Ès ou paré pou gwo tribilasyon-la ?

1. Poukwa sa enpòwtan kè nou préparé-nou sianka ni on katastwòf ?

LÈ NOU ka pran tan préparé-nou pou on biten, sa pé sové vi an nou. Pa ègzanp, lèwvwè on katastwòf ka fèt, sé moun-la ki préparé-yo la avan katastwòf-la pi fasil a rété vivan é yo pé édé lézòt pi fasilman osi. Mi sa on òwganizasyon ki ka touvé-y an Éwòp é ki ka éséyé édé moun ka di : « Lè ou byen préparé, sa ka chanjé toutbitenb. »

2. Poukwa fò-nou préparé-nou pou gwo tribilasyon-la ? (Matyé 24:44).

² ‘Gwo tribilasyon-la’ ké koumansé onsèl kou (Mat. 24:21). Men gwo tribilasyon-la pé’é ni ayen a vwè èvè sé katastwòf-la ki ka fèt la, pas nou sav kè i ka vin alòskè onlo adan sélézòt katastwòf-la pé rivé a siwprann-nou. Ni 2000 an dè sa apépré, Jézi avèti disip a-y é i di-yo préparé-yo pou jou-lasa (li Matyé 24:44). Siwvwè nou préparé-nou, nou ké rivé pasé sé moman difisil lasa pi fasilman é nou ké pé édé lézòt fè menm biten-la osi (Lik 21:36).

3. Poukwa fò nou ké ni andirans, konpasyon é lanmou pannan gwo tribilasyon-la ?

³ An-nou palé dè 3 kalité nou ké bizwen pou nou pé sa préparé-nou pou gwo tribilasyon-la. Kijan nou ké réyaji si yo ka mandé-nou préché on mésaj a jijman ki ké chouboulé moun é lèwgadé moun ka lévé kont nou ? (Rév. 16:21). Nou ké bizwen andirans pou nou obéyi Jéova é fò-nou ké sèten kè i ké pwotéjé-nou. Ka nou ké fè siwvwè frè é sè an nou pèd on pawti a zéfé a yo oben siwvwè yo pèd tousa yo té ni ? (Abak. 3:17, 18). Konm nou ni konpasyon pou yo, sa ké ban-nou balan pou fè on biten pou édé-yo. An-nou imajiné aprézan kè sé nasyon-la ka mèt-yo ansanm pou ataké-nou é kè nou oblijé viv èvè plizyè frè é sè adan on toupiti pyès, kijan nou ké réyaji ? (Ézék. 38:10-12). Si nou vé andiré sé moman difisil lasa, fò-nou ké enmé frè é sè an nou fò toubònman.

4. Kijan Labib ka montré kè fò-nou kontinyé fè ansòt pou nou ni andirans, konpasyon é lanmou ?

⁴ Pawòl a Bondyé ka ankourajé-nou a toujou ni andirans, konpasyon é lanmou. Lik 21:19 ka di : « Si zò andiré, zò ké sové vi a zòt. » 1 Pyè 3:8 ka di : « Fò-zò ni […] on konpasyon ki plen tandrès. » É 1 Tésalonisyen 4:9, 10 ka di : « Bondyé anségné-zòt pou yonn pé sa enmé lòt […]. Men nou ka ankourajé-zòt, léfrè, pou zò kontinyé fè sa plis ankò. » Yo maké tout sé vèwsé-lasa pou sé disip-la men yotout té ja montré kè yo té ni andirans, konpasyon é lanmou. Alò poukwa yo té ka mandé-yo fè sa ? Sé té pou yo té kontinyé travay sé kalité-lasa. É nou osi sé sa pou nou fè. Pou édé-nou, nou ké vwè kijan sé 1^é krétyen-la montré kè yo té ni sé kalité-lasa. Nou ké ègzaminé-yo yonn apré lòt. Aprésa nou ké vwè kijan nou pé imité-yo é kijan sa ké édé-nou préparé-nou pou gwo tribilasyon-la.

