Sèptanm

Jéova bay Jézi pouvwar pou i réglé tout problèm moun-yan gen. Nou pa pouvé débarasé nou kò di tout problèm nou gen jòdla. Mé grasa mirak i fè, Jézi li menm montré ki i pouvé fè l’. Parèkzanp, i pouvé débarasé nou di sa ki ka fè ki nou gen problèm, sa lé di péché Adan bay nou-a épi konsékans péché-a : maladi ké lanmò (Mat. 9:1-6 ; Rom. 5:12, 18, 19). Mirak i fè montré ki i pouvé géri « tout kalité maladi » é i jis pouvé résisité moun mouri (Mat. 4:23 ; Jean 11:43, 44). I pouvé kalmé tanpèt ki fò osi, épi ganyen asou lèspri méchan-yan (Marc 4:37-39 ; Luc 8:2). Kou nou savé ki Jéova bay so Pitit sa kalité pouvwar-a, sa ka rasiré nou ! Nou pouvé sir ki lò Rwayonm-an ké dirijé latè-a, i ké fè nou gen tout bèl bagaj Jéova promèt nou. Mirak Jézi fè ka pèrmèt nou gen roun ti lidé di sa i ké fè asou tout latè-a dipi syèl-a, aprézan i Rwa Rwayonm-an. w23.04 3 § 5-7.

Si to annan roun asanblé i gen bokou proklamatèr, é ki to ka santi ki yé pa ka fè to réponn souvan, pitèt to ka di ki to ké arété lévé to lanmen. Mé to pa divèt arété fè éfòr. Préparé plizyèr répons. Konsa, si yé pa ka entérojé to o koumansman étid-a, to ké pouvé réponn pita annan réinyon-an. Lò to ka étidyé roun artik annan Tourdégard-a, réfléchi asou kouman chak paragraf ka alé ké tèm-an, konsa to ké pitèt gen plizyèr lidé entérésan pou di pannan tout kozé-a. To pouvé osi préparé plizyèr répons asou sèrten paragraf ki ka palé di vérité ki pi rèd pou èspliké. Poukisa ? Paské pitèt, a sa moman-an i pa ké gen bokou moun ki ké lévé yé lanmen ? Mé kisa to pouvé fè si sa ka fè plizyèr réinyon yé pa bay to réponn ? Anvan réinyon-an, di frè-a ki asou program-an ki késyon to té ké lé réponn. w23.04 21-22 § 9-10.

Jozèf té ka fè sa Jéova té ka di li fè ké plézi, é a pou sa a té roun bon mari. O mwen trwa fwa, Jéova di li fè bagaj pou so fanmi. Chak fwa, i obéyi lanmenm, menmsi sa té lé di ki i té divèt fè gro chanjman (Mat. 1:20 ; 2:13-15, 19-21). Kou i fè sa Jéova té ka doumandé li, Jozèf protéjé Mari é i pran swen di li. Jozèf té ka obéyi Jéova, é sa dèt fè Mari gen plis lanmou ké rèspè pou li. Zòt ki mari, zòt pouvé imité Jozèf, épi chaché konsèy annan Labib asou fason pou zòt pran swen di zòt fanmi. Si zòt ka swiv sa konsèy-ya, menmsi sa lé di fè gro chanjman, zòt ké montré zòt lanmou pou zòt madanm, é lanmou zòt gen roun pou ròt ké vin pi fò. Roun sò ki ka rété Vanwatou, é ki maryé dipi pasé 20 lannen, ka di : « Lò mo mari ka chaché konsèy Jéova é ka swiv yé, mo gen plis rèspè pou li. Mo ka santi mo an sékirité, é lò i ka pran roun désizyon, mo ka fè li konfyans. » w23.05 21 § 5.

Jwif-ya ki té ké soti di Babilòn pou routounen Israyèl té ké divini roun « pèp ki sen » pou yé Bondjé (Deut. 7:6). Mé sa pa té lé di ki yé pa té ké gen pyès chanjman pou fè pou fè li plézi. Mantalité ké mèrs babilonyen-yan té détenn asou près tout Jwif-ya ki té fèt Babilòn. Plizyèr lannen apré prémyé ran Jwif-ya routounen Israyèl, gouvèrnèr Néémi rété gon lò i wè ki i té gen timoun ki té fèt Israyèl ki pa té anprann lang Jwif-ya (Deut. 6:6, 7 ; Néh. 13:23, 24). Kouman sa timoun-yan té pouvé anprann kontan ké adoré Jéova si yé pa té ka konprann lang ébré-a, lang Bondjé té sèrvi pou fè moun ékri près tout so Paròl ? (Esd. 10:3, 44). Donk sa Jwif-ya té gen gran chanjman pou fè. Mé sa té pi fasil pou yé fè sa chanjman-yan annan yé péyi koté Bondjé té ka roumété vré ladorasyon-an (Néh. 8:8, 9). w23.05 15 § 6-7.

