Désanm

Ès Jéova pouvé résisité moun mouri-ya ? Asiré pa pitèt ! I sa « Tou-Pwisan-an » (Rév. 1:8). Donk, i pouvé ganyen asou nenpòrt ki lèlmi, menm asou lanmò-a (1 Cor. 15:26). Si nou sir ki Bondjé pouvé résisité moun mouri-ya, a osi paské nou savé ki so mémwè pa ka janmen bout. Parèkzanp, i ka aplé chak zétwèl ké so non (Is. 40:26). I ka sonjé sa-ya ki mouri osi (Job 14:13 ; Luc 20:38). Donk i pouvé fasilman sonjé tout ti détay asou moun-yan i ké résisité ; i pouvé sonjé fason yé kò té fèt, yé pèrsonalité, sa yé viv, yé souvénir, ké ròt bagaj ankò. Lò Jéova ka promèt nou résisité moun mouri-ya, nou pouvé krè li paské i lé é i pouvé fè l’. Mé rounòt bagaj ka montré ki nou pouvé krè li : Jéova ja résisité plizyèr moun. Annan Labib nou ka li ki i bay plizyèr moun, Jézi parèkzanp, pouvwar pou résisité moun mouri. w23.04 9 § 7-9.

Si nou ka palé jantiman épi ké dousèr, moun-an ké pi anvi kouté nou épi kontinyé kozé ké nou. Mé si a yenki briga moun-an lé briga ké nou ouben ari di sa nou ka krè, nou pa bézwen kontinyé kozé-a (Prov. 26:4). Mé a pa tout moun ki konsa ; roun ran moun, pitèt menm bokou, ké kouté nou. Nou ka trapé roun patché bénédiksyon lò nou ka chaché divini roun moun ki dous, asiré pa pitèt. Doumandé Jéova idé to rété dous lò moun ka pozé to késyon ki rèd ouben lò yé ka kritiké to. Pa bliyé ki si to ka réyaji ké dousèr épi ké rèspè, sa pouvé idé to kontinyé kozé jantiman ké roun moun menmsi zòt pa dakò, san zòt pa koumansé babyé ké zòt konpanyen. Sa pouvé menm idé sa-ya ki ka kouté to chanjé lidé asou nou ouben asou sa Labib ka di. Atò, a pou to « toujou paré pou défann » sa to ka krè, « ké dousèr ké bokou rèspè » (1 Pierre 3:15). Épi montré ki, kou to sa roun moun ki dous, to fò ! w23.09 19 § 18-19.

Annou wè kat fason roun moun pouvé montré i gen pasyans. Prémyèrman, roun moun ki gen pasyans pa ka kouri faché. I ka fè éfòr pou i rété kalm lò i èstrésé ouben lò roun moun ka provoké li, é i pa ka randé kou pou kou (Ex. 34:6). Dézyèmman, roun moun ki gen pasyans, a roun moun ki konnèt antann jantiman. Si roun bagaj ka pran plis tan ki sa i té prévwè, i ka fè éfòr pou i pa nèrvé é pou i pa kòlè (Mat. 18:26, 27). Trwazyèmman, roun moun ki gen pasyans pa ka kouri fè bagaj-ya. Lò roun moun ki gen pasyans gen roun bagaj enpòrtan pou fè, i pa ka kouri alé fè bagaj-a vitman présé san i pa réfléchi. I ka pran tan òrganizé so kò. Apré sa, i ka pran tan i gen pou pran-an, pou fè so travay. Katriyèmman, roun moun ki gen pasyans ka fè éfòr pou i sipòrté éprèv-ya san i pa plenn so kò. I ké fè sa i pouvé pou i kontinyé adoré Jéova ké tchò kontan (Col. 1:11). Nou ki ka sèrvi Jéova, nou divèt gen pasyans annan tout sa domenn-yan. w23.08 20-21 § 3-6.

Roun bagaj enpòrtan ki ka fè ki nou divèt protéjé nou tchò, a ki Jéova ka gadé sa nou gen ofon nou tchò. É lò i ka gadé nou tchò, i ka wè plis ki sa ròt-ya pouvé wè ; i ka wè ki kalité moun nou sa vréman. Si nou ka plen nou lèspri ké so sajès ki ka pèrmèt nou gen lavi pou tout-tan, i ké kontan nou (Jean 4:14). É i pa ké gen plas ankò pou manti ké vyé lidé malpròp Satan ké so monn ka éséyé mété annan nou lèspri pou fè nou soufri (1 Jean 5:18, 19). Pi nou ka vin pròch ké Jéova, pi nou ka rèspèkté l’ é pi nou kontan l’. Kou nou pa lé fè nou Papa lapenn, yenki sonjé fè roun péché, nou ja dégouté. Marta, roun sò ki ka rété Kroasi, briga pou i pa fè roun péché sèksyèl. Men sa i ékri : « Sa té rèd pou mo té kontinyé byen réfléchi é mo briga pou mo pa anvi fè roun mové bagaj. Mé kou mo té pè fè Jéova lapenn, sa protéjé mo. » Kouman lakrent pou Bondjé anpéché Marta fè roun mové bagaj ? I èspliké ki i réfléchi asou sa ki té ké rivé si i té ka pran roun mové désizyon. Nou pouvé fè menm bagaj-a. w23.06 20-21 § 3-4.

