AWTIK POU ÉTIDYÉ 20
KANTIK 7 Jéova, fòs an nou
Jéova ké konsolé-w
« Louwé […] Papa-la ki ka pran penn an nou èvè tandrès é Dyé a tout konsolasyon la » (2 KOR. 1:3).
ON TI LIDÉ ASI SA NOU KAY VWÈ
Nou ké ègzaminé jan-la Jéova aji la èvè sé Juif-la yo té chayé Babilòn pa fòs é nou ké vwè ka sa pé aprann-nou.
1. Rakonté kijan sé Juif-la té ka viv lè yo chayé-yo Babilòn pa fòs.
PANNAN lanné é lanné, sé Juif-la pa kouté Jéova é yo fè sa a plizyè rèpriz. Anfinaldikont, Jéova pèwmèt sé Babilonyen-la détwi péyi a yo é chayé-yo Babilòn pa fòs. Kijan vi a yo té yé koté-lasa ? (2 Kron. 36:15, 16, 20, 21). Sé vré, yo té pé menné vi a yo tibwen kon yo té abityé fè-y avan (Jér. 29:4-7). Men konnyéla, lavi pa té fasil Babilòn. Konfèdmanti, si yo té pé chwazi, a pa vi-lasa yo té’é chwazi. Ka yo té ka rèsanti parapòt a sa ? Mi sa yonn adan yo di : « Nou sizé òbò gran rivyè a Babilòn. Nou pléré lè nou sonjé Syon » (Sòm 137:1). Dé bra a sé Juif-la té kasé menm é yo té vréman bizwen yo konsolé-yo. Kimoun ki té’é pé konsolé-yo ?
2-3. a) Ka Jéova fè pou sé Juif-la yo té chayé Babilòn pa fòs ? b) Ka nou ké vwè adan awtik-lasa ?
2 Jéova sé « Dyé a tout konsolasyon la » (2 Kor. 1:3). I enmé sèwvitè a-y é i anvi konsolé-yo. I té sav byen kè lèwvwè sé Juif-la té’é Babilòn, sèwten adan yo té’é règrété yo pa té kouté-y é i té sav osi kè yo té’é viré an 2 bra a-y (Iz. 59:20). Sé pousa, plis ki 100 an avan yo té chayé-yo Babilòn, Jéova té ba pwofèt Izayi on mésaj pou yo é mésaj-lasa, nou ka touvé-y adan liv a Izayi. Kijan liv a Izayi té’é édé-yo ? Mi sa Izayi di : « Konsolé pèp an mwen, konsolé-y » (Iz. 40:1). Adan liv a Izayi, Jéova ka ba sé Juif-la ki té Babilòn konsolasyon-la yo té bizwen la.
3 Kon sé Juif-la yo té chayé Babilòn pa fòs, délè, nou osi nou bizwen yo konsolé-nou. Adan awtik-lasa, nou ké vwè 3 biten Jéova fè pou konsolé sé Juif-la yo té chayé Babilòn pa fòs : 1) I pwomèt i ké padonné séla ki ka rèpanti-yo la, 2) i ba pèp a-y on èspwa é 3) i trankilizé-yo pou lapè pa té pran lanmen asi yo. Nou ké vwè kijan Jéova ka konsolé-nou nou osi jòdijou.
JÉOVA KA PADONNÉ-NOU
4. Kijan Jéova montré kè i té ka pran penn a sé Juif-la ? (Izayi 55:7).
4 Jéova sé « Papa-la ki ka pran penn an nou èvè tandrès » (2 Kor. 1:3). I montré sa lèwvwè i pwomèt sé Juif-la ki té rèpanti-yo la kè i ké padonné-yo (li Izayi 55:7). Mi sa i di : « Pas an ni on lanmou ki fidèl é ki pa’a jen fin, an ké pran penn a-w » (Iz. 54:8). Men aprésa, kijan i montré i té ka pran penn a yo ? Sé vré, Jéova pini tout pèp-la akòz dè sé mové biten-la yo té ka fè la, men Jéova té pwomèt-yo kè a pa pou touttan yo té’é rété Babilòn (Iz. 40:2). Sèten sé pawòl-lasa konsolé é rasiré sé Juif-la ki rèpanti-yo la !
