Ukeran “Ana Bwai Te Atua Ake A Nano”

“E tirotiroi bwai ni kabane te Tamnei ma ana bwai te Atua ake a nano.”​—1 I-KORINTO 2:10.

1. Baikara koaua man te Baibara aika a kimwareirei iai aomata aika a tibwa moana aia reirei?

A KONA angiina mai buakora n te ekaretia ni Kristian, ni kauring kimwareireia ngkoa ni moan ataan te koaua irouia. Ti a tibwa ataa kakawakin aran te Atua ae Iehova, e aera ngkai e tuai ni katoka te rawawata, bukin tera ngkai a nako tabeman nako karawa ao kanoan taai aika a na roko ibukia aomata aika kakaonimaki. Tao ti a tia n nenera te Baibara mai mwaina, ma a raba baikai mairoura n aron ae riki ngkai nakoia angiia aomata. Titeboo ngaira ngkanne ma te aomata ae tebo i taari ao e kakorakoraa n tarataraa te rakai. Ibukina bwa akea ana bwai n tebo, e na aki kona n nori bwain taari aika kantara ake i nano riki. Ma ngkana iai ana bwai n tebo ke tao e kirati kabin ana booti, e na boni kimarimari ni moan noran te rakai ae kirimatamata ma ni kantara, iika, arokan taari ao baika maiu tabeua riki aika kamimi. N aron naba anne, ngkana ti kamatataaki ni kanoan te Baibara, ai tibwa ara moantai anne n oota n “ana bwai te Atua ake a nano.”​—1 I-Korinto 2:8-​10.

2. Bukin tera bwa a na akea tokin te kimwareirei ae reke, man reiakinan Ana Taeka te Atua?

² E koaua bwa ti a rauaki naba n ara atatai ae tii moan reirei man ana koaua te Baibara? Te bwai ae nanonaki n te kibuntaeka ae “ana bwai te Atua ake a nano,” bon otara n rabakaun te Atua are e kaotiotaki nakoia Kristian rinanon te taamnei are raoiroi, ma e karabaaki nakoia tabeman. (1 I-Korinto 2:7) E aki tiatianaki rabakaun te Atua ao ti kona ni karekea te kimwareirei ae korakora man neneran kawaina nako! Ti aki kona n atai rabakaun te Atua ni bwaai ni kabane ni kaineti ma kawaina nako. E kona n teimatoa kimwareireira are ti namakinna ngkoa ni moan reiakinan ana boto n reirei te Baibara, ngkana ti reitaanako neneran “ana bwai te Atua ake a nano” n akea kerikakin ingaingan nanora.

3. E aera ngkai ti riai n ota raoi ni baika ti kakoauai?

³ E aera bwa ti riai n ota raoi ni ‘bwaai aika a nano’? Ngkana ti ota raoi, tiaki tii i aon te bwai ae ti kakoauaa ma ibukin naba ae e aera ngkai ti kakoauaa, e na kakorakoraki iai ara onimaki ao kakoauan aana. Ti tuangaki n te Baibara bwa ti na kamanenai “rabakaura n iango,” [NW] bwa ti aonga n “riki n ata Nanon te Atua, are raoiroi, are kakukurei, are koro-raoi.” (I-Rom 12:1, 2) Ngkana ti ota raoi bwa e aera ngkai e tangirira Iehova bwa ti na maiuakina te aeka ni maiu teuana, e a kamatoaki iai ara motinnano ni kan ongeaba irouna. Ti kona ni kakorakoraki man ara atatai ni ‘baika a nano,’ bwa ti na rawa ni karaoi mwakuri aika bubuaka ao ni kairaki nakoni ‘kani karaoan makuri aika raraoi.’​—Tito 2:14.