Malérèzman, menmsi nou motivé épi nou ka kontrolé nou kò, nou tout ka jwenn problèm. Parèkzanp ‘bagaj nou pa prévwè’ pouvé anpéché nou gen tan pou nou fè sa nou prévwè (Eccl. 9:11). Nou pouvé jwenn problèm ki pouvé dékourajé nou (Prov. 24:10). Kou nou pa parfè, nou pouvé fè bagaj ki pa bon é sa pouvé fè ki sa pi rèd pou nou fè sa nou prévwè (Rom. 7:23). Ouben détan a jis las nou las (Mat. 26:43). Kisa nou pouvé fè lò nou gen sa kalité problèm-yan ? Sonjé ki a pa paské to ka jwenn roun problèm ki to pa ké janmen rivé. Labib ka di ki nou pouvé jwenn problèm dèyè problèm ki pouvé jité nou atè. Mé i ka byen èspliké osi ki nou pouvé lévé. Wi, si to ka kontinyé vansé menm lò to ka jwenn problèm, to ka montré Jéova ki to vréman lé fè l’ plézi. É imajiné kouman i dèt kontan lò i ka wè to ka kontinyé fè éfòr ! w23.05 30 § 14-15.

Lò roun jennjan ka pran sèrvis pyonyé-a, i ka anprann roun patché bagaj. Lò nou pyonyé, nou divèt adapté nou kò paské nou divèt fè ké roun patché moun ki diféran. Nou ka anprann jéré nou soumaké osi épi pa gaspiyé l’ (Phil. 4:11-13). Roun patché pyonyé pèrmanan koumansé ké sèrvis pyonyé òksilyèr-a pannan roun tan. É roun ran annan yé divini sèrvitèr annan konstriksyon-an, ouben bétélit apré. Donk si roun jennjan ka divini pyonyé òksilyèr, apré sa pitèt yé ké pouvé envité li pou ròt kalité sèrvis ankò. Labib ka di ki sa-la ki « anvi » divini ansyen, « a roun bèl bagaj i lé fè » (1 Tim. 3:1). Anvan roun frè divini ansyen, a pou i divini asistan. Asistan-yan ka travay ké ansyen-yan annan roun patché domenn. Yé tout ka sèrvi yé frè ké sò-ya ké imilité é yé tout ka préché ké balan. w23.12 28 § 14-16.

Rwa Jozyas té sa roun jennjan lò i koumansé chaché Jéova. I té lé anprann konnèt li pi byen épi fè so volonté. Mé, bagaj-ya pa té fasil pou sa jenn rwa-a. Près tout Israyélit-ya té ka adoré fo bondjé. É i té divèt gen kouraj pou i té ankourajé yé adoré vré Bondjé-a. Ès Jozyas té gen kouraj ? Wi ! Anvan menm i té gen 20 lannen, i koumansé tiré fo ladorasyon-an annan péyi-a (2 Chron. 34:1, 2). Menmsi to jenn, to pouvé imité Jozyas. Si to ka vin pròch di Jéova é si to ka anprann kontan so kalité, sa ké bay to anvi bay li to lavi. Kouman to lavi ké chanjé lò to ké fè sa ? Luke batizé lò i té gen 14 lannen. Jou-a i bay Jéova so lavi, i di : « Aprézan, a mo sèrvis pou Jéova ki ké an prémyé annan mo lavi é mo ké fè tousa mo ké pouvé pou mo fè li plézi » (Marc 12:30). Si a sa to lé to menm osi, to pouvé sir ki to ké gen roun bèl lavi ! w23.09 11 § 12-13.