5. Poukwa nou pi sèten ki sé Juif-la kè Jéova ka padonné péché an nou ?
5 Ka sa ka aprann-nou ? Jéova paré a padonné sèwvitè a-y a san pou san. Sé Juif-la té sèten dè sa, men nou, nou pi sèten dè sa ankò. Poukwa nou ka di sa ? Paskè nou sav ka Jéova fè pou i té pé sa padonné péché an nou. Plizyè syèk apré Izayi té anonsé pwofési-lasa, Jéova voyé Gason-la i té pi enmé la asi latè pou bay vi a-y an ranson pou moun ki péché é ki ka rèpanti-yo. É davwa Jézi mò pou nou, Jéova pé padonné péché an nou a san pou san (Akt 3:19 ; Iz. 1:18 ; Éféz. 1:7). Jéova sé vréman on Bondyé ki ka padonné moun !
6. Lè nou ka pran tan réfléchi asi jan Jéova ka padonné-nou, sa ka konsolé-nou. Poukwa nou ka di sa ? (gadé imaj-la osi).
6 Sé pawòl-la Jéova fè maké la an Izayi 55:7 pé édé-nou si nou ka santi-nou koupab parapòt a érè nou fè. Nou pé santi-nou konsa, davwa nou ka soufè akòz dè érè-la nou fè la magré nou ja rèpanti-nou. Men si nou ja di sé ansyen-la péché-la nou fè la é si nou ja arété fè sa ki mové, nou pé sèten kè Jéova ja padonné-nou. É lè Jéova ka padonné-nou, i ka désidé kè i pa’a sonjé péché-la nou fè la ankò (konparé èvè sa ki maké adan Jérémi 31:34). Si Jéova pa ka rété ka sonjé péché an nou, nou ka tou konprann kè fò pa nou rété ka sonjé-yo nonplis ! (Ézék. 33:14-16). É talè, Papa-la ki ka pran penn an nou èvè tandrès ké woté tout sé difikilté-la nou ka jwenn la akòz dè péché nou fè.
Sa ki ka konté pou Jéova, a pa sé érè-la nou ni lokazyon fè la, men sé sa nou ka fè konnyéla (gadé paragraf 6 la).
7. Siwvwè nou fè on péché é kè nou kaché sa, ka ki ké ban-nou balan pou nou ay di sa nou fè ?
7 Ka pou nou fè siwvwè konsyans an nou ka bat-nou pas nou fè on péché ki grav é kè nou kaché sa ? Labib ka di-nou ay vwè sé ansyen-la pou mandé-yo édé-nou (Jak 5:14, 15). Pli souvan ki rarman, lèwvwè nou fè on péché, sa pa fasil dè di sa nou fè. Men nou pé sèten kè Jéova é sé nonm-la i chwazi la pou pran swen an nou ké aji èvè lanmou é konpasyon épi nou. Siwvwè nou ka mèt sa fon an tèt an nou é kè nou ka règrété sa nou fè, nou ké rivé ay palé ba sé ansyen-la. An-nou vwè kijan mizérikòd a Jéova konsolé on frè non a-y sé Arthura. Konsyans a-y té ka bat-li oséryé menm. Mi sa i ka di : « Pannan 1 an apépré, an gadé biten pòwno. Men on jou, an tann on diskou ki té ka palé dè konsyans-la noutout ni la. Alò an palé ba madanm an mwen é an palé ba sé ansyen-la osi. An di-yo tout biten-la. Sa soulajé-mwen onlo, men lè an té ka sonjé adan ki vyé vis an té tonbé la, sa té ka malmenné-mwen toujou. Sé ansyen-la fan’an sonjé kè Jéova pa lagé-mwen. I ka korijé-nou pas i enmé-nou. Yo té tèlman janti lè yo palé ban mwen. Sa rasiré-mwen é sa édé-mwen vwè-mwen kon Jéova ka vwè-mwen. » Jòdijou, Arthur pyonyé é i asistan adan lasanblé a-y. A pa ti kontan nou kontan sav kè si nou ka rèpanti-nou poudèbon, Jéova toujou paré a padonné-nou !
