Te Babaire Ibukin Kakororaoan Ana Kaantaninga Te Atua

“E karaoi bai ni kabane [te Atua] n ai aron nanona ae e tangiria.”​—I-EBETO 1:11, BK.

1. E aera ngkai a na botaki ana ekaretia ni kabane Ana Tia Kakoaua Iehova n Eberi 12 2006?

N TAIRIKIN te Katenibong ae Eberi 12 2006, a na botaki aomata aika tao 16 mirion, ni karaoa Ana Katairiki te Uea. N taabo nako ake a na botaki iai, e na iai te taibora ao i aona te kariki ae aki-karikaki are e tei ibukin rabwatan Kristo, ao te wain ae uraura are e tei ibukin raraana ae kawawaeaki. Imwain banen kabwarabwaraan ae tera nanon Kauringan maten Iesu, a na kabutaki banna ni kauring aikai nakoia aomata ake a roko. Te kariki moa ao imwina te wain. Iai n aia ekaretia tabeua Ana Tia Kakoaua Iehova, ae tao temanna ke tabeman riki mai buakoia ake a roko, ae a na katoong banna ni kauring aikai. Ma n angiin taabo, akea mai buakoia aika roko ae katoong banna aikai. Bukin tera ngkai tii tabeman Kristian, are te koraki aika kaantaningaa te nako karawa aika a katoong banna aikai, ao angiia Kristian ake a kaantaningaa te maiu i aon te aba, a aki katoong?

2, 3. (a) E kanga ni waakina nako ana karikibwai Iehova ni kaineti ma ana kaantaninga? (b) Tera bukin karikan te aonnaba ao aomata iroun Iehova?

² Bon te Atua ae iai ana kaantaninga Iehova. Ibukin kakororaoan ana kaantaninga, e “karaoi bai ni kabane n ai aron nanona ae e tangiria.” (I-Ebeto 1:11, BK) E karika moa Natina ae ana rikitemanna. (Ioane 1:1, 14; Te Kaotioti 3:14) Imwina, rinanon Natina, e a karikia taanga n anera ao te iuniweeti, n ikotaki naba ma aonnaba ao aomata.​—Iobi 38:4, 7; Taian Areru 103:19-21; Ioane 1:2, 3; I-Korote 1:15, 16.

³ E aki karika te aonnaba Iehova bwa te tabo ni kataitai ibukia aomata imwain are a na kona n riki bwa kabatiaia riki anera i karawa, n aron ae a reiakinna Aaro ake aongkoa Kristian ngaiia aika mwaiti. E karaoia ibukin ana kaantaninga are “e na maekanaki.” (Itaia 45:18) E karika te aonnaba te Atua ibukia aomata ao te aomata ibukin te aonnaba. (Taian Areru 115:16) E na riki bwa te baretaiti te aonnaba ni bane, ao e na kaonaki irouia aomata aika raoiroi, ake a na kona n ribanaia ma n tararuaia raoi. Akea te kaantaninga ibukin te nako karawa ae a anganaki ara moani karo.​—Karikani Bwaai 1:26-28; 2:7, 8, 15.

Te Karitei Nakon Ana Kaantaninga Iehova

4. E kanga n riki te karitei nakon riain Iehova n tautaeka ngke e moan waboboaki karikaia aomata?

⁴ E karitei natin te Atua temanna ae te anera, ike e a kakorakoraa n tuuka koron bukin ana kaantaninga Iehova. E buakaka arona iai ni kabongana te bwaintangira mairoun te Atua, are inaaomatana n rinea are e na karaoia. E kakiriwea te rau are a namakinna aomata nako, ake a tangira te aantaeka nakon ana tautaeka Iehova. E kairiia te moan taanga Tatan bwa a na moana maiuiia n inaaomata mairoun te Atua. (Karikani Bwaai 3:1-6) E aki kakewea mwaakan Iehova, ma e tiriburea arona n tautaeka ao ngkanne e kananokokorakia iai riain Iehova n tautaeka. Mangaia are, e a tabekaki te bukibuki ibukin riain Iehova n tautaeka, i aon te aba ngke e moan waboboaki karikaia aomata.

