AWTIK POU ÉTIDYÉ 21
KANTIK 21 Kontinyé chèché Wayòm a Bondyé an prèmyé
Kontinyé fè vil-la ki la pou touttan konfyans
« Vil-la nou ka atann la menm, sé tala ki pou vin la » (ÉBR. 13:14).
ON TI LIDÉ ASI SA NOU KAY VWÈ
Nou ké vwè déotwa konsèy ki adan Ébré chapit 13. Nou ké vwè osi kijan yo itil ban nou dépi konnyéla é kijan yo ké itil ban nou dèmen.
1. Ka Jézi té anonsé anrapò èvè Jérizalèm ?
AVAN i mò, Jézi palé disip a-y dè on pwofési. I di-yo kè on jou ‘onpakèt sòlda té’é lantouré Jérizalèm’ (Lik 21:20). I di-yo osi kè lè yo té’é vwè sa, fò yo té’é chapé kò a yo onfwamenm (Lik 21:21, 22).
2. Ki konsèy lapòt Pòl ba sé krétyen-la ki té ka rété an Jidé é a Jérizalèm ?
2 Déotwa lanné tousèl avan sé sòlda women la té lantouré Jérizalèm, lapòt Pòl maké on lèt ba sé krétyen-la ki té ka rété an Jidé é a Jérizalèm. Adan lèt-lasa, té ni on mésaj ki té enpòwtan. Lèt-lasa sé liv a Ébré é adan-y, Pòl ba sé frè é sè la dé konsèy pou préparé-yo pou sa ki té ka vin dèyè. Ka ki té kay pasé ? Ében yo té kay détwi Jérizalèm. Sèl mannyè sé krétyen-la té’é rété vivan, sé si yo té paré a lésé kaz a yo é travay a yo. Sé pousa, mi sa Pòl maké anrapò èvè Jérizalèm : « Kotésit nou pa ni on vil ki la pou touttan. » É mi sa i di ankò : « Men vil-la nou ka atann la menm, sé tala ki pou vin la » (Ébr. 13:14).
3. « Vil-la ki ni fondasyon ki solid », ka sa yé ojis, é poukwa fò-nou mèt konfyans an nou adan-y ?
3 Lè sé krétyen-la désidé lésé Jérizalèm é Lajidé, onlo moun di kè yo fou é yo fè jé èvè tèt a yo. Men sé pas sé krétyen-la pati kè yo rivé sové vi a yo. Jòdijou osi, moun ka fè jé èvè nou pas nou pa ka ba lajan twòp enpòwtans é pas nou pa’a konté asi on nonm pou ranjé pwoblèm ki asi latè. Poukwa nou ka aji konsa ? Sé pas nou sav kè talè Bondyé kay détwi mond-la nou ka viv adan-y la. Kifè nou ka atann « vil-la ki ni fondasyon ki solid », « tala ki pou vin la », kivédi wayòm a Bondyéa (Ébr. 11:10 ; Mat. 6:33). Adan awtik-lasa, nou ké vwè : 1) kijan sé konsèy-la Pòl ba sé krétyen-la édé-yo mèt konfyans a yo adan wayòm a Bondyé, 2) kijan Pòl préparé sé krétyen-la pou sa ki té kay vin talè é 3) kijan sé konsèy-lasa ka édé-nou jòdijou.
MÈT KONFYANS A-W ADAN SILA KI PÉ’É JEN LAGÉ-W LA
4. Poukwa vil a Jérizalèm té enpòwtan konsa pou sé krétyen-la ?
4 Vil a Jérizalèm, sé té on vil ki té enpòwtan pou sé krétyen-la. Sé la yo té mèt prèmyé lasanblé-la anplas. Sa fèt an lan 33 é sé la komité santral la té yé osi. Anplisdisa, sé adan vil-lasa onlo krétyen té fè kaz a yo é yo té ni onlo biten la osi. Men Jézi avèti disip a-y. I di-yo kè non sèlman fò yo té’é lésé Jérizalèm men fò yo té’é lésé Lajidé osi (Mat. 24:16).
5. Kijan Pòl préparé sé krétyen-la pou sa ki té kay rivé ?
5 Konm Pòl té bizwen préparé sé krétyen-la pou yo té lésé Jérizalèm, i édé-yo konprann ka Jéova té ka pansé dè vil-lasa. I fè-yo sonjé kè Jéova pa té ka aksèpté ni sé prèt-la ki té adan tanp a Jérizalèm, ni sé sakrifis-la yo té ka fè ba-y la ankò (Ébr. 8:13). Lamajorité a sé moun-la ki té ka rété Jérizalèm pa té aksèpté Mési-la. Kifè, a pa koté-lasa moun té’é adoré Jéova ankò. Sé détwi yo té’é détwi Jérizalèm é tanp a-y (Lik 13:34, 35).
