Lò to ka gadé pou ròt-ya, to ka jwenn bénédiksyon pannan tout to lavi

Mo papa té pastèr. I té annan légliz yé ka aplé Église Unie du Canada. Chak simenn, i té ka voyé mo ké mo sò katéchis, é apré sa, nou té ka viré jwenn li pou kouté lanmès onzèr. Aprémidi, nou té k’alé lasal ké manman. A konsa mo rivé wè fasilman ki diférans i té gen ant sa dé rélijyon-yan.

Mo manman koumansé palé di sa i té fin anprann ké Bob ké Marion Hutcheson, a té dé zanmi i té gen dipi lontan. É yé menm osi yé asèpté lavérité-a. An 1958, frè ké sò Hutcheson mennen mo Nouyòrk, ansanm ké yé trwa garson. Nou tout alé annan asanblé entèrnasyonal-a « La volonté divine » ki fèt pannan 8 jou. A jòdla mo ka konprann ki sakrifis yé fè pou mennen nou laba. Mé sa asanblé-a, a roun annan pi bèl bagaj mo ka sonjé annan mo lavi.

YÉ GADÉ POU MO É SA CHANJÉ TOUT MO LAVI

Lò mo té jennjan, nou té ka rété annan roun bitasyon é mo té kontan okipé di zannimo-ya bokou. Mo té lé vréman divini vétérinèr. Mo manman palé di sa ké roun ansyen annan asanblé-a. Épi jantiman, ansyen-an fè mo sonjé ki nou ka viv annan « dèrnyé jou-ya ». É i fè mo réfléchi. Sa fòrmasyon-an té ké fèt asou plizyèr lannen, é mo lanmityé ké Jéova té ké pouvé pran roun tap (2 Tim. 3:1). Donk mo désidé pa alé linivèrsité.

Mé mo té ka doumandé mo kò sa mo té ké fè lò mo té ké fini lékòl. Menm si mo té ka préché chak sanmdi ké chak dimanch, mo pa té kontan préché é mo pa té lé divini pyonyé. An menm tan, mo papa ké mo tonton ki pa té ka adoré Jéova té ka ankourajé mo asèpté roun travay a plen tan annan roun gran antrépriz asirans Toronto. Mo tonton té gen roun bon plas annan sa antrépriz-a. Donk mo asèpté sa travay-a.

Annan sa travay-a, mo toujou té ka fè plis lèr é mo té ka pasé bokou tan ké moun ki pa té ka adoré Jéova. Sa té ka anpéché mo préché épi alé annan réinyon-yan chak simenn. O koumansman, mo té ka rété koté mo granpapa ki pa Témwen, mé lò i mouri, mo té pou trapé rounòt kaz.

Frè ké sò Hutcheson, ki té mennen mo annan asanblé 1958, té kou roun papa ké roun manman pou mo. Yé di mo vini rété koté yé, é gras a yé, mo fè progrè èspirityèl. An 1960, mo batizé an menm tan ki yé tibolonm, John. Apré sa, John divini pyonyé, é sa ankourajé mo préché plis. Frè-ya annan asanblé-a wè ki mo té ka fè progrè, é yé mété mo serviteur à l’École du ministère théocratiquea.

MO KA MARYÉ KÉ ROUN BON TI MADANM É MO KA DIVINI PYONYÉ

An 1966, mo maryé ké Randi Berge, roun pyonyé ki té gen bokou balan é ki té lé alé koté yé té bézwen plis moun pou préché. Nou rèsponsab sirkonskripsyon wè ki nou té lé fè plis é i ankourajé nou alé idé asanblé Orillia, an Ontario. Donk nou déménajé pou alé rété laba.

Lò nou rivé Orillia, mo divini pyonyé pèrmanan, kou Randi. Balan i té gen-an té détenn asou mo ! Mé a sèlman lò mo mété tout mo fòrs annan sèrvis pyonyé-a ki mo rousanti lajwa nou gen lò nou ka itilizé Labib-a, é lò nou ka wè moun-yan konprann lavérité. Lò nou té Orillia, nou idé roun mouché ké so madanm trè janti pou yé fè chanjman annan yé lavi é pou yé divini Témwen Jéova. Sa té bèl toubonnman !