FÈ ANSÒT POU-W RIVÉ ANDIRÉ PIBYEN

5. Grasa kibiten sé 1^é krétyen-la rivé andiré ?

⁵ O 1^é syèk, fò sé krétyen-la té andiré (Ébr. 10:36). Yo té ka jwenn menm difikilté ki lamajorité a sé moun-la ki té ka viv an tan a yo la. É anplisdisa, yo té ka jwenn dòt pwoblèm paskè yo té krétyen. Non sèlman sé chèf a rèlijyon juif la té ka pèwsékité lamajorité adan yo, men anplisdisa sé otorité women la é pwòp fanmi a yo té dèyè do a yo (Mat. 10:21). Ondòt biten pou yo té fè osi, sé fè atansyon pou sa sé apòsta-la té ka anségné pa té aji asi yo, pas sé ansègnman-lasa té ka mèt divizyon adan lasanblé-la (Akt 20:29, 30). Men magrésa yo rivé andiré (Rév. 2:3). Ka ki édé-yo ? Ében yo té ka médité asi ègzanp a moun ki adan Labib é ki té ka andiré, kon ègzanp a Jòb (Jak 5:10, 11). Yo té ka priyé pou yo té pé sa ni fòs (Akt 4:29-31). É yo toujou té ka sonjé jan Jéova té’é béni-yo siwvwè yo té ka kontinyé andiré (Akt 5:41).

6. Ka Merita fè pou andiré sa fanmi a-y té ka fè-y sibi é ka ègzanp a-y ka aprann-nou ?

⁶ Nou osi nou pé andiré. Ka nou pé fè pou nou rivé fè sa ? Adan Labib, nou ka touvé ègzanp a moun ki andiré. Fò-nou pran labitid étidyé sé ègzanp-lasa é médité asi yo si nou vé andiré. Sé sa Merita, on sè ki ka viv an Albani fè. Sa édé-y pou i té pé sa andiré tout sé abominasyon-la fanmi a-y té ka fè-y sibi la. Mi sa i ka èspliké : « An étidyé ègzanp a Jòb é sa touché-mwen toubònman. Jòb soufè bon soufè la é i pa menm té sav kimoun ki té dèyè do a tout sé soufrans-lasa. Poutan mi sa i di : “Jiskatan an mò, an pé’é lagé fidélité an mwen !” (Jòb 27:5). An rann-mwen kont kè éprèv an ka jwenn pa ayen koté tousa Jòb jwenn. É mwen, an sav kimoun ki dèyè do a sa alòskè li, i pa menm té sav sa. »

7. Menmsi alèla nou pa’a jwenn gwo difikilté, ka pou nou aprann fè dépi aprézan ?

⁷ Nou pé fè ansòt pou nou andiré pibyen osi, si nou ka priyé souvan é siwvwè nou ka pran labitid palé Jéova dè tousa ki ka trakasé-nou (Filip. 4:6 ; 1 Tés. 5:17). Pétèt kè alèla ou pa’a jwenn on gwo difikilté. Men chakfwa on biten ka pran tèt a-w oben ka chouboulé-w, oben kè ou pa sav ka pou ou fè adan on sitiyasyon, ès ou ka priyé Jéova é ès ou ka mandé-y édé-w ? Si lèwvwè ou ka jwenn on ti pwoblèm ou ka pran labitid fè sa, ében lèwvwè ou ké anba gwo difikilté ou ké palé ba Jéova tou natirèlman. Anplisdisa, ou ké sèten kè Jéova sav ègzaktèman a ki moman pou i édé-w é kè i sav ka pou i fè ba-w (Sòm 27:1, 3).

8. Kijan ègzanp a Mira ka montré-nou kè lèwvwè nou ka andiré dépi konnyéla, sa pé édé-nou andiré lèwvwè nou ké jwenn éprèv dèmen ? (Jak 1:2-4 ; gadé imaj-la osi).

⁸ Siwvwè alèla nou ka andiré difikilté nou ka jwenn, lèwvwè gwo tribilasyon-la ké rivé, nou ké rivé andiré pi fasilman (Wom. 5:3). Poukwa nou ka di sa ? Ni onlo frè é sè ki konstaté kè chakfwa yo té ka andiré on éprèv, sa té ka ba-yo fòs pou yo té pé sa andiré éprèv-la ki té ka vin dèyè do a-y la. Lè yo té ka vwè kè Jéova té ka édé-yo andiré on difikilté, sa té ka ba-yo plis fwa é lèwvwè yo té ka jwenn ondòt difikilté, yo té sèten kè Jéova té vé édé-yo (li Jak 1:2-4). Mira sé on pyonyé ki ka viv an Albani é i rann-li kont kè tout sé éprèv-la i ja andiré la ka ba-y fòs pou i pé sa kontinyé andiré. Délè, i ni lenprésyon kè sé-y tousèl ki ka andiré tousa difikilté. Men lè i ka viré sonjé sé 20 lanné-la ki sòti pasé la, i ka sonjé tousa Jéova ja fè pou montré-y kè i té ka soutyenn-li é mi sa i ka di an tchè a-y : « Rété fidèl, Mira. Apré tousa Jéova ja fè pou édé-w andiré sé sitiyasyon difisil la ou ja jwenn la, pa lagé Jéova. » Vou osi ou pé réfléchi asi tousa Jéova ja fè pou édé-w andiré. Ou pé sèten kè chakfwa ou ka andiré on éprèv, Jéova ka vwè sa é i ké rékonpansé-w (Mat. 5:10-12). Kifè, lèwvwè gwo tribilasyon-la ké koumansé, ou ké ja aprann kijan pou ou andiré é ou ké byen désidé a kontinyé andiré.

