To pouvé sir ki Jéova kontan to

1. Poukisa to bay Jéova to lavi ? (gadé zimaj-a osi).

ÈS TO ka sonjé jou to désidé bay Jéova to lavi ? To désidé fè sa pas to anprann konnèt li é to vin kontan li. To promèt li ki sa ki té ké pi enpòrtan pou to, a fè so volonté é ki to té ké kontinyé kontan l’ ké tout to tchò, ké tout to nanm, ké tout to pansé épi ké tout to fòrs (Marc 12:30). Dipi sa jou-a, to lanmou pou li vin plizanpli fò. Atò, kisa to té ké réponn si yé té ka doumandé to : « Ès to kontan Jéova ? » Lanmenm, to té ké réponn : « I pa gen pyès moun ni pyès bagaj mo kontan plis pasé li ! »

2-3. Di kisa Jéova lé nou sir, é kisa nou ké wè annan sa artik-a ? (Jérémie 31:3).

² Parkont, kisa to té ké réponn si yé té ka doumandé to : « Ès to sir ki Jéova kontan to ? » Ès to té ké réfléchi anvan to di wi pas to ka pansé ki to pa mérité i kontan to ? Men sa roun sò ki soufri lò i té piti di : « Mo savé ki mo kontan Jéova, mo sir di sa. Parkont, mo souvan ka doumandé mo kò si i kontan mo. » Kouman to pouvé savé sa Jéova ka vréman rousanti pou to ?

³ Jéova lé to sir ki i kontan to (li Jérémie 31:3). Sonjé sa : I fè to vin òbò li. É lò to bay li to lavi é to batizé, i fè to roun kado ki gen bokou valò : so lanmou fidèl. Sa lé di ki a pa ti kontan i kontan to é ki i pa ké janmen lésé to tonbé. Sa lanmou-a ka fè li wè tout sa ki ka adoré l’, donk to menm osi, kou so « nasyon èspésyal » (Mal. 3:17). Jéova lé to sir ki i kontan to menm fason apot Pòl té sir ki Jéova té kontan li. A pou sa i ékri : « Mo sir ki ni lanmò, ni lavi, ni zanj, ni gouvèrnman, ni bagaj ki la aprézan, ni bagaj ki ké rivé, ni pwisans, ni rotò, ni bagaj ki fon, ni pyès ròt kréyasyon pa ké pouvé séparé nou di lanmou Bondjé gen pou nou » (Rom. 8:38, 39). Annan sa artik-a, nou ké wè poukisa nou divèt fè sa ki fo pou nou ankò pi sir ki Jéova kontan nou é kouman nou pouvé fè sa.

POUKISA TO DIVÈT SIR KI JÉOVA KONTAN TO

4. Ki manti Satan lé fè nou krè, é kisa nou pouvé fè pou nou pa tonbé annan so trap ?

⁴ Lò nou sir ki Jéova kontan nou, nou pa ka tonbé annan « trap » Satan (Éph. 6:11). Satan ka fè tousa i pouvé pou nou arété adoré Jéova. Roun bagaj i ka éséyé fè, a fè nou krè ki Jéova pa kontan nou. Mé a roun manti. Pa jen bliyé ki lò Satan gen roun chans pou ataké nou, i pa ka pédi tan. Souvan, a lò nou pi fèb i ka ataké nou, parèkzanp lò nou dékourajé akoz di mové bagaj ki rivé nou anvan, akoz di problèm nou ka jwenn jòdla ouben paské nou ka enkyété nou kò pou dimen (Prov. 24:10). I kou roun lyon ki ka chwazi ataké roun jibyé ki fèb. Lò nou fèb, i ka profité pou éséyé fè nou anbandonnen Jéova. Mé si nou toujou ka fè sa ki fo pou nou ankò pi sir ki Jéova kontan nou, nou ké gen plis fòrs pou « tchenbé rèd douvan li » é pou nou pa tonbé annan so trap (1 Pierre 5:8, 9 ; Jacq. 4:7).