4. Tera ae irekereke ma reiakinan te Baibara?

⁴ Ti riai n reiakin baika a nano ngkana ti kan ota raoi iai. Ngaia are e rangi ni kaokoro te reirei ma ae ko a warekia nako naba. E kainnanoaki iai neneran raoi te rongorongo bwa tera reitakina ma are ti a kaman ataia. (2 Timoteo 1:13) E kainnanoaki naba iai bwa ti na ataa bukin taekinan te bwai teuana. E riai ni karinaki naba i buakon te reirei n te Baibara, kananoan te iango i aon arora ni kona ni kamanenai baika ti reiakin, ni karaoan ara motinnano aika riai ao ibukin buokaia aomata naba. Kioina ngkai “e anganaki te aba te Baibara ni kabanea iroun Tamnein te Atua, ao e manena,” ti riai ngkanne ni kamanenai “taeka nako aika a oti nako mai win [Iehova].” (2 Timoteo 3:16, 17; Mataio 4:4) E kainnanoaki naba te kakorakora n reiakinan te Baibara! Ma e kona ni kakukurei ao n aki kangaanga karekean te ota n “ana bwai te Atua ake a nano.”

E Buokia Aika Nimamannei Iehova Bwa A na Ota

5. Antai ae kona n ota raoi n “ana bwai te Atua ake a nano”?

⁵ E ngae ngkana e aki rangi n rietata am reirei ao ko aki taneiai ma te reirei, tai iangoia bwa ko a aki kona n ota raoi n “ana bwai te Atua ake a nano.” N ana tai ni mwakuri ni minita Iesu i aon te aba, ao e kaotaia aomata ni kaineti ma Ana kaantaninga Iehova. E aki kaota aei nakoia akana rabakau ma akana wanawana, ma nakoia akana aki reireiaki ao aika aki ataibwai, ake a kaotiota te nanorinano n aroia ni butimwaea reiakinaia irouia ana toro te Atua. A taraa ni merimeri ni kabotauaki ma te koraki ake a a tia n reireiaki n taabo n reirei. (Mataio 11:25; Mwakuri 4:13) Ni kaineti ma “baika E katauraoi te Atua i bukiia ake a tangiria,” e korea ae kangai te abotoro Bauro nakoia raona n onimaki: “E kaotioti baikai te Atua nako ira iroun Tamneina: ba E tirotiroi bwai ni kabane te Tamnei ma ana bwai te Atua ake a nano.”​—1 I-Korinto 2:9, 10.

6. Tera ae nanonaki n 1 I-Korinto 2:10?

⁶ E kanga taamnein te Atua n “tirotiroi bwai ni kabane ma ana bwai te Atua ake a nano”? N onean mwin are e na angania Kristian n tatabemania nako te kaotioti ibukin te koaua, e kabongana taamneina Iehova ni kaira ana botaki ae katiteuanaki, ae katauraoaki iai te kaotaota man te Baibara. (Mwakuri 20:28; I-Ebeto 4:3-6) Titeboo kaetietin te reirei i aon te Baibara nakoia ekaretia ni kabane ni katobibia te aonnaba. A rinanoaki reirei man te Baibara ni kabane, n ekaretia nako i nanon te tai ae maan teutana. E mwamwakuri te taamnei are raoiroi rinanon te ekaretia ni buokia aomata ni maiuakina te aroaro ae kainnanoaki, ibukin karekean te ota raoi n “ana bwai te Atua ake a nano.”​—Mwakuri 5:32.

Baika A Irekereke ma “Ana Bwai te Atua Ake A Nano”

7. E aera ngkai a mwaiti aomata aika a aki ota n “ana bwai te Atua ake a nano”?

⁷ Ti riai n aki iangoia bwa e kangaanga reken te ota ni ‘bwaai aika nano.’ E karabaaki te atatai ni kaineti ma “ana bwai te Atua ake a nano” nakoia angiia aomata. Tiaki ibukina bwa e rangi ni kangaanga karekean rabakaun te Atua, ma ibukina bwa e mwamwanaia aomata Tatan bwa a aonga n rawa ni butimwaea te buoka ae katauraoia Iehova rinanon Ana botaki.​—2 I-Korinto 4:3, 4.

