AWTIK POU ÉTIDYÉ 49
Ès Jéova ké réponn a priyè an mwen ?
« Zò ké kriyé-mwen, zò ké vin owa an mwen pou priyé-mwen, é an ké kouté-zòt » (JÉR. 29:12).
KANTIK 41 « Ô Dieu, entends ma prière »
ON TI LIDÉ ASI SA NOU KAY VWÈa
1-2. Poukwa délè nou pé ni lenprésyon kè Jéova pa ka réponn a priyè an nou ?
« TOUVÉ pli gran plézi a-w adan Jéova, é i ké ba-w sa tchè a-w anvi » (Sòm 37:4). Mi on bèl pwomès mi ! Men ès nou ka pansé kè Jéova ké ban-nou tousa nou ka mandé-y onfwamenm ? Poukwa sa enpòwtan kè nou pozé-nou kèsyon-lasa ? Imajiné sé sitiyasyon-lasa : On sè ki sélibatè ka priyé Jéova pou i fè Lékòl pou évanjélizatè a Wayòm-la. Men pi tan ka pasé é pi i ka vwè kè yo pa ka envité-y. On jenn frè ni on maladi ki grav ka mandé Jéova géri-y pou i pé sa fè plis ba-y adan lasanblé-la. Men i pa’a géri menm. On papa é on manman ka priyé Jéova pou timoun a yo rété adan lavérité. Men timoun-la ka désidé kè i pé’é sèvi Jéova ankò.
2 Pétèt kè vou osi ou mandé Jéova on biten é lèwgadé ou pa trapé sa ou té vé la. Ès a moman-lasa ou di an tchè a-w : « Men poukwa Jéova ka réponn a priyè a dòt moun men i pa’a réponn-mwen ? » Oben ès ou mèt an tèt a-w kè si i pa’a réponn-vou, sé pas ou fè on mové biten ? Sé sa on sè non a-y sé Janiceb té ka pansé. Li é mari a-y té mandé Jéova pou yo té ay travay an Bétèl-la. Mi sa i ka di : « Pou mwen, yo pa té’é tadé a envité-nou pou nou travay an Bétèl-la. » Men aprésa, onpakèt tan pasé é yo pa jen envité-yo. Mi sa Janice ka di ankò : « A pa ti tris an té tris é an pa té ka konprann ayen. An té ka mandé-mwen ka an fè Jéova pou an fè-y lapenn. Poutan, an té mandé-y dé biten byen prési adan priyè an mwen. An pa té ka konprann poukwa i pa té ka réponn-mwen. »
3. Ka nou ké vwè adan awtik-lasa ?
3 Délè nou pé mandé-nou si Jéova ka kouté priyè an nou. An tan a Labib, ni sèwten moun fidèl ki té ka mandé-yo sa osi (Jòb 30:20 ; Sòm 22:2 ; Abak. 1:2). Kijan ou pé sèten kè Jéova ké réponn a priyè a-w ? (Sòm 65:2). Pou réponn a kèsyon-lasa nou ké vwè 3 biten : 1) Ka Jéova ké fè pou nou ? 2) Ka Jéova ka atann dè nou ? 3) Délè, poukwa fò-nou ké mandé Jéova dòt biten ?
KA JÉOVA KÉ FÈ POU NOU ?
4. Dapré Jérémi 29:12, ka Jéova ka pwomèt kè i ké fè pou nou ?
4 Jéova ka pwomèt-nou kè i ké kouté priyè an nou (li Jérémi 29:12). Konm nou fidèl a Jéova, Bondyé an nou enmé-nou é i pé’é jen pa kouté priyè an nou (Sòm 10:17 ; 37:28). Men apapousa Jéova ké ban-nou tousa nou ka mandé-y. Pétèt kè fò nou ké atann nouvo mond-la pou nou trapé sèwten biten nou mandé-y.