5. Tera te kauoua ni bukibuki are e tabekaki, ao ibukin antai?

⁵ E irekereke te moan bukibuki ibukin riain Iehova n tautaeka i aoni bwaai ni kabane, ma te kauoua ni bukibuki are e tabekia Tatan n ana bong Iobi. E karekea te nanououa Tatan ni kaineti ma raoiroin nanoia natin te Atua ake a aantaeka Nakoina ma n toro Irouna. E taekinna Tatan bwa a karaoa aei, ibukin kani kakabwaiaaia, ma ngkana a kataaki, a na bon tannako mairoun te Atua. (Iobi 1:7-11; 2:4, 5) E ngae ngke e tabekaki te bukibuki aei ni kaineti ma ana toro Iehova i aon te aba, ma e kaineti naba nakoia natin te Atua aika anera, n ikotaki naba ma Natina are ana rikitemanna.

6. E kanga Iehova ni kakaonimaki ni kakororaoa ana kaantaninga ao nanon arana?

⁶ Ibukin kakaonimakina ni kakororaoan ana kaantaninga ao nanon arana, E karikia Iehova i bon irouna bwa te Burabeti ao te tia Kamaiu.a E taku nakon Tatan: “N na kaki te kakaiwi i marenam ma te aine aei, ao i marenan am kariki ma ana kariki: e na kaikoaka atum, ao ane ko na kaikoaka bukini waena ngkoe.” (Karikani Bwaai 3:15) Rinanon te Kariki are mairoun ana “aine” are tei ibukin iteran ana botaki te Atua are i karawa, e a kona iai Iehova ni kaekaa ana bukibuki Tatan ao n angania ana kariki Atam kaantaningaan te kamaiuaki ao te maiu.​—I-Rom 5:21; I-Karatia 4:26, 31.

“Nanona ae e Raba”

7. Tera te kaantaninga are e kaotia Iehova rinanon te abotoro Bauro?

⁷ N ana reta te abotoro Bauro nakoia Kristian ake i Ebeto, e kamataataa raoi iai aron Iehova ni bairea ana waaki ibukin kakororaoan ana kaantaninga. E korea ae kangai Bauro: “E kaota nakoira nanona ae e raba ma ana iango n akoi, are e a kamani baireia i boni irouna. E na kakoroa bukina ngkana e roko taina, ao e na boti bai ni kabane, aika baini karawa ma bain aonteaba, i an te mataniwi ae ti temanna, ae boni Kristo.” (I-Ebeto 1:9, 10, BK) Ana kaantaninga Iehova ae mimitong, boni karekean te iuniweeti ae a katiteuanaki kaaina n aantaeka ma nanoia ni kabane nakon ana tautaeka. (Te Kaotioti 4:11) E na katabuaki ngkanne arana, ao e nang kaotaraeaki iai bwa Tatan bon te tia kewe, ao e nang tauaki ana taeka te Atua “i aonaba, n ai aron tauana i karawa.”​—Mataio 6:10.

8. Tera nanon te taeka ae rairaki bwa ‘babaire’?

⁸ E na kakororaoaki “ana iango n akoi” Iehova, ke ana kaantaninga, rinanon ana ‘babaire.’ E kabonganaki iroun Bauro te taeka ae nanona raoi “te kairiri n te utu.” E aki nanonaki iai te tautaeka n aron te Tautaeka n Uea iroun te Mesia, ma e nanonaki iai te waaki ni kairiri.b Aron Iehova ae kamimi ni kairiri ibukin kakororaoan ana kaantaninga, e irekereke ma te “baere raba” mairoun te Atua, are e na kaotaki teutana imwin teutana i nanon tienture aika mwaiti.​—I-Ebeto 1:10; 3:9, NW, Nori kabwarabwara ake i nano.