Jézi té savé ki Jéova lé sanktifyé so non, sa lé di lavé l’ di tout mové bagaj yé di asou l’. A pou sa, nou Mèt anprann nou sa lapriyè-a : « Nou Papa ki annan syèl-a, a pou to non sanktifyé » (Mat. 6:9). Jézi té savé ki zafè sanktifikasyon non so Papa, a sa ki pi enpòrtan-an. I pa gen pyès moun, ni annan syèl-a, ni asou latè-a ki fè plis bagaj pasé Jézi pou sanktifyé non Jéova-a. Pourtan, lò yé arété l’, kisa so lèlmi di i té fè ? Yé di ki i té dérèspèkté non Bondjé ! Nou pouvé sir ki pou li, roun moun pa pouvé fè roun péché pi grav pasé jouré ouben manti asou non so Papa ki sen. Lò i té ka sonjé ki yé té ké akizé l’ di fè roun bagaj konsa épi yé té ké arété l’, sa té ka boulvèrsé l’. A dèt pou sa i té « tèlman angwasé » roun ti moso tan anvan yé arété l’ (Luc 22:41-44). w24.02 11 § 11.

Nou ki annan lakours krétyen-an, nou divèt kontan Jéova ké Jézi plis pasé nou fanmi (Mat. 10:37). Mé sa pa lé di ki nou pouvé néglijé nou rèsponsabilité annan nou fanmi kousidiré yé té ka anpéché nou fè Bondjé ké Kris plézi. O kontrèr, pou nou fè yé plézi nou divèt fè sa nou gen pou fè pou nou fanmi (1 Tim. 5:4, 8). Si nou ka fè sa, nou tchò ké plis kontan. Sa nòrmal paské Jéova savé ki tchò tout moun kontan annan roun fanmi lò mouché ké madanm kontan é ka rèspèkté yé konpanyen, lò papa ké manman kontan yé timoun é ka byen lévé yé, é lò timoun-yan ka obéyi yé papa ké yé manman (Éph. 5:33 ; 6:1, 4). Ki to sa roun mouché ouben roun madanm maryé, ki to sa roun papa, roun manman ouben roun timoun, a pou to tchenbé kont di sajès Labib pasé to fè kou to ka pansé, kou yé anprann to fè ouben pasé to fè sa sa-ya ki èspésyalis swadizan ka di. Pou fè sa, sèrvi nou piblikasyon ki ka apiyé asou Labib. Annan sa piblikasyon-yan to ka trapé bon konsèy é yé ka èspliké to kouman to pouvé swiv prensip-ya ki annan Labib. w23.08 28 § 6-7.

Roun jenn sò divèt konnèt fè bagaj ki itil. Sèrten bagaj roun tifi ka anprann fè lò i piti ké idé l’ pannan tout so lavi. Parèkzanp, anprann byen li ké ékri. Annan sèrten péyi, moun ka pansé ki roun madanm pa bézwen anprann li ké ékri. Mé pou roun krétyen, sa bagaj-ya enpòrtan (1 Tim. 4:13). Donk, menmsi sa rèd, kontinyé éséyé anprann byen li ké ékri. Kisa sa ké mennen pou to ? Sa pouvé idé to pou to trapé roun travay épi gardé l’. Épi osi sa ké pi fasil pou to étidyé Labib épi ansényé ròt-ya. É sa ki pi bèl-a, a ki kou to ké li Labib é to ké pran tan réfléchi asou l’, to ké vin pi pròch di Jéova (1 Tim. 4:15). w23.12 20 § 10-11.

Doumandé Jéova idé to pou to tchenbé douvan tantasyon-an. Kou nou pa parfè, a tout tan pou nou briga pou nou pa fè mové bagaj. Anplis di sa, Satan ka fè tousa i pouvé pou sa toujou pi rèd pou nou briga. Parèkzanp, i ka sèrvi anmizman ki pa pròp pou plen nou tèt ké vyé lidé, sa lé di dé lidé ki ka fè nou vin sal douvan Bondjé é ki pouvé fè nou fè roun péché ki grav (Marc 7:21-23 ; Jacq. 1:14, 15). Si nou pa lé fè sa ki pa bon, nou bézwen Jéova idé nou. Annan lapriyè Jézi anprann so disip, men sa i di nou doumandé : « Pa fè nou antré an tantasyon, mé libéré nou di méchan-an » (Mat. 6:13). Jéova lé idé nou, mé a pou nou doumandé li idé nou. Apré sa, sa nou ka fè divèt alé annan menm sans ké nou lapriyè. w23.05 6-7 § 15-17.

