Te Ukeuke N Reirei—E Manena Ma Ni Kakukurei
“Ngkana ko ukoukoria . . . , e na reke iroum atakin te Atua.”—TAEKA N RABAKAU 2:4, 5.
1. Ti na kanga ni kona ni karekea te kukurei ae bati, man te kaki botu ni wareware?
A MWAITI aomata aika a wawareware ibukin kakukureiaia. Ngkana e raoiroi are warekaki, ao te wareware e kona n riki bwa te aro ni kaaki botu ae kamaiu. Irarikin aia babaire ibukin te wareware n te Baibara are a tataneiai ni karaoia, Kristian tabeman a namakina te kukurei ngkana a kauka aia Baibara ma ni wareware man te Areru teuana, man Taeka N Rabakau, taian Euangkerio, ke mwakoron te Baibara ake tabeua riki. Tamaroan taeka ao iango ake a mena iai, a karika kimwareireia ae korakora. Tabeman riki a kaki botuia ni wareware n te Yearbook of Jehovah’s Witnesses, te maekatin ae te Awake!, rongorongoia aomata ake a boretiaki inanon te maekatin aei, ke rongorongon te aonnaba rimoa, aaba aika kakaokoro, ao te karikibwai.
2, 3. (a) N te aro ra are reirei i aon bwaai n taamnei aika nano, a kona ni kabotauaki ma te amwarake ae matoatoa? (b) Tera ae e irekereke ma te ukeuke n reirei?
2 Ma e ngae ngkai te wareware e kona n riki bwa te aro ni kaki botu teuana, ma te ukeuke n reirei, e kainnanoa kamwakuran te iango. E korea ae kangai te tia rabakau ni karekeiango ae te I-Buritan ae arana Francis Bacon ngke e kabotaua te wareboki ma te amwarake: “Kaanga, te wareware ni booki tabeua bon ai aron ae ko kataa kangkangin te amwarake teutana, booki tabeua riki, ai aron ae te waekoa n oonga te amwarake, ao ake tabeua riki, ai aron ae ko riai ni kamaaniko riki ni wareware iai ma n iaiangoi raoi.” Te Baibara bon te boki teuana ae reke raoi n te kabanea n rinan aei. E korea ae kangai te abotoro Bauro: “A bati ara taeka aika ti kan taekina Teuaei iai [are taekan Kristo are e kaikonakaki iroun te Uea ao te Ibonga are Merekitereka]; ao a aki kai kaetaki, ngkai kam riki n ongo-maaki n te taeka. . . . Ao te amarake ae matoatoa boni kanaia akana ikawai, akana a kataneiaki ni wanawana n ata te raoiroi ma te buakaka.” (Ebera 5:11, 14) Te amwarake ae matoatoa, kaanga e riai moa ni kangkantaki, imwain ae e na oongaki ma ni kamanenaki iroun te rabwata. Rongorongon bwaai n taamnei aika nano riki, a riai n iangoaki raoi imwain ae a na rin n te nano, ma n aki manuokinaki.
3 Te rikitinare teuana e kabwarabwara “te ukeuke n reirei” bwa “te mwakuri, ke aron kamanenan te iango bwa e aonga ni karekea te atatai ke te ota, ae waakinaki tao rinanon te wareware, te ukeuke, ke bwaai riki tabeua n aron akanne.” E teretere iai bwa e bati riki ae nanonaki nakon te wareware ae tii teutana, are tao ti kona ni kanikinaei taeka tabeua iai. Te ukeuke n reirei e nanona te mwakuri, kakorakoran te iango, ao kabonganan te ataibwai. E ngae ngkai te ukeuke n reirei e kainnanoa te kakorakora, ma tiaki nanona bwa e aki kona ni kakukurei.
Karaoan te Ukeuke n Reirei bwa te Bwai ae Kakukurei
4. Ni kaineti ma are e taekinna te tia areru, e na kanga te ukeuke n ana Taeka te Atua n riki bwa te bwai ae kamaiu ma ni manena?