6. Poukwa fò Pòl té ba sé krétyen-la konsèy-la ki maké adan Ébré 13:5, 6 ?
6 Lè Pòl maké lèt-la i maké la ba sé Ébré-la, onlo moun té kontan rété Jérizalèm é onlo moun té ka vin pou vizité-y. On misyé women ki maké liv a épòk-lasa di konsa kè moun alantou a Jérizalèm té konnèt vil-lasa byen menm. Plizyè fwa adan lanné-la, onlo Juif té ka sòti adan enpé péyi pou vin Jérizalèm pannan sé fèt-la. Kifè, ni bon lajan ki té ka rantré adan vil-lasa. Sèwten krétyen dwèt té ka fè bon lajan osi. Pétèt sé pousa lapòt Pòl di sé krétyen-la : « Fò pa lanmou pou lajan dirijé mannyè zò ka viv ; kontanté-zòt dè sa zò ni. » Aprésa i fè-yo sonjé bèl pwomès-la Jéova ka fè chak sèwvitè a-y : « An pé’é jen kité-w, é an pé’é jen lagé-w » (li Ébré 13:5, 6 ; Dét. 31:6 ; Sòm 118:6). Plita, fò pa sé krétyen-la té oubliyé kè Jéova pa té’é jen lagé-yo. Poukisa ? Pas on ti moman apré yo rèsèvwa lèt-lasa, yo té’é oblijé lésé kaz a yo, travay a yo é onlo biten yo té ni. Aprésa, fò yo té’é ay rété ondòt koté é sa pa té’é fasil.
7. Poukwa sé dépi konnyéla pou nou fè Jéova konfyans plis ankò ?
7 Ka sa ka aprann-nou : Ka ki ké rivé talè ? ‘Gwo tribilasyon-la’ ké koumansé é Jéova ké détwi mond méchan lasa (Mat. 24:21). Fò nou véyatif é fò nou paré kon sé 1é krétyen-la (Lik 21:34-36). Pannan gwo tribilasyon-la, pétèt nou ké pèd kaz an nou é pétèt nou ké pèd tout zéfé an nou. A moman-lasa, fò nou ké sèten kè Jéova pé’é jen lagé-nou. Avan gwo tribilasyon-la koumansé, kivédi dépi konnyéla, nou pé montré jan nou ka fè Jéova konfyans. Mi sa ou pé mandé-w : « Sé désizyon-la an ka pran la é sé pwojé-la an ka fè la ka montré kè an ka fè fon asi Jéova oben asi lajan an mwen ? » (1 Tim. 6:17). Ègzanp a sé krétyen-la ki té ka viv o prèmyé syèk pé édé-nou rété fidèl pannan gwo tribilasyon-la. Men gwo tribilasyon-la sé on biten moun po’o jen vwè. Alò kijan nou pé sav ka pou nou fè ègzaktèman lè i ké koumansé ?
AN-NOU OBÉYI SÉLA KI KA DIRIJÉ-NOU LA
8. Ka Jézi té di sé disip-la ?
8 Déotwa lanné apré sé krétyen-la rèsèvwa lèt a Pòl, yo vwè lawmé a sé Women-la rivé alantou a Jérizalèm. Sa té vlé di kè lè-la té rivé pou yo té chapé pas yo té kay détwi Jérizalèm (Mat. 24:3 ; Lik 21:20, 24). Men ki koté fò yo té alé ? Sèl biten Jézi té di sé té : « Fò moun ki an Jidé chapé kò a yo pou yo ay adan sé montangn-la » (Lik 21:21). Adan réjyon-lasa té ni onlo montangn. Ki dirèksyon pou yo té pran ?
9. Poukwa sé krétyen-la dwèt mandé-yo ki koté pou yo kouri kaché ? (gadé kat-la osi).
9 An-nou vwè déotwa montangn sé krétyen-la té pé kouri kaché : séla ki té an Samari, séla ki té an Galilé, tala yo ka kriyé Èwmon, séla ki té o Liban é séla ki té lòt koté a Jouden-la (gadé kat-la). Adan sé montangn-lasa té ni plizyè vil sé moun-la té pé santi-yo ansékirité. Pa ègzanp, vil a Gamala té asi on montangn ki té ho é pou-w té rivé jous la, a pa té on ti afè. Alò sèwten Juif konpranndèdi kè si yo té k’ay la, yo té’é ansékirité. Men sé Women-la ataké vil-la é yo détwi-y. É yo tchouyé onlo moun adan vil-lasab.