5. Toupannan Jéova ka kouté priyè an nou, ki biten i pa ka oubliyé ? Bay on ti èsplikasyon.
5 Toupannan Jéova ka kouté priyè an nou, i ka sonjé pwojé a-y (Iz. 55:8, 9). On biten Jéova vé sé kè latè plen èvè moun ki kontan obéyi-y é ki ka aksèpté kè i gouvèné-yo. Men konm Satan di kè moun té’é pi kontan si yo té ka gouvèné-yo yomenm a yo, Jéova ka lésé-yo fè zafè a yo pou toutmoun vwè kè Satan sé on mantè (Jén. 3:1-5). Konm sé lézòm ki ka gouvèné, nou ni pwoblèm si pwoblèm (Ékl. 8:9). Nou sav kè Jéova ja désidé kitan i ké fè sé pwoblèm-lasa disparèt men i pé’é fè sa avan jou-la i prévwa la. Si i té ka réglé sé pwoblèm-lasa avan lè, ni sèwten moun ki té’é pé pansé kè lézòm ka dirijé byen menm é kè yo kapab réglé pwoblèm an nou.
6. Poukwa nou pé sèten kè Jéova ké toujou aji èvè lanmou èvè nou é kè i ké toujou aji on mannyè ki jis ?
6 Plizyè moun pé mandé Jéova menm biten-la men i pa oblijé réponn-yo menmjan-la. Pa ègzanp, wa Ézékyas té malad toubònman lèwvwè i sipliyé Jéova pou i té pé sa géri-y. Jéova réponn a priyè a-y é i géri-y (2 Wa 20:1-6). Pawkont, a pa konsa sa pasé pou lapòt Pòl. I té ni on pikan andidan chè a-y. Pétèt kè sé té on maladi i té ni é lèwvwè i mandé Jéova woté pikan-lasa, Jéova pa woté-y (2 Kor. 12:7-9). An-nou vwè ègzanp a lapòt Jak é ta lapòt Pyè. Éwòd té ka chèché a tchouyé-yo toulédé. Alò lasanblé-la priyé pou Pyè é sèten i dwèt priyé pou Jak osi. Men ka ki rivé ? Éwòd fè-yo tchouyé Jak men Jéova fè on mirak pou sové Pyè (Akt 12:1-11). Alò nou té’é pé mandé-nou : « Men poukwa Jéova sové Pyè alòskè i pa sové Jak ? » Labib pa’a réponn a kèsyon-lasac. Men on biten nou pé sèten sé kè Jéova toujou ka aji on ‘mannyè ki jis’ (Dét. 32:4). É on biten nou sav osi, sé kè Jéova té enmé ki yonn ki lòt (Rév. 21:14). Sé vré, Jéova pa oblijé réponn a priyè an nou kon nou té’é vé men nou sèten kè i toujou ka aji on mannyè ki jis é i toujou ka aji èvè lanmou épi nou. Alò, lè nou ka vwè ki répons i ka ban-nou nou pa ni a plenn-nou (Jòb 33:13).
7. Ka pou nou pa fè é poukwa ?
7 Fò pa nou konparé sitiyasyon an nou èvè sitiyasyon a frè é sè an nou. An-nou imajiné sa : Nou bizwen Jéova édé-nou, alò nou ka mandé-y on biten byen prési adan priyè an nou. Men i pa’a ban-nou sa nou mandé-y la. Kèlkè tan apré, nou ka vin sav kè on moun mandé Jéova menm biten ki nou é i ka sanm sa Jéova ba-y sa i mandé-y la. Sé sa on sè non a-y sé Anna viv. Mari a-y, Matthew, té ni on kansè é lèwvwè i touvé-y malad, sè-la priyé Jéova pou i té pé sa géri-y. É anmenmditan té ni 2 sè ki té ja ni on bèl laj ki té ka goumé èvè on kansè osi. Alò Anna mèt jounou atè pou mari a-y é i fè menm biten-la pou sé 2 sè-la osi. Sé 2 sè-la géri men mari a-y mò. Odépa Anna mandé-y ès sé 2 sè-la géri pas Jéova fè on biten pou yo. Aprésa i mandé-y si sé sa poukwa Jéova pa té fè menm biten pou mari a-y. Sé vré, nou pé pa di pou ki rézon sé 2 sè-lasa géri men sa nou sav sé kè on jou Jéova ké fè tout soufrans disparèt é i présé résisité zanmi a-y ki mò (Jòb 14:15).
