LÉSON 10
Kouman réinyon Témwen Jéova-ya pouvé idé ou ?
Ès ou ja alé annan roun réinyon Témwen Jéova-ya ? Si ou pa janmen alé, pitèt sa ka fè ou pè. Pitèt ou ka doumandé ou kò osi : « Kisa ki ka pasé annan sa réinyon-yan ? Poukisa yé enpòrtan ? Poukisa i té ké bon pou mo alé annan sa réinyon-yan ? » Annan sa léson-an, ou ké anprann kouman réinyon-yan pouvé fè ou lanmityé ké Bondjé divini pi fò é idé ou chak jou annan ou lavi.
1. Poukisa Témwen Jéova-ya ka alé annan yé réinyon ?
Roun moun ki ékri Labib-a èspliké : « Annan gran asanblé-a, mo ké louwé Jéova » (Psaume 26:12). Jòdla osi, Témwen Jéova-ya gen labitid alé annan yé réinyon é sa ka bay yé tchò kontan. Asou tout latè-a, yé ka kontré chak simenn pou adoré Bondjé, chanté ké priyè. Plizyèr fwa annan lannen-an, yé ka fè gran asanblé pou adoré Jéova.
2. Kisa ou ké anprann annan sa réinyon-yan ?
Annan réinyon-yan, Témwen Jéova-ya ka étidyé Labib-a é ‘yé ka byen èspliké l’ é yé ka fè moun savé kisa sa lé di’ (li Néhémie 8:8). Si ou k’alé annan réinyon-yan, ou ké anprann plis bagaj asou Jéova é bèl kalité i gen. Pi ou ké anprann bagaj asou lanmou i gen pou ou, pi ou ké divini pròch di li. Ou ké anprann osi kouman i pouvé idé ou viv ké tchò kontan (Isaïe 48:17, 18).
3. Poukisa konnèt ròt moun annan réinyon-yan ké idé ou ?
Jéova ka doumandé nou ‘gadé roun pou ròt pou nou idé nou konpanyen gen lanmou é fè bèl bagaj, épi pa lésé nou réinyon-yan’ (Hébreux 10:24, 25). Annan réinyon-yan, ou ké kontré ké moun ki ka vréman gadé roun pou ròt. A la, ou ké tandé yé palé di sa ki ka bay yé fòrs annan Labib-a (li Romains 1:11, 12). Kou ou menm, yé lé anprann plis bagaj asou Bondjé. Anplis di sa, ou ké anprann konnèt ròt moun ki gen tchò kontan, menm si yé gen problèm kou tout moun. A pou sa Jéova lé nou alé annan nou réinyon chak simenn !
ANNOU FOUYÉ ANNAN LABIB-A
Annou wè kisa ki ka pasé annan réinyon Témwen Jéova-ya é poukisa i bon fè éfòr alé annan réinyon-yan.
4. Réinyon Témwen Jéova-ya
Dipi lépòk apot Jézi-ya, krétyen-yan toujou rasanblé yé kò pou adoré Jéova (Romains 16:3-5). Li Colossiens 3:16, épi kozé asou sa késyon-an :
Kouman prémyé krétyen-yan té ka adoré Jéova ?
Jòdla osi, Témwen-yan ka rasanblé chak simenn annan yé sal di Rwayonm pou adoré Bondjé. Pou savé kisa ka pasé annan sa réinyon-yan, gadé VIDÉYO-a. Apré sa, gadé zimaj-a ki ka montré roun réinyon épi kozé asou sa késyon-yan :
Ki bagaj nou ka fè annan nou réinyon ka sanblé ké sa ou li annan Colossiens 3:16 ?
Annan vidéyo-a ouben asou zimaj-a, ès ou wè roun bagaj ki ka bay ou anvi vini annan réinyon-yan ?
Li 2 Corinthiens 9:7, épi kozé asou sa késyon-an :
Poukisa Témwen Jéova-ya pa ka doumandé soumaké annan yé réinyon ?
Annou gadé ansanm sa nou ké wè annan prochen réinyon-an.
Ki parti annan réinyon-an ou ka pansé ki ké pi entérésan pou ou, ouben ki ké idé ou ?
Ès ou savé sa ?
Asou jw.org, ou pouvé trapé koté i gen Sal di Rwayonm ké lèr réinyon-yan toupatou asou latè-a.
Annan nou réinyon, nou pouvé kouté diskour, gadé démonstrasyon ké vidéyo. Réinyon-yan ka koumansé ké roun chanté é roun lapriyè é yé ka fini menm fason-an.
Pannan roun parti réinyon-an, sa-ya ki lé pouvé partisipé.
Tout moun byenvini : Wonm, fanm, granmoun ké timoun.
Pa bézwen péyé pou vini annan nou réinyon é pa gen lakèt.
5. A pou fè éfòr pou alé annan réinyon-yan
Annou wè èkzanp fanmi Jézi. Chak lannen, yé té ka soti di Nazarèt pou rivé jik Jérizalèm koté i té gen Tanp-a, yé té divèt maché près 100 kilomèt sa lé di pannan trwa jou an mitan montangn. Li Luc 2:39-42, épi kozé asou sa késyon-yan :
Ès ou ka pansé yé té bézwen fè éfòr pou fè sa vwayaj-a ?
É ou menm, ki éfòr ou ké bézwen fè pou vini annan réinyon-yan ?
Ès ou ké fè sa éfòr-ya pou bon tchò ? Poukisa ou ka di sa ?
Labib-a ka di ki sa enpòrtan menm alé annan réinyon-yan pou adoré Bondjé. Li Hébreux 10:24, 25, épi kozé asou sa késyon-an :
Poukisa nou divèt alé annan réinyon-yan chak simenn ?
I GEN MOUN KA DI : « Mo pa bézwen alé annan réinyon pou adoré Bondjé, jis li Labib-a annan mo kaz i bon. »
Ki vèrsé ouben ki èkzanp annan Labib-a ou té ké sèrvi pou montré sa Jéova lé ?
SA NOU WÈ
Alé annan réinyon-yan ké idé ou anprann plis bagaj asou Jéova, é ké fè ou lanmityé ké li divini pi fò, anplis di sa, ou ké adoré Bondjé ké ròt moun.
Kisa ou anprann
Poukisa Jéova lé nou alé annan réinyon-yan ?
Kisa ou ké anprann annan réinyon Témwen Jéova-ya ?
Ki ròt bénédiksyon ou ké trapé si ou ka alé annan réinyon-yan ?
SA OU POUVÉ TRAPÉ OSI
Ès sa ka fè ou pè alé annan roun réinyon ? A sa ki rivé roun mouché mé aprézan i kontan réinyon-yan.
Gadé patché éfòr roun jennjan fè pas i té kontan alé annan réinyon-yan.
Gadé sa moun ka di asou réinyon-yan.
« Poukisa sa enpòrtan alé annan réinyon-yan ki fèt annan Sal di Rwayonm-an ? » (artik jw.org)
Roun mouché ki té annan roun bann ki té kontan briga chanjé so lavi lò i koumansé alé annan réinyon-yan.
« Je ne sortais jamais sans mon arme » (La Tour de Garde, 1é jwiyé 2014)