8. Baikara baike a nano ake e taekin Bauro ni katenuan mwakoron ana reta nakoia I-Ebeto?

⁸ E kaotaki ni katenuan mwakoron ana reta Bauro nakoia I-Ebeto bwa e irekereke “ana bwai te Atua ake a nano” ma koaua aika mwaiti aika rangi n ataaki irouia angiia ana aomata Iehova. Aika koaua n aron kinaakin te Kariki are e beritanaki, rineaia tabeman mai buakoia botannaomata ake iai irouia kaantaningaan te maiu i karawa ao taekan te Tautaeka n Uea iroun te Mesia. E korea ae kangai Bauro: “Are aki kaotaki nakoia natiia aomata n rooro ake ngkoangkoa, n ai arona ngkae e kaotaki ngkai iroun te Tamnei nakoia ana tia tuatua aika tabuaki ma ana burabeti; ba a aonga n raonia Iteraera Tientaire n ababa, ma n riki ba te rabata ae ti teuana, ma ni buokanibwai ma ngaiia n te taeka n akoi, are irouni Kristo Iesu.” E taekinna Bauro bwa e mwiokoaki bwa e na “kaota nakoia aomata ni kabaneia aroni makurian te baere raba, are karabaki ma ngkoangkoa iroun te Atua.”​—I-Ebeto 3:5-9.

9. E aera ngkai ti na kakabwaiaki n otara n “ana bwai te Atua ake a nano”?

⁹ E reitaanako kabwarabwaraan nanon te Atua Bauro, ae e na ‘kaotaki rabakauna ae bati arona nakoia taian uea ma ake a korakora i karawa iroun te ekaretia.’ (I-Ebeto 3:10) A kakabwaiaki anera n noran ao otaia n rabakaun Iehova ni kaira te ekaretia ni Kristian. Ai kakabwaiakira ngaira n otara ni baika a kan atai anera! (1 Betero 1:10-​12) Imwina riki, e taekinna Bauro, bwa ti riai ni kakorakoraira ‘n ata te baerei ma ake a itiaki ni kabaneia, are rababan, anaun ma nanon ao rietan’ te onimaki ni Kristian. (I-Ebeto 3:11, 18) Ngkai ti na rinanon katoton baika a nano tabeua aika a kona ni karababai riki otara iai.

Katoton Baika A Nano

10, 11. Ni kaineti ma ae e taekinaki n te Baibara, n ningai are e a riki iai Iesu bwa te moan uaa man ana “kariki” ana “aine” te Atua i karawa?

¹⁰ Ti ataia bwa Iesu bon te moan uaa n te “kariki” mairoun ana “aine” te Atua i karawa ae taekinaki ni Karikani Bwaai 3:15. Ni karababan riki otara, ti kona n titiraki ni kangai: ‘E riki Iesu bwa te Kariki ae beritanaki n ningai? Te koaua bwa e riki aei tabeua te tai imwain rikina n aomata, bungiana i aon te aba, bwabetitoana, ke ni kautana man te mate?’

¹¹ E beritanna te Atua bwa e na otinako te kariki are e na kaikoaka atun te naeta, man ana botaki are i karawa ae taetae ni burabetinaki bwa ana “aine.” Ma imwin ririki aika ngaa ma ngaa, ao akea te kariki ae e otinako mairoun ana aine te Atua anne are e na tau korakorana ni kamaunaa Tatan ma ana mwakuri nako. Mangaia are e a taekinaki te aine anne n ana taetae ni burabeti Itaia bwa e “kanoabo” ao e “maraki nanona.” (Itaia 54:1, 5, 6) Ma imwina riki, e a bungiaki Iesu i Betereem. Ma imwin bwabetitoana, ao e a kabiraki iroun te taamnei are raoiroi ike e a riki iai bwa natin te Atua ao e a kangai iai Iehova: “Aei natiu.” (Mataio 3:17, BK; Ioane 3:3) E a tibwa kaoti n te tai anne moan uaan te “kariki” are mairoun te aine. Imwina, a a kabiraki iroun te taamnei are raoiroi taan rimwin Iesu. N tokina, e a kona n “takarua ni kukurei” Ana “aine” Iehova, are e a tia n riki bwa ‘te aine ae kanoabo,’ i nanon te tai ae maan.​—Itaia 54:1; I-Karatia 3:29.

12, 13. Kiibu raa, aika kaotaki iai ae kaain “te toro ae kakaonimaki ae wanawana,” bon Kristian ni kabane aika kabiraki i aon te aba?