4 Warekan ao neneran ana Taeka te Atua e kona ni kakamaiu ma ni kaunga. E kangai te tia Areru: “Moan te raoiroi ana tua Iehova, ao e kamaiua te tamnei: e boni koaua ana taeka Iehova, ao e kawanawana ane e ro nanona. A raraoi ana tua Iehova, ao a kakukureia te nano E itiaki ana taeka Iehova, ao e kaootai maata.” (Taian Areru 19:7, 8) Ana tua ao ana reirei Iehova a kamaiu tamneira, a kamarurungira riki n te itera n taamnei, a kakukureia nanora, ao a kaootai matara n aron ataakin raoi ana kaantaninga Iehova aika moanibaan te raoiroi. Ai raoiroira anne!
5. Baikara aroaro ake ti kona ni karekea iai te kukurei ae bati man te ukeuke n reirei?
5 Ngkana ti nora uaan ara mwakuri aika raraoi, ao ti kukurei ni kakaraoia. Mangaia are ngkana ti na karika te ukeuke n reirei bwa e na kakukurei, ao ti riai ni kabaitira ni kamanena te atatai ae boou are ti karekea mai iai. E korea ae kangai Iakobo: “Ma ane tarataraa te tua are moan te raoiroi, are te tua n inaomata, ni memena naba iai, ngkai tiaki te tia ongo te tua ae mamanuokia, ma e makuria te makuri, ao e na kabaia n ana makuri.” (Iakobo 1:25) Waekoan kamanenakin bwaai ake a reiakinaki iai, e boni karekea te rau n nano. Te ukeuke ni kakaea kaekan te titiraki teuana ae ti bo ma ngaia ngkana ti karaoa ara mwakuri ni minita ke ti reireinia aomata, e na kabatiaa riki kukurein nanora.
Karikirakean Tangiran Ana Taeka te Atua
6. E kanga te tia korea te ka 119 n Areru ni kaota aron tangiran ana taeka Iehova irouna?
6 Etekia, are te nati n uea, are tao ngaia are e otea te ka 119 n Areru ngke e ataei riki, e kaota aron tangiran ana taeka Iehova irouna. E kabonganai taeka aika tamaroa ngke e kangai: “N na kukurei n am tua: n na aki manuoka am taeka. Am taeka nako bon au bwai ni kukurei naba. . . . N na kakukureiai n am tua, aika I tangiri; a na roko i rou am nanoanga, ba I aonga ni maiu: ba bon au bwai ni kukurei am tua. Iehova, i bati n tangira te maiu mai Roum; ao au bwai ni kukurei am tua.”—Taian Areru 119:16, 24, 47, 77, 174.
7, 8. (a) N aron are e kabwarabwaraki n te boki teuana, tera are e nanonaki n taeka aika “N na kukurei” n ana Taeka te Atua? (b) Ti na kanga ni kona ni kaota tangiran ana Taeka Iehova iroura? (c) E a kanga Etira ni katauraoia imwain warekan ana Tua Iehova?
7 E taekina ae kangai te rikitinare teuana are e kabwarabwara te Baibara n Ebera, ibukin taeka aika “N na kukurei,” ake a kabonganaki n te ka 119 n Areru: “Kabonganana n te kibu 16 e boraoi ma kabonganan [taian weabe] aika reitaki ma te kakatonga ni kimwareirei . . . ao te iaiango. . . . E kangai waakinana: kakatonga ni kimwareirei, bwaina te iangomwaaka, kukurei iai . . . Taeka aikai a kona n taekinna bwa te iangomwaaka, bon te anga teuana are te aomata e kona iai ni karekea kukureina n ana taeka Yahweh. . . . Nanon taeka aikai a taekina naba rootakin te nano iai.”a
8 Eng, tangiran ana Taeka Iehova iroura e riai n nako mai kabitoin nanora. Ti riai ni kukurei ngkana ti karaurau n iangoi mwakoro ake ti a tibwa tia ni wareki. Ti riai n iaiangoi bwaai n taamnei aika nano, ao n tabeakini ma te iangomwaaka. Karaoan aei e kainnanoa te karaurau n iangoi raoi bwaai aika warekaki, ao te tataro. N ai aron Etira, ti kainnanoa katauraoan nanora ibukin warekan ma neneran ana Taeka te Atua iroura. E koreaki taekana ni kangai: “E kataea nangin nanona Etira ba e na ukoukora ana tua Iehova, ma n toua mwina, ma n reirei ana taeka ma mooti i buakoia Iteraera.” (Etira 7:10) Tarai bukina aika tenua are e motika nanona iai Etira: e na ukeuke n reirei, e na kamanenai ni maiuna bwaai ake e reiakin, ao e na manga anga reirei iai. Ti riai naba ni kakairi n ana katoto aei.
