Lé Kpẹ̀a E Lúùk Beè Emí

3 Mm̀ ní ea égè 15 gbáá e Tàìbérìọ̀s Sízà ni bẹlmà, tṍó e Póntiọ̀s Páílèt géè bẹ̀l Jùdíà, Hẹ́rọ̀d* ní ea géè bẹ̀l Gálilì e, Fílìp ea dú a vígà géè bẹ̀l bálásĩ́ Ítùríà nè Tràkònáítìs, vaá Làìsénìàs géè bẹ̀l bálásĩ́ Àbìlínì 2 mm̀ gbò tṍó e Ánàs nè Kéíàfàs beè dú gbò togó vààla gyọ́ọ. Tṍóá ní e Bàrì beè ló bel nè Jṍòn ea dú nvín Zèkàráíà gbẹá boo kpáà bàlà ól é.

3 Vó à naa, Jṍòn beè gbóó bã gbò dó ea dì beeá ló Jọ́dàn vaá kọ́ kpẹ̀a nè gbò nen kọ bà á ọgá aa ló ba pọ́lọ́ vaá dììa múú kọbé Bàrì ia ló ba pọ́lọ́ nè va 4 dì belì bé e ba beè emí mm̀ kpá neǹ kọ́ọ̀ bùlà Bàrì Àìzáíà naaá kọọ̀: “À íe neń ea di boo kpáà bàlà ól ea gé vee kọọ̀: ‘Sii tóm ló èèlè Jìhóvà!* Naanii kọọ̀ gbò a èèlè á lèlà. 5 Bà é ká kọ̀láá kà kolo-kolo kẽ vaá lẹgẹ̀lẹ̀ kọ̀láá kà gù nè kpá-kpá ńgù. Gbò èèlè ea beè ìgà é íè ge lèlà, vaá gbò èèlè ea beè dú kpògòlò-kpògòlò é ọ́ọ́gá. 6 Vaá kọ̀láá nen é mon dùùà ea aa bá Bàrì.’”

7 À beè gbóó kọ́ nè gbò e ba beè dúé ló kọ á tuè va diilèè múúá kọọ̀: “Booló pá nvín kpí bom, mée ní ea ãanéi kọ ó teelai aalíí bá súng Bàrì e? 8 Beè vó, gbóó labvii láb ea zógè kọ o ọ́gai. Ó gá kọi neai bọọ bá kọọ̀, ‘Ébràhám̀ dú bẹẹ nómá tẹ̀.’ Boo béè kọ m̀ kọ́ọ̀ nèi kọọ̀ Bàrì é láá kììlà gbò kpò demí naamá gbò pá nvín nè Ébràhám̀. 9 Kigi a íná kpò kúm gbò téá. Bà é kẽ́e kọ̀láá kà té e náa múmí lé ból súú tẹlẹ kẽ vaá tobví tẹlẹ dáà sã́.”

10 Gbòa à gbóó bĩináe kọọ̀: “Beè vó, éé ní ea bọ́ló kọ é naa ẽ́?” 11 À aalá nè va kọọ̀: “Neń ea íe bàà kà kọ̀là ló á tú ene kà nè neń e bè náa íe tọ́ọ̀ kà, vaá neń ea íe nu gè dè á naa nagé vó.” 12 Kọbèè gbò lọ̀l kpègè gbáá beè dúé ló kọ á tuè va diilèè múú, vaá ba beè bĩináe kọọ̀: “Neǹ Dòbá, éé ní ea bọ́ló kọ é naa ẽ́?” 13 À kọ́ nè va kọọ̀: “Ó gá tui kpègè ea el ló kpègè gbáá e bà ólò kpẽ̀.” 14 Nagé, gbò bé beè dù gé bĩináe kọọ̀: “Éé ní ea bọ́ló kọ é naa ẽ́?” À kọ́ nè va kọọ̀: “Ó gá tui bá kpóó tuumai nu lọlíí bá tọ́ọ̀ nen àbèè ge gbai bel nen. Kpègè e bà ólò kpẽ́ nèi á gbõomáí ló.”

15 Gbòa géè ẹ̀bmà dẽè Kráìst vaá dénè ọ̀và géè bugi togó kilma ló Jṍòn kọọ̀, “É kọọ̀ ẹlẹ ní ea dú Kráìst e?” 16 Jṍòn à aalá nè dénè ọ̀và kọọ̀: “Nda túùi diilé múú, sõò nen ea gé dú nvéè nda el kpãà nda, vaá ním sim̀ tùlà ge taalá díí ea di boo a kpá kátọ. À é túi diilé múú tení dú ló nyómá káí nè sã́.* 17 A tọ̀ ge sààmà súú* lọl gbàà kpá dìé bá. À é kpálí tọ ea beè tõo sàa õ̀ònà vaá à é bṍònè ló súúá sẹlẹ́ mm̀ tọ gè kpoogè dee ló nu sẹlẹ, sõò à é kpá sã́ ló kpá ea dú ló vaá bà náa é láá gimè.”

18 A beè lo nágé gã́bug bel dùùlà bá deè tṍ vaá kilsĩ́ gè kọ́ kpẹ̀a nè gbòa. 19 Sõò boo béè kọọ̀ Jṍòn beè kọ́ bel Hẹ́rọ̀d ea géè bẹ̀l bálásĩ́ kĩá boo béè Hẹ̀ródìàs ea dú vaà a vígà, nè boo béè dõona kà gbò pọ́lọ́ nu e Hẹ́rọ̀d beè naa. 20 Hẹ́rọ̀d beè gbóó kpáá sí dõona kà agẹ bá pọ́lọ́: A beè sii Jṍòn nvee tọọ̀ kpọ́gọ́lọ́.

21 Tṍó e Jṍòn géè tú dénè gbòa diilé múú, a beè tu nágé Jíízọ̀s diilé múú. Vaá boo tṍó e Jíízọ̀s gé tãàgã ló Bàrì, káála beè gbóó kùùà, 22 vaá nyómá káí ea meà belí kú-kuú kẽ beè gbóó eláẹ́ boo, mon à gbóó sìlà aa káála kọọ̀: “Oloò ńdáà Sã́áná em vulè. Nyíém palàge ẹẹ ní ló.”