Jéova « ka géri moun tchè a yo fann »

1. Ka Jéova ka rèsanti lè i ka sonjé sèwvitè a-y ?

JÉOVA ka vwè tousa sèwvitè a-y ka viv. I ka vwè lè nou kontan é i lè nou tris osi (Sòm 37:18). Lè i ka vwè kè nou ka fè tousa nou pé pou nou sèvi-y magré nou ni bobo an tchè an nou, sa ka touché-y toubònman ! I anvi soutyenn-nou é i anvi konsolé-nou.

2. Ka Jéova ka fè pou moun tchè a yo an bobo é kijan nou pé bénéfisyé dè sa ?

² Sòm 147:3 ka di kè Jéova ka pansé bobo a moun tchè a yo fann. Sa vé di kè lèwvwè tchè a on moun an bobo, Jéova ka pran swen a-y èvè onlo tandrès. Men ka nou pé fè pou i pé sa pran swen an nou èvè tandrès ? An-nou pran on ègzanp pou nou konprann sa. Lè on moun malad bon malad la, on bon dòktè pé édé-y onlo menm. Men pousa, fò moun-la ki malad la fè tousa dòktè-la ka mandé-y fè. Menmjan-la, adan Pawòl a-y, Jéova ka palé ba moun tchè a yo an bobo. Adan awtik-lasa, nou ké vwè ka i ka di-yo é nou ké vwè osi kijan yo pé mèt sé konsèy-la i ka ba-yo la an pratik.

JÉOVA KA FÈ-NOU SONJÉ KÈ NOU NI ONLO VALÈ POU-Y

3. Poukwa sèwten moun ka pansé kè yo pa ni pon valè ?

³ Adan mond-la nou ka viv adan-y la, pa ni lanmou. Moun ka fè dòt moun soufè, kifè onlo moun ka pansé kè yo pa ni pon valè. Mi sa on sè non a-y sé Helena ka di : « Adan fanmi an mwen, pa té ni lanmou. Pap’an mwen té ka vougaré-mwen é touléjou i té ka di-mwen kè an pa té ni pon valè. » Pétèt kè vou osi, yo malmenné-w oben pétèt kè souvantfwa yo té ka méprizé-w. Pétèt osi kè jan-la yo té ka aji èvè-w la ka fè kè jòdla ou ka pansé kè ou pa ni pon valè. Si sé sa ou viv, ou pé ni dimal a kwè kè on moun enmé-w vréman.

4. Dapré Sòm 34:18, lè tchè a on moun fann, ka Jéova ka rèsanti pou moun-lasa é ka i ka pwomèt kè i ké fè ba-y ?

⁴ Menmsi yo ja malmenné-w onlo adan vi a-w, ni on biten ou pé sèten a san pou san : Jéova enmé-w é ou ni onlo onlo valè pou-y. I « toupré a moun tchè a yo fann » (li Sòm 34:18). Si ou « dékourajé », sonjé kè Jéova vwè sé bèl kalité-la ou ni la é kè sé-y ki atiré-w pou-w vin owa a-y (Jan 6:44). I toujou paré pou édé-w pas ou ni onlo valè pou-y.

5. Jézi pa té ka aji nenpòt kijan èvè moun yo té ka méprizé. Ka sa ka aprann-nou ?

⁵ Ègzanp a Jézi pé édé-nou konprann pibyen ka Jéova ka rèsanti pou lézimen. Lè i té asi latè, Jézi té ka sousyé-y onlo dè moun yo té ka méprizé, é i té ka aji èvè onlo konpasyon épi yo (Mat. 9:9-12). On jou, on madanm ki té ni on maladi ki té rèd toubònman vin mannyé lenj a Jézi pou vwè si i ka géri. Jézi konsolé-y é i félisité-y pou jan i aji èvè fwa (Mawk 5:25-34). Jézi ka imité Pap’a-y a san pou san (Jan 14:9). Alò ou pé sèten kè ou ni onlo valè pou Jéova é kè non sèlman i ka vwè bèl kalité kè ou ni, men i ka vwè jan ou ni fwa adan-y é jan ou enmé-y osi.