Lò mouché ké madanm ka bay yé lanmityé ké yé Papa ki annan syèl-a bokou valò, yé ka pran plézi swiv so konsèy. Konsa, yé ka véyé pou yé pa trapé problèm ki pouvé fè yé lanmou fébli, ouben si yé ka jwenn sa problèm-yan, yé ka réglé yé. Anplis di sa, sa-ya ki gen roun lanmityé ké Jéova ki fò, ka fè tousa yé pouvé osi pou imité li. Yé ka chaché gen bèl kalité kou bonté, pasyans ké mizérikòrd (Éph. 4:32 – 5:1). Lò mouché ké madanm gen sa bèl kalité-ya, yé lanmou ka grandi fasilman. Lena, roun sò ki maryé dipi pasé 25 lannen, ka di : « Sa fasil pou kontan épi rèspèkté roun moun so lanmityé ké Jéova fò. » Annou pran roun èkzanp annan Labib. Roun jou, Jéova té gen pou chwazi roun mouché ké so madanm pou yé divini papa ké manman sa-la ki té ké divini Mési-a. Annan tout pitit di pitit David, i chwazi Jozèf ké Mari. Poukisa ? Paské yé toulédé té gen roun lanmityé ki té fò ké li. É Jéova té savé ki yé té ké mété li an prémyé annan yé maryaj. w23.05 20-21 § 3-4.

Nou Chèf, Jézi, parfè, mé moun-yan i ka sèrvi pou dirijé nou, yé menm yé pa parfè. Pitèt sa pouvé rèd pou nou obéyi yé èspésyalman si yé ka doumandé nou fè roun bagaj nou pa anvi fè. Roun jou, sa té rèd pou apot Pyèr obéyi roun lòrd. Roun zanj té doumandé li manjé zannimo ki pa té pròp dapré Lalwa Moyiz. Mé Pyèr réfizé. É a pa roun fwa i fè sa : i fè l’ trwa fwa ! (Actes 10:9-16). Poukisa ? Pou li, sa zanj-a té ka doumandé l’ fè pa té gen sans. Apot Pòl, li menm, obéyi lò ansyen-yan ki té Jérizalèm doumandé li pran kat mouché, alé annan Tanp-a ké yé épi pirifyé so kò ansanm ké yé, kou Lalwa té ka doumandé yé fè l’. Konsa i té ké montré ki i té ka obéyi Lalwa-a. Pòl té savé ki krétyen-yan pa té gen pou obéyi Lalwa ankò. Anplis di sa, i pa té fè pyès mové bagaj. Pourtan, « landimen-an, [i] mennen sa mouché-ya ké li é i pirifyé so kò ké yé kou Lalwa té ka doumandé yé fè » (Actes 21:23, 24, 26). Kou i obéyi, i pèrmèt tout moun annan asanblé-a rété ansanm ansanm (Rom. 14:19, 21). w23.10 10 § 15-16.

Pitèt to pa ké di ki dé moun ki zanmi divèt pè ouben gen lakrent pou yé konpanyen. Mé roun moun ki lé pròch ké Jéova divèt ‘gen lakrent pou li’. Ki i gen lontan ki pa gen lontan nou ka adoré Jéova, nou tout divèt gen lakrent pou li, paské sa lakrent-a ka sové nou. Mé gen lakrent pou Bondjé, kisa sa lé di ? Roun moun ki gen bon kalité lakrent-a pou Bondjé kontan l’ é i pa lé fè anyen ki pouvé fè l’ pédi so lanmityé ké li. Jézi té gen sa kalité « lakrent pou Bondjé » (Héb. 5:7). I pa té pè so Papa (Is. 11:2, 3). O kontrèr, i té kontan li bokou é i té lé obéyi l’ (Jean 14:21, 31). Kou Jézi, nou ka rèspèkté é nou ka admiré Jéova bokou paské i plen ké lanmou, i saj, i jis é i pwisan. Nou savé osi ki, kou i kontan nou, fason nou ka réyaji lò i ka ansényé nou enpòrtan pou li. Fason nou ka réyaji pouvé fè so tchò kontan ouben fè li lapenn (Ps. 78:41 ; Prov. 27:11). w23.06 14 § 1-2 ; 15 § 5.