8. a) Dapré Izayi 43:2, kijan Jéova ka édé-nou ? b) Kijan lapriyè pé édé-nou lèwvwè nou ka jwenn éprèv ? (gadé vidéo-la Lapriyè ka édé-nou fasadé).
8 Jéova toujou ké soutyenn-nou. Konm Jéova sé on Papa ki plen lanmou, i pa enmé vwè-nou ka soufè (Iz. 63:9). Menmsi i ka pwotéjé-nou sa vé pa di kè nou pé’é jen jwenn pon éprèv. Délè sé éprèv-la pé touvé-yo kon on flèv oben kon on flanm difé (li Izayi 43:2). Men i ka pwomèt-nou kè i ké édé-nou « janmbé » sé éprèv-lasa. É kèlkèswa éprèv-la nou ka jwenn konnyéla, Jéova ké fè ansòt pou nou toujou rété bon bon zanmi èvè-y. Anplisdisa, i ka ban-nou puisans a lèspri sen a-y pou nou pé sa andiré (Lik 11:13 ; Filip. 4:13). Alò nou pé sèten kè i ké toujou ban-nou ègzaktèman sa nou bizwen pou nou pé sa andiré é pou nou rété fidèl a-yd.
KA JÉOVA KA ATANN DÈ NOU ?
9. Dapré Jak 1:6, 7 poukwa fò-nou sèten kè Jéova ké édé-nou ?
9 Jéova vé kè nou fè-y konfyans (Ébr. 11:6). Ni dé moman, lèwvwè nou ka touvé-nou anba éprèv, nou pé ni lenprésyon kè nou pé’é jen rivé about a sé éprèv-lasa. É nou pé mèt-nou ka pansé kè pétèt Jéova pé’é fè ayen pou édé-nou. Men Labib ka ban-nou lagaranti kè nou ké pé « monté asi on miray » grasa puisans a Jéova (Sòm 18:29). Alò, olyé nou lésé dé lidé konsa mèt dout an tèt an nou, an-nou priyé èvè fwa é an-nou mèt fon an tèt an nou kè Jéova ké réponn a priyè an nou (li Jak 1:6, 7).
10. Bay on ègzanp ki ka montré kijan nou pé aji annakò èvè priyè an nou.
10 Jéova vé kè nou aji annakò èvè priyè an nou. An-nou pran on ègzanp : On frè ka mandé Jéova édé-y pou i pé sa ni déotwa jou konjé pou i ay lasanblé réjyonal. Kijan Jéova pé réponn a priyè a-y ? I pé ba frè-la kouraj-la i bizwen la pou i pé sa palé ba patron a-y. Men fò frè-la fè on biten osi, fò i mandé patron-la bay déotwa jou konjé é pétèt a pa onsèl fwa i ké ni a mandé-y sa. Pétèt i ké pwopozé patron a-y travay ondòt jou oben ranplasé on kolèg-travay. É si sa nésésè, i ké di patron a-y palapenn péyé-y sé jou konjé lasa.
11. Poukwa fò-nou kontinyé priyé Jéova pou sa ki ka trakasé-nou ?
11 Jéova vé kè nou kontinyé priyè pou sa ki ka trakasé-nou (1 Tés. 5:17). Lè nou ka ègzaminé sa Jézi di, nou ka konprann kè a pa toutlè nou ké mandé Bondyé on biten kè nou ké ni-y tousuit (Lik 11:9). Men pa lagé ! Priyé toutlè é fè sa èvè tout tchè a-w (Lik 18:1-7). Lèwvwè nou vlé on biten é kè nou ka priyé pou sa toutlè, nou ka montré Jéova kè biten-lasa vréman enpòwtan pou nou. Sa ka montré osi kè nou ni fwa adan lèfètkè i kapab édé-nou.
DÉLÈ, POUKWA FÒ-NOU KÉ MANDÉ JÉOVA DÒT BITEN ?
12. a) Ki kèsyon nou té’é pé pozé-nou anrapò èvè sa nou ka mandé Jéova, é poukwa fò-nou fè sa ? b) Kijan nou pé sèten nou ka montré Jéova kè nou ka rèspèkté-y lè nou ka priyé-y ? (gadé ti karé-la « Lè an ka mandé Jéova on biten, ès an ka montré-y kè an ni rèspé pou-y ? »).