6. Si ou ni lenprésyon kè ou pa vo ayen é kè lidé-lasa fon an tèt a-w, ka pou ou fè ?

⁶ Si ou ni lenprésyon kè ou pa vo ayen é kè lidé-lasa fon an tèt a-w, ka ou pé fè ? Ében li dé pasaj ki ka montré-w kè ou ni valè pou Jéova é pran tan réfléchi asi yob (Sòm 94:19). Pa konparé-w èvè lézòt é pa konsantré-w asi sa ou pa’a rivé fè. Jéova pa’a mandé-w fè dé biten ki two fò pou-w (Sòm 103:13, 14). Si yo fè-w vwè mizè lèwvwè ou té piti oben kè yo fè malpwòpté èvè-w, pa di kè sé fòt a-w. Pa mèt an tèt a-w kè tousa ki rivé-w la, ou té mérité-y ! Sonjé kè li Jéova a pa konsa i ka vwè sa. Pou-y, moun-la ki ka fè mové biten, sé-y ki koupab é i ka édé moun ki ka soufè adan sa (1 Pyè 3:12). Sandra, sé on sè ki vwè bon mizè lèwvwè i té piti. Mi sa i ka di : « An ka mandé Jéova édé-mwen vwè sé bèl kalité-la i ka vwè adan mwen la. »

7. Kijan sa nou viv dan lèpasé pé sèvi-nou ?

⁷ Ou pé sèten kè Jéova pé itilizé-w pou édé dòt moun. Sonjé kè lè ou ka préché, sé travay ou ka travay ansanm èvè-y é sé on bèl lonnè toubònman (1 Kor. 3:9). Davwa ou ja viv onlo biten adan vi a-w, pétèt sa ka édé-w konprann lézòt pibyen é pétèt sa ka édé-w konprann jan yo ka soufè. Ou pé fè onlo biten pou édé-yo ! Helen sé on sè nou palé dè-y talè-la. Jéova édé-y é frè é sè a-y édé-y osi kifè alè limenm a-y kapab édé lézòt. Mi sa i ka di : « Avan, an té ni lenprésyon kè an té on ti kakazwa, men alè, grasa Jéova, an ka santi kè moun ki alantou an mwen enmé-mwen é an ka santi-mwen itil pou lézòt. » Helen pyonyé pèwmanan konnyéla é i kontan ti sèwvis a-y.

JÉOVA VÉ NOU AKSÈPTÉ KÈ I PADONNÉ-NOU

8. Ka Jéova ka pwomèt-nou adan Izayi 1:18 ?

⁸ Sèwten moun ki ka sèvi Jéova ka santi-yo koupab parapòt a péché yo ni lokazyon fè. Sé pé dé biten yo fè avan yo té pran lèbatèm oben apré yo batizé. Men on biten pou nou pa jen oubliyé sé kè Jéova enmé-nou onlo toubònman é i bay vi a Gason a-y an ranson pou padonné péché an nou. Sé on bèl kado i fè-nou é i vé nou aksèpté kado-lasa. Dépi nou « woumèt zafè an nou annòd » èvè-yc, i ka padonné-nou é i pa’a fè-y adèmi. Kijan nou fè sav sa ? Ében sé Bondyé limenm a-y ki ka pwomèt-nou sa (li Izayi 1:18). Ou ka imajiné-w, Jéova pa ka sonjé sé péché-la nou ni lokazyon fè la. A pa lanmou sa ? Pawkont ni on biten i pé’é jen oubliyé, sé tout sé bon biten-la nou ka fè pou-y la (Sòm 103:9, 12 ; Ébr. 6:10).

9. Olyé nou sonjé sé péché-la nou ni lokazyon fè la, ka pou nou fè ?

⁹ Si sa ou fè dan lèpasé ka tèwbolizé lèspri a-w toujou, fè tousa ou pé pou sonjé sa ou ka fè konnyéla é sa ou ké kapab fè an paradi-la. An-nou pran ègzanp a lapòt Pòl. I fè sé krétyen-la bon abominasyon, é i té ka règrété sa. Men i té sav kè Jéova té padonné-y (1 Tim. 1:12-15). Ès toutlè i té ka wouvin asi sé péché-la i té fè la ? Awa. Sèten i pa té ka rété ka réfléchi asi ki jan dè moun i té yé avan i té vin krétyen é asi sa i fè (Filip. 3:4-8, 13-15). Pawkont, i té ka préché èvè onlo balan é i té ka konsantré-y asi sa Bondyé pwomèt. Kon Pòl, ou pé pa chanjé lèpasé. Men ou pé ba Jéova glwa é fè-y plézi konnyéla é ou pé konsantré-w asi bèl biten Jéova pwomèt-nou pou dèmen.

10. Ka nou pé fè si moun ka soufè akòz dè mové biten nou ni lokazyon fè ?

¹⁰ É vinvwè ou fè moun ditò é kè sa ka tèwbolizé lèspri a-w toujou, ka ou pé fè ? Ében fè tousa ou pé pou aji pibyen èvè sé moun-lasa. Mandé-yo padon é fè-yo santi jan ou ka règrété sa ou fè la (2 Kor. 7:11). Ou pé mandé Jéova osi édé sé moun-la ki ka soufè akòz dè mové biten ou fè. Jéova pé édé-yo men i pé édé-w osi pou zò kontinyé sèvi-y é i pé trankilizé lèspri a zòt.

