Lé Kpẹ̀a E Lúùk Beè Emí
21 Boo tṍó e Jíízọ̀s géè ẹ̀b kpó e bà ólo tẹlẹ̀ kpègè m ã́, à gbóó mòn gbò méné e bà gé tẹ́lẹ̀ kpègè m. 2 A beè mòn nàgé ene kà sàn vaà tãa ea tú bàà kà kpọ́gọ́lọ́ kpègè* tẹlẹ m. 3 À gbóó kọọ̀: “M̀ lóò kà-kà bel nèi kọọ̀, kpègè e vaà tãaí tẹ́lẹ̀ bọọ èl ní e dénè nen tẹ́lẹ̀. 4 Boo béè kọọ̀ dénè nagbòa tẹ́lẹ̀ lọl dẽè gã́bug e bà íe, sõò náa kal ló béè kọọ̀ ńnvááí dú kà neǹ tãa, à tẹ́lẹ̀ dénè nú ea íe ea gáẹ̀ láá tõ̀òma dùm.”
5 Tṍó e tṍó téní e sìgà gbò géè ló bel ea kil ló bé e bà tú lé-lé kpò dem nè gbò nú e ba beè nè Bàrì siimá tóm ló tọọ̀ káíá naa, 6 à gbóó kọọ̀: “Tṍó gé dú e dénè kpò dem eo gé moniií náa é sígá èla e bà náa é kúmí uú kẽ.” 7 Bà gbóó bĩináe kọọ̀: “Neǹ Dòbá, mó tṍó ní e gbò nuí é nááá ẽ́, vaá éé ní ea dú kpíi ea é zógè tṍó e gbò nuí é nááá ẽ́?” 8 À gbóó kọọ̀: “Ọẹi dẽe kọbé tọ́ọ̀ nen náa dagẹ̀i, boo béè kọọ̀ gã́bug nen é dú boo ńdáà bée vaá kọọ̀, ‘Ndaà é nená ẽ́,’ vaá ‘Tṍóá a íná kuló.’ Ó gá nyooneí va. 9 Nagé, tṍó eo dã́ì kòvà bé gím nè zààlì kẽ, lóói á gá kení boo béè kọọ̀ gbò nuí é íè ge zẹ́ẹ́ naaá, sõò kùbmà náa é dú tẽ̀ènè tṍóá.”
10 Tṍóá, à gbóó kọ́ nè va kọọ̀: “Dó é bé dó, vaá boǹ méné bé boǹ méné. 11 Agẹ bá zùgà kunukẽ̀ é nááá, vaá kíì gyã́á nè kom ea ólò zilá é dí kele-kele ketõ̀ò. Gbò nen é mon gbò nú ea é síìmà va pọ̀ nè kpíi ea é aa káála.
12 “Sõò besĩ́ dénè nuí kálá naaá, gbò nen é sííi vaá biigèi ló. Bà é túi kilma ba gbò tọ bõ̀ònaló fã̀ gé beelái bel ló vaá túi nvee tọọ̀ kpọ́gọ́lọ́. Bà é fáálái siimá kèsĩ́ gbò méné nè gbò e bà gé bẹl boo béè ńdáà bée. 13 Níí é náa kọ ó kọi kpẹ̀a neí va. 14 Vó à naa, beelai fulii kọ nóo é zẹ́ẹ́ teníí boo bel eo é lói mm̀ ge kpenai bọọ bá, 15 boo béè kọọ̀ nda é néi nyìmànù vaá nvèè bá nèi kọ ó nyimai bel eo é lói kọbé bọọ gbò ọ́b náa láà béi èlbá àbèè ge aalái bel gã́. 16 Nagé, bã̀àna bọọ tẹ̀ nè bọọ kà nè pá bọọ vígà nè pá bọọ dúà ló nè pá bọọ kóò é túi nvee bá gbò bèèla vaá bà é fẹ́ sìgà bọ̀ì, 17 vaá dénè nen é ọ́bvíi boo béè ńdáà bée. 18 Sõò tọ́ọ̀ nu náa é nááá ló bã̀àna enè paà gyáa ea dìí togó. 19 Bọọ ĩ̀ìmà é náa kọ ó duuai.