12 Si Jéova pò’ò ban-nou sa nou ka mandé-y, fò-nou pozé-nou 3 kèsyon. Mi prèmyé-la : « Ès an ka priyé pou bon biten-la ? » Souvantfwa, nou ka kwè kè nou sav sa ki pibon pou nou. Men pétèt biten-la nou ka mandé la ké fè-nou dibyen pannan déotwa jou é aprésa i ké fòsé-nou. Pétèt nou ni on pwoblèm é nou ka di Jéova sé konsa nou té’é vé i réglé pwoblèm-la pou nou. Men ka ki ka di kè pa ni on méyè solisyon ki tala nou ka mandé adan priyè an nou ? É pétèt sèwten biten nou ka mandé adan priyè an nou pa annakò èvè volonté a-y (1 Jan 5:14). Pa ègzanp, sé paran-la nou palé dè yo talè la mandé Jéova fè ansòt pou timoun a yo rété adan lavérité. I ka sanm sa sé on bon biten pou mandé Bondyé. Men Jéova pa ka fòsé ponmoun sèvi-y. I vé nou adoré-y paskè sé sa nou chwazi fè, é sé sa i ka atann dè timoun an nou osi (Dét. 10:12, 13 ; 30:19, 20). Alò, pétèt kè sa té’é myé si sé paran-la té ka mandé Jéova édé-yo touché tchè a timoun a yo plito, pou i aprann enmé Jéova é pou i vin bon bon zanmi èvè-y (Pwov. 22:6 ; Éféz. 6:4).
13. Dapré Ébré 4:16, a ki moman Jéova ké édé-nou ? Bay on ti èsplikasyon.
13 Dézyèm biten-la pou nou mandé-nou la sé : « Ès sé aprézan Jéova chwazi ban-mwen sa an té mandé-y la ? » Pétèt pou nou, nou bizwen kè i réponn a priyè an nou onfwa-onfwa. Men li Jéova i sav byen a ki moman pou i réponn-nou é sé ké méyè moman-la (li Ébré 4:16). Lèwvwè nou pa ni sa nou mandé Jéova tousuit, pétèt nou pé di-nou répons-la sé : « Non », alòskè pétèt Jéova ka di-nou : « Atann tibwen ankò ». Sonjé jenn frè-la ki té ka priyé Jéova pou i té géri. Si Jéova té fè on mirak pou géri-y, Satan té’é pé di kè si frè-la ka sèvi Jéova toujou sé pas Jéova géri-y (Jòb 1:9-11 ; 2:4). Anplisdisa, Jéova ja chwazi kitan i ké fè tout maladi disparèt (Iz. 33:24 ; Rév. 21:3, 4). Alò konm moman-lasa po’o rivé, nou pé pa atann dè Jéova kè i fè on mirak pou géri-nou. Donk a moman-lasa, frè-lasa pé mandé Jéova ba-y fòs é édé-y santi-y anpé pou andiré maladi-la i ni la é pou i kontinyé rété fidèl a-y (Sòm 29:11).
14. Ka ègzanp a Janice ka aprann-vou ?
14 An-nou wouvin asi ègzanp a Janice, sè-la ki té ka priyé pou ay an Bétèl-la. Sé 5 an apré kè i rivé konprann kijan Jéova té réponn a priyè a-y. Mi sa i ka èspliké : « Pannan tout tan-lasa, Jéova fòwmé-mwen é i aprann-mwen onlo biten. Fò an té aprann fè-y konfyans plis ankò. Fò an té pasé plis tan ka étidyé tousèl an mwen. Fò an té mèt fon an tèt an mwen osi kè kèlkèswa koté-la an té ka sèvi Jéova la, an té pé ni tchè-kontan. » Déotwa tan apré, yo nonmé mari a Janice rèsponsab a siwkonskripsyon. Lè i sonjé sa ki pasé, mi sa i ka di : « Menmsi Jéova pa réponn-mwen kon mwen an té vé, i réponn-mwen. Sa pran tan pou an té rivé konprann kè répons a-y sé té on bèl ti kado. I aji èvè mwen épi lanmou é bonté. An ni onlo rèkonésans pou sa menm. »
Si ou ka pansé kè Jéova pa ba-w yonn adan sé biten-la ou mandé-y la, pétèt ou té’é pé mandé-y dòt biten (gadé paragraf 15 la)f.