Lò rwa Ozyas vin fò, i bliyé ki si i té gen fòrs é si so zafè té ka byen maché, a té grasa Jéova. Kisa sa ka anprann nou ? Annou toujou sonjé ki a Jéova ki ka bay nou bénédiksyon ké rèsponsabilité nou gen. Pasé nou bay nou kò grad pou sa nou ka rivé fè, annou toujou di ki a grasa Jéova (1 Cor. 4:7). Épi ké imilité, annou rékonnèt ki nou pa parfè é ki, détan, nou bézwen yé rouprann nou. Roun frè ki gen pasé 60 lannen ékri : « Mo anprann pa dékourajé lò ròt-ya ka rémarké sa mo ka fè ki pa bon. Lò mo ka fè roun bétiz, épi yé ka rouprann mo, mo ka mo éséyé chanjé épi kontinyé bay Jéova sa mo gen ki miyò. » Si nou gen lakrent pou Jéova é si nou ka kontinyé gen imilité, tout bagaj ké alé byen pou nou (Prov. 22:4). w23.09 10 § 10-11.

Krétyen-yan annan 1^é syèk-a té divèt gen andirans. Yé té ka jwenn menm kalité problèm ké moun yé lépòk, mé anplis di sa, yé té gen ròt problèm. Chèf rélijyé jwif-ya ké gouvèrnman romen-an té ka pèrsékité bokou annan yé, épi menm yé pròp fanmi té ka pèrsékité yé osi (Mat. 10:21). É détan, yé té divèt briga pou fo ansèyman apòsta-ya ki té ka éséyé divizé asanblé-a, pa détenn asou yé (Actes 20:29, 30). Mé yé rivé tchenbé rèd (Rév. 2:3). Kisa ki idé yé ? Yé pran tan réfléchi asou èkzanp moun annan Labib-a ki té gen andirans, kou Jòb parèkzanp (Jacq. 5:10, 11). Yé priyè pou Bondjé bay yé fòrs (Actes 4:29-31). É yé mété yé lidé asou bénédiksyon yé té ka jwenn paské yé té ka tchenbé rèd (Actes 5:41). Nou menm osi nou pouvé gen andirans. Pou fè sa, annou étidyé épi annou pran tan réfléchi souvan asou èkzanp moun ki té gen andirans nou ka jwenn annan Paròl Bondjé-a ké annan nou piblikasyon. w23.07 3 § 5-6.

Ni Jéova ni Jézi pa ké janmen lésé nou tonbé. Lò apot Pyèr di ki i pa té konnèt Jézi, i té gen roun chwa enpòrtan pou fè. Ès i té ké arété sa roun disip Kris, ouben ès i té ké kontinyé ? Jézi té sipliyé Jéova pou so lafwa pa fébli. Anplis di sa, i té di Pyèr ki i té priyè pou li é i té di li ki i té sir ki pita, i té ké rivé bay so frè fòrs (Luc 22:31, 32). Lò Pyèr té ka sonjé sa Jézi té di l’, sa dèt té ka rasiré l’ ! Lò nou gen roun désizyon enpòrtan pou pran, Jéova pouvé sèrvi dé bèrjé ki kontan nou pou rasiré nou é pou idé nou rété fidèl (Éph. 4:8, 11). Menm fason Jéova bay Pyèr ké plizyèr ròt apot sa yé té bézwen pou viv, i ké bay nou sa nou bézwen pou viv si nou ka mété prédikasyon-an an prémyé annan nou lavi. w23.09 24-25 § 14-15.

Jéova ka wè tout ti bagaj nou ka fè pou ròt moun. I ka wè sa kou roun sakrifis ki gen bokou valò. Pou li, a kousidiré i dévé nou é i lé ranboursé nou. Si to té asistan ouben ansyen anvan, Jéova pa bliyé tousa to fè pou li ké lanmou (1 Cor. 15:58). É i ka rémarké osi tousa to lanmou pou li ka fè to fè jòdla. Jéova lé ki nou tout, nou kontinyé fè nou lanmou pou li é pou nou frè ké sò-ya vin pi fò. Nou ké fè nou lanmou pou Jéova vin pi fò si nou ka li so Paròl, si nou ka pran tan réfléchi asou l’, é si nou ka priyè li souvan. É nou ké kontan nou frè ké sò-ya plis si nou ka idé yé lò yé bézwen. Pi nou lanmou ké vin fò, pi nou lanmityé ké Jéova é nou lanmityé ké nou frè ké sò-ya ké vin fò. É sa lanmityé-ya ké rété pou tout-tan ! w23.07 10 § 11 ; 11 § 13 ; 13 § 18.

