LÉSON 09
Lapriyè-a ka fè ou lanmityé ké Bondjé vin pi fò
Ès ou ja santi ki ou té bézwen ki roun moun bay ou roun bon konsèy ? Ès ou gen késyon asou lavi-a ki ou té ké kontan gen répons-ya ? Ès ou bézwen roun moun konsolé ou ké idé ou ? Ès ou té ké lé vin pi pròch di Jéova ? Lapriyè-a pouvé idé ou pou tout sa bagaj-ya. Mé kouman nou divèt priyè ? Ès a tout lapriyè Bondjé ka kouté ? Kisa ou divèt fè pou Bondjé kouté ou lapriyè ? Annou wè sa.
1. Kimoun nou divèt priyè, é pou ki bagaj ?
Jézi ansényé ki a nou Papa ki annan syèl-a rounso nou divèt priyè. A sa Jézi li menm té ka fè. I di : « Atò, a konsa pou zòt priyè : “Nou Papa ki annan syèl-a...” » (Matthieu 6:9). Lò nou ka priyè Jéova, nou lanmityé ké li ka vin pi fò.
Nou pouvé priyè Jéova pou près tout kalité bagaj. Mé si nou lé Bondjé kouté nou lapriyè, fo sa nou ka doumandé l’ alé ké so volonté. ‘Nenpòrt ki bagaj nou ka doumandé Bondjé soulon so volonté, i ka tandé nou’ (1 Jean 5:14). Jézi bay èkzanp asou kisa nou pouvé priyè (li Matthieu 6:9-13). Nou pouvé priyè pou nou menm. Mé a pa pou nou bliyé di Bondjé mèrsi pou sa i ka fè pou nou, é doumandé l’ osi idé ròt-ya.
2. Kouman nou divèt priyè ?
Labib-a ka ankourajé nou ‘di Bondjé tousa nou gen ofon nou tchò’ (Psaume 62:8). Atò, a ké nou tchò nou divèt priyè Bondjé. Nou pouvé priyè fò ouben annan nou tèt, a nenpòrt ki moman ké nenpòrt ki koté. I pa gen roun pozisyon èspésyal. Nou pouvé priyè ajounou, asiz ouben dibout. Pi enpòrtan-an a ki nou montré nou gen rèspè pou Jéova.
3. Kouman Bondjé ka réponn nou lapriyè ?
I ka fè sa di plizyèr fason. Jéova bay nou so paròl, Labib-a, é annan l’ nou ka trapé répons asou késyon nou ka pozé nou kò. Li Paròl Bondjé pouvé « bay sa-la ki pa gen èspéryans sajès » (Psaume 19:7 ; li Jacques 1:5). Jéova pouvé idé nou osi rété kalm lò nou gen problèm. É i pouvé itilizé so sèrvitèr-ya pou yé idé nou lò nou bézwen.
ANNOU FOUYÉ ANNAN LABIB-A
Annou wè kisa ou divèt fè pou Bondjé kouté ou lapriyè. Annou wè osi kouman lapriyè-a pouvé idé ou.
4. Sa nou divèt fè pou Bondjé kouté nou lapriyè
Ki bagaj i enpòrtan nou fè pou Bondjé kouté nou lapriyè ? Gadé VIDÉYO-a.
Jéova lé nou priyè l’. Li Psaume 65:2, épi kozé asou sa késyon-yan :
Ès ou ka pansé ki ‘sa-la ki ka tandé lapriyè-a’ lé ou priyè l’ ? Poukisa ou ka pansé sa ?
Pou Bondjé kouté nou lapriyè, fo nou viv di roun fason ki ka fè l’ plézi. Li Michée 3:4 ké 1 Pierre 3:12, épi kozé asou sa késyon-yan :
Poukisa nou pouvé sir ki Bondjé ké kouté nou lapriyè ?
Pannan roun lagèr, chak bò ka priyè pou ganyen. Ès ou ka pansé ki Bondjé ké réponn sa kalité lapriyè-ya ?
5. Nou divèt priyè ké nou tchò
I gen moun ki anprann ki yé té divèt toujou répété menm lapriyè-a. Mé ès a konsa Jéova lé nou priyè l’ ? Li Matthieu 6:7, épi kozé asou sa késyon-yan :
Kisa ou divèt fè pou ‘pa toujou répété menm bagaj-ya’ annan ou lapriyè ?
Chak jou, réfléchi asou roun bèl bagaj Bondjé fè pou ou, épi di li mèrsi pou sa. Si ou ka fè sa touléjou pannan roun simenn, ou ké wè ki ou rivé priyè pou sèt bagaj diféran san répété menm paròl-ya.
Roun papa kontan lò so pitit ka palé ké li ké tout so tchò. Ké Jéova a menm bagaj-a. I kontan lò nou ka palé ké li ké tout nou tchò.
6. Lapriyè-a a roun kado di Bondjé
Kouman lapriyè-a pouvé bay nou fòrs lò tout bagaj k’alé byen mé osi lò nou anba problèm ? Gadé VIDÉYO-a.
Labib-a ka di ki lapriyè-a pouvé idé nou rété kalm. Li Philippiens 4:6, 7, épi kozé asou sa késyon-yan :
A vré ki lapriyè-a pa ké toujou fè disparèt tout problèm nou ka jwenn, mé magré sa, kouman sa pouvé idé nou ?
Pou kisa ou té ké lé priyè ?
Ès ou savé sa ?
« Anmèn » lé di « a sa ki pou fèt » ouben « asiré pa pitèt ». Labib-a ka di ki dipi lontan, sèrvitèr Bondjé-ya ka di « anmèn » lò roun lapriyè fini (1 Chroniques 16:36).
7. Pran tan pou priyè
Détan, nou tèlman okipé ki nou ka bliyé priyè. Ès pou Jézi sa té enpòrtan priyè ? Li Matthieu 14:23 ké Marc 1:35, épi kozé asou sa késyon-yan :
Kisa Jézi té ka fè pou gen tan priyè ?
Kisa ou pouvé fè pou trapé tan pou priyè ?
I GEN MOUN KA DI : « Priyè pa ka sèrvi anyen, Bondjé pa janmen réponn mo lapriyè. »
Kisa ou té ké réponn ?
SA NOU WÈ
Priyè ké tout nou tchò ka fè nou vin pi pròch di Bondjé. Sa ka idé nou rété kalm, é sa ka bay nou fòrs nou bézwen pou fè Jéova plézi.
Kisa ou anprann
Kimoun nou divèt priyè ?
Kouman nou divèt priyè ?
Kouman lapriyè-a pouvé idé nou ?
SA OU POUVÉ TRAPÉ OSI
Trapé répons asou késyon moun ka pozé asou lapriyè-a.
« Sept choses à savoir sur la prière » (La Tour de Garde, 1é òktòb 2010)
Gadé poukisa sa enpòrtan priyè é sa ou pouvé fè pou ou lapriyè vin miyò.
Kimoun nou divèt priyè ? Gadé sa Labib-a ka di asou sa.
Sa vidéyo-a ka montré ki nou pouvé priyè nenpòrt ki koté é nenpòrt ki moman.