ARTIK POU ÉTIDYÉ 22
KANTIK 15 Vive le Premier-né de Jéhovah !
Poukisa non Jéova-a enpòrtan pou Jézi ?
« Mo fè yé konnèt to non é mo ké fè yé konnèt li » (JEAN 17:26).
SA NOU KÉ ANPRANN
Nou ké wè kouman Jézi fè moun konnèt non Jéova-a é kouman i montré ki Jéova sen é ki tousa Satan di asou li, a yenki manti.
1-2. a) Kisa Jézi fè lannwit anvan yé tchwé l’ ? b) Ki késyon nou ké réponn annan sa artik-a ?
NOU annan lannen 33, jédi 14 nizan. I ta. Titalò, yé ké trayi Jézi, yé ké jijé l’, kondané l’, malmennen l’ épi tchwé l’. I fin manjé roun répa èspésyal ké so apot ki té fidèl annan roun lasal laro kaz roun moun. Apré sa, i ankourajé yé. A té dèrnyé fwa i té ka fè l’ anvan i mouri. Aprézan, anvan yé tout pati, i ka fè roun lapriyè ki enpòrtan toubonnman. Nou ka jwenn sa lapriyè-a annan Jean chapit 17.
2 Kisa lapriyè Jézi fè ka anprann nou asou sa ki té ka troumanté l’ a sa moman-an é asou sa ki té pi enpòrtan pou li lò i té asou latè-a ? Annou réponn sa késyon-an.
« MO FÈ YÉ KONNÈT TO NON »
3. Kisa Jézi di dé fwa lò i priyè, é kisa sa té lé di ? (Jean 17:6, 26).
3 « Mo fè yé konnèt to non. » Jézi di sa dé fwa annan so lapriyè (li Jean 17:6, 26). Kisa i té lé di ? Ès i té lé fè so disip konnèt non so Papa ? Awa. Kou so disip té Jwif, yé té ja savé ki non Bondjé, a Jéova. Sa non-an marké annan Ékritir ébrayik-ya rounlo ké roun patché fwa. Donk, Jézi pa té ka palé di non Bondjé. I té ka pito palé di sa sa non-an té ka réprézanté. I fè yé konnèt moun-an ki té ka poté sa non-an, sa i lé pou moun-yan ké latè-a, sa i fè ké sa i ké fè, ké bèl kalité i gen. É a li sèlman ki té pouvé èspliké tousa konsa.
4-5. a) Kouman non roun moun pouvé vin gen plis valò pou nou ? Bay roun èkzanp. b) Kouman disip Jézi-ya vin « konnèt » non Jéova-a ?
4 Imajiné i gen roun ansyen annan to asanblé yé ka aplé David. I chirirjyen. Sa ka fè lontan to konnèt li. Mé roun jou, to divèt antré lopital lanmenm. Yé ka mennen to lopital koté sa frè-a ka travay, a li ki ka opéré to é i ka sové to. Lò to ka sonjé non sa frè-a aprézan, ès i pa gen plis bagaj ka vini an to lèspri ? Asiré ! Aprézan, a pa roun ansyen rounso, a chirirjyen-an ki sové to lavi osi.
5 Disip Jézi-ya osi té ja konnèt non Jéova-a. Mé, sa non-an vin gen plis valò pou yé paské Jézi idé yé konnèt li pi byen. Jézi imité so Papa annan tousa i di ké tousa i fè. Donk, lò disip-ya wè kouman Jézi té ka ansényé é kouman i té ka aji ké ròt-ya, yé vin « konnèt » Jéova pi byen (Jean 14:9 ; 17:3).
