LÉSON 49
Kouman ou fanmi pouvé gen tchò kontan ? (parti 1)
Moun-yan ki fin maryé lé ki lajwa yé té gen jou yé maryé-a rété pou tout-tan. É sa posib ! Krétyen-yan ki ja maryé dipi lontan é ki ka fè éfòr pou kouté konsèy Labib-a ka bay byen savé ki sa posib.
1. Ki konsèy Labib-a ka bay pou mari-a ?
Jéova chwazi mari-a pou i sa chèf fanmi-a (li Éphésiens 5:23). I lé mari-a pran désizyon ki bon pou tout fanmi-a. Labib-a ka di mari-ya : « A pou zòt kontinyé kontan zòt madanm » (Éphésiens 5:25). Kisa sa lé di ? Roun mari ki kontan so madanm janti ké li douvan ròt-ya, mé osi lò yé toulédé. I ka protéjé so madanm é i ka fè tousa i pouvé pou pran swen di li é fè tchò so madanm kontan (1 Timothée 5:8). É sa ki pi enpòrtan ankò, a ki mari-a ka idé so madanm fè so lanmityé ké Jéova vin pi fò (Matthieu 4:4). Parèkzanp, i pouvé priyè ké li Labib-a ké so madanm. Roun mari ki ka pran swen di so madanm ké lanmou ka fè so lanmityé ké Jéova rété pi fò (li 1 Pierre 3:7).
2. Ki konsèy Labib-a ka bay pou madanm-an ?
Paròl Bondjé-a ka di ki madanm-an « divèt gen roun gran rèspè pou so mari » (Éphésiens 5:33). Kouman i pouvé fè sa ? Madanm-an pouvé pran tan réfléchi asou bèl kalité-ya so mari gen é pou éfòr i ka fè pou pran swen di li ké timoun-yan. Madanm-an osi pouvé montré rèspè lò i ka soutni désizyon so mari ka pran é lò i janti lò i ka palé ké so mari, menm si so mari pa ka adoré Jéova. Madanm-an osi pa ka mal palé so mari dèyè so do.
3. Kouman roun mari ké so madanm pouvé fè yé maryaj divini pi fò ?
Labib-a ka di asou roun mouché ké so madanm : « Yé toulédé ké sa rounsèl lachè » (Matthieu 19:5). Sa lé di ki yé divèt briga kont tout bagaj ki pouvé fè yé lanmou fébli. Yé ka fè sa lò yé souvan ka pasé tan ansanm é lò yé ka di lavérité asou sa yé ka pansé ké sa yé ka rousanti. Yé pa ka lésé pyès moun ouben pyès bagaj, sof Jéova, divini pi enpòrtan ki yé mouché ouben yé madanm. Sa yé ka rousanti annan yé tchò roun pou ròt, yé ka panga pa rousanti l’ pou rounòt moun.
ANNOU FOUYÉ ANNAN LABIB-A
Annou wè ki prensip Labib-a pouvé fè ou lanmou pou ou mouché ouben ou madanm vin pi fò.
4. A pou mari-a kontan so madanm é pran swen di li
Labib-a ka di ki « mari-ya divèt kontan yé madanm kou yé pròp kò » (Éphésiens 5:28, 29). Kisa sa lé di ? Gadé VIDÉYO-a, épi kozé asou sa késyon-an :
Di ki fason mari-a ka montré i kontan so madanm é ka pran swen di li ?
Li Colossiens 3:12, épi kozé asou sa késyon-an :
Kouman mari-a pouvé montré sa bèl kalité-ya annan so maryaj ?
5. A pou madanm-an kontan ké rèspèkté so mari
Labib-a ka ankourajé madanm-an rèspèkté so mari, ki i ka adoré Jéova ki i pa ka adoré l’. Li 1 Pierre 3:1, 2, épi kozé asou sa késyon-an :
Si ou mari pa ka adoré Jéova, asiré pa pitèt ou anvi i fè sa. Dapré ou, kisa ki miyò ? Palé di Labib-a annan so zorè toulong ouben gen roun bèl kondwit plen ké rèspè ? Poukisa ou ka di sa ?
Roun mouché ké so madanm pouvé pran bon désizyon ansanm. Mé sa pouvé rivé ki madanm-an pa dakò ké so mari. A vré, i pouvé di sa i ka pansé, mé di roun fason ki dous é plen ké rèspè, pas i ka rékonnèt ki a pou so mari Jéova bay rèsponsabilité désidé sa ki miyò pou tout fanmi-a. I ka fè tousa i pouvé pou soutni désizyon so mari. A konsa madanm-an ka fè sopa pou fanmi-a gen tchò kontan. Li 1 Pierre 3:3-5, épi kozé asou sa késyon-an :
Kisa Jéova ka rousanti lò madanm-an ka rèspèkté so mari ?
6. Ou pouvé réglé problèm-yan annan ou maryaj
I pa gen maryaj ki parfè. A pou sa, roun mouché ké so madanm divèt travay ansanm pou réglé problèm-yan yé ka jwenn annan yé maryaj. Gadé VIDÉYO-a, épi kozé asou sa késyon-yan :
Annan vidéyo-a, kisa ki ka montré ki lanmou mouché-a ké so madanm té ka fébli ?
Kisa yé fè pou sa lanmou-a vin pi fò ?
Li 1 Corinthiens 10:24 ké Colossiens 3:13. Apré ou li chak vèrsé, kozé asou sa késyon-an :
Kouman sa konsèy-a pouvé fè maryaj-a vin pi fò ?
Labib-a ka di ki nou divèt bay lònò roun pou ròt. Bay lònò, sa lé di ki nou janti ké roun moun é nou ka aji ké li ké rèspè. Li Romains 12:10, épi kozé asou sa késyon-an :
Ès mari-a ouben madanm-an ké bay lònò sèlman si ròt-a ka fè l’ an prémyé ? Poukisa ?
I GEN MOUN KA DI : « Bagaj-a chanjé annan mo maryaj, nou lanmou fébli. »
Kouman ou té ké èspliké ki Labib-a pouvé idé yé annan sa sitiasyon-an ?
SA NOU WÈ
Mouché-a ké so madanm pouvé fè yé tchò kontan lò yé toulédé kontan é ka rèspèkté roun ròt, é lò yé ka kouté konsèy Labib-a ka bay.
Kisa ou anprann
Kisa mouché-a pouvé fè pou li ké so madanm gen tchò kontan annan yé maryaj ?
Kisa madanm-an pouvé fè pou li ké so mari gen tchò kontan annan yé maryaj ?
Si ou maryé, ki prensip Labib-a pouvé fè ou maryaj divini pi fò ?
SA OU POUVÉ TRAPÉ OSI
Gadé plizyèr konsèy ki ké idé ou fanmi gen tchò kontan.
Sa lanmizik-a ka montré bénédiksyon ou ka jwenn lò ou ka kouté konsèy Labib-a ka bay asou maryaj-a.
Kisa sa lé di rèspèkté otorité so mari ?
« Des femmes qui se soumettent à l’autorité » (Tour de Garde, 15 mé 2010)
Kouman roun mouché ké so madanm rivé réglé gro problèm yé té gen annan yé maryaj, menm lò yé divòrsé ?