ROUNÒT LANG KA FÈ NOU RÉFLÉCHI ROUNÒT FASON

Roun jou mo té Toronto, mo kontré ké Arnold MacNamara, roun annan frè-ya ki té ka dirijé travay Bétèl-a. I doumandé mo si nou té ké lé divini pyonyé èspésyal. Lanmenm mo di : « Mé wi ! Nou pouvé alé nenpòrt ki koté sòf Kébèk ! » Mo di sa paské mantalité moun-yan ki ka rété annan parti-a koté yé ka palé anglé o Kébèk té détenn asou mo. Yé pa té kontan parti-a koté yé ka palé fransé o Kébèk. A sa lépòk-a, i té gen roun mouvman politik ki té lé sa koté-a vin endépandan. Souvan i té gen sa yé ka aplé troubles sociaux.

Arnold réponn mo : « Atchèlman, a o Kébèk rounso filyal-a ka voyé pyonyé èspésyal. » Donk lanmenm mo asèpté alé. Mo té savé ki Randi té ké kontan. Pita, mo randé mo kò kont ki a té roun annan pi bon désizyon nou té pran.

Mo ké Randi, ké rounòt frè ké so madanm, nou pati pou alé Rimouski, roun ti vil o nòr ès é a 540 kilomèt di Montréal. Anvan nou alé, nou té pran léson pannan senk simenn pou anprann palé fransé, mé nou té gen bokou progrè pou fè toujou. Parèkzanp, roun jou, pannan roun réinyon, mo té ka li kominikasyon-yan, é pasé mo di i té ké gen roun patché « délégués autrichiens » pou prochen asanblé-a, mo di ki i té ké gen roun patché « délégués autruches ».

Kat sò ki pa té maryé é ki té gen bokou balan, ké frè ké sò Huberdeau ké yé dé tifi vin jwenn nou pita. Frè ké sò Huberdeau té ka louwé roun kaz ki té gen sèt chanm é yé té ka aplé sa kaz-a « la Maison-Blanche » akoz di koulèr poto sa kaz-a. Plizyèr pyonyé té ka rété koté yé, é yé tout té ka bay roun ti moso soumaké pou péyé loyé-a. An jénéral nou té ant 12 ké 14 moun annan sa kaz-a. Kou nou té pyonyé èspésyal, mo ké Randi nou té ka préché maten, aprémidi ké aswè. Donk nou té kontan paské i té toujou gen roun moun pou préché ké nou, menm lò a té sézon frédi é i té ka fè frèt aswè.

Nou té tèlman kontan sa pyonyé-ya ki yé divini kou nou pròp fanmi. Détan, nou té ka limen roun difé épi nou té ka asiz òbò l’. Nou té gen osi sa nou té ka aplé « journées pierogi », sa lé di ki sa jou-ya nou tout té ka fè ravioles farcies. É souvan, sanmdi aswè, kou i té gen roun frè ki té konnèt jwé lanmizik, nou té ka chanté épi nou té ka dansé.

Annan téritwar Rimouski, i té gen bokou moun ki té lé étidyé Labib-a. An senk an, plizyèr étidyan Labib-a fè progrè jistan yé batizé é i vin gen 35 proklamatèr annan asanblé-a !

Préché o Kébèk, a té roun bon fòrmasyon pou nou. Nou wè Jéova idé nou annan prédikasyon-an mé osi pou sa nou té bézwen. Anplis di sa, nou anprann kontan moun ki té ka palé fransé, nou anprann kontan yé lang épi yé kiltir é sa bay nou anvi konnèt ròt kiltir ankò (2 Cor. 6:13).

