Men a Jéova pa jen two kout

1. Kijan Moyiz montré i té ka fè Jéova konfyans lè i fè sé Israélit-la sòti an Éjipt ?

LIV A Ébré ka palé dè onlo moun ki té ni fwa an Jéova. Yonn adan yo sé Moyiz. Moyiz té ni on fwa ki té èstraòwdinè toubònman (Ébr. 3:2-5 ; 11:23-25). I montré i té ni fwa lè i fè sé Israélit-la sòti an Éjipt. I pa lésé lapè pran lanmen asi-y lèwvwè i té douvan Faraon é lawmé a-y. I fè Jéova konfyans a san pou san, i fè pèp-la travèsé lanmè Wouj la é plita i menné-yo adan dézè-la (Ébr. 11:27-29). Lamajorité a sé Israélit-la té ka mandé-yo si Jéova té kapab pran swen a yo, men Moyiz kontinyé fè Bondyé a-y konfyans. É i té ni rézon a-y pas Jéova ba sé Israélit-la bwè é manjé, alòskè dézè-la sé on koté ayen pa’a pouséa (Ègz. 15:22-25 ; Sòm 78:23-25).

2. Poukwa Bondyé di Moyiz : « Ès men a Jéova two kout ? » (Nonb 11:21-23).

² Magré Moyiz té ni on fwa ki té solid, on lanné apré Jéova fè sé Israélit-la sòti an Éjipt, Moyiz koumansé mandé-y ès Jéova té’é ba pèp-la vyann kon i té di. Té ni milyon é milyon moun adan pèp-la, ki sé nonm ki sé madanm ki sé timoun, é a pa adan dézè-la ou té’é touvé granzafè a manjé. Kijan Jéova té’é ba tousa moun vyann pou yo manjé ? Alò mi sa Jéova di Moyiz : « Ès men a Jéova two kout ? » (li Nonb 11:21-23). Adan Labib, lè yo ka sèvi èvè èsprésyon-la « men a Jéova » sé pou palé dè lèspri sen a-y, kivédi fòs la i ka sèvi èvè-y la pou fè sa i anvi. Kifè sé konsi Jéova té ka di Moyiz : « Siwvwè an ka di an ké fè on biten sé kè an pé fè-y. »

3. Poukwa sa entérésan kè nou gadé sa Jéova di Moyiz ?

³ Ès ou ja mandé-w si Jéova ké ba ki vou ki fanmi a-w sa zò bizwen pou viv ? An-nou gadé sa ki pasé lèwvwè Moyiz é sé Israélit-la mèt-yo ka douté kè Jéova té kapab ba-yo sa yo té bizwen. É nou ké vwè déotwa vèwsé ki ké édé-nou pou nou sèten kè men a Jéova pa jen two kout.

SA ÈGZANP A MOYIZ É TA SÉ ISRAÉLIT-LA KA APRANN-NOU

4. Poukwa onlo Israélit koumansé douté kè Jéova té’é pran swen a yo ?

⁴ Poukwa onlo Israélit mèt-yo ka douté kè Jéova té’é pran swen a yo ? Lèwvwè sé Israélit-la sòti an Éjipt, té ni onpakèt moun ki pati èvè yo osi. Yotout maché pannan on bon moman avan yo rivé adan péyi-la Bondyé té pwomèt pèp a-y (Ègz. 12:38 ; Dét. 8:15). Sé moun-la ki pa té Israélit la té las èvè màn-la, manjé-la Jéova té ba-yo la, é yo détenn asi onlo Israélit kifè yo mèt-yo ka plenn-yo osi (Nonb 11:4-6). Pèp-la koumansé sonjé sa yo té ka manjé an Éjipt. Konm pèp-la té ka mèt bon présyon asi Moyiz, i dwèt pansé kè sé-y ki té dwèt touvé tousa vyann ba tousa moun é i pa té ka vwè kijan i té’é rivé fè sa (Nonb 11:13, 14).