Te Ukeuke n Reirei Bon Kanoan te Taromauri
9, 10. (a) Baikara aroaron te tia areru ake a kaotia bwa e tabeakina ana Taeka Iehova iai? (b) Tera ae nanonaki n te weabe n Ebera ae rairaki bwa “[am] bwai n iango”? (c) Bukin tera ngkai moan te kakawaki bwa ti na iangoa naba te ukeuke n reirei n te Baibara bwa “kanoan ara taromauri”?
9 Te tia areru e taekinna bwa e mutiakina ana tua Iehova, ana kaetieti, ao ana reirei. E anene ni kangai: “N na iangoi am tua, ao N na ira nanon am aro nako. . . . Ao N na arori baiu nakon am tua, aika I tangiri; ao N na iangoi am tua. Ai bati ra tangiran am tua i rou! Bon au bwai n iango te baei ni kabongnga. I rabakau riki nakoia au tia reirei ni kabaneia; ba bon au bwai n iango am taeka.” (Taian Areru 119:15, 48, 97, 99) Tera ae nanonaki n ae ‘te bwai n iango,’ ana Taeka Iehova?
10 Te weabe n te taetae n Ebera ae raira karika bwa “[am] bwai n iango,” e nanona naba “te iango mwaaka,” “manga rinanoan taekan te bwai teuana n am iango.” “E kabonganaki naba ibukin te karaurau n iangoa raoi taekan ana mwakuri te Atua . . . ao ana Taeka te Atua.” (Theological Wordbook of the Old Testament) Te nauna are “bwai n iango,” e taekina aron “te iaiango ae waakinaki iroun te tia areru,” “tangiran neneran” ana tua te Atua irouna, ba “kanoan ana taromauri.” Iangoan neneran ana Taeka te Atua bwa kanoan ara taromauri e kaota aron kakawakin karaoan aei. Mangaia are a riai ni kakaonimaki aomata iai, ao a riai n tataro ngkana a karaoia. Te ukeuke n reirei bon kanoan ara taromauri, ao e waakinaki iroura bwa ti aonga ni katamaroaa riki ara taromauri.
Nenera Riki Ana Taeka te Atua Ni Kananoa
11. E kanga Iehova ni kaotii iango i aon bwaai n taamnei aika nano nakoia ana aomata?
11 E kaota aron ana karinerine ae bati te tia areru ngke e kakatonga ni kangai: “Iehova, ai ababaki ra am makuri! Moa n naano nanom nako.” (Taian Areru 92:5) Ao te abotoro Bauro e taekin “ana bwai te Atua ake a nano,” ae taian iango ake e kaotii Iehova nakoia ana aomata “iroun Tamneina” are e mwamwakuri i aoia kaain te toro ae kakaonimaki ae wanawana. (1 I-Korinto 2:10; Mataio 24:45) Te koraki aikai a kakaonimaki ni katauraoa te marike n taamnei ibukia aomata ni kabaneia—ae “te rannimmamma” ibukia aomata aika boou, ao “te amarake ae e matoatoa” ibukia “aomata aika a ikawai,” aika bwaai aika a “kanganga kabarabaraaia.” (Ebera 5:11-14, BK)
12. Taekina te katoto teuana ibukin “ana bwai te Atua aika nano” ake a a tia ni kabwarabwaraki irouia kaain te toro ae kakaonimaki.