9. Tera aron Iehova ni kaotiota nanona ae raba, teutana imwin teutana?

⁹ Rinanon karaoan boraraoi tabeua, e kaotiota iai Iehova aron kakoroan bukin ana kaantaninga teutana imwin teutana, ni kaineti ma te Kariki are e beritanna i Eten. E kaotaki n ana berita ma Aberaam bwa e na riki i aon te aba man ana utu Aberaam te Kariki are beritanaki, ao a na kakabwaiaki ‘botanaomatan aonnaba ni bane’ irouna. E kaotaki naba n te berita anne bwa a na iai tabeman aika a na raona moani mwakoron te kariki ane kakawaki anne. (Karikani Bwaai 22:17, 18) E kaotaki ana kaantaninga Iehova ibukin katean te “koraki n ibonga” n te berita n Tua are e karaoaki ma Iteraera n rabwata. (Te Otinako 19:5, 6) E kaotaki n te berita ma Tawita bwa e na riki te Kariki anne bwa te tia Kairiri n aki totoki n te Tautaeka n Uea. (2 Tamuera 7:12, 13; Taian Areru 89:3, 4) Ngke e a tia te berita n Tua ni kairiia kaain Iutaia nakon rokon te Mesia, e a manga kaotii aanga riki tabeua Iehova ibukin kakoroan bukin ana kaantaninga. (I-Karatia 3:19, 24) Aomata ake a na raona mwakoron te kariki ae kakawaki riki aei, a na riki bwa te “koraki n ibonga” are e taetae ni burabetinaki, ao a na uotaki nakon “te berita nabangkai” bwa “Iteraera” ae boou, are Iteraera n taamnei.​—Ieremia 31:31-34; Ebera 8:7-9.c

10, 11. (a) E kanga Iehova ni kaota te Kariki are e taetae ni burabetinaki? (b) E aera ngke e roko i aon te aba Natin te Atua ae ana rikitemanna?

¹⁰ Ibukin waakinan kakororaoan ana kaantaninga te Atua, e a roko te tai are e taetae ni burabetinaki ibukin kaotin te Kariki i aon te aba. E kanakoa te anera ae Kabiriera Iehova bwa e na tuanga Maria are e nang bungia te nati te mwaane ao e na aranaki bwa Iesu. E taku te anera nakoina: “Ane E na kakanato, ao E na aranaki ba Natin Teuare Moan te Rietata: ao te Uea are te Atua E na anganna ana kaintokanuea tamana are Tawita: ao ane E na uea i aon te bata are Iakoba n aki toki; ao akea tokin ueana.” (Ruka 1:32, 33) Mangaia are, e a ataaki raoi te Kariki are e beritanaki.​—I-Karatia 3:16; 4:4.

¹¹ E roko nako aon te aba Natin Iehova ae ana rikitemanna bwa e na kataaki tian ana onimaki. E boto i aoni maiun Iesu kaekan raoi ana bukibuki Tatan. E na teimatoa ni kakaonimaki nakon Tamana? E irekereke aei ma te baere raba mairoun te Atua. Imwina riki, ao e kabwarabwaraa ana mwakuri Iesu te abotoro Bauro ni kangai: “E kakanato te baere raba are bwain te aro ni Kristian; E kaotaki Teuarei n te rabata, E karaoiroaki iroun te Tamnei, E noraki irouia anera, E tataekinaki nakoia Tientaire, E onimakinaki i aon te aba, E mwaneaki rake nako nanon te neboaki.” (1 Timoteo 3:16) Eng, ibukin teimatoan Iesu ni kakaonimaki ni karokoa matena, e a anga iai kaekaan raoi ana bukibuki Tatan. Ma iai riki rongorongon te baere raba aika teimatoa n tuai ni kaotaki.

“Te Baere Raba are Bwain Uean te Atua”

12, 13. (a) Tera te anga teuana ni kaineti ma “te baere raba are bwain Uean te Atua”? (b) Tera ae irekereke ma rineaia te koraki ae karako, ibukin te nako karawa iroun Iehova?

¹² Ni mwanangan Iesu teuana ibukin tataekinan te rongorongo i Kariraia, e taekinna bwa e irekereke te baere raba ma te Tautaeka n Uea iroun te Mesia. E taku nakoia taan rimwina: “Ba kam anganaki te kona n ata te baere raba are bwain uean te Atua.” ( Mataio 13:11; Mareko 4:11) Te anga teuana ae irekereke ma te baere raba bon aron Iehova n rinea te “nanai ae uarereke,” ae kaainaki irouia aomata aika 144,000 bwa a na raona Natina n riki bwa mwakoron te kariki ake a na uea ma ngaia i karawa.​—Ruka 12:32; Te Kaotioti 14:1, 4.