JÉOVA KA BAN-NOU ON ÈSPWA
8. a) Ki bèl èspwa Jéova ba sé Juif-la yo té chayé Babilòn pa fòs ? b) Dapré Izayi 40:29-31, kijan sé Juif-la ki rèpanti-yo la réyaji davwa Jéova ba-yo on bèl èspwa ?
8 Sé Juif-la té’é pé mèt an tèt a yo kè yo pa té’é jen viré adan péyi a yo. An jénéral, sé Babilonyen-la pa jen té ka lagé moun yo té menné Babilòn pa fòs (Iz. 14:17). Men Jéova ba pèp a-y on èspwa. I pwomèt-yo kè i té’é libéré-yo é kè ayen pa té’é anpéché-y fè sa (Iz. 44:26 ; 55:12). Pou Jéova, Babilòn sé té on ti grenn pousyè (Iz. 40:15). É lè ou ka souflé asi pousyè-la, i ka volé ! Lè sé Juif-la tann bèl èspwa-lasa, kijan sa aji asi yo ? Ében sa konsolé-yo. Men anplis, sa aji asi yo ondòt jan. Mi sa Izayi maké : « Moun ki ka mèt èspwa a yo adan Jéova ké woupran fòs » (li Izayi 40:29-31). Sé Juif-la ‘té’é volé ho an syèl-la konsi yo té ni zèl kon ta sé èg-la’ pas bèl èspwa-lasa té’é ba-yo bon fòs.
9. Poukwa sé Juif-la té sèten kè Jéova té’é réyalizé pwomès a-y ?
9 Sé Juif-la té sèten kè Jéova té’é réyalizé pwomès-la i té fè-yo la, pas Jéova té ba-yo laprèv kè sa té’é fèt. Kijansa ? An-nou vwè sé pwofési-la ki té ja réyalizé la. Lasiri té pran wayòm a sé 10 tribi a Israèl la é sé Asiriyen-la té pati èvè sé moun-la ki té ka rété la (Iz. 8:4). Sé Babilonyen-la té détwi Jérizalèm, é sé moun-la ki té ka rété la, yo té chayé-yo Babilòn pa fòs (Iz. 39:5-7). Yo krévé zyé a Sédésyas é yo chayé-y Babilòn pa fòs (Jér. 39:7 ; Ézék. 12:12, 13). Sé konsa, tousa Jéova té di réyalizé é sé Juif-la té sav sa byen (Iz. 42:9 ; 46:10). Kifè, lè Jéova di-yo kè i té’é libéré-yo, sé Juif-la pa té ni pon dout asi sa.
10. Ka ki ké édé-nou kontinyé èspéré magré nou ka viv pannan dènyé jou a mond-lasa ?
10 Ka sa ka aprann-nou ? Lèwvwè nou ka santi-nou dékourajé, èspérans an nou pé konsolé-nou é i pé wouban-nou fòs. Magré sitiyasyon-la ka vin dè plizanpli mové asi latè é kè dé lènmi ki puisan toubònman ka mèt baton an wou an nou, nou pa’a pèd èspwa. Jéova ka pwomèt-nou kè nou ké viv pou touttan adan paradi-la é lè nou ké la, nou ké viv anpé é ansékirité. Fò nou kontinyé konsantré-nou asi èspérans-lasa. Si nou pa’a fè sa, sé té’é tibwen konsi nou ka gadé on koté ki bèl toubònman pa finèt an nou, men konm vit a finèt-la sal, nou pa’a byen vwè. Kijan nou pé nétwayé « vit a finèt an nou », kivédi, kijan nou pé konsantré-nou asi èspérans an nou ? Nou pé pran labitid imajiné jan vi an nou ké bèl adan nouvo mond-la. Nou pé li sé awtik-la, gadé sé vidéo-la é kouté sé chanson-la ki anrapò èvè èspérans an nou. É nou pé palé Jéova dè tout sé biten-la nou ja présé vwè an 2 zyé an nou adan paradi-la.