¹² E kaineti te kauoua ni katoto ni baika nano ake a a tia ni kaotaki nakoira, ma Ana kaantaninga te Atua ibukin rineaia te koraki ake 144,000 mwaitiia mai buakoia botannaomata. (Te Kaotioti 14:1, 4) Ti butimwaea te reirei are boni kaain “te toro ae kakaonimaki ae wanawana” te koraki ake a kabiraki ni kabane iroun te taamnei aika maiu ngkai i aon te aba, are e taekinia Iesu bwa a na katauraoa te ‘amwarake’ n taina ae riai ibukia tabonibaina. (Mataio 24:45) E kakoauaki etin te atatai aei ni kibun te Baibara raa? E kona Iesu n nanona temanna te Kristian ae karikirakei aia onimaki tarina ni katauraoan baika a na rikirake iai aia onimaki?

¹³ E tua ae kangai te Atua nakon te natannaomata ae Iteraera: “Bon taani kakoaua au taeka ngkami, ao au tia makuri ae I rineia.” (Itaia 43:10) Ma n Nitian 11 33 C.E., e a tuangia mataniwi n te natannaomata ae Iteraera Iesu bwa a a kakeaaki iroun te Atua bwa a na aki manga toro Irouna. E taku: “E na anaki mai roumi uean te Atua; ao e na anganaki te botanaomata ae kariki uaana.” E taku Iesu nakoia aomata aika bati: “Noria, e nang tiku maneabami i roumi ni maroaa.” (Mataio 21:43; 23:38) A aki kakaonimaki ke ni wanawana te bata ae Iteraera, e ngae ngke ana toro Iehova ngaiia. (Itaia 29:13, 14) Rimwi riki n te bong anne, e titiraki Iesu ni kangai: “Ai antai te toro ae kakaonimaki ae wanawana?” Ai aron ae e titiraki ni kangai, ‘Antai te baronga ae wanawana ae e na onea mwin Iteraera n riki bwa ana toro te Atua ae kakaonimaki?’ E kaekaa aei te abotoro Betero ngke e tua ae kangai nakon aia ekaretia Kristian ake a kabiraki: “Ngkami bon . . . te roro ae rineaki, ae te koraki n ibonga n uea.” (1 Betero 1:4; 2:9) E a riki te botannaomata n taamnei ae “ana Iteraera te Atua,” bwa ana toro Iehova aika boou. (I-Karatia 6:16) N aron are a katea te rabwata teuana ae te “toro” kaain Iteraera ni kabane ake rimoa, Kristian aika kabiraki aika i aon te aba ni kabane, a karekea naba n te tai teuana te rabwata ae “te toro ae kakaonimaki ae wanawana.” Ai kakabwaiakira ngaira ngkai a rereke ‘karara’ rinanon ana toro te Atua!

E Kona n Rangi ni Kakukurei te Ukeuke n Reirei i Bon Iroum

14. E aera ngkai e kakukurei riki te reirei n te Baibara nakon ae tii te wareware?

¹⁴ Ti aki ngkanne namakina te kukurei ni kakorakoran ara onimaki man kaotan te atatai ae boou man te Baibara nakoira? Anne bukina ngkai e kakukurei riki te reirei n te Baibara nakon ae tii te wareware. Mangaia are ngkana ko wareki booki aika kabwarabwaraa te Baibara, titirakiniko ni kangai: ‘Tera kabotauan te kabwarabwara aei ma otau are mai mwaina n te reirei aei? Baikara kiibu riki tabeua man te Baibara ke maroro aika I kona n iangoi ake a na kona n raona riki boutokaan motinnano aika taekinaki n te rongorongo aei?’ Ngkana e kainnanoaki te ukeuke riki i aona, korea te titiraki ae ko kan ataa kaekaana, ao e na riki bwa te moanibwai ae ko na rinanona n am ukeuke n reirei ae e na roko.