5-6. Sé moun-la ki pa té Israélit-la détenn asi sé Israélit-la. Ka sa ka aprann-nou ?

⁵ Sé moun-la ki pa té Israélit-la pa té ni rèkonésans pou tousa Jéova té fè pou yo é i ka sanmsa yo détenn asi sé Israélit-la. Adan mond-la osi sé moun-la engra é yo pé rivé a détenn asi nou, é lèwgadé nou pé touvé kè Jéova pa’a fè asé biten ban nou. Sa pé rivé-nou siwvwè nou ka règrété sa nou té ni avan oben si nou ka jalou sa lézòt tini. Pawkont nou ké ni tchè-kontan toubònman siwvwè nou ka aprann kontanté-nou dè sa nou ni.

⁶ Sé Israélit-la té dwèt sonjé sa Jéova té pwomèt-yo. I té di-yo kè i té’é ba-yo lontan plis ki sa yo té bizwen, men sé adan péyi-la Jéova té pwomèt-yo la kè yo té’é ni tousa. Menmjan-la, olyé nou konsantré-nou asi sa nou pa ni adan mond-lasa, sa té’é byen kè nou sonjé sa Jéova ké ban-nou adan paradi-la. Nou pé sonjé osi déotwa vèwsé ki ké édé-nou fè Jéova konfyans plis ankò.

7. Poukwa nou pé sèten kè men a Jéova pa two kout ?

⁷ Pétèt kè ou ka mandé-w poukwa Jéova di Moyiz : « Ès men an mwen two kout ? » I ka sanmsa i té vé fè Moyiz konprann 2 biten : non sèlman puisans a-y pa ni pon limit, men i pé sèvi èvè-y koté-la i vlé la, menmsi sé on koté ki lwen. Bondyé té pé ba sé Israélit-la vyann menmsi yo té ka touvé-yo anmitan dézè-la. I montré pèp a-y i té pé édé-yo nenpòt ki koté yo té yé (Sòm 136:11, 12). Alò nou osi, nou pé sèten Jéova ké pé woté-nou anba nenpòt ki éprèv kèlkèswa koté-la nou yé la (Sòm 138:6, 7).

8. Ka nou pé fè pou nou pa tonbé adan menm pyèj ki onlo moun ki té adan dézè-la ? (gadé imaj-la osi).

⁸ Jéova fè sa i pwomèt é i ba pèp a-y on gran kantité zozyo pou sa sèvi-yo vyann. Magrésa, sé Israélit-la pa montré pon rèkonésans pou mirak-la Jéova té fè ba yo la. Okontrè, onlo adan yo koumansé vin voras. Lajouné kon lannuit, yo pa té ka las ranmasé zozyo, touttan yo té pé chayé yo té ka chayé. A pa ti kòlè Jéova té kòlè lè i vwè jan yo « aji kon moun ki égoyis ». Kifè Jéova pini-yo (Nonb 11:31-34). Ka sa ka aprann-nou ? Fò nou fè atansyon pou nou pa vin voras kon yo. Ki nou sé on moun ki rich ki nou maléré, sa pou nou chèché sé ‘trézò ki an syèl-la’. Nou ké rivé fè sa si nou toujou ka chèché a vin bon zanmi èvè Jéova é Jézi (Mat. 6:19, 20 ; Lik 16:9). Nou pé sèten Jéova ké ban-nou sa nou bizwen.

9. Dè ki bien nou pé sèten a san pou san ?

⁹ Jòdijou osi, Jéova paré pou édé sèwvitè a-y. Men a pa pas i pé fè sa kè sa vé di nou pé’é jen pèd ayen an nou oben kè nou pé’é jen manké lajan oben manjéb. Jéova pé’é jen lagé-nou. Chakfwa nou ké jwenn on éprèv i ké la ban nou. Kijan nou pé montré kè nou sèten i ké toujou pran swen an nou ? An-nou ègzaminé 2 sitiyasyon : 1) lè lajan-la kout é 2) lè nou ka gadé pou vwè ka nou ké fè pou nou pa manké ayen pannan vyéyès an nou.