12 Ibukin ataakin nanon “ana bwai te Atua aika nano,” e kainnanoaki moa te tataro ao te ukeuke n reirei, n ikotaki ma te iangomwaaka i aon ana Taeka. N aron anne, iai reirei aika raraoi ake a a tia ni boretiaki ake a kaotia bwa e kanga Iehova ni kaboraoa raoi karaoan te kaeti taeka ae riai, ao kaotan te nanoanga. Kaotan te nanoanga irouna bon tiaki tii kamamaaran ana kaeti taeka ae riai; ma ana nanoanga te Atua boni kaotan ana kaeti taeka ae riai n ikotaki ma ana tangira. Ngke e motika taekan te tia bure temanna, Iehova e baireia moa bwa e kona n reke nanoangakin te tia bure i aan ana karea ni kaboomwi Natina, ke e aki. Ngkana te tia bure e rawa n raraoma ke e karitei, te Atua e kariaia waakinan te kaeti taeka ae riai, n akea te nanoanga. E boni kakaonimaki raoi nakon ana kaetieti aika rietata.b (I-Rom 3:21-26) “Ai nano ra kaubwain te Atua ma rabakauna!”—I-Rom 11:33.
13. Ti na kanga ni kona ni kaota te kaitau ibukin koaua n taamnei aika a “ewa maitiia” ake a a tia ni kaotaki nakoira?
13 N ai aron te tia areru, ti rangi ni kakatonga n te koaua ae e kukurei Iehova ni kaota ana iango aika mwaiti nakoira. E korea ae kangai Tawita: “Ao ai kakawaki ra i rou nanom nako, te Atua! Ai ewa ra maitiia! Ngkana tao I wareki, ao a maiti riki nakon tanon aonaba.” (Taian Areru 139:17, 18) E ngae ngkai ara atatai moan te uarereke ngkana e kabotauaki ma iango aika mwaiti kurikuri ae akea tokiia ake a na kaotaki iroun Iehova nakon taai aika imwaira, ma ti rangi ni kaitau ibukin taiani koaua i aon bwaai n taamnei aika kakawaki aika a “ewa maitiia,” ake a a tia n reke iroura ngkai, ao ti teimatoa n nenera nako riki ana Taeka te Atua ae bwanin.—Taian Areru 119:160.
Kainnanoakin te Kakorakora ao Bwaai n Ibuobuoki Aika Manena
14. E a kanga Taeka N Rabakau 2:1-6 ni kaatuua riain kainnanoan te kakorakora n ukeuke n reirei n ana Taeka te Atua?
14 Te reirei n ukeuke raoi n te Baibara e kainnanoa te kakorakora. Te koaua aei e teretere raoi man te karaurau ni wareware i aon Taeka N Rabakau 2:1-6. Tarai taeka aika a kaotii bwaai ake a na karaoaki, ake a kabonganaki iroun te Uea ae wanawana are Toromon ni kamataata iai aron te kakorakora ae kainnanoaki ibukin karekean te atatai, te wanawana, ao te ataibwai mairoun te Atua. E korea ae kangai: “Natiu, ngkana ko kaki i nanom au taeka, ma ni kaiko au tua nako i roum; ao ko katanimaia taningam iai nakon te rabakau, ma n raira naba nanom nakon te ataibwai; Eng, ngkana ko bon tangira te atatai, ma ni kanenea bwanam nakon te ataibwai; Ngkana ko ukoukoria ba kaanga te tirewa, ma n neneria ba kaanga te bwai ae kakawaki ae raba; Ao ane ko na ata iai makan Iehova, ao e na reke i roum atakin te Atua. Ba e anganga te rabakau Iehova; E oti nako te atatai ma te ataibwai mai wina.” (Ara bwai man reireiti.) Eng, te ukeuke n reirei ae e na materaoi, e kainnanoa te ukeuke, ae kaanga te keniken ibukin kakaean te kaubwai ae karabaki.