11. Ka ègzanp a pwofèt Jonas ka aprann-nou ? (gadé osi imaj-la ).

¹¹ Fè ansòt pou sé érè-la ou ni lokazyon fè la sèvi-w lèson, é lésé Jéova sèvi èvè-w jan-la i vlé la. Sonjé sa ki rivé pwofèt Jonas. Olyé i ay Niniv kon Jéova té mandé-y, i chapé kò a-y lwen lwen lwen a Niniv. Men Jéova korijé Jonas. Sé érè-la i fè la sèvi-y lèson (Jonas 1:1-4, 15-17 ; 2:7-10). Jéova pa lagé Jonas. I ba-y ondòt chans : i woumandé-y ay Niniv. Kou-lasa, Jonas pa fè ni yonn ni dé, i obéyi onfwa menm. Menmsi i té ka règrété érè-la i fè la, sa pa anpéché-y aksèpté travay-la Jéova té ka ba-y la (Jonas 3:1-3).

JÉOVA KA SÈVI ÈVÈ LÈSPRI SEN A-Y POU KONSOLÉ-NOU

12. Lè ou viv dé biten ki rèd toubònman, kijan Jéova pé trankilizé-w ? (Filipyen 4:6, 7).

¹² Lèwvwè nou viv dé biten ki té rèd toubònman, Jéova pé konsolé-nou grasa lèspri sen a-y. Ron é Carol sé on fanmi ki pèd gason a yo. I suisidé-y. Mi sa yo ka di asi sa : « Nou té ja pasé bout-rèd adan vi an nou, men nou pa’a manti ba-zòt, tala sé té pi rèd la menm. Nou rété onlo tan pa’a dòmi lannuit é a moman-lasa, nou té ka priyé Jéova. Aprésa nou té ka santi-nou anpé é pé-lasa sé tala yo ka palé la adan Filipyen 4:6, 7 » (li-y). Si vou osi ou ka jwenn éprèv é kè tchè a-w ka sengné, wouvè tchè a-w ba Jéova é sonjé kè ou pé fè sa kantité fwa ou vé é ou pé fè sa kantité tan ou vé (Sòm 86:3 ; 88:1). Chakfwa ou ka priyé, sonjé mandé-y lèspri sen a-y. I pé’é jen pa réponn-vou (Lik 11:9-13).

13. Kijan lèspri sen a Jéova pé édé-nou kontinyé rété fidèl a-y ? (Éfézyen 3:16).

¹³ Ès ou jwenn on éprèv ki té rèd toubònman é konnyéla ou ka santi ou pa gè ni fòs pou fè ayen ankò ? Si sé ka a-w, lèspri sen pé ba-w fòs-la ou bizwen la pou kontinyé rété fidèl a Jéova (li Éfézyen 3:16). An-nou vwè ègzanp a Flora, on sè ki té misyonè èvè mari a-y. Malérèzman, mari a-y tronpé-y é yo divòsé. Mi sa Flora ka di : « Lèwvwè sa fèt, a pa ti angwasé sa té ka angwasé-mwen é sé enki sa an té ka sonjé. An mandé Jéova lèspri sen a-y pou an pa lagé, é i ban-mwen sa an té bizwen pou an woupran doubout an mwen é pou an andiré sa an pa té jen konpranndèdi an té’é rivé andiré. » Flora sèten kè Jéova édé-y a fè-y konfyans plis ankò é i sèten kè i ké soutyenn-li adan tout sé éprèv-la i ka jwenn la. Flora ka di kè sa ki maké an Sòm 119:32 ka montré byen kijan Jéova édé-y. Mi sa vèwsé-la ka di : « An ké présé suiv komandman a-w, pas ou préparé on plas ba yo an tchè an mwen. »

14. Kijan nou pé lésé lèspri sen a Bondyé édé-nou ?

¹⁴ Apré kè ou mandé Jéova lèspri sen, ka pou-w fè ? Ou pé fè dé biten ki ké fè-w ni lèspri sen a-y plis ankò. Prèmyé biten ou pé fè pou sa, sé ay réinyon é préché. Li bib a-w touléjou osi, konsa sé sa Jéova ka pansé ki ké an lèspri a-w (Filip. 4:8, 9). Toupannan ou ka fè lèkti a-w, chwazi istwa a on moun ki adan Labib é ki jwenn éprèv é pran on tan pou réfléchi asi jan Jéova soutyenn-li. Sé sa Sandra nou palé dè-y talè la fè. A moman-lasa, i té ka jwenn éprèv si éprèv é mi sa i ka di : « Istwa a Jozèf ka touché-mwen onlo toubònman. I pa jen lésé sé éprèv-la i jwenn la é sé enjistis-la i sibi la anpéché-y rété bon bon zanmi èvè Jéova » (Jén. 39:21-23).