Chak krétyen divèt désidé pou li menm kouman i ké swanyé so kò. I pa gen bokou lalwa annan Labib asou sa zafè-a. Parèkzanp, i gen koumannman-an ki ka di pa pran disan épi sa-la ki ka di pa fè tchenbwa (Actes 15:20 ; Gal. 5:19, 20). Apar sa dé koumannman-yan, yé pouvé désidé pou yé menm ki kalité trètman yé ké asèpté. Menmsi nou sir ki roun trètman bon ouben o kontrèr i danjéré, nou divèt rèspèkté drwa nou frè ké sò gen di pran yépa désizyon. Sa ki ké idé nou, a sonjé sa 4 bagaj-ya : 1) a rwayonm Bondjé-a sèlman ki ké fini ké nou problèm lasanté pou tout-tan (Is. 33:24), 2) chak krétyen divèt « byen sir » di sa ki pi bon pou li (Rom. 14:5), 3) nou pa ka jijé ròt-ya é nou ka panga fè yé tribiché (Rom. 14:13) é 4) nou ka montré ki nou kontan nou konpanyen, é sa ki pi enpòrtan pou nou, a pa nou drwa di chwazi sa nou lé, mé a ki asanblé-a rété byen ansanm (Rom. 14:15, 19, 20). w23.07 24 § 15.

Ès to lanmityé ké Jéova gen valò pou to ? Asiré pa pitèt ! A té menm bagaj-a pou roun patché sèrvitèr Bondjé tan-lontan (Ps. 104:33, 34). Roun patché annan yé fè sakrifis pou Jéova. A sa « naziréyen »-yan annan lépòk Israyèl té ka fè. Yé té vouwé pou roun sèrvis èspésyal. Naziréyen-yan té sa dé Israyélit ki té ka fè sèrten sakrifis èspésyal pou sèrvi Jéova. Lalwa Moyiz té ka pèrmèt wonm kou fanm fè Jéova sa vé-a : divini roun naziréyen pannan roun tan (Nomb. 6:1, 2). Lò i té ka fè sa vé-a, ouben sa promès-a, roun naziréyen té oblijé fè sèrten bagaj ròt Israyélit-ya pa té gen pou fè. Atò, kisa ki té pouvé fè roun Israyélit désidé vouwé so kò épi divini roun naziréyen ? I divèt té ka fè l’ paské i té kontan Jéova bokou é paské i té gen rékonésans pou tout bèl bénédiksyon i té rousouvwè (Deut. 6:5 ; 16:17). w24.02 14 § 1-2.

Labib-a ka palé souvan di « fidélité », ouben « lanmou fidèl » Bondjé ka montré pou so zanmi. Mo ébré Labib-a ka sèrvi pou « fidélité » ouben « lanmou fidèl », a menm mo ébré-a i ka sèrvi pou palé di lanmou sèrvitèr Bondjé-ya gen pou yé konpanyen (2 Sam. 9:6, 7). Pi tan-an ka pasé, pi nou fidélité pou Jéova pouvé vin pi fò. Annou wè kouman fidélité Danyèl vin pi fò. Pannan tout so lavi, Danyèl té gen pou montré ki i té fidèl ké Jéova. Mé a lò i té gen pasé 90 lannen roun bagaj ki té rèd menm rivé li. Plizyèr fonksyonèr rwa-a fè roun konplo pou tchwé Danyèl paské yé pa té kontan li é yé pa té ka rèspèkté so Bondjé. Donk, yé fè rwa-a fè roun lalwa. Sa lalwa-a té ké montré pou kimoun Danyèl té fidèl : pou so Bondjé ouben pou rwa-a. Sèl bagaj Danyèl té divèt fè pou i té montré ki i té fidèl ké rwa-a, a té arété priyè Jéova pannan 30 jou. Danyèl désidé pa fè pyès konpromi (Dan. 6:12-15, 20-22). w23.08 5 § 10-12.

Jéova lé nou kontinyé montré nou frè ké sò-ya ki nou kontan yé. Si roun jou, roun annan yé pa ka aji ké nou kou roun krétyen divèt fè l’, nou pouvé di nou kò ki i lé fè Jéova plézi, mé ki i aji san i pa réfléchi (Prov. 12:18). Jéova kontan so sèrvitèr-ya ki fidèl menmsi yé pa parfè. Lò nou ka fè roun bagaj ki pa bon, i pa ka mété nou asou koté é i pa ka rété faché ké nou (Ps. 103:9). Sa vréman enpòrtan di pardonnen ròt-ya pou nou imité nou Papa ! (Éph. 4:32 – 5:1). Anplis di sa, annou pa bliyé ki kou lafen-an pròch, a pou nou rété pròch ké nou frè ké sò-ya. Nou savé ki pèrsékisyon-an ké vini pi fò ankò. Yé pouvé menm mété nou lajòl akoz di nou lafwa. Si sa ka rivé nou, nou ké bézwen nou frè ké sò-ya (Prov. 17:17). w24.03 15-16 § 6-7.

