Jézi a kimoun ?

Jézi a roun di sé moun-yan ki pi sélèb annan istwè-a. Magré sa, moun-yan pa konnèt bokou bagaj asou Jézi, yé gen lidé diféran asou kimoun i sa. Mé kisa Labib-a ka di asou Jézi ?

1. Jézi a kimoun ?

Jézi a roun zanj pwisan ki ka viv annan syèl-a. Jéova kréyé Jézi anvan i kréyé ròt bagaj. A pou sa, annan Labib-a, yé ka aplé Jézi « prémyé-a ki fèt annan tousa Bondjé kréyé » (Colossiens 1:15). Labib-a ka di osi ki Jézi a ‘sèl Pitit Bondjé’. Sa lé di, a Jézi rounso Jéova kréyé san pésonn pa idé l’ (Jean 3:16). Jézi travay ansanm ké so Papa, i idé l’ pou kréyé tout ròt bagaj-ya (li Proverbes 8:30). Lanmou Jézi ké Jéova gen roun pou ròt fò toubonnman. Jézi palé ké fidélité di mésaj ké koumannman Jéova bay li. A pou sa Labib-a ka aplé Jézi « Paròl-a » (Jean 1:14).

2. Poukisa Jézi vin asou latè-a ?

I gen apéprè 2000 lannen, Jézi té ka rété annan syèl-a. Mé Jéova itilizé so lèspri sen pou fè roun mirak, i mété lavi Jézi annan vant roun jenn fanm yé té ka aplé Mari. A konsa, Jézi fèt asou latè-a (li Luc 1:34, 35). Jéova voyé Jézi asou latè-a pou i divini Mési-a, ouben Kris-a, pou i sové tout mouna (gadé nòt-a). Jézi réyalizé tout profési-ya asou Mési-a. Sa idé moun-yan konprann ki Jézi té sa « Kris-a, Pitit Bondjé ki vivan-an » (Matthieu 16:16).

3. Ki koté Jézi fika aprézan ?

Apré so lanmò, Jézi résisité kou roun zanj é i viré annan syèl-a. Annan syèl-a, « Bondjé bay li roun plas ki pi rot » (Philippiens 2:9). Aprézan, Jézi sa roun zanj vréman pwisan. A Jéova rounso ki pi pwisan pasé Jézi.

4. A pa Jézi ki sa Bondjé Tou-Pwisan-an

Labib-a ka di ki Jézi sa roun zanj pwisan annan syèl-a. Magré sa, i ka obéyi so Bondjé Jéova ki sa so Papa. Poukisa nou ka di sa ? Gadé VIDÉYO-a pou wè annan Labib-a poukisa Jézi ké Bondjé Tou-Pwisan-an, a pa menm moun-an.

VIDÉYO : Ès Jézi Kris a Bondjé ? (3:22)

Vèrsé Labib-ya ka idé nou konprann ki Jéova ké Jézi sa dé moun diféran. Li vèrsé-ya épi kozé asou sa késyon-yan.

Li Luc 1:30-32.

• Kouman sa zanj-a di, ka montré ki Jézi a pa menm moun-an ki Jéova, « Sa-la ki Pi-Rot-a » ?

Li Matthieu 3:16, 17.

• Lò Jézi batizé, yé tandé roun vwa ki soti annan syèl-a. Kisa sa vwa-a di ?

• Sa ou ka pansé, a té di ki moun sa vwa-a ?

Li Jean 14:28.

• Annan roun fanmi, ki moun ki pi vyé é ki gen plis otorité ? Papa-a ouben pitit-a ?

• Jézi aplé Jéova « Papa ». Kisa sa ka anprann nou ?

Li Jean 12:49.

• Ès Jézi ka pansé ki li ké so Papa égal égo ? É ou menm, ès ou ka pansé yé égal égo ?

5. Kisa ka montré ki Jézi té sa Mési-a ?

VIDÉYO : Profési-ya asou Jézi réyalizé (3:03)

Li sa profési biblik-ya épi kozé asou sa késyon-yan.

Li Michée 5:2 pou savé koté Mési-a té divèt fètb (gadé nòt-a).

• Ès sa profési-a réyalizé ? (Matthieu 2:1).

Li Psaume 34:20 ké Zacharie 12:10 pou wè dé profési asou lanmò Jézi.

• Ès sa profési-ya réyalizé ? (Jean 19:33-37).

• I gen moun ka di ki Jézi fè bagaj anba anba pou profési-ya réyalizé. Kisa ou ka pansé ?

• Kisa sa ka montré ou asou Jézi ?

SA NOU WÈ

Jézi a roun zanj pwisan. I sa Pitit Bondjé é Mési-a.

Kisa ou anprann

• Poukisa yé ka aplé Jézi « prémyé-a ki fèt annan tousa Bondjé kréyé » ?

• Kisa Jézi té ka fè anvan i vini asou latè-a ?

• Kouman nou savé ki Jézi sa Mési-a ?

SA OU POUVÉ TRAPÉ OSI

Gadé ròt bagaj ki ka montré ki Jézi té sa Mési-a.

« Ès profési-ya ki annan Labib-a ka byen montré ki Jézi a Mési-a ? » (artik jw.org)

Gadé kouman Labib-a ka montré ki Jézi a Pitit Bondjé.

« Poukisa yé ka aplé Jézi Pitit Bondjé-a ? » (artik jw.org)

Gadé poukisa ansèyman asou trinité-a pa ka vin di Labib-a ?

« Jésus est-il Dieu ? » (La Tour de Garde, 1^é avril 2009)

Gadé kouman lavi roun madanm chanjé lò i anprann sa Labib-a ka di asou Jézi.

« Une femme juive explique pourquoi elle a remis sa foi en question » (Réveillez-vous !, mé 2013)