JÉOVA KA SÈVI ÈVÈ FRÈ É SÈ AN NOU POU KONSOLÉ-NOU

15. Kimoun ki pé konsolé-nou é kijan yo pé fè sa ? (gadé imaj-la osi).

¹⁵ Lè nou ka soufè, frè é sè an nou pé vin « on gran sous a konsolasyon » pou nou (Kol. 4:11). Jéova ka sèvi èvè yo pou montré-nou lanmou a-y. Yo ka konsolé-nou lèwvwè yo ka pasé tibwen tan èvè nou é lèwvwè yo ka kouté-nou. Délè, yo ka ankourajé-nou lè yo ka li on ti vèwsé ban nou oben lè yo ka priyé èvè noud (Wom. 15:4). Dépawfwa, on frè oben on sè pé fè-nou sonjé ka Jéova ka pansé é sa ka édé-nou kontinyé andiré. Siwvwè nou pa’a santi-nou byen, frè é sè an nou pé édé-nou ondòt mannyè ankò. Pa ègzanp, yo pé préparé on ti manjé ban nou.

16. Si ou vé lézòt édé-w, ka pou-w fè ?

¹⁶ Délè, fò noumenm an nou ké ay mandé frè é sè an nou édé-nou. Sé vré frè é sè an nou enmé-nou é yo vé soutyenn-nou (Pwov. 17:17). Men yo pa’a li an tchè an nou, alò yo pé pa sav tousa nou ka rèsanti é yo pa oblijé sav sa nou bizwen osi (Pwov. 14:10). Si tchè a-w an bobo, pa pè ay palé ba zanmi a-w ki byen doubout adan lavérité. Di-yo sa ou té’é bizwen yo fè ba-w. Ondòt biten ou pé fè osi sé chwazi on ansyen oben 2 ansyen ou ka santi-w alèz èvè yo é wouvè tchè a-w ba yo. Ni sèwten sè ki wouvè tchè a yo ba on sè ki mati é sa fè-yo onlo byen menm.

17. Délè, ni dé biten ki pé anpéché-nou lésé frè é sè an nou konsolé-nou. Ki biten ésa ?

¹⁷ Pa rété tousèl a-w. Sé vré kè lè tchè an nou an bobo, nou pa gè anvi pasé tan èvè dòt moun. Délè, frè é sè an nou pé ni mal a konprann-nou oben yo pé di-nou on biten ki pé fè-nou mal (Jak 3:2). Men fò pa nou rété dè koté an nou. Jéova pé sèvi èvè frè é sè an nou pou ankourajé-nou. Gavin sé on ansyen ki fè on déprésyon. Mi sa i ka di : « Souvantfwa an pa té anvi palé èvè zanmi an mwen oben pasé tan èvè yo. » Men i pa lésé sa i té ka rèsanti pran lanmen asi-y é i kontinyé pasé tan èvè frè é sè a-y. Sa té ka fè-y dibyen. Mi sa on sè non a-y sé Amy ka èspliké : « Sa an ja viv ka fè kè an ni dimal a fè lézòt konfyans. Men an ka aprann enmé frè é sè an mwen é an ka fè-yo konfyans, kon Jéova ka fè-y. An sav kè sa ka fè-y plézi, é sa ka ban-mwen tchè-kontan osi. »

SA JÉOVA KA PWOMÈT-NOU PÉ BAN-NOU FÒS

18. Lè nou ka sonjé sa ki ké fèt dèmen, poukwa nou pé ni on èspwa é ka nou pé fè dépi alè ?

¹⁸ Talè, Jéova ké woté tout soufrans asi latè. Pon maladi pé’é fè-nou soufè ankò, é pon biten nou viv pé ké fè-nou soufè nonplis (Rév. 21:3, 4). A moman-lasa pon biten « pé ké malmenné tchè an nou ankò » (Iz. 65:17). Men dépi alè, Jéova ka pran swen an nou lè nou ka soufè. I ka mèt enpé biten a dispozisyon an nou pou soutyenn-nou é pou konsolé-nou. I ka fè sa pas i enmé-nou. Alò pa pè sèvi èvè tousa i mèt a dispozisyon a-w. Mèt fon an tèt a-w osi kè Jéova ‘ka sousyé-y dè-w’ é pa jen douté dè sa (1 Pyè 5:7).