15. Poukwa délè fò-nou ké mandé Jéova dòt biten ? (gadé sé imaj-la osi).
15 Mi twazyèm kèsyon-la : « Ès fò pa an mandé Jéova dòt biten ? » Lè nou ka priyé Jéova, é kè nou ka pran tan èspliké-y ka nou vé ègzaktèman, sé on bon biten nou ka fè. Men pou nou rivé konprann ka i vé pou nou, pétèt fò pa nou rété enki asi sa nou vlé i ban-nou. An-nou wouvin asi ègzanp a sè sélibatè la ki té ka priyé pou fè Lékòl pou sé évanjélizatè a Wayòm-la. Si i vé fè lékòl-lasa sé pou préché koté yo bizwen moun an ranfò. Alò, toupannan i ka kontinyé priyé pou yo envité-y fè lékòl-lasa, i té’é pé mandé Jéova édé-y vwè ka i pé fè anplis dépi konnyéla pou soutyenn travay a prédikasyon-la (Akt 16:9, 10). É aprésa, pou i pé sa aji annakò èvè priyè a-y, i té’é pé mandé rèsponsab a siwkonskripsyon a-y ès yo pa bizwen plis pyonyé adan on lasanblé adan réjyon-la i ka rété la. Anplisdisa, i pé voyé on lèt pou Bétèl a péyi a-y oben pou Bétèl a ondòt péyie pou sav ki koté i té’é pé ay pou bay on pal.
16. Dè kibiten nou pé sèten ?
16 Kon nou vwè, nou pé sèten kè Jéova ké réponn a priyè an nou é kè lè i ké réponn-nou i ké fè sa on mannyè ki jis é èvè lanmou (Sòm 4:3 ; Iz. 30:18). A pa toutlè i ké réponn-nou kon nou nou té ka èspéré. Men Jéova pé’é jen fè konsi i pa’a tann priyè an nou. I enmé-nou toubònman. É i pé’é jen lagé-nou (Sòm 9:10). Alò, kontinyé « fè-y konfyans toutlè », é kontinyé wouvè tchè a-w ba-y lè ou ka priyé-y (Sòm 62:8).
KANTIK 43 Prière de remerciement
a Adan awtik-lasa nou ké vwè poukwa nou pé sèten kè Jéova ké toujou réponn a priyè an nou, é kè lèwvwè i ké réponn-nou i ké toujou fè sa èvè lanmou é on mannyè ki jis.
b Yo chanjé sèwten non.
c Gadé awtik-la « Jéova toujou ka fè sa ki byen. Ès ou ni konfyans adan sa ? » adan niméwo a févriyé 2022 a Tou dè Gad la (§ 3-6).
d Si ou vé ni plis enfòwmasyon asi jan Jéova ka édé-nou lè nou ka jwenn difikilté, gadé vidéo-la Lapriyè ka édé-nou fasadé asi jw.org.
e Si ou vé sav ka pou-w fè si ou vé ay sèvi adan ondòt péyi ay adan liv-la Organisés pour faire la volonté de Jéhovah (chap. 10, § 6-9).
f SA NOU KA VWÈ ASI SÉ IMAJ-LA 2 sè ka priyé Jéova avan yo ranpli on dèmann pou fè Lékòl pou évanjélizatè a Wayòm-la. Plita, yo envité yonn adan yo pou fè lékòl-lasa, men yo pa envité lòt-la. Olyé i lésé sa dékourajé-y, sè-la yo pa envité la ka priyé Jéova pou mandé-y édé-y vwè ki dòt biten i pé fè pou soutyenn travay a prédikasyon-la. Aprésa, i ka voyé on lèt pou filyal-la pas i té’é enmé ay préché on koté yo bizwen ranfò.