LÈ LAJAN-LA KOUT

10. Ki pwoblèm a lajan nou pé jwenn ?

¹⁰ Pwoblèm politik, lagè, katastwòf natirèl oben épidémi, pé fè-nou dépansé plis lajan ki sa nou té prévwa. Sa pé fè-nou pèd travay an nou, sèwten biten nou ni oben kaz an nou. Pétèt nou ké oblijé chèché ondòt travay oben ay rété ondòt koté èvè fanmi an nou pou nou pé sa ba-yo sa yo bizwen. Ka ki ké édé-nou pran dé désizyon ki ka montré kè nou sèten men a Jéova pa jen two kout pou édé-nou ?

11. Ka ki pé édé-w lè lajan-la kout ? (Lik 12:29-31).

¹¹ Prèmyé biten pou-w fè sé wouvè tchè a-w ba Jéova (Pwov. 16:3). Mandé-y ba-w sajès pou-w pé sa pran bon désizyon, pou sa édé-w rété kalm é pou-w pa enkyèt ankò (li Lik 12:29-31). Kontinyé mandé-y pou i édé-w kontanté-w dè sa ou bizwen (1 Tim. 6:7, 8). Chèché adan piblikasyon an nou awtik ki pé édé-w vwè ka ou pé fè lè ou ni pwoblèm a lajan. Ni onlo moun ki ay asi jw.org é ki touvé dé bon ti konsèy adan sé vidéo-la oben adan sé awtik-la ki ka palé dè pwoblèm a lajan.

12. Ki kèsyon on krétyen pé pozé-y pou i pran on bon désizyon pou li é fanmi a-y ?

¹² Ni frè é sè ki pati lwen fanmi a yo pou ay travay. Men anfinaldikont, a pa té on bon désizyon. Avan nou aksèpté on travay, a pa yenki lajan-la pou nou gadé, men fò nou réfléchi pou nou vwè si sa pé ké anpéché ki nou ki fanmi an nou rété bon bon zanmi èvè Jéova (Lik 14:28). Mi sa ou pé mandé-w : « Si an ka rété lwen madanm an mwen oben lwen mari an mwen, kijan sa ké aji asi mayé an mwen ? Si an ka aksèpté travay-lasa, ès an ké pé ay adan tout réinyon an mwen, ay préché é pasé tan èvè frè é sè an mwen ? » Si ou ni timoun, mi ondòt kèsyon pou-w pozé-w : « Kijan an ké fè pou lévé timoun an mwen “sèlon édikasyon é avèwtisman a Jéova” si an pa èvè yo ? » (Éféz. 6:4). Lè ou ka pran on désizyon, bazé-w asi sa Jéova ka pansé é pa bazé-w asi sa fanmi a-w oben zanmi a-w ki pa Témwen a Jéova ka panséc. Tony sé on frè ki ka rété an Azi dè Lwès. Yo pwopozé-y plizyè travay ki té’é fè-y gangné onlo lajan, men sé travay-lasa té ka touvé-yo adan ondòt péyi. I priyé anrapò èvè sa, é i palé sa èvè madanm a-y. Anfinaldikont i pa aksèpté ponyonn adan sé travay-lasa, é li é madanm a-y fè ansòt pou ni mwens dépans. Lè Tony ka réfléchi sa jòdijou, mi sa i ka di : « An rivé édé plizyè moun aprann konnèt Jéova, é timoun an nou ka pwogrésé adan lavérité. Fanmi an nou aprann kè lèwvwè ou ka fè sa ki maké adan Matyé 6:33, Jéova toujou ka pran swen a-w. »

LÈ NOU KA PRAN DÉSIZYON POU LÈ NOU KÉ PLI VYÉ

13. Ki biten nou pé fè alèla pou nou pé sa ni sa nou bizwen dèmen ?

¹³ Lè nou ka pran désizyon pou lè nou ké pli vyé, nou pé montré Jéova nou ka fè-y konfyans. Labib ka di-nou kè fò nou travay rèd pou nou pé sa ni on dèkwa pou dèmen (Pwov. 6:6-11). Si nou pé, nou pé séré on ti lajan pou sa sèvi-nou plita. Sé vré kè lajan pé démélé-w lè biten-la rèd (Ékl. 7:12). Men fò pa lajan-la sé sa ki pi enpòwtan adan vi an nou.