Lò apot Pòl ékri so prémyé lèt pou frè-ya ki té Tésalonik, sa pa té ka fè roun lannen asanblé-a té fèt. Donk, frè-ya ki té gen rèsponsabilité annan asanblé-a pa té gen bokou èspéryans é i dèt gen sèrten bagaj yé mal fè. Mé magré sa, yé té mérité yé frè ké sò rèspèkté yé. Lò gran tribilasyon-an ké tou pròch rivé, pitèt frè-ya annan syèj mondyal-a ouben annan Bétèl-a annan nou péyi pa ké pouvé dirijé nou ankò. Si sa ka rivé, nou ké divèt konté ankò plis asou ansyen-yan annan nou asanblé pou di nou sa nou divèt fè. A pou sa, sa enpòrtan pou nou anprann kontan yé épi rèspèkté yé dipi aprézan. Kèlkéswa sa ki pouvé rivé, a pou nou kontinyé byen réfléchi : annou pa rété asou yé défo, annou pito wè ki Jéova ka sèrvi Jézi pou gidé sa wonm-yan ki fidèl. Menm fason kas-a té ka protéjé tèt roun sòlda, èspwar nou gen-an ka protéjé nou pansé. Nou ka wè ki sa sa monn-an ka propozé nou pa gen pyès valò (Phil. 3:8). Sa ka pèrmèt nou rété kalm épi byen dibout. w23.06 11-12 § 11-12.

Sa-ya ki ka tandé « fanm-an ki sòt » divèt fè roun chwa : yé divèt désidé si yé ké asèpté ouben si yé pa ké asèpté so envitasyon. I gen roun patché bon rézon ki ka fè ki nou pa divèt tonbé annan zafè imoralité sèksyèl-a. « Fanm-an ki sòt » lé fè moun krè ki « dlo moun ka vòlò dous pou bwè » (Prov. 9:17). A kisa sa « dlo moun ka vòlò »-a ? Labib ka di ki rélasyon sèksyèl roun mouché gen ké so madanm maryé kou dlo ki ka rafréchi (Prov. 5:15-18). Roun mouché ké so madanm ki maryé pouvé pran plézi gen rélasyon sèksyèl ki pròp. Mé a pa menm bagaj-a ké « dlo moun ka vòlò ». Sa dlo-a, a dèt rélasyon sèksyèl ki entèrdi é ki pa pròp. Moun-yan ki ka gen sa rélasyon sèksyèl-ya ka séré pou fè sa, menm fason roun volèr ka séré pou vòlò. Sa ‘dlo yé ka vòlò’-a pouvé parèt dous si yé ka pansé ki pyès moun pa ké jen savé sa yé ka fè. Mé yé mal bat yé kart ! Jéova ka wè tout bagaj. I pa gen anyen ki pi anmè pasé pédi favèr Jéova-a. Donk, a pa roun bagaj ki « dous », ouben agréyab (1 Cor. 6:9, 10). w23.06 22 § 7-9.

É si roun jou, to ka santi ki to pa ka priyè ankò ké to tchò ouben ki to pa ka pran plézi préché ankò ? Pa krè ki to pa gen lèspri Jéova ankò. Kou to pa parfè, roun jou to pouvé byen épi rounòt jou to pouvé santi to pa byen. Si to pa gen menm balan-an ankò, réfléchi asou èkzanp apot Pòl. I toujou té ka éséyé imité Jézi, mé, détan, i té ka randé so kò kont ki i pa té anvi fè l’. Pòl té byen désidé préché menm lò i pa té anvi. Menm fason-an, pa pran désizyon parapòrta sa to ka rousanti rounso. A pou to byen désidé fè sa ki byen menm lò to pa anvi fè l’. Si to ka kontinyé fè sa ki byen, piti piti sa to ka rousanti pouvé chanjé. (1 Cor. 9:16). w24.03 11-12 § 12-13.

Nou pouvé montré nou frè ké sò-ya ki nou kontan yé lò nou ka asèpté yé divini nou zanmi (2 Cor. 6:11-13). Annan roun patché asanblé, i gen frè ké sò ki ka vini di tout kalité koté é ki pa gen menm pèrsonalité. Nou pouvé fè nou lanmou pou nou frè ké sò-ya vin pi fò si nou ka rété asou yé bèl kalité. Lò nou ka anprann wè ròt-ya kou Jéova ka wè yé, nou ka montré ki nou kontan yé. Nou ké divèt montré nou kontan nou konpanyen pannan gran tribilasyon-an. Lò i ké koumansé, ki koté nou ké pouvé séré ? Lò yé ataké Babilòn, sèrvitèr Jéova-ya té pou obéyi sa lòrd-a : « Mo pèp, alé, antré annan to chanm ki pi ofon épi fronmen lapòt-ya dèyè to. Séré to kò pannan roun ti moman jiktan kòlè-a fini » (Is. 26:20). Dapré sa nou ka konprann, sa paròl-ya, a pou nou ki ké janbé gran tribilasyon-an osi. w23.07 6-7 § 14-16.