Annan Labib, nou ka jwenn èkzanp jennjan ki té pròch di Jéova, ki Jéova té kontan é ki rivé gen roun bèl lavi. David té annan yé. Lò i té jenn, i chwazi adoré Jéova é pita, lò i té rwa, i rété fidèl (1 Rois 3:6 ; 9:4, 5 ; 14:8). Lavi David pouvé idé to ké ankourajé to sèrvi Jéova ké fidélité. To pouvé étidyé osi lavi Mark ouben Timoté. To ké wè ki yé désidé sèrvi Jéova lò yé té jenn é yé fè Jéova plézi pannan tout yé lavi. To ké wè ki yé rivé gen roun bèl lavi. Sa to ka fè di to lavi jòdla enpòrtan. Si to ka fè Jéova konfyans, pasé to mété to konfyans annan to entélijans, i ké idé to maché asou bon chimen-an. Konsa, to ké pouvé gen roun lavi ki bèl é viv ké tchò kontan. Pa janmen bliyé ki Jéova kontan tousa to ka fè pou li. Ès i gen roun pi bèl bagaj pasé sèrvi to Papa ki annan syèl-a é ki kontan nou. w23.09 13 § 18-19.

Apot Pòl té savé ki so frè ké sò-ya pa té parfè. Parèkzanp, roun ran annan asanblé Jérizalèm té pè l’ lò yé kontré ké l’ (Actes 9:26). Pita, roun ran annan asanblé-a palé li mal pou sali so répitasyon (2 Cor. 10:10). I wè roun frè ki té gen bokou rèsponsabilité pran roun désizyon ki té pouvé fè roun patché frè ké sò tonbé (Gal. 2:11, 12). É roun di so bon zanmi, Mark, fè l’ lapenn bokou (Actes 15:37, 38). Tout sa sitiasyon-yan té pouvé fè l’ désidé arété frékanté sa-ya ki té fè li lapenn. Mé i kontinyé wè so frè ké sò-ya kou Jéova té ka wè yé é i kontinyé travay pou Jéova. Kisa ki idé l’ tchenbé ? Pòl té kontan so frè ké sò-ya. So lanmou pou yé idé li rété asou bèl kalité yé té gen pasé i rété asou yé défo. É sa pèrmèt li apliké sa nou ka li annan tèks pou koumansé sa lajournen-an. w24.03 15 § 4-5.

Annan Labib, i gen roun patché istwè ki ka montré ki sa enpòrtan pou nou sa dé moun ki dous. Annou palé di Izaak. Lò i déménajé pou alé Gérar, roun vil annan péyi Filisten-yan, so vwazen koumansé jalou li é yé bouché tout pi sèrvitèr so papa té fouyé. Pasé i briga pou i défann so drwa, i pati pi lwen ké tout so fanmi é i fouyé ròt pi (Gen. 26:12-18). Mé Filisten-yan di ki sa dilo-a té di yé osi. Sa kou-a ankò, Izaak fè sa ki té fo pou i té rété byen ké yé (Gen. 26:19-25). Kisa ki idé l’ rété dous douvan dé moun ki té byen désidé pou fè roun dézòrd ké li ? I dèt byen gadé èkzanp so papa ké so manman, i dèt anprann roun patché bagaj ké Abraam ki té sa roun moun ki té kontan lapè épi ké Sara ki té sa roun moun ki té ‘dous é ki té ka chaché lapè’ (1 Pierre 3:4-6 ; Gen. 21:22-34). w23.09 15 § 4.

Lò moman-an té rivé, kou Jéova kontan nou, i voyé so prémyé Pitit asou latè-a ; i té lé i palé pou tout moun di sa rwayonm-an épi bay so lavi kou ranson pou i sové moun-yan di péché-a ké di lanmò-a. Apré sa, i résisité l’ pou i divini Rwa di so rwayonm annan syèl-a. Tèm Labib, a : Jéova ké sanktifyé so non é i ké fè so projè pou latè-a fèt grasa so rwayonm ké Jézi ki Rwa sa rwayonm-an. Projè Jéova-a pa pouvé chanjé. I promèt nou ki i ké fè sa i désidé fè (Is. 46:10, nòt ; Héb. 6:17, 18). Piti piti, latè-a ké divini roun paradi, é pitit Adan ké Èv, ki ké fidèl ké Bondjé é ki ké parfè, ké « viv [asou l’] pou tout-tan » (Ps. 22:26). Mé, a pa sa sèlman Bondjé désidé fè. Sa i lé osi, a fè tout so sèrvitèr, ki annan syèl-a, ki asou latè-a, adoré l’ yé tout ansanm. Alòr, tout moun ké rékonnèt ki i sa yé Souvéren, yé ké obéyi l’ é yé ké rété fidèl (Éph. 1:8-11). Lò to ka wè kouman Jéova ka fè so projè fèt, ès to pa ka trouvé sa bèl toubonnman ? w23.10 20 § 7-8.