14. Poukwa fò nou tchenn kont dè sa Ébré 13:5 ka di lè nou ka prévwa pou dèmen ?

¹⁴ Jézi pran on ègzanp pou montré kè on moun ki ka séré onpakèt lajan men « ki pa rich douvan Bondyé », sé on moun ki pa ni sajès (Lik 12:16-21). Sé vré, ponmoun pa konnèt ka ki ké fèt dèmen (Pwov. 23:4, 5; Jak 4:13-15). Anplisdisa, Jézikri ni lokazyon di kè fò on disip a-y paré a « lagé » tousa i ni (Lik 14:33). Sé sa ki rivé sé krétyen Jidé la o 1^é syèk. Yo té paré a pèd tousa yo té ni (Ébr. 10:34). Jòdijou, onlo frè é sè aksèpté pèd travay a yo pas yo pa té vlé soutyenn on pawti politik (Rév. 13:16, 17). Ka ki édé-yo fè sa ? Sé pas yo té ni konfyans adan pwomès a Jéova ki ka di : « An pé’é jen kité-w, é an pé’é jen lagé-w » (li Ébré 13:5). Kifè, nou ka fè sa nou pé pou mèt on ti lajan a koté pou dèmen. É menmsi dé biten nou pa té prévwa ka rivé-nou, nou ké kontinyé fèfon asi Jéova.

15. Ka pou sé fanmi-la sonjé anrapò èvè timoun a yo ? (gadé imaj-la osi).

¹⁵ Adan sèwten kilti, lè sé fanmi-la ka fè timoun, sé pou sé timoun-la pé sa okipé dè yo lè yo ké vyé. Pou yo, sé konsidiré sé timoun-la sé on asirans pou rètrèt a yo. Men dapré sa Labib ka di, sé sé paran-la pou okipé dè timoun a yo (2 Kor. 12:14). Sé vré kè lè yo ka vin ni on tilaj, délè yo ka bizwen timoun a yo pran swen a yo, é ni onlo timoun ki kontan fè sa (1 Tim. 5:4). Men sé paran-la ki ka fèfon asi Jéova ka pli kontan édé timoun a yo sèvi Jéova, ki pousé sé timoun-la gangné lajan pou yo pran swen a paran a yo dèmen (3 Jan 4).

16. Kijan sé paran-la pé édé timoun a yo pou yo pé sa gangné sou a pen a yo dèmen ? (Éfézyen 4:28).

¹⁶ Toupannan zò ka édé timoun a zòt préparé-y pou dèmen, montré-y kè zò ka fè Jéova konfyans. Pannan yo jenn aprann-yo kè sa enpòwten kè yo travay rèd (Pwov. 29:21 ; li Éfézyen 4:28). Édé-yo osi pou yo aprann byen lékòl. Fè rèchèwch osi pou touvé prensip a Labib ki ké édé-yo chwazi èvè sajès ki étid yo ké fè. Òbjèktif-la sé kè lè timoun-la ké gran, i gangné sou a pen a-y men anmenmditan kè i touvé tan pou i préché, é pétèt menm pou i vin pyonyé.

17. Dè ki biten nou pé sèten ?

¹⁷ Moun ki ka fè Jéova konfyans sav kè i pé pran swen a yo é kè i anvi fè-y toubònman. Pi lafen ka vin é pi fò nou ké fè Jéova konfyans. Kèlkèswa sa ki pasé, fò-nou sèten kè i ké sèvi èvè lèspri sen a-y pou ban-nou sa nou bizwen. Kèlkèswa koté-la nou yé la, men a Jéova pé’é jen two kout pou i édé-nou.