A pou to rézonab. Doumandé to kò : « Ès ròt-ya ka trouvé ki mo sa roun moun ki rézonab, roun moun ki toujou ka asèpté chanjé fason i ka wè bagaj-ya pou tonbé dakò ké ròt-ya, roun moun ki ka asèpté ki ròt-ya ka wè bagaj-ya rounòt fason ? Ouben ès mo rèd, ès mo tèt dou ? Ès mo ka kouté yé é ès mo ka tchenbé kont di sa yé lé lò sa posib ? » Pi nou ké montré nou rézonab, pi nou ké imité Jéova ké Jézi. Nou rézonab lò nou ka adapté nou kò lò nou sitiasyon ka chanjé. Lò roun bagaj ka chanjé annan nou lavi, sa pouvé mennen problèm nou pa té ka antann. Nou pouvé tonbé malad rounsèl kou konsa. Sitiasyon ékonomik ouben politik annan péyi-a pouvé chanjé é sa pouvé boulvèrsé nou lavi (Eccl. 9:11). É menm lò òrganizasyon Jéova-a ka voyé nou rounòt koté ouben ka doumandé nou fè rounòt bagaj, sa pouvé rèd osi. Nou pouvé adapté ké nou nouvo sitiasyon 1) si nou ka asèpté bagaj-ya kou yé fika, 2) si nou ka kontinyé vansé, 3) si nou ka mété nou lidé asou bon bagaj é 4) si nou ka fè bagaj pou ròt-ya. w23.07 21-22 § 7-8.

Danyèl té sa roun jennjan lò Babilonyen-yan tchenbé li pou mennen l’ Babilòn, lwen di Jérizalèm. A té roun prizonyé. Mé magré i té jenn, grotchap Babilonyen-yan rémarké li. Yé wè ‘sa yé wéy té pouvé wè’ : yé wè ki so « kò pa té [...] gen pyès défo », ki i té « bèl » é ki i té ka vini di roun fanmi enpòrtan (1 Sam. 16:7). Donk, yé bay li roun fòrmasyon pou i té pouvé travay annan palè-a (Dan. 1:3, 4, 6). Jéova té kontan Danyèl paské sa jennjan-an té chwazi rété fidèl ké li. Anfèt, pitèt Danyèl té gen ven lannen rounso, ouben mwens ki sa, lò Jéova di ki i té jis kou Noé ké Jòb ki té rété fidèl pannan roun patché lannen (Gen. 5:32 ; 6:9, 10 ; Job 42:16, 17 ; Ézéch. 14:14). É Jéova kontinyé kontan Danyèl pannan tout so lavi ki té long é ki té bèl toubonnman (Dan. 10:11, 19). w23.08 2 § 1-2.

Si to lé achté roun kaz, to ké anvi wè ké to pròp wéy ki kalité kaz to ka achté. A sa pou nou fè osi lò nou ka li é lò nou ka étidyé Labib. Si to ka li pou li, a sèlman « prémyé bagaj-ya nou ka anprann annan Paròl Bondjé-a ki sakré » to ké anprann (Héb. 5:12). Kou pou kaz-a, a pou to pito « antré » pou to konprann tout détay ki annan Labib. Pou to rivé byen étidyé l’, to pouvé chaché konprann kouman sa Labib ka di roun koté ka alé ké sa i ka di rounòt koté. Fè éfòr pou to byen konprann vérité-ya to ka krè mé osi poukisa to ka krè sa. Pou nou rivé byen konprann Labib, i gen plizyèr vérité nou divèt pran tan byen étidyé. Apot Pòl ankourajé so frè ké sò-ya pran tan byen étidyé Paròl Bondjé-a pou yé té rivé « byen konprann longèr-a, larjò-a, ròtò-a ké tout bagaj ki fon » annan lavérité-a. A konsa, rasin yé lafwa té ké « alé byen fon » é i té ké « byen dibout » (Éph. 3:14-19). A sa nou divèt fè nou menm osi. w23.10 18 § 1-3.