20 “Kọ̀láá bé ea dì naa, tṍó eo monìì kọọ̀ gbò bé bééá ló Jèrúselẹ̀m, ò gbóó nyimai kọọ̀ tṍó e bà é gé kyọ̀ẹ sĩ́ a íná kuló. 21 Tṍóá, gbò e ba di Jùdíà á gbóó dààmà togó gè teelá kil deè boo gù. Gbò e bà di mm̀ boná á gbóó teelá aa m, vaá gbò e bà di gbò boń ea di kuló á gá bã̀ na m, 22 boo béè kọọ̀ níà gbò deé e Bàrì é béélá bel ló gbò nen kọbé gbò nú e ba beè emí ḿḿ-má. 23 Pọ́lọ́ múú kyáá á di ló gbò e nvín di gbàà nè gbò e bà gé ne má nvín mm̀ gbò tṍóá! Boo béè kọọ̀ kà agẹ bá tã̀àgã̀ é dí boo kunukẽ̀í, vaá kpọ̀té é dí boo gbò e bà di boo. 24 Vaá bà é tú gẹ̀ bé fẹẹmá va, vaá sií va kilma dénè gbò dó àla, vaá gbò dó àla é zag tọ́ boo Jèrúselẹ̀m dọ̀ọ̀mà tṍó e tṍó e ba beè íbá ló nè gbò dó àla é íná kùbmà.
25 “Nagé, à íe gbò nú ea é sila dẽè nàànì nè ẽ́ nè gyã́à káála. Pọ̀ é síi gbò e bà di boo kunukẽ̀í, vaá bà náa é nyímá nu gè naa boo béè kòvà kpóóló múú nè fọ́ọ́lọ́ ea é dí sĩ́ pène. 26 Gbò nen é gbaaà bá pọ̀ nè nú e bà ẹbmà dẽe kọ à é nááá ló gbò e bà di boo kunukẽ̀í, boo béè kọọ̀ gbò nú ea di sĩ́ káála é zugà. 27 Tṍóá, bà é gbóó mòn Sã́áná nená ea di boo bù dee ea gé dú, vaá à é fáálá kpóó nè ka domá. 28 Sõò tṍó e gbò nuí ni daamà togó gè naaá, gbóó elaí èla vaá ò dalai dẽé boo, boo béè kọọ̀ bọọ dùùà a íná kuló.”
29 Tṍóá, à gbóó tú bel dòòle ló loomá bel nè va kọọ̀: “Nveenii kpíi ló té fíìg nè dénè nagbò téá. 30 Tṍó eo monìì kọ a kpáá sí pà sãa vaá tẹ̀g, ò ólò gbóó nyimai kọọ̀ tṍó e nu ólò dùm a íná kuló. 31 Mm̀ tẽ̀ènè sĩ́deèá, tṍó eo monìì kọọ̀ gbò nuí dì ea gé nááá, gbóó nyimai kọọ̀ Boǹ Méné Bàrì a íná kuló. 32 Nda lóò kà-kà bel nèi kọọ̀, nakà kúúlíí náa é téní tà tṍó e dénè nuí é nááá. 33 Káála nè kunukẽ̀ é téní tà, sõò gbò bel e nda lóò é di dọ̀ọ̀mà dè-dè.
34 “Sõò palàge ọẹi dẽe kọbé nóo káì nyíe gbẹẹlíí boo áá gè dé nu nè ge ṍ nu nè tã̀àgã̀ ea di mm̀ dùm, vaá deeá gbóó búló dọ̀í boo 35 belí bé e gyã̀ì ólò búló sii nom naaá. Boo béè kọọ̀ à é dọ́ boo kọ̀láá neń ea di boo kunukẽ̀í. 36 Kilíí sĩ́ gè dìí zìle vaá ò palàge banii Bàrì kọ̀láá tṍó kọbé ò láá fulii zelíí bá kọ̀láá kà nú ea é íè gè naaáí vaá láá elaí kèsĩ́ Sã́áná nená.”
37 À ólò àà gé noomà nu mm̀ tọọ̀ káí ẹ́ẹ́ èla, vaá tṍó e dee ni bílá, à aà kil boo Gù Ólìv gé tõo. 38 Vaá buù deè bòm dee, dénè nen ólò dúé ló tọọ̀ káíá kọbé bà dã́ bel ea é ló.