Épi filyal-a doumandé nou déménajé pou alé rété annan vil Tracadie (Nouveau-Brunswick). Nou pa té ka antann sa. Sa pa té fasil pou nou. Nou té fin sinyé roun kontra pou louwé roun kaz. Mo té gen roun travay a mitan, mo té ka ansényé annan roun lékòl. I té gen sa ki té ka étidyé Labib-a ké nou ki té fin divini proklamatèr, épi nou té ka konstrwi roun sal di Rwayonm, nou té an mitan travo-ya.

Nou priyè toulong sanmdi ké dimanch pou sa chanjman-an é nou alé vizité vil Tracadie-a. A té roun vil ki pa té gen anyen ka wè ké Rimouski. Mé kou Jéova té lé nou alé laba, nou désidé alé rété laba. Nou fè sa pou wè sa Jéova té ké fè pou nou, é nou wè l’ tiré tout bagaj ki té ka baré nou chimen (Mal. 3:10). Sa kou-a ankò, kou Randi gen roun bèl lanmityé ké Jéova, i pa ka gadé pou so douvan lèstomak é i kontan ari, sa té pi fasil pou nou té déménajé.

Annan nou nouvo asanblé, a rounsèl ansyen i té gen, Robert Ross. Li ké so madanm Linda té pyonyé annan sa asanblé-a anvan, é yé té désidé rété la lò yé fè yé prémyé timoun. Menm si sa té ka pran yé bokou tan pou okipé di yé ti garson, yé ankourajé nou bokou, mo ké Randi, paské yé byen rousouvwè nou, nou té ka wè ki yé pa té ka moli é ki yé té gen bokou balan annan prédikasyon-an.

NOU KONTAN SÈRVI JÉOVA KÈLKÉSWA SA I KA DOUMANDÉ NOU FÈ

Nou rété annan vil Tracadie kou pyonyé pannan dé lannen, é apré sa, Jéova fè nou rounòt sirpriz : i envité nou travay annan sèrvis sirkonskripsyon-an. Nou vizité asanblé-ya an anglé pannan sèt lannen. Apré sa, yé mété nou annan roun sirkonskripsyon fransé o Kébèk. Nou surveillant de district o Kébèk, Léonce Crépeaultb, té toujou ka félisité mo pou diskour mo té ka fè. Mé apré sa, i té ka doumandé mo : « Kouman to pouvé fè pou sa to ka di pi itil ankò ? » Fason i gadé pou mo-a pousé mo ansényé pi byen épi roun fason ki pi senp.

Mo pa ké janmen bliyé asanblé entèrnasyonal-a « La foi victorieuse » ki fèt Montréal an 1978. Yé té doumandé nou okipé di sèrvis cafétéria. 80 000 moun té pou vini é tout bagaj té chanjé : matéryèl-a, sa yé té ké bay moun manjé ké fason nou té pou préparé manjé-a, nou pa té janmen fè sa. É nou té gen apéprè 20 kamyon réfrigérés mé yé pa té toujou ka byen maché. Anplis di sa, lavèy asanblé-a, i té gen roun match annan èstad-a koté asanblé-a té pou fèt, é nou antann minwi anvan nou té pouvé mété tout bagaj. Mé four-ya yé menm, a té pou limen yé anvan jou louvri pou nou té pouvé préparé tchenbé tchò-a ! Nou té las, mé mo anprann roun patché bagaj ké volontèr-ya ki té kontan travay, ki té gen matirité é ki té kontan ari. Nou divini zanmi, é jis jòdla nou zanmi toujou. A pa ti kontan mo té kontan la pou sa asanblé-a o Kébèk, koté yé té pèrsékité nou frè ké sò-ya ant 1940 ké 1950 !

Mo travay ké plizyèr frè pannan gran asanblé réjyonal-ya ki fèt Montréal é mo anprann roun patché bagaj ké yé osi. I gen roun lannen, David Splane, ki annan Kolèj santral-a aprézan, dirijé sa yé ka aplé le bureau de l’assemblée. Rounòt lannen, a mo yé doumandé fè sa. Mé David idé mo ké tout so tchò.