Labib ka palé di roun patché ròt moun ki montré ki yé té gen pasyans. A té ké roun bon bagaj si to té ka pran tan gadé yé èkzanp lò to ka étidyé to rounso. To pouvé gadé èkzanp David. Lò Bondjé chwazi li pou i divini rwa, i té jenn, mé i antann roun patché lannen anvan i divini rwa. Ouben èkzanp Siméyon ké Ann. Yé sèrvi Jéova ké fidélité toupannan yé té ka antann Mési-a (Luc 2:25, 36-38). Lò to ka étidyé sa èkzanp-ya, chaché répons sa késyon-yan : « Kisa ki pitèt idé sa moun-an gen pasyans ? Ki bénédiksyon i trapé ? Kouman mo pouvé imité l’ ? » To pouvé anprann osi roun patché bagaj ké èkzanp moun annan Labib ki pa pran pasyans (1 Sam. 13:8-14). Doumandé to kò : « Poukisa yé pa té gen pasyans ? Ki problèm yé trapé akoz di sa ? » w23.08 25 § 15.

Apot Pyèr té sa roun moun ki té fidèl ; i pa janmen lésé anyen dékourajé l’ nèt. I montré i té fidèl jou-a Jézi di roun bagaj so disip pa konprann (Jean 6:68). Roun ran disip arété swiv Jézi san yé pa menm chaché konprann sa i té lé di. Mé a pa sa Pyèr fè. I rékonnèt ki a Jézi rounso ki té « gen palò ki ka bay lavi pou tout-tan ». Jézi té savé ki kou ròt apot-ya, Pyèr té ké lésé l’ tonbé. Mé magré sa, i montré l’ ki i té ka fè l’ konfyans. I di li ki i té sir ki i té ké viré maré so kanmza é ki i té ké rété fidèl (Luc 22:31, 32). Jézi té savé ki « lèspri-a lé fè bokou bagaj, mé [ki] lachè-a li menm, i fèb » (Marc 14:38). A pou sa, menm lò Pyèr di ki i pa té konnèt li, i pa lésé l’ tonbé. Lò i résisité, i parèt douvan li roun jou i dèt té li rounso (Marc 16:7 ; Luc 24:34 ; 1 Cor. 15:5). Sa dèt ankourajé Pyèr toubonnman pas i té tris menm ! w23.09 22 § 9-10.

Jéova ka « kouvri », sa lé di i ka pardonnen, péché sa-ya ki gen lafwa annan li. I ka pardonnen yé nèt é i pa ka tchenbé kont di sa ankò (Ps. 32:1, 2). Pou li, sa moun-yan jis é yé pa gen pyès défo paské yé gen lafwa. A pa paské Bondjé té di ki Abraam, David ké ròt annan so sèrvitèr té jis, ki yé pa té ka péché, é ki yé té parfè. Mé kou yé té gen lafwa, pou Bondjé yé pa té gen défo, èspésyalman lò nou ka konparé yé ké sa-ya ki pa té ka adoré li (Éph. 2:12). Kou apot Pòl byen di l’ annan so lèt, a pou nou gen lafwa pou nou vin zanmi ké Bondjé. Abraam ké David té zanmi ké Jéova paské yé té gen lafwa annan li. É nou menm osi nou pouvé divini zanmi Jéova grasa nou lafwa. w23.12 3 § 6-7.

Jòdla, tout krétyen-yan gen roun bèl lònò : yé pouvé bay Jéova sakrifis lò yé ka bay yé tan, yé fòrs ké yé soumaké pou adoré l’. Nou pouvé bay Jéova sa nou gen ki miyò pou nou montré ki adoré l’ sa roun lònò ki gen valò pou nou. Apot Pòl ka palé di plizyèr bagaj nou toujou divèt fè pou nou adoré Bondjé (Héb. 10:22-25). I ka èspliké ki nou divèt priyè Jéova, palé pou tout moun di nou èspwar, rasanblé ké moun annan nou asanblé épi ankourajé nou konpanyen. Épi i ka di ankò : « Plis ankò paské zòt ka wè jou-a ka rivé. » Bò d’ lafen liv Révélation-an, zanj Jéova-a ka bay sa lòrd-a : « Adoré Bondjé » (Rév. 19:10 ; 22:9). É i ka bay sa lòrd-a dé fwa, pou montré kouman sa enpòrtan. Donk, adoré nou gran Bondjé annan so tanp èspirityèl divèt gen bokou valò pou nou. É annou pa janmen bliyé tout sa vérité-ya ki fon asou so gran tanp èspirityèl ! w23.10 29 § 17-18.

