Mardi 9 sèptanm
Roun fanm sòt ka fè dézòrd. I pa konnèt pyès anyen (Prov. 9:13).
Sa-ya ki ka tandé « fanm-an ki sòt » divèt fè roun chwa : yé divèt désidé si yé ké asèpté ouben si yé pa ké asèpté so envitasyon. I gen roun patché bon rézon ki ka fè ki nou pa divèt tonbé annan zafè imoralité sèksyèl-a. « Fanm-an ki sòt » lé fè moun krè ki « dlo moun ka vòlò dous pou bwè » (Prov. 9:17). A kisa sa « dlo moun ka vòlò »-a ? Labib ka di ki rélasyon sèksyèl roun mouché gen ké so madanm maryé kou dlo ki ka rafréchi (Prov. 5:15-18). Roun mouché ké so madanm ki maryé pouvé pran plézi gen rélasyon sèksyèl ki pròp. Mé a pa menm bagaj-a ké « dlo moun ka vòlò ». Sa dlo-a, a dèt rélasyon sèksyèl ki entèrdi é ki pa pròp. Moun-yan ki ka gen sa rélasyon sèksyèl-ya ka séré pou fè sa, menm fason roun volèr ka séré pou vòlò. Sa ‘dlo yé ka vòlò’-a pouvé parèt dous si yé ka pansé ki pyès moun pa ké jen savé sa yé ka fè. Mé yé mal bat yé kart ! Jéova ka wè tout bagaj. I pa gen anyen ki pi anmè pasé pédi favèr Jéova-a. Donk, a pa roun bagaj ki « dous », ouben agréyab (1 Cor. 6:9, 10). w23.06 22 § 7-9.
Mèrkrédi 10 sèptanm
Si mo pa ka fè l’ ké bon tchò, an tout sans yé bay mo fè roun travay (1 Cor. 9:17).
É si roun jou, to ka santi ki to pa ka priyè ankò ké to tchò ouben ki to pa ka pran plézi préché ankò ? Pa krè ki to pa gen lèspri Jéova ankò. Kou to pa parfè, roun jou to pouvé byen épi rounòt jou to pouvé santi to pa byen. Si to pa gen menm balan-an ankò, réfléchi asou èkzanp apot Pòl. I toujou té ka éséyé imité Jézi, mé, détan, i té ka randé so kò kont ki i pa té anvi fè l’. Pòl té byen désidé préché menm lò i pa té anvi. Menm fason-an, pa pran désizyon parapòrta sa to ka rousanti rounso. A pou to byen désidé fè sa ki byen menm lò to pa anvi fè l’. Si to ka kontinyé fè sa ki byen, piti piti sa to ka rousanti pouvé chanjé. (1 Cor. 9:16). w24.03 11-12 § 12-13.
Jédi 11 sèptanm
Byen montré yé ki zòt kontan yé (2 Cor. 8:24).
Nou pouvé montré nou frè ké sò-ya ki nou kontan yé lò nou ka asèpté yé divini nou zanmi (2 Cor. 6:11-13). Annan roun patché asanblé, i gen frè ké sò ki ka vini di tout kalité koté é ki pa gen menm pèrsonalité. Nou pouvé fè nou lanmou pou nou frè ké sò-ya vin pi fò si nou ka rété asou yé bèl kalité. Lò nou ka anprann wè ròt-ya kou Jéova ka wè yé, nou ka montré ki nou kontan yé. Nou ké divèt montré nou kontan nou konpanyen pannan gran tribilasyon-an. Lò i ké koumansé, ki koté nou ké pouvé séré ? Lò yé ataké Babilòn, sèrvitèr Jéova-ya té pou obéyi sa lòrd-a : « Mo pèp, alé, antré annan to chanm ki pi ofon épi fronmen lapòt-ya dèyè to. Séré to kò pannan roun ti moman jiktan kòlè-a fini » (Is. 26:20). Dapré sa nou ka konprann, sa paròl-ya, a pou nou ki ké janbé gran tribilasyon-an osi. w23.07 6-7 § 14-16.