« TO NON, NON TO BAY MO-A »
6. Lò Jézi di ki Jéova bay li so non, kisa i té lé di ? (Jean 17:11, 12).
6 Jézi priyè pou so disip. Men sa i doumandé Jéova : « Gadé pou yé akoz di to non, non to bay mo-a » (li Jean 17:11, 12). Ès sa té lé di ki yé té ké aplé Jézi Jéova aprézan ? Non. Si to byen gadé, Jézi di « to non », donk yé pa koumansé aplé Jézi, Jéova. Atò, kisa Jézi té lé di lò i di ki yé té bay li non Bondjé ? Prémyèrman, i té lé di ki a li ki té ka réprézanté Bondjé é ki té ka di moun-yan sa Bondjé té lé di yé. A té so Papa ki té voyé l’ asou latè-a é a li ki té pèrmèt li fè mirak (Jean 5:43 ; 10:25) Dézyèmman, a té pou di ki so non lé di « Jéova ka sové ». Donk, annan non Jézi, i té gen non Jéova-a.
7. Bay roun èkzanp pou èspliké poukisa Jézi té pouvé palé pou Jéova.
7 Annou pran roun èkzanp pou konprann poukisa Jézi té pouvé palé kousidiré a té Jéova ki té ka palé. Détan, chèf roun péyi pouvé voyé roun moun pou palé pou li. É lò sa moun-an ka di roun bagaj, a kousidiré a té chèf péyi-a menm ki té ka palé. Menm fason-an, Jézi té ka réprézanté Jéova é i té ka palé a so plas (Mat. 21:9 ; Luc 13:35).
8. Poukisa Jéova di ki so non té « annan » Jézi anvan i vini asou latè ? (Exode 23:20, 21).
8 Labib ka aplé Jézi « Paròl-a » paské i té ka di zanj-ya ké moun asou latè sa Jéova té lé i di yé (Jean 1:1-3). Nou pouvé pansé ki zanj-a Jéova voyé pou i pran swen di Israyélit-ya lò yé té annan dézèr-a, a té Jézia. Lò Jéova doumandé so pèp obéyi sa zanj-a, i di li : « Pas mo non annan li » (li Exode 23:20, 21). Jéova di sa pas Jézi ka palé a so plas é a li an prémyé ki ka montré ki Jéova toujou ka fè sa ki drèt é ki i sen.
« PAPA, GLORIFYÉ TO NON »
9. Poukisa nou pouvé di ki non Jéova-a té enpòrtan toubonnman pou Jézi ?
9 Kou nou wè l’, anvan menm Jézi vini asou latè-a, non Jéova-a té enpòrtan toubonnman pou li. Lò i té asou latè-a, i montré annan tousa i fè kouman non so Papa té enpòrtan pou li ! Roun tibi tan anvan i mouri, Jézi doumandé Jéova : « Papa, glorifyé to non. » Lanmenm, Jéova réponn li. Roun vwa ki té ka vini di syèl-a é ki té fò kou loraj di : « Mo ja glorifyé l’ é mo ké glorifyé l’ ankò » (Jean 12:28).
10-11. a) Kouman Jézi glorifyé non Jéova-a ? (gadé zimaj-a osi). b) Poukisa Jéova bézwen sanktifyé épi défann so non ?
10 Jézi osi glorifyé non so Papa. Kouman i fè sa ? Parèkzanp, i palé ròt-ya di bèl kalité so Papa gen ké di tout bèl bagaj i ka fè. Mé a pa sa rounso i fè. I sanktifyé non so Papa é i montré ki i toujou ka fè sa ki drètb. Jézi montré kouman sa té enpòrtan lò i anprann so disip priyè. I di yé : « Nou Papa ki annan syèl-a, a pou to non sanktifyé » (Mat. 6:9).
11 Poukisa Jéova bézwen sanktifyé épi défann so non ? Paské annan jarden Édèn-an, Satan malpalé Jéova pou sali so répitasyon. I di ki Jéova té ka manti é ki i té ka anpéché Adan ké Èv gen roun bon bagaj (Gen. 3:1-5). I té lé fè yé krè ki sa Jéova té ka fè pa té bon. Sa Djab-a di sali non Bondjé-a, sa lé di so répitasyon. Pita, annan lépòk Jòb, sa mantò-a di ki sa-ya ki ka adoré Jéova ka fè l’ jis pou profité di sa i ka bay yé. I di dèyè sa ki pyès moun pa kontan Jéova asé pou kontinyé adoré l’ lò yé gen problèm (Job 1:9-11 ; 2:4). Kimoun té ka manti ? Jéova ouben Satan ? A ké tan-an nou té ké wè sa.