Nou tout lé « kontinyé kontan nou konpanyen. » Mé fo pa nou bliyé ki Jézi té di ki ‘lanmou laplipar moun-yan té ké divini frèt’ (Mat. 24:12). I pa té lé di ki so disip té ké arété montré yé lanmou pou yé konpanyen. Mé, nou divèt panga paské kou sa monn-an frèt, sa pouvé détenn asou nou. A pou sa, annou réponn sa késyon-an ki enpòrtan : kouman nou pouvé savé si lanmou nou gen pou nou frè ké sò fò ? Pou nou wè si nou lanmou pou nou frè ké sò-ya fò, nou pouvé gadé kouman nou ka réyaji annan sèrten sitiasyon (2 Cor. 8:8). Men sa apot Pyèr di pou palé di roun annan sa sitiasyon-yan : « Pasé pyès ròt bagaj, a pou zòt gen bokou lanmou pou zòt konpanyen, paské lanmou ka kouvri roun patché péché » (1 Pierre 4:8). Akoz di défo ròt-ya gen ouben di sa yé ka fè ki pa bon, sa pouvé rèd pou nou lanmou pou yé rété fò. w23.11 10-11 § 12-13.

Si nou ka montré nou kontan roun ran frè ké sò épi nou pa ka fè menm bagaj-a pou rounòt ran, nou pa ka obéyi koumannman Jézi bay. Nou pouvé santi ki nou pi pròch di sèrten frè ké sò, menm fason Jézi té ka santi so kò pi pròch di roun ran apot (Jean 13:23 ; 20:2). Mé apot Pyèr ka fè nou sonjé ki nou divèt « kontan » nou frè ké sò-ya ‘ké tout nou tchò’, sa lé di ké menm lanmou i gen annan roun fanmi koté tout moun kontan yé konpanyen (1 Pierre 2:17). Pyèr di osi ki ‘a pou nou gen roun lanmou ki fò roun pou ròt ké tout nou tchò’ (1 Pierre 1:22). Annan sa vèrsé-ya, lò Pyèr ka di nou gen roun lanmou ki « fò », sa lé di kontan roun moun menmsi sa rèd pou nou. Parèkzanp, kisa pou nou fè si roun frè ouben roun sò ka fè nou lapenn ouben ka fè nou faché ? Nou pouvé gen tandans fè kou sa moun-an pasé nou aji ké li ké lanmou. Mé grasa Jézi, Pyèr anprann ki Jéova pa kontan lavanjans (Jean 18:10, 11). I ékri : « Pa randé pyès moun mové bagaj yé fè zòt, pa jouré pyès moun pas yé jouré zòt. Pasé zòt fè sa, réponn yé ké roun bénédiksyon » (1 Pierre 3:9). Si nou lanmou pou nou frè ké sò-ya fò, nou ké janti ké yé é nou ké montré yé ki nou kontan yé. w23.09 28-29 § 9-11.

Nou étoné lò nou ka gadé kouman roun timoun ka grandi vit. A kousidiré sa ka fèt tousèl san i pa fè pyès éfòr (1 Cor. 13:11 ; Héb. 6:1). Mé si nou lé divini roun krétyen ki djòk, nou blijé fè éfòr. Pou nou rivé fè sa, nou divèt gen roun lanmityé ké Jéova ki fò. Nou bézwen so lèspri sen osi pou nou gen bèl kalité i kontan, pou nou anprann fè bagaj ki itil épi pou nou préparé nou kò pou rèsponsabilité nou ké pouvé gen pita (Prov. 1:5). A Jéova ki fè wonm-yan ké fanm-yan (Gen. 1:27). Nou byen savé ki roun fanm a pa roun wonm, yé pa gen menm kò-a. Mé i gen ròt bagaj ankò ka fè ki yé diféran. Parèkzanp, Jéova fè wonm-yan ké fanm-yan pou yé gen rèsponsabilité ki diféran. Donk, yé bézwen gen sèrten kalité é yé bézwen konnèt fè sèrten bagaj pou yé chak okipé di yépa rèsponsabilité (Gen. 2:18). w23.12 18 § 1-2.

Ès Jézi té lé ròt moun sèrvi non so Papa ? Wi. Annan so lépòk, roun ran chèf rélijyé té ka pansé ki lò yé té ka di non Bondjé yé té ka dérèspèkté l’. Mé Jézi pa janmen lésé sa tradisyon-an ki pa té k’alé ké Ékritir-ya, anpéché l’ onoré non so Papa. Roun jou, annan réjyon Jérazényen-an, i géri roun mouché ki té gen démon asou l’. Kou yé té pè, roun ran moun annan sa koté-a sipliyé Jézi, yé di l’ chapé (Marc 5:16, 17). Magré sa, Jézi té lé moun sa koté-a konnèt non Jéova-a. A pou sa, lò i voyé mouché i té géri-a di sa ki té rivé l’, i pa di li rakonté sa Jézi té fè, mé sa Jéova té fè (Marc 5:19). Jòdla, a menm bagaj Jézi lé : i lé nou fè tout moun asou tout latè-a konnèt non so Papa ! (Mat. 24:14 ; 28:20). Lò nou ka fè sa, nou ka fè Jézi, nou Rwa, plézi. w24.02 10 § 10.