Lò Jwif-ya ki té soti Babilòn rivé Jérizalèm, sa té rèd pou yé. Sa pa té fasil pou yé té bay yé fanmi manjé ké bwè. Nasyon-yan a yé lantou té ka éséyé baré yé chimen é i té gen roun patché problèm politik annan Anpir Pèrs-a. Akoz di sa, roun ran annan yé pa té ka rivé mété zafè roukonstrwi tanp Jéova-a an prémyé annan yé lavi. A pou sa, Jéova voyé dé profèt, Ajé ké Zakari, pou idé Jwif-ya viré gen balan é yé rivé bay yé bokou balan (Agg. 1:1 ; Zach. 1:1). Mé, apéprè 50 lannen pita, yé té dékourajé ankò. Èsdras, roun moun so travay a té roukopyé Lalwa é ki té vayan annan sa, soti Babilòn pou ankourajé yé mété vré ladorasyon-an an prémyé annan yé lavi (Esd. 7:1, 6). Profési Ajé ké Zakari idé sèrvitèr Bondjé-ya tan-lontan kontinyé fè Jéova konfyans lò yé té ka pèrsékité yé. É sa profési-ya pouvé idé nou, nou menm osi, pou nou kontinyé fè li konfyans lò nou ka jwenn problèm annan nou lavi (Prov. 22:19). w23.11 14-15 § 2-3.

Kouman nou pouvé montré nou frè ké sò-ya ki nou kontan yé ? Parèkzanp, lò nou ka konsolé yé. É a konpasyon-an ki ké fè nou ‘kontinyé konsolé nou konpanyen’ (1 Thess. 4:18). Pou fini, kouman nou pouvé fè nou lanmou pou nou konpanyen rété fò ? Lò nou ka pardonnen ké tout nou tchò. Poukisa sa èspésyalman enpòrtan jòdla pou nou montré nou lanmou pou nou konpanyen ? Men sa Pyèr ka di asou sa : « Lafen tout bagaj tou pròch. Donk […] a pou zòt gen bokou lanmou pou zòt konpanyen » (1 Pierre 4:7, 8). Kou lafen sa monn méchan-an tou pròch, kisa ki ké rivé ? Men sa Jézi anonsé parapòrta so disip : « Tout nasyon-yan ké rayi zòt akoz di mo non » (Mat. 24:9). Pou nou rivé sipòrté sa bagaj-a, nou divèt rété ansanm ansanm. É Satan pa ké jen rivé séparé nou si a lanmou ki ka fè nou rété ansanm ansanm (Phil. 2:1, 2). w23.11 13 § 18-19.

Vérité-ya ki annan Paròl Bondjé-a fò menm. Lò nou ka idé moun-yan anprann kimoun Jéova sa vréman, nou ka wè roun bagaj ka fèt ki bèl toubonnman. Satan pa ka rivé anpéché sa moun-yan wè lavérité-a ankò, donk yé ka koumansé wè nou Papa kou nou ka wè l’. So pwisans ki pa gen limit ka fè yé rété èstébékwé (Is. 40:26). Yé ka vin sir ki so jistis parfè (Deut. 32:4). Yé ka anprann roun patché bagaj grasa so sajès ki gran toubonnman (Is. 55:9 ; Rom. 11:33). É sa ka konsolé yé lò yé ka anprann ki i sa lanmou (1 Jean 4:8). Pi yé ka vin pròch di li, pi yé gen èspwar divini so pitit é viv pou tout-tan. A pa ti bèl lònò nou gen. Nou pouvé idé yé vin pròch di yé Papa ! Lò nou ka fè sa, Jéova ka wè nou kou dé moun ki ka « travay ansanm » ké li (1 Cor. 3:5). w24.02 12 § 15.

Si to ka étidyé Labib ké Témwen Jéova-ya ouben si a to papa ké to manman ki Témwen, ès to lé batizé ? A roun bèl bagaj. Mé anvan to batizé to divèt vouwé Jéova to lavi. Kouman roun moun ka vouwé Bondjé so lavi ? Lò to ka vouwé Jéova to lavi, sa lé di ki to ka priyè l’ pou promèt li ki a li rounso to ké adoré é ki to ké toujou mété so volonté an prémyé annan to lavi. Anfèt, to ka promèt li ki to ké kontinyé kontan li « ké tout to tchò, ké tout to nanm, ké tout to pansé épi ké tout to fòrs » (Marc 12:30). Pou batenm-an, tout moun ka wè ki to vouwé Jéova to lavi. Mé lò to ka priyè Jéova pou vouwé li to lavi, a roun bagaj to ka fè to rounso ké li. A roun vé ki sakré. To gen pou rèspèkté sa vé-a kou Jéova lé to fè l’ (Eccl. 5:4). w24.03 2 § 2 ; 3 § 5.