15. Baikara aaro n reirei aika kakukurei, ao a na kanga ni kona n teimatoa ni buokiko?

¹⁵ Baikara ukeuke n reirei aika a na karekea kukureim n te atatai ae boou? E kona ni karikirakea te ota iroura bairean te tai ibukin neneran raoi ana berita te Atua aika kakaokoro, ake e a tia ni karaoi ibukin kakabwaiaaia botannaomata. Ko kona ni kakorakoraa am onimaki n reiakinan taetae ni burabeti aika kaineti ma Iesu Kristo ke n rinanoan teuana mai buakon booki ni burabeti n te Baibara, n nenera kibuna teuana imwin teuana. E kakorakoraa naba te onimaki kauringan rongorongoia Ana Tia Kakoaua Iehova ni boong aikai, ni kamanenan te boki ae Jehovah’s Witnesses​—Proclaimers of God’s Kingdom, ngkana e a tauraoi n oin am taetae.a E kona ni kaotako raoi riki i aoni kiibu tabeua, te kauring i aon te reirei ae e atunaki n “Titiraki Mairouia Taani Wareware” ae boretiaki n Te Taua-n-Tantani. Karekea otam i aon ana kaotaota kibun te Baibara akana a kabonganaki ibukin karekean motinnano akana a kabwarabwaraki. Ko na buokaki n aei ni “kataneiaki ni wanawana” ao ni karikirakea am atatai. (Ebera 5:14) Ni karaoan am reirei, korei mwia n oin am Baibara ke i aon te beebwa bwa e aonga n teimatoa n reke buokam mai iai ao ai uana naba ma ake ko kona ni buokia.

Buokia Rooro n Rikirake Bwa E na Kakukurei Reiakinan te Baibara Irouia

16. Ko na kanga ni buokia rooro n rikirake bwa e na kakukurei reiakinan te Baibara irouia?

¹⁶ E bati ae a kona ni karaoia kaaro ni buokia natia, bwa a na karikirakea bwaruan taekan te onimaki ni koaua. Tai kakeaa bongan aia konabwai n ota rooro n rikirake i aoni baika nano. Ngkana ko angania te bwai ae a na ukeuke i aona ibukin aia katauraoi nakon te reirei n te utu, ko kona n titirakinia bwa tera reireiaia mai iai. E kona naba ni karinaki i nanon te reirei n te utu taai ni kataneiai ibukin buokaia rooro n rikirake, bwa a aonga n rabakau ni kaota bukin aia onimaki ao n ataia bwa a bon koaua baike a a tia n reiakin. Irarikina, ko kona ni kabonganaa te boroutia ae, “See the Good Land”b n reireinia iai rongorongon taabo aika kakaokoro n te Baibara ao ni kamataatai baika kam wareki n ami wareware man te Baibara ibukin te wiki.

17. E aera ngkai ti riai ni karaoa ara ukeuke n reirei i bon iroura n te aro ae riai ao ni baireaki raoi?

¹⁷ E kona n rangi ni kakaongora ao ni kakorakoraa te onimaki karaoan reirei man te Baibara, ma taraia raoi bwa e na aki anaa am tai ni katauraoi ibukin bobotakin te ekaretia. Taai ni bobotaki aikai bon te anga teuana are ti a kairaki iai iroun Iehova, rinanon “te toro ae kakaonimaki ae wanawana.” Ma ko kona ni buokaki n anga am kaeka aika raraoi man karaoan am kakaae aika bati riki, tao n te Reirei n te Boki n te Ekaretia ke n tain reirei aika kakawaki man te wareware n te Baibara ni katoa wiiki ibukin Te Kuura ni Kataneiai Ibukia Taan Uarongorongo.

18. E aera ngkai e manena te kakorakora ibukin reiakinan “ana bwai te Atua ake a nano”?

¹⁸ Ko kona ni kaaniaki ma Iehova n am ukeuke n reirei i bon iroum man Ana Taeka te Atua. E taku te Baibara ni kaotan manenan te aeka n reirei anne: “Te bwai ni kamaiu te rabakau, n ai aron te mane ngkai te bwai ni kamaiu naba: ma aio raoiroin te ataibwai, ba e kamaiua te aomata ae ana bwai te rabakau te rabakau.” (Te Minita 7:12) Mangaia are e manena te kakorakora ibukin kananoan am atatai n ana koaua te Atua. E kangai ana berita te Baibara ni kaineti ma ake a teimatoa n ukoukoria: “E na reke i roum atakin te Atua.”​—Taeka N Rabakau 2:4, 5.

[Kabwarabwara ae nano]

Ko Kona ni Kabwarabwaraa?

• Baikara “ana bwai te Atua ake a nano”?

• E aera ngkai ti aki riai ni katoka reiakinan bwaai aika nano?

• E aera ngkai e kona n reke irouia Kristian ni kabane te kimwareirei n ataan “ana bwai te Atua ake a nano”?

• Ko na kanga ni kakabwaiaki riki man “ana bwai te Atua ake a nano”?