Nou ka fè parti di òrganizasyon Jéova-a é a roun bénédiksyon annan sa dèrnyé jou-ya ki rèd. Lavi-a annan sa monn-an ka vin plizanpli difisil, mé Jéova ka bay nou frè ké sò pou idé nou (Ps. 133:1). I ka èspliké nou kouman nou tchò pouvé kontan annan nou fanmi (Éph. 5:33 – 6:1). É i ka bay nou sajès nou bézwen pou nou vréman byen annan nou tchò. Mé a pou nou fè éfòr kanmenm pou nou kontinyé adoré Jéova ké fidélité. Poukisa ? Paské sa ròt-ya ka di ouben ka fè pouvé fè nou lapenn. Nou pouvé dékourajé osi paské nou ka fè bagaj ki pa bon, èspésyalman si nou ka roufè menm bagaj-ya toulong. Mé a pou nou kontinyé adoré Jéova 1) lò roun frè ouben roun sò ka fè nou lapenn, 2) lò nou madanm ouben nou mari ka fè nou lapenn, épi 3) lò nou dékourajé paské nou fè roun bagaj ki pa bon. w24.03 14 § 1-2.

Détan, to ké tandé palé di frè ké sò ki té pouvé fè plis pou Jéova. Pitèt yé fè Lékòl pou évanjélizatèr Rwayonm-an ouben yé alé koté yé té bézwen plis moun pou préché. Si a roun bagaj to pouvé fè, pa ézité òrganizé to kò pou fè l’. Sèrvitèr Jéova-ya ka chaché fè plis annan travay prédikasyon-an (Actes 16:9). Mé si to pa pouvé fè l’ aprézan, pa krè ki to pi bas pasé ròt-ya. Annan lakours krétyen-an, a pa loutou kouri, a kontinyé kouri ki tout (Mat. 10:22). Pa bliyé ki lò to ka fè sa to pouvé annan to sitiasyon, Jéova kontan toubonnman. Roun fason enpòrtan pou to kontinyé swiv Jézi apré to batenm, a lò to ka fè tousa to pouvé pou sèrvi Jéova (Ps. 26:1). w24.03 10 § 11.

Si nou ka répanti, nou Papa ki annan syèl-a ka promèt nou pardonnen nou (Ps. 86:5). Donk, si to ka rigrété péché to fè ké tout to tchò, to pouvé krè Jéova : i pardonnen to. Pa bliyé ki Jéova rézonab. I pa ka janmen doumandé to fè plis ki sa to pouvé fè. Dipi to ka fè tousa to pouvé, i kontan sa to ka bay li. To pouvé réfléchi osi asou èkzanp moun annan Labib ki sèrvi Jéova ké tout yé tchò. Sonjé apot Pòl parèkzanp. Pannan lontan, i fè roun patché kilomèt épi i kréyé roun patché asanblé. Mé lò so sitiasyon chanjé é i pa té pouvé préché bokou kou anvan, ès Bondjé arété kontan l’ ? Non. Kou Pòl kontinyé fè sa i té pouvé, Jéova béni l’ (Actes 28:30, 31). Menm fason-an, sa to pouvé bay Jéova pouvé chanjé. Mé sa ki enpòrtan pou li, a sa to gen annan to tchò. w24.03 27 § 7, 9.

Jézi bay so disip roun bon èkzanp : pannan tout so lavi asou latè-a i priyè souvan. Mé kou i té souvan okipé é i té toujou gen bokou moun ké li, i té divèt chwazi roun moman pou i té pouvé priyè (Marc 6:31, 45, 46). Roun jou, i lévé bònò pou i té pouvé priyè li rounso. Sa rivé li priyè tout lannwit pou i té pran roun désizyon enpòrtan (Luc 6:12, 13). É lannwit anvan i mouri, i priyè plizyèr fwa jis anvan i fè sa ki té pi rèd annan so misyon asou latè-a (Mat. 26:39, 42, 44). Èkzanp Jézi ka anprann nou ki menmsi nou gen bokou bagaj pou fè, nou divèt pran tan pou nou priyè. Pitèt nou ké divèt lévé pi bònò ouben alé dronmi roun ti moso pita. Si nou ka fè sa, nou ké montré Jéova ki sa kado i fè nou-a gen valò pou nou. w23.05 3 § 4-5.