Labib ka di ki tout mouché ké madanm maryé ka jwenn « tribilasyon », sa lé di problèm (1 Cor. 7:28). É a vré, tout mouché ké madanm ki maryé ka jwenn problèm. Poukisa ? Paské, lò dé moun ka maryé, a dé moun ki pa parfè ki ka maryé. Yé chak gen yépa kalité ké défo é yé chak gen bagaj yé kontan ké bagaj yé pa kontan. Détan, yé pa gen menm kiltir-a é yé pa lévé menm fason-an. Épi, piti piti, yé pouvé koumansé wè sèrten défo yé mouché ouben yé madanm gen yé pa té ka wè anvan yé maryé. Tout sa bagaj-ya pouvé mennen problèm. Anplis di sa, lò roun mouché ké so madanm ka jwenn problèm, pasé yé rékonnèt ki yé gen yépa rèsponsabilité annan sa épi chaché ranjé sa problèm-yan, détan yé ka akizé ròt-a. Yé ka di ki a di so fot. Lò a konsa, pitèt yé pouvé koumansé krè ki pou yé fin ké sa, a pou yé séparé ouben divòrsé. Mé ès sa ké vréman ranjé problèm-an ? Non. Jéova lé moun maryé rèspèkté promès yé fè jou yé maryé-a menmsi sa rèd pou yé viv ké yé mouché ouben yé madanm. w24.03 16 § 8 ; 17 § 11.

Apré to batizé, to vin konnèt Jéova pi byen é to vin kontan l’ ankò plis, é èspwar to gen di viv pou tout-tan annan roun paradi asou latè-a, vin pi fò ankò (Héb. 5:13 – 6:1). To viv to menm sa ki marké annan Romains 5:2-4. To jwenn plizyèr éprèv mé to tchenbé rèd é Jéova montré to ki i té kontan to. Jòdla, kou to sir ki i kontan sa to ka fè, sa ka pèrmèt to antann so promès fèt. Èspwar to gen-an pi fò pasé anvan. Sa èspwar-a gen ankò plis valò pou to. Sa ka touché to plis. É sa ka aji asou tout to lavi, asou fason to ka fè ké to fanmi, asou désizyon to ka pran é menm asou fason to ka sèrvi to tan. Kou to ka fè Bondjé plézi, i ka bay to roun èspwar. Apot Pòl bay rounòt lidé enpòrtan asou sa. Sa i di ka pèrmèt to sir ki sa to ka èspéré ké fèt, to pa ké antann pou anyen (Rom. 15:13). w23.12 12-13 § 16-19.

Byen souvan, fason nou ka réfléchi lò tout bagaj k’alé byen ké fason nou ka réfléchi lò nou annan roun éprèv, a pa menm bagaj-a. A sa ka fèt osi ké sa nou ka rousanti épi ké fason nou ka aji. Nou pouvé santi ki nou gen tròp bagaj annan nou tchò ké annan nou tèt. Kouman Jéova ka idé nou lò nou boulvèrsé konsa ? I ka promèt nou fè nou rété byen dibout. Lò roun bato anmitan roun tanpèt, van-an ké dlo-a ka soukouyé l’ tèlman ki i pouvé chalviré. Pou anpéché bato-a balansé tròp, yé ka mété dé najwar anba bato-a. Grasa sa, bato-a gen mwens chans chalviré é moun-yan ki asou l’ pi alèz pou vwayajé. Mé souvan, sa sistèm-an ka maché pi byen lò bato-a ka kontinyé vansé. Menm fason-an, si nou ka kontinyé sèrvi Jéova ké fidélité menm lò nou gen éprèv, Jéova ké fè nou rété byen dibout. w24.01 22 § 7-8.

Lò to pè, doumandé to kò : « Kisa Jéova ja fè ? » Réfléchi asou sa i kréyé. Parèkzanp, « byen gadé » kouman Jéova ka pran swen di zozo-ya ké flèr-ya menmsi yé pa pouvé ni imité so kalité ni adoré l’. Si to ka réfléchi asou sa, sa ké fè to vin ankò plis sir ki i ké pran swen di to osi (Mat. 6:25-32). Réfléchi osi asou sa Jéova fè pou so sèrvitèr-ya. Pitèt to pouvé étidyé lavi roun moun annan Labib-a ki montré ki i té gen bokou lafwa, ouben to pouvé li istwè roun sèrvitèr Bondjé di nou lépòk. Anplis di sa, réfléchi asou sa Jéova ja fè pou pran swen di to. Doumandé to kò : « Kouman i idé to anprann konnèt li ? (Jean 6:44). Kouman i réponn to lapriyè ? (1 Jean 5:14). Ki bénédiksyon to ka jwenn chak jou grasa sakrifis so pitit i kontan-an ? (Éph. 1:7 ; Héb. 4:14-16). » w24.01 4 § 6 ; 7 § 17.