AJI ÉPI KONPASYON

9. Kijan lasanblé a Antyòch aji épi konpasyon èvè frè é sè a yo ?

⁹ An-nou vwè sa ki pasé lèwvwè manjé vin ra an Jidé é kè sitiyasyon-lasa té grav toubònman. Lèwvwè sé frè é sè la ki té adan lasanblé a Antyòch an Siri vin sav sa ki té ka pasé, sèten yo vin ni konpasyon pou frè é sè a yo ki té an Jidé. Alò yo fè on biten pou édé frè é sè a yo. Yo « désidé voyé sèkou ba sé frè Jidé la, chakmoun sèlon sa i té ni » (Akt 11:27-30). Sé frè Jidé la té ka soufè pas yo pa té ni ayen pou manjé. Menmsi sé frè é sè Antyòch la té ka rété lwen, yo té byen désidé a fè on biten pou édé-yo (1 Jan 3:17, 18).

10. Lèwvwè sèwten adan frè é sè an nou sibi on katastwòf, kijan nou pé aji épi konpasyon èvè yo ? (gadé imaj-la osi).

¹⁰ Jòdijou, nou pé aji èvè konpasyon osi lèwvwè nou ka vin sav kè sèwten adan frè é sè an nou sibi on katastwòf. Tousuit, nou pé fè on biten pou édé-yo. Pa ègzanp, nou pé mandé sé ansyen-la si nou pé bay on pal pou pòté frè é sè an nou sèkou, nou pé fè ofrann pou aktivité a òwganizasyon-la ki ka fèt toupatou asi latè oben nou pé priyé pou séla ki sibi katastwòf-lac (Pwov. 17:17). An 2020, pannan pandémi a Covid-19 la, yo mèt plis ki 950 komité pou pòté sèkou anplas toupatou asi latè. Konsa, yo té pé okipé-yo dè sé frè é sè la ki té bizwen kè yo édé-yo. Sé frè é sè la ki adan sé komité-lasa mérité nou félisité-yo toubònman. Konm yo ni konpasyon pou frè é sè a yo, yo ka édé-yo pou yo ni sa yo bizwen pou viv é pou yo rété bon bon zanmi èvè Jéova. É délè osi, yo réparé oben woukonstwi kaz a yo oben sé koté-la yo ka réyini-yo la pou adoré Bondyé (gadé 2 Korentyen 8:1-4).

11. Lè nou ka aji èvè konpasyon, kijan sa pé ba Pap’an nou ki an syèl-la glwa ?

¹¹ Lè nou ka aji épi konpasyon apré on katastwòf, moun ka vwè sakrifis nou ka fè. Sa ki fèt o Baamas an 2019, apré siklòn Dorian, ka montré-nou sa byen. Siklòn-lasa té détwi on sal di Wayòm. Sé frè-la té ka woukonstwi sal-la é pou sèwten biten yo té ni a fè, yo mandé patron a on antrèpriz ki pa té Témwen a Jéova fè on dèvi pou yo. Mi sa i di-yo : « Si zò dakò, an ka prété-zòt […] matéryèl an mwen, an ka voyé moun fè travay-la ba zòt é an ka ba-zòt sé matéryo-la. Zò pé’é ni ayen a péyé […]. An anvi fè sa ba òwganizasyon a zòt pas lè an ka vwè jan zò ka édé zanmi a zòt, sa ka touché-mwen onlo. » Lamajorité a sé moun-la ki adan mond-lasa pa konnèt Jéova. Men onlo adan yo ka gadé sa Témwen a Jéova ka fè pou édé lézòt. Lèwvwè nou ka aji èvè konpasyon, sa pé édé moun vin owa Sila ki ni onlo onlo mizérikòd. A pa ti kontan nou kontan sav kè nou pé pawtisipé adan sa ! (Éféz. 2:4).

