Jean

3 I té gen roun farizyen so non a té Nikodèm ; i té sa roun chèf jwif. 2 I alé wè Jézi lò i té ka fè soukou déja é i di li : « Rabi, nou savé a Bondjé ki voyé to ansényé, paské i pa gen pyès moun ki pouvé fè mirak to ka fè-a, si Bondjé pa ké li. » 3 Alòr Jézi di li : « Wi, mo ka di to l’, a lavérité : si roun moun pa ka fèt rounòt kou ankò, i pa pouvé wè rwayonm Bondjé-a. » 4 Nikodèm doumandé li : « Kouman roun moun ki ja granmoun pouvé viré fèt ? I pa pouvé routounen annan vant so manman é viré fèt roun dézyèm fwa kanmenm ! » 5 Jézi réponn : « Wi mo ka di to sa, a lavérité : si roun moun pa ka fèt grasa dlo ké lèspri sen, i pa pouvé antré annan rwayonm Bondjé-a. 6 Sa ki fèt grasa lachè, a lachè, é sa ki fèt grasa lèspri, a lèspri. 7 Pa rété èstébékwé paské mo di to : “Zòt divèt fèt roun dézyèm fwa.” 8 Van-an ka vanté koté i lé, é to ka tandé dézòrd i ka fè, mé to pa savé di ki koté i soti é koté i ka alé. A menm bagaj-a pou tout sa-ya ki fèt grasa lèspri. » 9 Atò, Nikodèm réponn : « Kouman sa pouvé fèt ? » 10 Jézi réponn li : « To menm ki ka ansényé moun Israyèl, to pa konnèt sa bagaj-ya ? 11 Wi, mo ka di to sa, a lavérité : nou ka palé di sa nou konnèt, é nou ka fè moun savé sa nou wè, mé zòt pa ka asèpté sa nou ka di zòt. 12 Si mo di zòt bagaj ki ka fèt asou latè-a é magré sa zòt pa ka krè, kouman zòt ké krè bagaj ki ka fèt annan syèl-a ? 13 Anplis, pyès moun pa monté annan syèl-a, mé sèlman sa-la ki désann di laro syèl-a, Pitit wonm-an. 14 Menm fason Moyiz mété sèrpan-an asou roun poto annan dézèr-a, yé divèt mété Pitit wonm-an asou roun poto osi, 15 pou tout sa ki ka krè annan li gen lavi pou tout-tan. 16 « Bondjé té tèlman kontan monn-an ki i bay so sèl Pitit, pou tout moun ki ka montré yé lafwa annan li pa détrwi, mé pou yé gen lavi pou tout-tan. 17 Paské Bondjé pa voyé so Pitit annan monn-an pou i jijé monn-an, mé i voyé l’ pou i sové monn-an grasa li. » 18 Yé pa ké jijé moun-an ki ka montré i gen lafwa annan li. Moun-an ki pa ka montré i gen lafwa ja rousouvwè roun jijman, paské i pa montré so lafwa annan non sèl Pitit Bondjé. 19 Men dapré kisa jijman-an fèt : limyèr-a vini annan monn-an, mé moun-yan té pi kontan soukou pasé limyèr-a, paské sa yé té ka fè té mové. 20 Paské sa-la ki ka fè mové bagaj rayi limyèr-a é i pa ka vin koté limyèr-a fika pou limyèr-a pa mété so zafè dèrò. 21 Mé sa-la ki ka maché drèt ka vin koté limyèr-a fika, pou moun byen wè ki tousa i fè k’alé ké volonté Bondjé. » 22 Apré sa, Jézi ké so disip alé lakanpagn an Jidé, é i rété la roun ti moman ké yé, é i té ka batizé moun. 23 Mé Jan osi té ka batizé moun a Énòn, bò d’ Salim, paské i té gen bokou dlo annan sa koté-a, é moun-yan pa té ka arété vini é Jan té ka batizé yé ; 24 pas yé patékò mété l’ lajòl. 25 Mé roun blo lévé ant roun Jwif ké disip Jan-yan asou zafè pirifikasyon-an. 26 Atò, yé vini wè Jan é yé di li : « Rabi, mouché-a ki té ké to ròt bò Jourden-an, to té ka palé di li, enben i ka batizé moun, é tout moun k’alé wè li. » 27 Jan réponn yé : « Roun moun pa pouvé rousouvwè anyen si a pa Bondjé annan syèl-a ki bay li. 28 Zòt menm zòt tandé sa mo di : “Mo pa sa Kris-a, mé Bondjé voyé mo douvan li.” 29 Sa-la ki gen madanm maryé-a, a wonm maryé-a. Mé lò zanmi wonm maryé-a dibout òbò li é ka tandé l’, so tchò kontan toubonman pas i tandé vwa wonm maryé-a. Donk, mo pa té pouvé pi kontan ki sa. 30 A pou i divini pi gran, mé mo menm, a pou mo divini pi piti. » 31 Sa-la ki soti laro pi rot pasé tout ròt-ya. Sa-la ki soti di latè ka palé di bagaj latè pas a di la i soti. Sa-la ki soti laro syèl pi rot pasé tout ròt-ya. 32 I ka palé di sa i wè ké di sa i tandé. Mé pyès moun pa ka krè sa i ka di. 33 Moun-an ki krè sa i di montré ki Bondjé ka di lavérité. 34 Pas sa-la Bondjé voyé ka di paròl Bondjé, pas i ka bay so lèspri san konté. 35 Papa-a kontan Pitit-a é i mété tout bagaj annan so lanmen. 36 Sa-la ki ka montré so lafwa annan Pitit-a gen lavi pou tout-tan ; sa-la ki ka dézobéyi Pitit-a pa ké gen lavi-a, é Bondjé ké rété kòlè ké li.