15. Tera te kabotau man te Baibara are e katereterea kainnanoan te reirei ae raoiroi ibukin waakinan te ukeuke n reirei?
15 Te ukeuke n reirei ae e na kakorakora tangiran bwaai n taamnei, e kainnanoa bwainakin aaro n reirei aika raoiroi. E korea ae kangai Toromon: “Ngkana tao e kabubu te biti, ao ngkana e aki taima wina te aomata, ao e na kabatia riki korakorana.” (Te Minita 10:10) Ngkana te tia mwakuri e kabongana te biti ae aki kakang, ke e aki rabakau aron kabonganana, ao e na banebuaka korakorana, ao e na aki rangi n raoiroi ana mwakuri. N aron anne, a kakaokoro nako mwaitin kakabwaia aika a kona n reke man te ukeuke n reirei, ao kakabwaia aika a reke mai iai a boto i aon arora ni waakina te ukeuke n reirei. Reirei aika manena ibukin katamaroan arora n ukeuke n reirei a kuneaki n Reirei 7 n te boki ae te Theocratic Ministry School Guidebook.c
16. Baikara reirei aika manena ae ti anganaki bwa e na buokira ni karaoa te ukeuke n reirei i aon bwaai aika nano?
16 Ngkana te tia rabakau n te mwakuri teuana e bairea karaoan ana mwakuri, e rinei moa bwaai ni mwakuri ake a na tangiraki iai. N aron anne, ngkana ti moana ara ukeuke n reirei, ti riai n rinei bwaai n reirei ake ti na kainnanoi man ara tabo ni boki. Ngkai ti ataia bwa te ukeuke n reirei bon te mwakuri ae e kainnanoa kamwakuran te iango, e raoiroi naba ngkana ti kaetira n tekateka raoi. Ngkana ti tangiria bwa e na marurung ara iango, tao e na raoiroi riki ngkana ti tekateka i aon te kaintekateka irarikin te taibora, nakon ae ti na wene i aon ara kainiwene, ke n tekateka n te kaintekateka ae rangi ni maraurau. Ngkana ko a tia n reirei inanon tabeua te tai, ao tao e na raoiroi ngkana ko teirake moa teutana, ke n otinako ni karekea moa te ang ae boou.
17, 18. Taekin katoto aika a kaota aron kabonganan bwaai n reirei aika raraoi iroum.
17 A rangi ni mwaiti bwaai n reirei aika moanibaan te raoiroi aika a tauraoi ibukira. Ae kakawaki riki iai, bon te Baibara ae te New World Translation, are e kona n reke ngkai n arona ae bwanin ke mwakorona tabeua, n taetae aika 37 mwaitiia. Iai inanon te New World Translation taian cross-reference, ao te “Table of the Books of the Bible,” ake a kaota aran te tia korea bokin te Baibara, te tabo are a koreaki iai, ao maanin te tai are e maroroakinaki inanon booki nako. Iai naba te index ibukin taeka ake a kabonganaki n te Baibara, kabwarabwara i aon bwaai tabeua aika a mena mai buki, ao taiani mwabe. Te Baibara aei e boretiaki n taetae tabeua ni maan aika bubura, ao te aekaki aei e aranaki bwa te Reference Bible. Bwaai ake a taekinaki i eta a mena naba inanon te Baibara aei ma bwaai aika a mwaiti riki, n ikotaki ma kabwarabwara ake i nano, ake a karinanaki naba. Ko kabonganai raoi bwaai aika a tauraoi ni bon oin am taetae bwa ko aonga n nenera riki ana Taeka te Atua?
