Actes

17 Atò, yé pasé Anfipolis ké Apolonya é yé rivé Tésalonik, koté Jwif-ya té gen roun sinagòg. 2 Pòl antré annan sinagòg-a kou i té gen labitid fè l’, é pannan trwa saba i fè yé réfléchi asou Ékritir-ya. 3 I té ka èspliké é i té ka montré annan Ékritir-ya ki Kris-a té divèt soufri é ki Bondjé té divèt résisité l’. I té ka di : « Sa Jézi mo ka palé zòt-a, a li ki sa Kris-a. » 4 Donk, déztrwa annan yé divini krwayan é yé koumansé maché ké Pòl ké Silas. Bokou Grèk ki té ka adoré Bondjé é bokou madanm ki té enpòrtan annan lasosyété fè menm bagaj-a. 6 Kou yé pa té ka trouvé yé, yé mennen Jazon ké plizyèr frè douvan chèf vil-a, toupannan yé té ka rélé : « Sa mouché-ya mété dézòrd toupatou, é aprézan yé isi-a, 7 é Jazon rousouvwè yé koté li ! Tout sa mouché-ya pa ka obéyi lalwa Sézar, yé ka di ki i gen rounòt rwa, Jézi. » 11 Jwif ki té ka rété Béré té gen roun pi bon mantalité ki sa ki té ka rété Tésalonik, paské yé rousouvwè paròl-a ké tout yé tchò, é yé té ka byen gadé Ékritir-ya chak jou pou wè si sa yé té ka di yé té vré. 16 Toupannan Pòl té ka antann yé Atèn, i koumansé kòlè lò i wè vil-a té plen ké zidòl. 17 Donk, annan sinagòg-a, i koumansé fè Jwif-ya ké moun-yan ki té ka adoré Bondjé, réfléchi, épi i té ka fè sa osi chak jou asou laplas marché-a ké sa-ya ki té la. 22 Pòl mété so kò anmitan Laréopaj é i di : « Zòt, moun Atèn, dapré sa mo ka wè, yé té ké di ki zòt pi kontan tout zòt bondjé pasé ròt-ya kontan yépa bondjé. 23 Parèkzanp, toupannan mo té ka maché annan vil-a é ki mo té ka pran tan gadé bagaj zòt ka sèrvi pou adoré zòt bondjé, mo jis trapé roun lotèl koté i té marké : “Pou roun Bondjé nou pa konnèt.” Sa zòt ka adoré san zòt pa konnèt, a di sa mo vin palé pou zòt. 25 I pa bézwen moun sèrvi l’, kousidiré i té bézwen roun bagaj, pas a li ki ka bay tout moun lavi ké souf ké tout bagaj. 26 Ké rounsèl wonm, i fè tout nasyon-yan pou yé viv asou tout latè-a. Épi, i désidé kitan bagaj-ya té ké fèt é jik ki koté moun-yan té ké pouvé rété, 27 pou yé chaché Bondjé, menmsi yé ka taté toupatou, é pou yé trouvé l’, menmsi an réyalité i pa lwen di nou chak. 28 Paské a grasa li nou ka viv, nou ka boujé é nou la, kou sèrten annan zòt powèt di l’ : “Paské nou menm osi nou sa so timoun.” 30 A vré, tan-lontan, Bondjé pa tchenbé kont di lépòk moun pa té konnèt anyen, mé aprézan i ka fè tout moun tout koté savé ki yé divèt répanti, 32 Lò yé tandé palé di rézirèksyon moun mouri-ya, roun ran koumansé ari, toupannan rounòt ran té ka di : « Nou ké kouté to palé di sa rounòt fwa. » 33 Atò, Pòl lésé yé, 34 mé déztrwa annan yé koumansé maché ké li é yé koumansé krè. Annan yé, i té gen Dénis, ki té jij annan tribinal Laréopaj-a, roun madanm yé té ka aplé Damaris, ké ròt ankò.