An 2011, apré 36 lannen annan sèrvis sirkonskripsyon-an ké Randi, yé doumandé mo divini fòrmatèr pou l’École des anciens des assemblées. An dézan, nou dronmi annan 75 lit diféran, mé sakrifis-a té vo lapenn. Lò chak simenn té fini, ansyen-yan té gen bokou rékonésans pou Kolèj santral-a paské yé té wè kouman sa té enpòrtan pou li pou yé rété pròch ké Jéova.

Pita, mo divini fòrmatèr pou Lékòl pou évanjélizatèr Rwayonm-an. Zélèv-ya souvan té ka santi ki yé pa té pouvé ankò paské yé té gen bokou bagaj pou fè : chak jou yé té ka étidyé pannan apéprè sèt lèr, épi chak jou aswè yé té gen dévwar pou fè apéprè pannan trwa lèr épi yé té gen kat ouben senk partisipasyon pou préparé chak simenn. Mo menm ké ròt fòrmatèr-a nou té ka èspliké yé ki yé pa té ké pouvé rivé si Jéova pa té ka idé yé. Mo toujou ké sonjé kouman zélèv-ya té ka rété èstébékwé lò yé té ka wè ki lò yé té ka konté asou Jéova, yé té ka rivé fè plis ki sa yé té ka pansé yé té pouvé fè.

LÒ TO KA GADÉ POU RÒT-YA, TO KA JWENN BÉNÉDIKSYON PANNAN TOUT TO LAVI

Kou mo manman té ka gadé pou ròt-ya, i jwenn roun patché bon rézilta : sa-ya ki té ka étidyé Labib-a ké li fè progrè é mo papa chanjé lidé asou lavérité-a ! Trwa jou apré mo manman mouri, nou rété étoné lò i vini lasal di Rwayonm pou kouté diskour-a, é i kontinyé vini annan réinyon-yan pannan 26 lannen. Mo papa pa janmen batizé, mé ansyen-yan di nou ki a toujou li ki té ka rivé lasal an prémyé.

Mo manman bay mo ké mo sò-ya roun bon èkzanp. Mo trwa sò ké yé mari ka adoré Jéova fidèlman. Mo gen dé sò ki bétélit, roun ki o Pòrtigal é ròt-a an Ayiti.

Jòdla, mo ké Randi nou pyonyé èspésyal a Hamilton, an Ontario. Lò nou té annan sèrvis sirkonskripsyon-an, nou té kontan alé ké nou frè ké sò-ya pou routounen wè moun-yan é pou fè léson biblik. Mé aprézan, nou kontan wè sa-ya ki ka étidyé Labib-a ké nou fè progrè. Nou ka vin zanmi ké frè ké sò-ya annan nou asanblé, é lò nou ka wè ki Jéova la ké yé lò a bon bagaj ouben mové bagaj ki ka rivé yé, sa ka ankourajé nou.

Lò nou ka sonjé kouman roun patché moun gadé pou nou pannan tout nou lavi, nou gen bokou rékonésans. Nou menm, nou éséyé « vréman enkyété » pou ròt-ya é nou ankourajé yé bay Jéova sa yé gen ki miyò (2 Cor. 7:6, 7). Parèkzanp, annan roun fanmi, i té gen madanm-an, tibolonm-an ké tifi-a ki té annan sèrvis a plen tan-an. Mo doumandé mari-a si i té ja sonjé divini pyonyé. I réponn mo ki i té ja ka idé trwa pyonyé. Alòr mo doumandé li : « Ès to pouvé idé yé pi byen pasé Jéova ? » Mo ankourajé l’ gouté pou wè ki lajwa so fanmi té gen. Sis mwa apré sa, i té pyonyé.

Mo ké Randi nou ké kontinyé rakonté « pou jénérasyon-an ki ka vini », « bèl bagaj » Jéova fè. Nou ka èspéré ki yé ké pran plézi sèrvi Jéova menm fason nou menm nou pran plézi sèrvi l’ ! (Ps. 71:17, 18).