Sé krétyen-la té pé ay kaché adan onlo montangn, men a pa adan yotout yo té’é ansékirité (gadé paragraf 9 la).
10-11. a) Kijan Jéova dwèt gidé sé krétyen-la ? (Ébré 13:7, 17). b) Lèfètkè sé krétyen-la obéyi séla ki té ka dirijé lasanblé-la, ki bon biten sa bay ? (gadé imaj-la osi).
10 I ka sanm sa Jéova sèvi èvè sé nonm-la ki té ka dirijé lasanblé-la pou gidé sé krétyen-la. On èspésyalis a listwa, non a-y sé Eusèbe, palé dè péryòd-lasa. I di kè Bondyé té ba déotwa frè Jérizalèm on pwofési pou fè-yo konprann kè fò sé krétyen-la té kité Jérizalèm pou yo ay an vil a Péla. Péla sé té méyè koté pou yo té ay. Konm i pa té lwen Jérizalèm, yo té pé ay la fasilman. Anplisdisa, konm lamajorité a sé moun-la ki té ka rété la pa té juif, yo pa té an lagè èvè sé Women-la (gadé kat-la).
11 Sé krétyen-la ki ‘obéyi séla ki té ka dirijé-yo la’ adan lasanblé-la chapé kò a yo adan montangn a Péla (li Ébré 13:7, 17). Yo obéyi é sé sa ki fè si yo rété vivan. Konm yo té ka atann wayòm a Bondyé, kivédi « vil-la ki ni fondasyon ki solid », Jéova pa lagé-yo (Ébr. 11:10).
Péla sé té on koté ou té ansékirité é i pa té lwen Jérizalèm (gadé sé paragraf 10 é 11 la).
12-13.Kijan Jéova ni lokazyon gidé pèp a-y lè biten-la té rèd ?
12 Ka sa ka aprann-nou : Jéova ka sèvi èvè sé frè-la ki antèt a òwganizasyon a-y pou ban-nou on dirèksyon byen prési. Nou ka touvé onlo ègzanp adan Bib-la ki ka montré kè Jéova ka sèvi èvè dé nonm ki fidèl pou gidé pèp a-y lèwvwè biten-la rèd (Dét. 31:23 ; Sòm 77:20). Jòdijou Jéova ka fè menm biten, é nou ka vwè sa an 2 zyé an nou.
13 Pa ègzanp, lè Covid-19 la vin lanmòd, ‘sé frè-la ki ka dirijé-nou la’ ba lasanblé-la dirèksyon-la i té bizwen la. Sé frè-lasa di sé ansyen-la kijan pou yo té fè sé réinyon-la pou nou té pé sa kontinyé adoré Jéova. Titak tan apré Covid-19 la koumansé, nou té ni lasanblé réjyonal an nou an pliski 500 lang. Frè é sè an nou té pé gadé pwogram-la anlè entèwnèt é asi télé-la, oben yo té pé kouté-y an radyo-la. Sé on biten ki poto’o jen fèt avan. Pannan péryòd-lasa, Jéova kontinyé anségné-nou, kifè nou rété soudé. Nou pé sèten kè kèlkèswa éprèv nou ké jwenn talè, Jéova ké kontinyé édé séla ki ka dirijé-nou la pou yo pran dé bon désizyon. Pou nou préparé-nou pou gwo tribilasyon-la, é pou nou aji èvè sajès lè biten-la ké vin rèd, fò nou fè Jéova konfyans é fò nou kouté sé frè-la ki ka dirijé-nou la. Men ki dòt biten pou nou travay ?
MONTRÉ FRÈ É SÈ A-W KÈ OU ENMÉ-YO É AKÉYI-YO BYEN
14. Dapré sa Ébré 13:1-3 ka di, kijan pou yonn té aji èvè lòt avan yo té détwi Jérizalèm ?
14 Lè gwo tribilasyon-la ké rivé, sé a moman-lasa pou yonn ké montré lòt kè i enmé-y plis ankò. Fò nou ké imité sé krétyen-la ki té ka rété Jérizalèm é séla ki té ka rété Jidé. Yonn té ja ka montré lòt kè i té enmé-y (Ébr. 10:32-34). Men pannan sé dènyé lanné-la ki té ka rété la avan yo détwi Jérizalèm, sé frè é sè la fè ansòt pou ‘yonn enmé lòt’ pi fò é pou ‘yonn akéyi lòt plibyen’ ankò (li Ébré 13:1-3). Nou osi, pli fen a mond-lasa ké toupré rivé, pli fò nou ké fè menm biten.