¹³ Kioina ngkai a karikaki aomata bwa taani maeka i aon te aba, e a kainnanoaki ngkanne te ‘karikibwai ae boou’ iroun Iehova bwa a aonga n nako karawa aomata tabeman. (2 I-Korinto 5:17, BK) E korea ae kangai te abotoro Bauro ngkai ngaia naba temanna mai buakoia ake a a tia n rineaki nakon te kaantaninga ae okoro aei ae te nako karawa: “E na karaoiroaki te Atua ae Taman ara Uea are Iesu Kristo, are a manga karikira n ai aron ana nanoanga ae bati nakon te kaantaninga ae kamaiu ni manga-utin Iesu Kristo mai buakoia maate, ba a aonga n reke bwaai aika aki kona ni mka, aika aki kamwara, aika aki kona n rai, aika kawakinaki i karawa i mwaimi.”​—1 Betero 1:3, 4.

14. (a) A kanga ni kairekerekeaki aomata aika tiaki I-Iutaia n “te baere raba are bwain uean te Atua”? (b) E aera ngkai ti a kona n ota n “ana bwai te Atua ake a nano”?

¹⁴ Iteran te baere raba teuana riki ni kaineti ma te Tautaeka n Uea n te tai ae imwaira, bon nanon te Atua ni karinia aomata aika tiaki I-Iutaia i buakon te mwaiti ae karako aei, ake a na uea ma Kristo i karawa. E kabwarabwaraa Bauro iteran ana ‘baire’ Iehova aei, ke arona ni waakina kakororaoan ana kaantaninga, ngke e kangai: “E aki kaotaki te rongorongo ae e raba anne nakoia aomata n tai ake ngkoa, ma e kaotaki ngkai nakoia aomata aika a tabu, aika Abotoro ma Burabeti, iroun te Tamnei. E kangai te rongorongo ae e raba anne: a katauaki bekan n ababa i rarikia I Iutaia; a riki ba te rabata ae ti teuana ma ngaiia; ao a baibai ma ngaiia ni kanoan te motintaeka, irouni Iesu Kristo, ba muin te Euangkerio.” (I-Ebeto 3:5, 6, BK) E kaotaki nanon iteran te baere raba aei nakoia ‘abotoro aika itiaki.’ Ti te arona naba ma boong aikai, bwa ngke arona bwa e aki buokira te taamnei ae raoiroi, ti na aki kona naba n ota n “ana bwai te Atua ake a nano.”​—1 I-Korinto 2:10; 4:1; I-Korote 1:26, 27.

15, 16. Bukin tera bwa Iehova e rineia raon Kristo n tautaeka mai buakoia botannaomata?

¹⁵ A taekinaki te koraki ake “tebubua ma abwi ma aua tenga” ake a noraki n tei irarikin “te Tiibutetei” i aon te Maunga are Tion i karawa, bwa a a tia ni “kabooaki mai aon te aba,” ao ni “kabooaki . . . mai buakoia aomata ba ana moa n uaa te Atua ma te Tiibutetei,” ae Kristo Iesu. (Te Kaotioti 14:1-4) E rinea ana karimoa mai buakoia natina i karawa Iehova, bwa e na riki bwa mwakoron te kariki ae kakawaki riki are beritanaki i Eten, ma bukin tera ngkai e rineia raon Kristo mai buakoia aomata? E kabwarabwaraa te abotoro Bauro bwa te koraki ae karako mwaitiia aei a “weteaki n ai aron [nanon Iehova],” “n ai aron nanona are atataiaomata.”​—I-Rom 8:17, 28-30; I-Ebeto 1:5, 11; 2 Timoteo 1:9.