Si to ka byen gadé tèks-a pou jòdla, Pòl di ki Jéova « plen » krétyen wen-yan ké lanmou. Roun diksyonèr biblik ka èspliké ki a kousidiré Jéova té vidé sa lanmou-a « kou roun larivyè » asou yé. Sa èkzanp-a ka vréman byen montré kouman Jéova kontan yé ! Krétyen wen-yan savé ki ‘Bondjé kontan’ yé (Jude 1). Apot Jan èspliké sa yé ka rousanti, i di : « Gadé ki kalité lanmou Papa-a bay nou, pou yé aplé nou pitit Bondjé ! » (1 Jean 3:1). Mé ès a krétyen wen-yan rounso Jéova kontan ? Non. Jéova montré ki i té kontan nou chak. Ki pi gran bagaj Jéova fè pou montré nou ki i kontan nou ? Ranson-an, a pi bèl bagaj pyès moun pa janmen fè pou montré so lanmou ! (Jean 3:16 ; Rom. 5:8). w24.01 28 § 9-10.

Sa vèrsé-a ka palé di roun bagaj David té ka fè lò i té pè : menmsi i té ka riské mouri, i té ka pran tan réfléchi asou sa Jéova té ké fè pou li pita. I té savé ki so Bondjé té ké idé l’ o bon moman paské i té promèt li fè l’ divini rwa Israyèl (1 Sam. 16:1, 13). É pou li, lò Jéova té ka di ki i té ké fè roun bagaj, a kousidiré i té ja fè l’. Kisa Jéova promèt fè pou to ? Nou savé ki Jéova pa ké anpéché nou trapé problèm é nou pa ka antann i fè sa. Mé kèlkéswa éprèv to ké jwenn jòdla, Jéova ké fè yé tout disparèt annan monn nouvo-a (Is. 25:7-9). Nou Kréyatèr ké résisité moun mouri-ya, i ké géri nou, é i ké krazé tout nou lèlmi. I pwisan, i pouvé fè tousa, asiré pa pitèt ! (1 Jean 4:4). w24.01 6 § 12-13.

Sonjé poukisa to bay Jéova to lavi é to batizé. To fè sa paské to té lé fè Jéova plézi. Sonjé sa ki fè to sir ki to té trapé lavérité-a. To anprann konnèt to Papa ki annan syèl-a é to koumansé kontan l’ épi rèspèkté l’. To lafwa grandi é i fè to répanti. To tchò fè to lésé mové bagaj to té ka fè épi fè sa Jéova kontan. To té soulajé lò to konprann ki Bondjé té pardonnen to (Ps. 32:2). To koumansé vini annan nou réinyon épi palé pou tout moun di bèl bagaj to té anprann. Aprézan to bay Bondjé to lavi é to batizé, to ka maché asou chimen lavi-a é to byen désidé pa lésé sa chimen-an (Mat. 7:13, 14). Atò, a pou to byen désidé rété maré ké Jéova épi toujou obéyi so koumannman. w23.07 17 § 14 ; 19 § 19.

Si to ka réfléchi asou lapriyè to fè Jéova lò to vouwé li to lavi, sa ké bay to fòrs pou tchenbé anba nenpòrt ki tantasyon. Parèkzanp, ès to ké fala roun moun ki maryé ? Awa ! To ja désidé pa fè sa kalité bagaj-ya. Si to pa ka lésé mové anvi pran rasin annan to tchò, to pa ké gen pou briga ké yé apré. Konsa, to pa ké pran « chimen méchan-yan », to ké « pran rounòt chimen » (Prov. 4:14, 15). Jézi té byen désidé fè so Papa plézi. Si to ka sonjé so èkzanp, dipi i ké gen roun bagaj Bondjé pa kontan, lanmenm to ké réfizé l’ nèt, paské to vouwé li to lavi (Mat. 4:10 ; Jean 8:29). Sa to ka fè lò to gen problèm ouben lò to douvan tantasyon pouvé montré ki to byen désidé kontinyé swiv Jézi. É si to ka kontinyé swiv li, to pouvé sir ki Jéova ké soutni to. w24.03 9-10 § 8-10.