Kpá Káí Néi Ból Dẽesĩ́

Beeá ló bàlà booí, gbò nen gé téní bá gbò tã̀àgã̀ ea náa kọ bàá ié bììla nyíe, tã̀àgã̀ bùlà, nè nyaa ló. É kọọ̀ à íe nú ea ni nááa ní ló ea náa kọ ó tení bá íb gbò dìtõ̀òá? Be à sẹlẹ, ò gé mon tã̀àgã̀ boo béè zọ̀ ló àbèè kọọ̀ nen eo beè vùlè ú. Òó láá bĩiná o bá kọọ̀, ‘É kọọ̀ nu é beè láá kpáá dú lé mm̀ dùm?’ Èé láá àgala boo ààla e Kpá Káí ne kilma ló bíbvá.

1. Mókà ból dẽesĩ́ ní e Kpá Káí néi kilma ló dì deèsĩ́ ẽ́?

Kpá Káí baatẽ́ nú ea náa vaá tã̀àgã̀ à di bàlà booí. À kọ́ nágé nú ea kil ló bé e gbò tã̀àgã̀í é beè gé iná kùbmà naa. Gbò zìgànù ea di mm̀ Kpá Káí é láá naa kọ ó ié lé “dì deèsĩ́ nè ból dẽesĩ́.” (Bugi Jèrèmáíà 29:11, 12.) Gbò zìgànùá nveè bá nèi kọ é láá ĩ̀ìmà gbò tã̀àgã̀ e gé téní bá kátogóí vaá ié ẹ́ẹ́ nyíe, nè ge naa kọ é àgala boo kọ èé beè ié ẹ́ẹ́ nyíe ea dì lee.

2. Kpá Káí kọ́ọ̀ dì deèsĩ́ e beè mèà naa vàẹ?

Kpá Káí kọ́ọ̀ dì deèsĩ́ “ú náa é dinà, bã̀àgà náa é dinà, tó náa é dinà, nyaa ló náa é dinà.” (Bugi Kùùà Nù 21:4.) Gbò dìtõ̀ò ea gé náa kọọ̀ gbò nen á mòn tã̀àgã̀ deè nieí—dì belí nání bá, pọ́lọ́ bèèla, zọ̀ ló, nè ú—náa é dinà. Kpá Káí zigà kọọ̀ gbò nen é dé kpéè ló dùm dọ̀ dè-dè mm̀ Páladaìs boo kunukẽ̀í.

3. Mósĩ́ deè ní eo é láá àgala boo kọọ̀ gbò zìgànù ea di mm̀ Kpá Káí é nááá ẽ́?

Gã́bug nen ólò gbĩ́ kọọ̀ lé nu á naaá, sõò bà náa ólò àgala boo kọọ̀ nú e bà ẹbmà dẽe é nááá. Èé láá àgala boo gbò nú e Kpá Káí kọ́. Èé láá dẹlẹ nyíé boo gbò nú ea di mm̀ Kpá Káí tení dú ló gè “ẹ̀b mm̀ Kpá Káí vaá gbĩ́ gè nyimá” beè nú ea kọ́ dú kà kà. (Tóm 17:11) Tṍó eo bugì Kpá Káí, òó mon gbò nú ea é nveè bá nè ni kọ ó beeláfùl be òó ziga ló gbò nú ea kọ́ kilma ló dì deèsĩ́.

KPÁÁ NÓ BỌ̀Ọ̀VẸ̀

4. Kpá Káí zigà kọọ̀ èé láá tõó dùm dọ̀ọ̀mà dè-dè e bè néé mon tã̀àgã̀

Ẹ̀b sìgà gbò zìgànù ea di mm̀ Kpá Káí. Mókà gbàà gbò zìgànùí ní ea palàge leemá ni ẽ́? Vaá ló éé?

Bugi gbò dọ̀ Kpá Káí e bà émí ló gbò zìgànùá, vaá ò gbóó aalai gbò bíbví:

• É kọ ò bulà kọọ̀ gbò dọ̀ Kpá Káíí né ni ból dẽesĩ́? É kọọ̀ gbò dọ̀ Kpá Káíí é láá naa kọọ̀ pá bọọ tọ nè pá o kóò á ié ból dẽesĩ́?

Dòòmà dẽe ló kọ ò diè mm̀ bàlà boo e

5. Gbò zìgànù ea di mm̀ Kpá Káí é láá nvèè bá nè ni

VÍDIÒ: M Beè Gbĩ́ Gè Naa Kọọ̀ Lé Bèèla Á Dì (4:07)

• Mm̀ vídiòá, mókà pọ́lọ́ bá e ba beè sẹ̀ẹ̀mà gbò nen ní ea beè tãagẽ Rafika ẹ?

• Móbá ní e Kpá Káí beè nvèè bá nèe náa kal ló béè kọọ̀ pọ́lọ́ bá e bà géè sẹ̀ẹ̀mà gbò nená náa beè iná kùbmà ẽ?

Tṍó e dẹlẹ̀ nyíé boo gbò zìgànù ea di mm̀ Kpá Káí, àé nveè bá nèi kọ lóói á gá ọọ vaá àé náa kọ é láá ié ẹ́ẹ́ nyíe kèbá gbò tã̀àgã̀ e gé téní bá. Bugi Próvẹẹ̀b 17:22 nè Róm̀ 12:12, vaá ò gbóó aalai gbò bíbví:

• É kọ ò bulà kọọ̀ be ò zigà gbò nú e Kpá Káí kọ́ kilma ló dì deèsĩ́, o dùm é dú lé kátogóí? Ló éé?

NÚ E NI NÓ

Gbò zìgànù ea di mm̀ Kpá Káí nveè bá nèi kọ é láá ĩ̀ìmà vaá ié ẹ́ẹ́ nyíe kèbá gbò tã̀àgã̀ e gé téní bá kátogóí.

Ge Òòa Boo

• Éé ní ea náa à dú bíi kọọ̀ gbò nen á nyimá gbò zìgànù ea di mm̀ Kpá Káí é?

• Éé ní e Kpá Káí kọ́ kilma ló dì deèsĩ́ ẽ́?

• Mósĩ́ deè ní e gbò nú e Kpá Káí kọ́ kilma ló dì deèsĩ́ é láá nvèè bá nè ni kátogóí é?

KPÁÁ GBĨ́ TẼ́ LÓ

Nyimá bé e ból dẽesĩ́ é láá nvèè bá nè ni tṍó eo di kèbá tã̀àgã̀ naa.

“Hope—Where Can You Find It?” (Awake!, April 22, 2004)

Nyimá bé e ból dẽesĩ́ ea kil ló dì deèsĩ́ é láá nvèè bá nè gbò e bà di kèbá kà agẹbá zọ̀ ló naa.

“Living With Chronic Illness—Can the Bible Help?” (Web article)

Tṍó eo gé ẹb nakà sọ́lí, dòòmà dẽe ló kọọ̀ olo nè pá o tọ gé dé kpéè ló dùm mm̀ páladaìs e Kpá Káí zigàa.

Imagine the Time (3:37)

Bugi nú ea kil ló bé e dùm nen ea beè olòó gbĩ́ gè nyaaná dìtõ̀ò kọ á dú lé beè nyaaá naa, tṍó ea nó gbò zìgànù ea kil ló dì deèsĩ́ lọl mm̀ Kpá Káí.

“I No Longer Feel That I Have to Change the World” (Kpá Tọ Kùdẽe Ló, July 1, 2013)