12. Lè nou ka aji épi konpasyon èvè frè é sè an nou jòdila, sa ka préparé-nou pou gwo tribilasyon-la. Poukwa nou ka di sa ? (Révélasyon 13:16, 17).

¹² Poukwa nou ké bizwen aji èvè konpasyon lè gwo tribilasyon-la ké rivé ? Labib té anonsé kè pannan gwo tribilasyon-la, moun ki pa ka soutyenn sé gouvènman-la ki an mond-lasa té’é jwenn difikilté. É sé sa nou ja ka viv dépi aprézan (li Révélasyon 13:16, 17). Pétèt kè sèwten adan frè é sè an nou ni dimal a ni sa ki fo pou viv é yo bizwen kè nou aji épi konpasyon èvè yo é kè nou édé-yo. Lè lè-la ké vin pou Wa an nou Jézikris jijé moun asi latè, nou vé i touvé-nou ka fè lézòt dibyen é kè i di-nou kè i ka’ban-nou wayòm-la’ (Mat. 25:34-40).

FÈ ANSÒT POU-W ENMÉ FRÈ É SÈ A-W PI FÒ

13. Kon Women 15:7 ka di, kijan sé 1^é krétyen-la fè ansòt pou yonn vin enmé lòt pi fò ?

¹³ O 1^é syèk, toutmoun té sav byen kè adan lasanblé-la yonn té enmé lòt fò. Men pou yonn té montré lòt kè i enmé-y, ès sa té fasil ? An-nou pran ègzanp a lasanblé a Wòm. Sé frè é sè la té vréman diféran, ni sa ki té Juif é dépi toupiti yo té aprann-yo obéyi a Lwa a Moyiz. É ni sa aprézan ki pa té Juif é yo, yo pa té lévé-yo konsa. Pétèt ni sa ki té èsklav é ni sa osi ki pa té èsklav ankò. Pétèt jous ni sa ki té ni èsklav akaz a yo. Konm sé frè é sè la té vréman diféran, kijan yo té’é fè pou yo pa lésé sa anpéché-yo ni lanmou yonn pou lòt ? Mi konsèy-lasa Lapòt Pòl ba-yo : « Fò yonn akéyi lòt byen » (li Women 15:7). Ka i té vlé di pa la ? Mo grèk la yo tradui la é ki bay « akéyi byen », vlé di rèsèvwa on moun èvè onlo jantiyès é akéyi-y bra gran wouvè kon nou ka fè-y lèwvwè on moun ka vin akaz an nou oben kon nou ka fè-y pou montré on moun kè nou anvi kè i vin zanmi an nou. Pa ègzanp, Onézim té èsklav a Filémon é i té chapé kò a-y. Alò Pòl èspliké-y kijan pou i té akéyi Onézim. Mi sa i di-y : « Akéyi-y byen » (Filém. 17). Prisil é Akilas aprézan, akéyi Apolòs byen lèwvwè « yo pran-y èvè yo » alòskè Apolòs pa té konnèt granzafè asi ansègnman a sé krétyen-la (Akt 18:26). Tout sé krétyen-lasa té diféran, men yo pa lésé sa anpéché-yo rété soudé. Yo mèt tout sé diférans-lasa akoté é yonn akéyi lòt byen.

14. Kijan Anna é mari a-y montré kè yo té ni lanmou pou frè é sè a yo ?

¹⁴ Nou pé montré frè é sè an nou kè nou enmé-yo lèwvwè nou ka vin zanmi a yo é kè nou ka pasé tan èvè yo. Souvantfwa, lè yo ka vwè sa, sa ka ba-yo anvi enmé-nou osi (2 Kor. 6:11-13). An-nou palé dè sa Anna é mari a-y viv. Yo toulédé misyonè. Kèlkètan apré yo voyé-yo préché an Afrik dè Lwès, pandémi a Covid-19 la koumansé. Konm yo té sòti rivé, yo pa té pé rankontré sé frè é sè la fas a fas. Alò kijan yo té’é pé montré sé frè é sè la ké yo té enmé-yo ? Ében yo rantré an kontak èvè sé frè é sè la pa vidéokonférans é yo di-yo kè yo té’é anvi aprann konnèt-yo pibyen. Tèlman sa touché sé fanmi-la ki adan lasanblé-la, yo mèt-yo ka kriyé-yo souvan é yo mèt-yo ka voyé onlo mésaj ba yo. Poukwa sé misyonè-la fè sa ? Mi sa Anna ka èspliké : « An pé’é jen oubliyé tout sé frè é sè la ki aji èvè lanmou épi mwen é fanmi an mwen, ki biten-la té bon ki biten-la pa té bon. Alò mwen osi an anvi aji èvè lanmou èvè lézòt. »