11. Ni on biten ki ka ba on sè ki malad bon malad la onlo fòs. Ki biten ésa ?
11 Joy, sé on sè ki malad bon malad la. An-nou vwè kijan èspérans-la ka konsolé-y é ka ba-y bon fòs. Mi sa i ka di : « Lèwvwè moral an mwen a zéwo, an ka di Jéova tousa ki an fon a tchè an mwen. An sav i ka konprann-mwen é kè i ka réponn-mwen. Pousa, i ka ban-mwen “puisans-la ki ka dépasé sa ki nòwmal” » (2 Kor. 4:7). Anplisdisa, Joy ka imajiné-y adan nouvo mond-la lèwvwè ‘ponmoun pé’é di an malad’ (Iz. 33:24). Si nou osi, nou ka di Jéova tousa nou ka rèsanti é kè nou toujou ka konsantré-nou asi bèl èspwa-la nou ni la, nou ké ni bon fòs.
12. Pou ki rézon nou pé fè sé pwomès-la Jéova fè-nou la konfyans ? (gadé imaj-la osi).
12 Kon Jéova fè pou sé Juif-la, i ka ban-nou plizyè rézon pou nou fè-y konfyans nou osi. Sonjé sèwten pwofési ki ja réyalizé. Pa ègzanp, pwofési-la ki anrapò èvè puisans mondyal la ki ka dirijé latè alèla, ka di kè ‘on pati a puisans-lasa fò é lòt pati a-y fèb’ (Dan. 2:42, 43). Ni ‘tranmanntè ki ka fèt on koté apré lòt’ é nou ka préché bon nouvèl a Wayòm-la « ba tout sé nasyon-la » (Mat. 24:7, 14). Lè nou ka vwè sé pwofési-lasa é onlo dòt ankò ka réyalizé an 2 zyé an nou, nou pi sèten ankò kè sélézòt bèl pwomès-la Jéova fè-nou la ké réyalizé.
Sé pwofési-la ki ka réyalizé anba zyé an nou jòdijou ka ban-nou onpakèt rézon pou kwè adan sé pwomès-la Jéova fè-nou la (gadé paragraf 12 la).
JÉOVA KA TRANKILIZÉ-NOU POU NOU PA LÉSÉ LAPÈ PRAN LANMEN ASI NOU
13. a) Ki difikilté sé Juif-la té’é jwenn lèwvwè sé Babilonyen-la té’é lésé-yo pati ? b) Dapré Izayi 41:10-13, kijan Jéova rasiré sé Juif-la yo té chayé Babilòn pa fòs ?
13 Menmsi èspérans-la Jéova té ba sé Juif-la yo té chayé pa fòs la té ka konsolé-yo, yo té’é jwenn difikilté kanmenm lèwvwè sé Babilonyen-la té’é lésé-yo pati. Jéova té ja sav sa. I té ja anonsé kè on ti moman avan sé Babilonyen-la té’é lagé sé Juif-la, on wa ki puisan toubònman té’é pran lanmen asi sé téritwa-la ki alantou a Babylòn é i té’é fin pa pran lanmen asi Babilòn osi (Iz. 41:2-5). Ès fò sa té fè sé Juif-la pè ? Jéova té ja rasiré pèp a-y lontan avan sa fèt. Mi sa i té di-yo : « Pa pè, pas an la èvè-w. Pa chaléré kò a-w, pas an sé Dyé a-w » (li Izayi 41:10-13). Lè Jéova di « an sé Dyé a-w », ka i té vé di ojis ? A pa té pou fè sé Juif-la sonjé kè fò yo té adoré-y, pas sa té ja klè an tèt a yo. Sa i té vé, sé fè-yo sonjé kè li, Bondyé a yo, té’é rété èvè yo (Sòm 118:6).
14. Ki dòt biten Jéova fè pou sé Juif-la pa té pè ankò ?
14 Pou trankilizé sé Juif-la ki té Babilòn la, Jéova fè-yo sonjé jan puisans a-y pa ni limit é jan i ni onlo onlo konésans. Pou yo konprann sa, i mandé-yo lévé tèt a yo é gadé sé zétwal-la ki an syèl-la. I di-yo osi kè non sèlman i kréyé sé zétwal-la, men i ka kriyé-yochak pa non a yo (Iz. 40:25-28). Alò a pa non a sèwvitè a-y i pé’é konnèt ! Anplisdisa, si i té ni asé fòs pou kréyé sé zétwal-la, a pa fòs i pa té’é ni pou okipé dè pèp a-y. Sé Juif-la yo té chayé Babilòn pa fòs té pé sèten dè sa. Yo pa té bizwen pè, é yo pa té bizwen pran tèt a yo pou sa ki té’é pasé.