5. Poukisa nou bézwen santi ki Jéova kontan nou ?

⁵ Lò nou sir ki Jéova kontan nou, nou lanmityé ké li ka vin pi fò. Poukisa nou ka di sa ? Nou bézwen kontan ròt-ya é nou bézwen santi ki ròt-ya kontan nou. A konsa Jéova fè nou. Lò moun ka montré nou ki yé kontan nou, sa ka bay nou anvi montré yé ki nou kontan yé osi. Donk, pi nou ké santi ki Jéova kontan nou, pi nou ké kontan l’ (1 Jean 4:19). É pi nou lanmou pou li ké vin fò, pi so lanmou pou nou ké vin fò osi. A sa nou ka wè annan Jacques 4:8 : « Vini pi pròch di Bondjé, é i ké vini pi pròch di zòt ». Mé kisa nou pouvé fè pou nou ankò pi sir ki Jéova kontan nou ?

KISA TO POUVÉ FÈ POU TO SIR KI JÉOVA KONTAN TO ?

6. Si nou pa ka rivé krè ki Jéova kontan nou, kisa nou pouvé doumandé li ?

⁶ Kontinyé priyè Jéova pou i idé to konprann poukisa i kontan to (Luc 18:1 ; Rom. 12:12). Doumandé Jéova idé to wè to kò kou li menm ka wè to. Pitèt to ké bézwen fè l’ plizyèr fwa touléjou. A vré ki si to tchò ka di to ki Jéova pa kontan to, sa pouvé rèd pou to arété krè sa. Mé pa bliyé ki Jéova pi gran pasé to tchò (1 Jean 3:19, 20). I konnèt to pi byen pasé to menm, i ka wè sa to menm to pitèt pa menm pouvé wè (1 Sam. 16:7 ; 2 Chron. 6:30). A pou sa, pa pè ‘di li tousa to gen ofon to tchò’ épi doumandé li idé to krè ki i kontan to (Ps. 62:8). Épi lò to fin priyè, fè sa nou ké wè aprézan.

7-8. Kouman Psaumes-yan ka byen montré nou ki Jéova kontan nou ?

⁷ Krè sa Jéova ka di. A Jéova ki fè moun ékri Labib. Donk, to pouvé krè tousa yé di asou li. Gadé ki bèl bagaj David ka di asou Jéova. « Jéova pròch di sa-ya yé tchò krazé ; i ka sové sa-ya ki dékourajé » (Ps. 34:18). Lò to tris, pitèt to ka pansé ki pyès moun pa ka konprann to é ki pyès moun pa pouvé idé to. Mé Jéova ka di to ki to pouvé sir ki lò to ka santi to kò konsa, i pròch di to pas i savé ki a la to bézwen li. Men sa David ékri annan rounòt psaume : « Mété mo dlo wéy annan to boutèy » (Ps. 56:8). Jéova ka wè lò to ka soufri. I vréman ka gadé pou to é lò i ka wè to soufri, i pa kontan sa menm. Menm fason chak ti gout dlo roun moun ki annan dézèr-a gen annan so boutèy enpòrtan pou li, chak ti gout dlo ka koulé di to wéy lò to ka kriyé enpòrtan pou Jéova. I ka sonjé chak fwa to kriyé pas to té tris. Men sa nou ka li osi annan Psaume 139:3 : « To konnèt tousa mo ka fè. » Jéova ka wè tousa to ka fè, mé sa i ka gadé, a bon bagaj to ka fè (Héb. 6:10). Poukisa ? Paské chak éfòr to ka fè pou fè l’ plézi enpòrtan pou li.

⁸ Grasa sa vèrsé-ya ki ka konsolé nou ké ròt ankòa, a kousidiré Jéova té ka di to : « Mo lé to savé kouman mo kontan to é kouman mo ka gadé pou to. » Mé kou nou wè l’, Satan ka éséyé fè nou krè ki Jéova pa kontan nou. Alòr, si détan to pa ka rivé krè ki Jéova kontan to, doumandé to kò : « Kimoun mo ké krè ? “Papa manti-a” ouben “Bondjé lavérité-a” ? » (Jean 8:44 ; Ps. 31:5).