15. Apré sé krétyen-la té chapé kò a yo adan sé montangn-la, poukwa yonn té bizwen montré lòt kè i enmé-y é kè i ka akéyi-y bra gran wouvè ?
15 Lawmé a sé Women la ki té ka lantouré Jérizalèm enn pati onsèl kou. Kifè, sé krétyen-la té pé chapé kò a yo. Men yo pa pati èvè granzafè (Mat. 24:17, 18). Toupannan yo té ka fè vwayaj-la pou rivé adan sé montangn-la, fò yonn té édé lòt. É lè yo rivé Péla, fò yonn té ba lòt on pal pou i té touvé on ti koté pou rété é pou touvé on travay. Onlo adan sé frè é sè la té bizwen manjé, lenj, é on koté pou yo rété. Davwa yonn té ka pran swen a lòt, sé krétyen-la té ka montré kijan yonn té enmé lòt fò é kijan yonn té ka akéyi lòt byen (Tit 3:14).
16. Lè frè é sè an nou bizwen yo édé-yo, kijan nou pé montré kè nou enmé-yo ? (gadé imaj-la osi).
16 Ka sa ka aprann-nou : Konm nou enmé frè é sè an nou, sa ka ban-nou anvi édé-yo lè yo bizwen. Pa ègzanp, ni onlo frè é sè ki kité péyi a yo akòz dè on lagè oben akòz dè on katastwòf natirèl é frè é sè a yo édé-yo volontyé. Yo ba-yo dé biten yo té bizwen, yo édé-yo é yo ankourajé-yo pou yo kontinyé sèvi Jéova. On sè ki té ka rété an Ikrèn kité kaz a-y akòz dè lagè-la. Mi sa i ka di : « Nou vwè men a Jéova é nou vwè kijan i sèvi èvè frè é sè an nou pou gidé-nou é pou pran swen an nou. Yo akéyi-nou bra gran wouvè é yo édé-nou onlo ki sé lè nou té an Ikrèn, ki sé lè nou té an Ongri. É konnyéla, yo ka kontinyé édé-nou an Almagn. » Nou ka travay ansanm èvè Jéova lè nou ka akéyi frè é sè an nou bra gran wouvè é lè nou ka ba-yo sa yo bizwen (Pwov. 19:17 ; 2 Kor. 1:3, 4).
Frè é sè an nou ki kité péyi a yo pou sové vi a yo bizwen nou édé-yo (gadé paragraf 16 la).
17. Poukwa sé konnyéla pou nou aprann enmé frè é sè an nou é akéyi-yo byen ?
17 Konnyéla yonn ja ka édé lòt, men pannan gwo tribilasyon-la, fò nou ké fè sa plis ankò (Abak. 3:16-18). Kifè, Jéova ka montré-nou dépi alè kijan pou nou enmé frè é sè an nou pli fò, é kijan pou nou akéyi-yo byen, pas nou ké bizwen sa toubònman dèmen.
KA KI KÉ PASÉ TALÈ ?
18. Kijan nou pé imité sé krétyen-la ki té lésé Jérizalèm ?
18 Lèwvwè sé Women-la détwi Jérizalèm, sé krétyen-la ki té kouté la é ki té chapé adan sé montangn-la sové vi a yo. Sé vré yo lésé koté-la yo té ka rété la, men Jéova pran swen a yo é i pa jen lagé-yo. É nou aprézan ? Nou pa sav ègzaktèman tousa ki ké pasé talè. Men Jézi té ja avèti-nou é i té ja di-nou kè fò nou ké paré a obéyi (Lik 12:40). Anplisdisa, nou pé pran on ti tan pou nou réfléchi asi sé konsèy-la Pòl ba sé Ébré-la é nou pé mèt-yo an pratik. Nou pé fèfon osi asi sa Jéova limenm ka pwomèt-nou. I ka di kè i pé’é jen kité-nou é kè i pé’é jen lagé-nou (Ébr. 13:5, 6). An-nou kontinyé mèt konfyans an nou adan wayòm a Bondyé, vil-la ki la pou touttan. Si nou ka fè sa, nou ké pé pwofité dè tout sé bèl biten-la Jéova ka pwomèt-nou la pou touttan (Mat. 25:34).
KANTIK 157 Lapé pou létèwnité !
a An tan a Labib, souvantfwa, sé té on wa ki té ka dirijé sé vil-la. Kifè, sé konsi sé vil-lasa sé té dé wayòm (Jén. 14:2).
b Sé biten-lasa fèt an lan 67, on ti moman apré sé krétyen-la lésé Lajidé é Jérizalèm.