Jézi anprann so disip ki sa enpòrtan di sanktifyé non Bondjé-a (gadé paragraf 10).
« MO KA BAY MO LAVI »
12. Kisa Jézi asèpté fè pas i té kontan Jéova ?
12 Kou Jézi té kontan Jéova, i té lé fè tousa i té pouvé pou sanktifyé ké défann so non. I di : « Mo ka bay mo lavi » (Jean 10:17, 18). É vré, i té paré mouri pou non Jéova-ac. Adan ké Èv, ki té parfè, té désidé tounen yé do bay yé Papa épi alé ké Satan. Jézi li menm asèpté vini asou latè-a pou montré ki i té kontan so Papa ké so non. Pou montré so lanmou, i obéyi Jéova annan tousa i di ké tousa i fè. É i rété fidèl pannan tout so lavi jistan i mouri asou roun poto soufrans (Héb. 4:15 ; 5:7-10 ; Héb. 12:2).
13. Poukisa a Jézi ki té pi byen plasé pou montré ki Satan sa roun mantò ? (gadé zimaj-a osi).
13 Tousa Jézi fè annan so lavi byen montré ki a pa Jéova ki ka manti, a Satan ! (Jean 8:44). Jézi té konnèt Jéova pi byen pasé pyès moun. Si menm roun tizing annan sa Satan té di asou Jéova té vré, Jézi té ké savé. Mé i té byen désidé défann non so Papa ki té kontan li, sa lé di so répitasyon. Menm lò Jéova arété protéjé l’, Jézi té byen désidé rété fidèl jistan i mouri pasé i dézobéyi l’d (Mat. 27:46).
Tousa Jézi fè annan so lavi byen montré ki a pa Jéova ki ka manti, a Satan ! (gadé paragraf 13).
« MO FINI TRAVAY TO BAY MO FÈ-A »
14. Kouman Jéova rékonpansé Jézi pas i rété fidèl ?
14 Lò i priyè lannwit anvan i mouri, Jézi té pouvé di : « Mo fini travay to bay mo fè-a. » Anplis di sa, i té sir ki Jéova té ké rékonpansé l’ pou so fidélité (Jean 17:4, 5). I té gen rézon fè so Papa konfyans. Jéova pa té lé i rété annan tonm-an (Actes 2:23, 24). I résisité l’ é i bay li « roun plas ki pi rot » annan syèl-a (Phil. 2:8, 9). Pita, Jézi divini Rwa di rwayonm Bondjé-a. Kisa sa rwayonm-an té ké fè ? Jézi bay répons-a lò i anprann so disip priyè : « A pou to rwayonm vini. A pou to volonté fèt asou latè-a, kou annan syèl-a » (Mat. 6:10).
15. Kisa Jézi ké fè ?
15 Titalò, Jézi ké briga ké lèlmi Jéova-ya é i ké krazé méchan-yan pannan lagèr Armagédon-an (Rév. 16:14, 16 ; 19:11-16). Roun ti moso tan apré sa, i ké jité Satan annan « trou-a ki pa gen fon », sa lé di roun koté i pa ké pouvé fè anyen kousidiré i té mouri (Rév. 20:1-3). Tout tan i ké rwa, sa lé di pannan mil lannen, Jézi ké mété lapè asou latè-a é i ké fè tout moun divini parfè. I ké résisité sa-ya ki mouri é i ké fè tout latè-a divini roun paradi. Volonté Jéova-a ké fèt ! (Rév. 21:1-4).