9. Kisa Jéova ka promèt sa-ya ki kontan l’ ? (Exode 20:5, 6).

⁹ Réfléchi asou sa Jéova ka rousanti pou sa-ya ki kontan li. Sonjé sa i di Moyiz ké Israyélit-ya (li Exode 20:5, 6). I di yé ki i sa roun Bondjé ki pa ké jen arété montré so lanmou fidèl pou sa-ya ki kontan l’. Sa i di ka pèrmèt nou sir ki i fidèl é ki i ké toujou kontan roun moun ki kontan l’ (Néh. 1:5). Donk, détan, si to bézwen sir ki Jéova kontan to, doumandé to kò : « Ès mo kontan Jéova ? » Apré sa, sonjé sa : kou to kontan l’ é ki to ka fè tousa to pouvé pou fè l’ plézi, to pouvé sir ki i kontan to bokou (Dan. 9:4 ; 1 Cor. 8:3). Anfèt, menm fason to sir ki to kontan l’, to pouvé sir ki i kontan to. To pouvé sir ki i ké toujou kontan to é ki i pa ké janmen lésé to tonbé.

10-11. Kouman Jéova lé to wè ranson-an ? (Galates 2:20).

¹⁰ Réfléchi asou ranson-an. Pi bèl kado Jéova fè nou, a ranson Jézi péyé lò i bay so lavi (Jean 3:16). Mé ès sa kado-a, a pou to osi ? Asiré pa pitèt ! Annou palé di Pòl. Anvan i divini krétyen, i té fè plizyèr péché ki té grav. Anplis di sa, a toulong i té divèt briga ké plizyèr défo i té gen (Rom. 7:24, 25 ; 1 Tim. 1:12-14). Pourtan, i rivé wè ranson-an kou roun kado Jéova té bay li èspésyalman (li Galates 2:20). Pa bliyé ki a Jéova ki fè Pòl ékri sa é ki tousa ki annan Labib la pou nou anprann roun patché bagaj (Rom. 15:4). Donk, sa Pòl di ka montré kouman Jéova lé to wè ranson-an : i lé to wè l’ kou roun kado i fè to èspésyalman. Si to ka wè ranson-an konsa, to ké ankò plis sir ki Jéova kontan to.

¹¹ Nou ka di Jéova mèrsi pas i voyé Jézi asou latè-a pou i bay so lavi pou nou. Mé i vini asou latè-a pou di lavérité asou so Papa osi (Jean 18:37). Parèkzanp, i èspliké sa Jéova ka rousanti pou so pitit-ya.

KOUMAN JÉZI KA IDÉ TO SIR KI JÉOVA KONTAN TO

12. Poukisa nou pouvé krè sa Jézi di asou Jéova ?

¹² Lò Jézi té asou latè-a, i pran plézi montré moun-yan ki kalité Bondjé Jéova sa (Luc 10:22). Nou pouvé krè sa Jézi di asou so Papa paské i rété ké li pannan rounlo ké roun patché tan anvan i vini asou latè (Col. 1:15). I té savé ki so Papa kontan l’ bokou. Épi i té wè Jéova montré ni zanj-ya ki fidèl ni so tibolonm ké so tifi ki fidèl asou latè-a, kouman i kontan yé. Kisa i ka fè pou idé nou krè ki so Papa kontan nou ?

13. Kouman Jézi lé nou wè Jéova ?

¹³ Jézi lé nou wè Jéova kou li menm ka wè l’. Annan Évanjil-ya, i ka aplé l’ « Papa » pasé 160 fwa. É lò i ka palé pou so disip, i ka di « zòt Papa » ouben « zòt Papa ki annan syèl-a » (Mat. 5:16 ; 6:26). Anvan Jézi vini asou latè-a, sa-ya ki té ka adoré Jéova té ka aplé l’ « Tou-Pwisan-an », « Pi-Rot-a » ké « Gran Kréyatèr »-a ké roun patché ròt tit konsa. Mé souvan, Jézi té ka aplé Jéova « Papa ». Sa ka montré ki Jéova lé sa-ya ki ka adoré l’ santi yé kò pròch di li kou roun timoun ki ka santi so kò pròch di so papa ki kontan li. Nou pouvé sir ki Jézi lé nou wè Jéova kou li menm ka wè li : kou roun bon papa ki kontan so pitit bokou. Annou wè dé èkzanp annan Évanjil-ya koté Jézi ka aplé Jéova « Papa » é annou wè sa sa ka anprann nou.