15. Kijan ègzanp a Vanessa ka montré-nou kè fò nou enmé tout frè é sè an nou ? (gadé imaj-la osi).

¹⁵ Onlo adan nou ka fè pawti a lasanblé ki ni plen frè é sè diféran adan é ki pa ni menm pèwsonalité ki nou. Nou pé enmé-yo pi fò siwvwè nou ka konsantré-nou asi bèl kalité a yo. Vanessa, sé on sè ki ka viv an Nouvèlzéland é i pa té ka rivé antann-li byen èvè sèwten frè é sè adan lasanblé-la. Men olyé i pa lévé-yo digad, i désidé kè i ké pasé tibwen plis tan èvè yo. Sa pèwmèt-li vwè ka Jéova ka aprésyé adan sé frè é sé lasa. Mi sa i ka rakonté : « Dépi mari an mwen vin rèsponsab a siwkonskripsyon, nou ka pasé tan èvè frè é sè ki pa ni menm pèwsonalité-la men aprézan an ka rivé antann-mwen èvè lézòt pi fasilman. An enmé lèfètkè yo diféran. Sa sèten kè Jéova osi enmé sa piskè i ka pèwmèt tout kalté moun adoré-y. » Lèwvwè nou ka aprann vwè frè é sè an nou kon Jéova ka vwè-yo, nou ka montré-yo kè nou enmé-yo (2 Kor. 8:24).

16. Poukwa sa ké enpòwtan kè nou montré frè é sè an nou kè nou enmé-yo pannan gwo tribilasyon-la ? (gadé imaj-la osi).

¹⁶ Pannan gwo tribilasyon-la, sa ké enpòwtan kè yonn enmé lòt. Lèwvwè i ké koumansé, kimoun ki ké pwotéjé-nou ? An-nou vwè ki biten Jéova mandé pèp a-y fè lèwvwè yo ataké Babilòn. Mi sa i di-yo : « Alé-w, pèp an mwen, rantré adan sé pyès a-w la ki pli fon la é fèmé sé pòt-la dèyè do a-w. Kaché on ti moman, jistan kòlè-la pasé » (Iz. 26:20). Pétèt kè nou osi fò-nou ké suiv sé enstriksyon-lasa pannan gwo tribilasyon-la. Pétèt kè ‘sé pyès-la ki pi fon la’ sé sé lasanblé-la. Pannan gwo tribilasyon-la, Jéova ka pwomèt-nou kè i ké pwotéjé-nou siwvwè nou ka kontinyé sèvi-y èvè frè é sè an nou. Sé pousa, si sé enki sipòté nou ka sipòté on frè oben on sè, men kè an réyalité nou pa enmé-y, sa pa ka sifi. Fò-nou fè éfò pou nou enmé-y èvè tout tchè an nou dépi konnyéla. Si nou pa’a fè sa, nou pé rivé a pèd vi an nou !

PRÉPARÉ-W DÉPI KONNYÉLA !

17. Si nou ka préparé-nou dépi konnyéla pou gwo tribilasyon-la ki ka vin la, ka nou ké rivé fè ?

¹⁷ Lèwvwè « gran jou a Jéova » ké rivé, limanité ké soufè toubònman (Sof. 1:14, 15). Sèwvitè a Jéova ké jwenn éprèv osi. Men si nou, nou ka préparé-nou dépi konnyéla, nou ké rivé rété kalm é nou ké pé édé lézòt osi. Nou ké andiré tout sé difikilté-la nou ké jwenn la. Nou ké fè tousa nou pé pou édé frè é sè an nou. Pousa, nou ké aji èvè konpasyon épi yo é nou ké édé-yo ni sa yo bizwen pou viv. Nou ké rété bon bon zanmi èvè yo osi pas piti-a-piti nou fè éfò pou nou enmé-yo. Alò Jéova ké rékonpansé-nou é i ké ban-nou lavi étèwnèl. É adan mond-la nou ké ka viv adan-y la, nou pé’é sonjé sé éprèv-la é sé katastwòf-la ankò (Iz. 65:17).