15. Ka Jéova té mandé pèp a-y fè lèwvwè lè-la té’é rivé pou yo sòti Babilòn ?
15 Jéova té ja di pèp a-y osi ka pou yo té fè lèwvwè lè-la té’é rivé pou sé Babilonyen-la lagé-yo. Tibwen tan avan, adan pwofési a Izayi, mi sa i té di pèp-la : « Rantré adan sé pyès a-w la ki pli fon la é fèmé sé pòt-la dèyè do a-w. Kaché-w on ti moman, jistan kòlè-la pasé » (Iz. 26:20). Pétèt sé Juif-la suiv sé enstriksyon-lasa lèwvwè wa Siris ataké Babilòn. On èspésyalis a listwa ki viv an tan lontan di konsa kè lèwvwè Siris rantré Babilòn, i mandé sòlda a-y « tchouyé tout sé moun-la ki té’é déwò-lab ». Imajiné jan sé moun-la ki té ka rété Babilòn dwèt té pè. Men sèten ayen pa rivé sé Juif-la yo té chayé Babilòn pa fòs, pas yo kouté Bondyé.
16. Poukwa fò pa nou enkyété-nou pou sa ki ké pasé pannan gwo tribilasyon-la ? (gadé imaj-la osi).
16 Ka sa ka aprann-nou ? Talè, gwo tribilasyon-la ké koumansé, é lèwvwè i ké koumansé, sé moun-la ké pè é yo ké pèd lakat. Men pèp a Jéova pé’é konsa. Nou sav kè Jéova sé Bondyé an nou. Alò nou ké kontinyé fè-y konfyans pas nou sav kè ‘délivrans an nou toupré rivé’ (Lik 21:28). Menm lèwvwè sé nasyon-la ké mèt-yo ansanm pou ataké-nou, nou ké rété doubout pikan. Jéova ké sèvi èvè zanj a-y pou pwotéjé-nou é i ké di-nou ka pou nou fè pou nou sové. Kijan nou ké ni sé enfòwmasyon-lasa ? Ében lèwvwè moman-la ké rivé, nou ké sav kijan. Men i ka sanm sa kè sé ké adan lasanblé an nou kè nou ké ni sé enfòwmasyon-lasa. Adan on sans, sé ‘pyès an nou la ki pi fon la’, sé sé lasanblé-la é sé la nou ké ansékirité. Alò, ka pou nou fè pou nou paré pou jou-lasa ? An-nou vin pi bon zanmi èvè frè é sè an nou, an-nou pran labitid obéyi lèwvwè lòwganizasyon ka ban-nou on dirèksyon, é fò-nou sèten osi kè òwganizasyon-la nou adan-y la, sé Jéova ki ka gidonné-y (Ébr. 10:24, 25 ; 13:17).
Konm nou sav kè Jéova puisan toubònman é kè i kapab sové-nou, nou pa ka enkyété-nou parapòt a sa ki ké fèt pannan gwo tribilasyon-lac (gadé paragraf 16 la).
17. Ka ou pé fè pou Jéova konsolé-w ?
17 Alò wi, sé vré, lavi pa té fasil ba sé Juif-la yo té chayé Babilòn pa fòs, men Jéova konsolé-yo é i rasiré-yo. I ké fè menm biten pou nou. Alò kèlkanswa sa ki té’é pé rivé dèmen, ou pé sèten kè Jéova ké konsolé-w. Sonjé jan Jéova ni onlo mizérikòd, konsantré-w asi bèl èspérans a-w é pa jen oubliyé kè konm Jéova sé Bondyé a-w, ou pa bizwen pè ayen.
KANTIK 3 Ou sé fòs an nou, èspwa an nou, konfyans an nou
a Yo chanjé sèwten non.
b Xénophon, Cyropédie (ou Éducation de Cyrus), liv. VII, chap. V, trad. P. Chambry, Paris, Éditions Garnier, 1958, p. 265-266.
c SA NOU KA VWÈ ASI IMAJ-LA : Déotwa frè é sè sanblé. Yo ka sonjé jan Jéova ni onlo puisans é kè i pé pwotéjé sèwvitè a-y kèlkèswa koté-la yo yé la asi latè.