14. Kouman Jézi montré ki nou chak nou gen valò pou so Papa ? (Matthieu 10:29-31 ; gadé zimaj-a osi).

¹⁴ Pou koumansé, annou wè sa Jézi di annan Matthieu 10:29-31 (li). Ti zozo-ya pa ka adoré Jéova é yé pa pouvé kontan l’. Pourtan, yé gen valò pou li pas lò roun ka tonbé atè, i ka wè l’. Nou menm, nou ka adoré l’ pas nou kontan l’. Donk, ès nou chak pa gen plis valò pasé yé ? Ès nou Papa pa ka gadé pou nou plis pasé yé ? Jézi di osi ki nou Papa konnèt ki kantité chivé nou chak gen asou nou tèt. Si Jéova konnèt roun ti bagaj konsa asou nou, nou pouvé sir ki a pa ti gadé i ka gadé pou nou. Wi, Jézi lé nou konprann kouman nou chak nou gen valò pou so Papa.

15. Kisa sa Jézi di annan Jean 6:44 ka anprann to asou to Papa ki annan syèl-a ?

¹⁵ Annou wè rounòt èkzanp koté Jézi ka aplé Jéova « Papa » (li Jean 6:44). To Papa ki annan syèl-a fè to vini òbò li. Poukisa i fè sa ? Pas i wè ki to tchò té paré pou sa (Actes 13:48). Lò Jézi di sa nou ka jwenn annan Jean 6:44, pitèt i té ka palé di sa Jéova di annan Jérémie 31:3. Annan sa vèrsé-a, Jéova di so pèp : « A sa lanmou fidèl-a ki fè mo fè to vini òbò mo » (Jér. 31:3 ; gadé Osée 11:4). Réfléchi asou sa sa lé di. Nou Papa ki annan syèl-a ki kontan nou toujou ka wè bèl kalité to gen, menmsi to menm, to pitèt pa ka rivé wè yé.

16. a) Kisa Jézi ka anprann nou asou Jéova, é poukisa nou divèt krè li ? b) Kisa to pouvé fè pou to ankò pi sir ki Jéova sa Papa-a to bézwen ? (gadé karé-a : « Papa-a nou tout bézwen »).

¹⁶ Lò Jézi ka di ki Jéova sa nou Papa, a kousidiré i té ka di nou : « Jéova sa mo Papa, mé a to Papa osi. É to pouvé sir ki i kontan to é ki i ka gadé pou to èspésyalman. » Donk, si détan sa rèd pou to krè ki Jéova kontan to, doumandé to kò : « Jézi konnèt so Papa pi byen pasé pyès moun é i pa jen ka manti. Ès a pa pou mo krè sa i ka di ? » (1 Pierre 2:22).

FÈ TOUSA TO POUVÉ POU TO ANKÒ PI SIR KI JÉOVA KONTAN TO

17. Poukisa nou toujou divèt fè tousa nou pouvé pou nou ankò pi sir ki Jéova kontan nou ?

¹⁷ Nou toujou divèt fè tousa nou pouvé pou nou ankò pi sir ki Jéova kontan nou. Kou nou di l’, nou lèlmi Satan ké fè tousa i pouvé pou fè nou arété adoré nou Bondjé. I lé dékourajé nou é i ké kontinyé éséyé fè nou krè ki Jéova pa kontan nou. Annou pa janmen lésé li ganyen ! (Job 27:5).

18. Kisa to pouvé fè pou to ankò pi sir ki Jéova kontan to ?

¹⁸ Pou to ankò pi sir ki Jéova kontan to, pa jen arété doumandé l’ idé to wè to kò kou li menm ka wè to. Pran tan byen réfléchi asou sa Labib ka di asou fason Jéova ka pran swen di sa-ya ki kontan l’. Réfléchi asou sa Jéova ka rousanti pou moun ki kontan l’ ; i ké toujou kontan roun moun ki kontan l’. Sonjé poukisa to pouvé wè ranson-an kou roun kado i fè to èspésyalman. Épi krè Jézi lò i ka di ki Jéova sa to Papa ki annan syèl-a. Donk, si roun jou roun moun ka doumandé to : « Ès to sir ki Jéova kontan to ? » to ké di l’ san katakata : « Wi, mo sir di sa ! É chak jou, mo ka fè tousa mo pouvé pou mo montré li ki mo kontan l’ ! »