18 Te bwai n reirei teuana riki ae moan te kakawaki bon te boki ae kabwarabwara te Baibara ae uoua mwakorona ae te Insight on the Scriptures. Ngkana e tauraoi te bwai n ibuobuoki aei n te taetae ae ko kona n ota iai, ao e riai n riki bwa am boki aei e na memena iroum n taai nako n am tai n ukeuke n reirei. E na kaotii rongorongo i aon angiin reirei ake a mena inanon te Baibara. Te bwai n ibuobuoki teuana ae ai aron anne bon te boki ae “All Scripture Is Inspired of God and Beneficial.” Ngkana ko moanna ni wareka bokin te Baibara teuana, ao e raoiroi moa neneran te reirei ae mena inanon te boki ae te “All Scripture” ae kaineti ma te boki anne, bwa e na anganiko rongorongon rimoa aika reitaki ma ngaia ao rongorongon te aba are e taekinaki iai. E na kaota naba kanoan bokin te Baibara anne, ao manenana nakoira. Te bwai n ibuobuoki teuana irarikin bwaai n reirei aika mwaiti, bon te Watchtower Library, are e kamwakuraki i aon te kombiuta, ao ae e tauraoi ngkai inanon taetae aika ruaiua.
19. (a) Bukin tera ngkai Iehova e a tia ni katauraoi bwaai n ibuobuoki ibukin neneran te Baibara iroura? (b) Tera ae e kainnanoaki ibukin waakinan te ukeuke n reirei ao te wareware n te Baibara ae e na materaoi?
19 Iehova e a tia ni katauraoi bwaai ni mwakuri aikai ni kabane rinanon “te toro ae kakaonimaki ae wanawana,” ibukin buokaia ana toro i aon te aonnaba bwa a na ‘ukoukora ma ni karekea irouia ataakin te Atua.’ (Taeka N Rabakau 2:4, 5) Aaro n ukeuke n reirei aika raraoi a na buokira bwa ti na katamaroa riki ara atatai ibukin Iehova, ma ni karekea ara iraorao ma ngaia ae kaan riki. (Taian Areru 63:1-8) Eng, te ukeuke n reirei e nanona te mwakuri, ma bon te mwakuri ae kakukurei ma ni materaoi. Ma e boni kainnanoa naba kabanean am tai, ao tao ko na bae n iangoia ni kangai, ‘E na reke ma iia au tai ae e na materaoi iai au wareware ao au reirei n te Baibara?’ Te titiraki aei e na rinanoaki n te kabanea ni kaongora n te reirei aei.
[Kabwarabwara ae nano]
a New International Dictionary of Old Testament Theology & Exegesis, Volume 4, i. 205-207.
b Nora Te Taua-n-Tantani ae bwain Tianuare 1 1999, iteraniba 25, barakirabe 7. Te ukeuke teuana n te Baibara ae ko kona ni karaoia, bon manga rinanokin reirei aika uoua n te maekatin anne, n ikotaki naba ma kaongora aika atunaki n te “Justice,” “Mercy,” ao “Righteousness” n te boki are kabwarabwara te Baibara ae te Insight on the Scriptures, are e boretiaki iroun te Watchtower Bible and Tract Society of New York, Inc.
c E boretiaki iroun te Watchtower Bible and Tract Society i New York, Inc.
Titiraki ni Kauring
• Ti na kanga ni kona ni karika ara ukeuke n reirei ae ti kakaraoia ibon iroura, bwa te bwai ae kamaiu ma ni manena?
• N ai aron te tia areru, ti na kanga ni kaota aron ‘tangiran’ ao ‘tabeakinan’ ana Taeka Iehova iroura?
• E a kanga Taeka N Rabakau 2:1-6 ni kaota riain te kakorakora n ukeuke n reirei n ana Taeka te Atua?
• Baikara bwaai n ibuobuoki ibukin te ukeuke n reirei ae e a tia ni katauraoi Iehova?
[Taamnei n iteraniba 14]
Te karaurau n iango ao te tataro a na buokira ni karikirakea riki tangiran ana Taeka te Atua iroura
[Taamnei n iteraniba 17]
Ko kabonganai bwaai n ibuobuoki n reirei ni kabane ake a tauraoi, bwa ko aonga n nenera riki ana Taeka te Atua?