¹⁶ Ana kaantaninga Iehova bon katabuan arana ae kakannato man tabu, ao ni kakoauaa naba riain mwaakana n tautaeka i aoni bwaai ni kabane. Ibukin wanawanan Iehova ae akea kabotauana n arona ni ‘bairei’ bwaai, ke ni kairii ana waaki, e a kanakoa iai ana moan Nati nako aon te aba, ike e a kataaki iai n te mate. Irarikin anne, e kamatoaa ana iango Iehova bwa a na kaaina te Tautaeka n Uea iroun te Mesia are Natina, aomata ake a a tia ni boutokaa naba Ana tautaeka ni karokoa mateia.​—I-Ebeto 1:8-12; Te Kaotioti 2:10, 11.

17. Bukin tera bwa ti kukurei ngkai a a tia ni maiu ngkoa i aon te aba Kristo ao raona n tautaeka?

¹⁷ E kaota ana tangira ae korakora Iehova ibukia ana kariki Atam rinanon karokoan Natina i aon te aba, ao n rineaia te koraki ake a na ababa ma Natina ao n uea naba n te Tautaeka n Uea mai buakoia botannaomata. A na kanga ni kakabwaiaki man anne, aomata ake a a tia ni kakaonimaki nakon Iehova, ni moa mairoun Abera ni karokoa ngkai? Kioina ngkai a bungiaki aomata aika aki kororaoi bwa ana toro te bure ao te mate, a kainnanoa ngkanne kaitiakaia raoi n te itera n rabwata ao n taamnei, bwa a aonga ni kororaoi n aron ana moani kaantaninga Iehova ibukin te botannaomata. (I-Rom 5:12) Ai kabebeteaki ra nanoia aomata ni kabane ake a kariariaa te maiu are aki toki i aon te aba, n ataakin ae e na kaota ana tangira nakoia ao ana taotaonakinnano aia Uea, n aron naba are e karaoia nakoia taan rimwina n ana tai ni mwakuri ni minita i aon te aba! (Mataio 11:28, 29; Ebera 2:17, 18; 4:15; 7:25, 26) Ao e na rau riki nanoia n ataakin ae raon Kristo i karawa aika uea ma ibonga aikai, boni mwaane ao aine aika kakaonimaki ngkoa ake a a tia n rinanon taiani mamaara ao ni kaaitarai kangaangan te maiu aei, n aron ae ti kaaitarai naba!​—I-Rom 7:21-25.

Ana Kaantaninga Iehova ae E na Koro Bukina

18, 19. Bukin tera bwa ti a ota riki ngkai n ana taeka Bauro ake n I-Ebeto 1:8-11 BK, ao tera ae e na rinanoaki n te kaongora ae imwina?

¹⁸ Ti a kona riki ngkai n ataa nanon ana taeka Bauro nakoia Kristian aika kabiraki ae mena n I-Ebeto 1:8-11, BK. E taekinna bwa e a tia Iehova ni kaota “nanona ae e raba,” ike a a tia iai ngaiia ‘n anganaki tibwangaia i nanoni Kristo,’ ao a a ‘kaman rineaki iroun te Atua n oin ana baire. E karaoi bwai ni kabane n ai aron nanona ae e tangiria.’ Ti taku bwa e tonuraoi aei ni kaineti ma ana “baire” Iehova ae kamimi ibukin kakororaoan ana kaantaninga. E reke naba otara man aei, bwa e aera ngkai tii tabeman mai buakoia Kristian aika ira Ana Katairiki te Uea aika katoong banna ni kauring.

¹⁹ N te kaongora ae imwina, ti na nora iai nanon Kauringan maten Kristo nakoia Kristian ake iai kaantaningan te nako karawa irouia. Ti na reiakinna naba bwa e aera ngkai mirion ma mirion aomata ake iai irouia kaantaningan te maiu n aki toki i aon te aba, a riai n ataa bannan te Kauring.

[Kabwarabwara ae nano]

Te Kauring

• E aera ngke e karika te aonnaba Iehova ao e kamaekaia aomata iai?

• Bukin tera ngkai e riai ni kataaki i aon te aba Natin Iehova ae ana rikitemanna?

• Bukin tera bwa e rineia raon Kristo n tautaeka Iehova mai buakoia botannaomata?