj, nou ka fè-y plézi (Sòm 119:108). An jénéral, on moun bizwen yo félisité-y pas sa ka rasiré-y. Men ès sa ka maché konsa pou Jéova osi ? Non. Lèwvwè nou ka ba Pap’an nou ki an syèl-la louwanj, nou ka réponn Satan davwa i manti asi nou. Satan di konsa kè ponmoun asi latè pé’é défann non a Bondyé. Dapré-y, ponyonn adan nou pa fidèl a san pou san. I ka di kè noutout ké arété sèvi Bondyé si nou pa ni pon entéré adan sa (Jòb 1:9-11 ; 2:4). Men Jòb rété fidèl é i montré kè Satan sé té on mantè. É vou ? Ès ou ké rété fidèl a Jéova ? Nouchak pé défann non a Jéova é mèt jwa an tchè a-y lè nou ka sèvi-y é lè nou ka rété fidèl a-y (Pwov. 27:11). Sé vréman on bèl lonnè toubònman. w24.02 8-9 § 3-5.

Plizyè lanné apré épòk a Moyiz é Joziyé, Jéova sèvi èvè jij pou gidé pèp a-y. Aprésa, lèwvwè té ni wa pou gouvèné Israèl, Jéova sèvi èvè pwofèt pou gidé pèp a-y é sé pwofèt-lasa té ka ba sé wa-la konsèy. Sèwten wa kouté konsèy a sé pwofèt-la. Pa ègzanp, lè pwofèt Natan vin pou korijé wa David, i aksèpté sa èvè onlo imilité (2 Sam. 12:7, 13 ; 1 Kron. 17:3, 4). Wa Jozafa suiv sa pwofèt Jaazyèl té di-y é i ankourajé pèp a Jida ni fwa adan pwofèt a Bondyé (2 Kron. 20:14, 15, 20). Lèwvwè biten-la té rèd, wa Ézékyas chèché konsèy owa pwofèt Izayi (Iz. 37:1-6). Chakfwa on wa té ka chèché dirèksyon a Jéova, Jéova té ka béni-y é pèp-la té ka touvé-y ansékirité (2 Kron. 20:29, 30 ; 32:22). Jéova té ka sèvi èvè pwofèt a-y pou gidé pèp a-y é toutmoun té pé konprann sa. w24.02 21 § 8.

Satan vlé kè nou frékanté moun ki pa ka ankourajé-nou rèspèkté prensip a Jéova. Fò nou sonjé kè moun nou ka frékanté, a pa sèlman moun ki ka pasé tan èvè nou, men sé moun ki ka palé èvè nou asi sé rézo sosyo la osi. Fò nou goumé èvè létadèspri a mond-lasa ki vlé fè-nou aksèpté tout kalté péché sèksyèl. Nou konnèt lavérité asi sa (Éféz. 4:19, 20). Alò an-nou mandé-nou : « Ès an ka pran bon prékosyon pou an pa frékanté kolèg-travay, kanmarad-lékòl oben dòt moun ki pa’a rèspèkté prensip a Jéova ki jis si sa pa nésésè ? Ès an ka soutyenn prensip a Jéova èvè onlo kouraj menmsi moun ka di-mwen kè an two karé ? » Kon 2 Timoté 2:20-22 ka di, fò nou fè atansyon a zanmi nou ka chwazi adan lasanblé-la osi. An-nou sonjé kè pé ni désèwten ki pé ké ankourajé-nou rété fidèl a Jéova é kontinyé sèvi-y. w24.03 22-23 § 11-12.

Ès ou ja éséyé imajiné ka Jéova ka sanm ? Sé vré, nou pé pa vwè Jéova, men Labib ka sèvi èvè onpakèt èksprésyon pou palé dè-y. Labib ka di kè Jéova sé « on solèy é on boukliyé » é « on difé ki ka détwi » (Sòm 84:11 ; Ébr. 12:29). Ézékyèl vwè Jéova adan on vizyon é i di kè i ka kléré kon on biten ki an lò blan, kè i sizé asi on twòn ki fèt èvè on wòch yo ka kriyé saphir an fransé é kè i lantouré èvè on lawkansyèl ki ka kléré (Ézék. 1:26-28). Konm nou pé pa vwè Jéova, pétèt nou pé ni dimal a kwè kè i enmé-nou. Pétèt nou viv dé biten ki té rèd an vi an nou, alò nou pa’a vwè kijan Jéova pé enmé-nou. Jéova ka konprann sa nou ka rèsanti é i sav kijan sa ka aji asi nou. Pou édé-nou, i ka di-nou adan Pawòl a-y kijan dè moun i yé. Lanmou. Mo-lasa sé pi bèl mo ki tini pou palé dè Jéova. Labib ka di : « Bondyé sé lanmou » (1 Jan 4:8). Tousa Jéova ka fè, i ka fè-y èvè lanmou. Tèlman Jéova enmé lézòt é tèlman lanmou a-y fò, i jous ka aji èvè lanmou épi moun ki pa enmé-y (Mat. 5:44, 45). w24.01 26 § 1-3.

Pou Jéova té fè Israèl sòti an Éjipt i sèvi èvè Moyiz. É pou i té fè pèp-la vwè an 2 zyé a-y, lajouné yo té ka vwè douvan yo on niyaj ki té ka sanm on kolòn é lannuit niyaj-lasa té ka vin on difé (Ègz. 13:21). Grasa kolòn-lasa Moyiz té ka gidé pèp-la é kolòn-lasa fè-yo rivé jous douvan lanmè Wouj la. Lèwvwè sé Israélit-la rann-yo kont kè douvan yo, té ni lanmè Wouj la, é kè lawmé a sé Éjipsyen-la té ka kouri dèyè do a yo, yo pèd lakat é yo konpranndèdi yo té pri adan on zatrap. Men a pa té sa ditou-ditou. Okontrè, sé Jéova ki té fè Moyiz menné pèp-la koté-lasa (Ègz. 14:2). Aprésa, Jéova fè on mirak pou sové pèp a-y é yomenm pa té ka atann-yo a sa (Ègz. 14:26-28). Pannan sé 40 lanné-la ki vin apré la, Moyiz toujou té ka fè fon asi kolòn-la pou i té pé sa gidé pèp a Bondyé an dézè-la (Ègz. 33:7, 9, 10). Moyiz té ka tann vwa a Jéova ki té ka sòti adan kolòn-la é aprésa Moyiz té ka di pèp-la sa Jéova té di-y. Kifè, sé Israélit-la té pé vwè an 2 zyé a yo kè Jéova té ka sèvi èvè Moyiz pou gidé-yo. w24.02 21 § 4-5.