16. Kouman lavi ké fika lò mil lannen-yan ké fini ?
16 Kouman lavi ké fika lò mil lannen-yan ké fini ? I pa ké gen péché ankò. Moun pa ké bézwen doumandé pardon é yé pa ké bézwen profité di ranson-an ankò ; yé pa ké bézwen ni 144 000-ya ni Jézi idé yé vin pròch di Jéova. É « lanmò, dèrnyé lèlmi-a, ké détrwi ». Tonm-yan ké vid. Bondjé ké résisité moun mouri-ya. Tout moun ké parfè (1 Cor. 15:25, 26).
17-18. a) Kisa ki ké rivé lò mil lannen-yan ké fini ? b) Kisa Jézi ké fè lò moman-an ké rivé pou i roubay so Papa rwayonm-an ? (1 Corinthiens 15:24, 28 ; gadé zimaj-a osi).
17 Ki ròt bagaj ké rivé lò mil lannen-yan ké fini ? Pyès moun pa ké douté ankò ki Jéova sa roun Bondjé ki sen é ki jis. Poukisa ? Annan jarden Édèn-an, Satan di ki Jéova sa roun mantò é ki i pa ka dirijé latè-a ké lanmou. Mé, dipi sa jou-a, sa-ya ki ka adoré Jéova ka kontinyé sanktifyé so non. Lò mil lannen-yan ké fini, i pa ké gen pyès problèm ké so répitasyon ankò ! Pyès moun pa ké di ankò ki Jéova pa sa roun papa ki kontan so pitit.
18 Finalman, tout moun ké wè ki tousa Satan té di asou Jéova, a té manti. Kisa Jézi ké fè lò moman-an ké rivé pou i roubay so Papa Rwayonm-an ? Ès i ké tounen so do bay Jéova kou Satan fè l’ ? I pa ké fè sa menm ! (li 1 Corinthiens 15:24, 28). I ké roubay so Papa Rwayonm-an é i ké soumèt so kò anba so dominasyon. Jézi pa kou Satan, i paré pédi tousa i gen pas i kontan Jéova.
Lò mil lannen-yan fini, Jézi ka roubay Jéova Rwayonm-an ké tout so tchò (gadé paragraf 18).
19. Poukisa nou pouvé di ki non Jéova-a enpòrtan toubonnman pou Jézi ?
19 Nou ka konprann poukisa Jéova té lé bay so Pitit so non ! Jézi réprézanté so Papa di roun fason ki parfè. Pou li, i pa gen bagaj ki pi enpòrtan pasé non Jéova-a. I té paré mouri pou sa non-an. É lò mil lannen-yan ké fini, i ké paré roubay Jéova tout bagaj. Kouman nou pouvé imité l’ ? Nou ké réponn sa késyon-an annan artik ki ka vin dèyè-a.
KANTIK 16 Louez Jéhovah et son Fils, l’Oint
a Jéova voyé sèrten zanj osi pou poté plizyèr mésaj pou li. A pou sa, annan sèrten vèrsé, menmsi yé ka palé di roun zanj yé ka di « Jéova ». Épi détan, a roun moun ka palé ké roun zanj, é moun-an ka aplé sa zanj-a « Jéova » (Gen. 18:1-33). Parèkzanp, Labib ka di ki a Jéova ki bay Moyiz Lalwa-a, mé ròt vèrsé ka di ki Jéova sèrvi zanj-ya pou bay sa Lalwa-a pou li (Lév. 27:34 ; Actes 7:38, 53 ; Gal. 3:19 ; Héb. 2:2-4).
b POU BYEN KONPRANN : « Sanktifyé » lé di bay lònò, gen bokou rèspè ouben di ki roun moun ouben roun bagaj sen.
c Lanmò Jézi bay moun posibilité viv pou tout-tan osi.
d Gadé artik « Késyon moun-yan ka pozé » annan Tourdégard avril 2021-a, p. 30-31.