10 TOGÓ BEL GE NÒ
SỌ́L EA GÃ́BUG DÚ 31 Naanii Lèèma Bàrì!
Nó Gè Bugi Togó Belí Jìhóvà Nè Jíízọ̀s
“Tã́gíní bé e Kráìst beè tú a nom̀ kpá ló mònmà tã̀àgã̀a, boolo ie nai gé bùlà ge naanii . . . vó.”—1 PÍT. 4:1.
NÚ EÉ NÓ
Èé ló bel boo nú e neǹ tóm Pítà beè nó lọl ló bé e Jíízọ̀s ólò bugi togó naa, nè nú e beele é láá no nagé.
1-2. Éé ní e gè vùlè Jìhóvà bãàa m ẽ́, vaá mósĩ́ deè ní e Jíízọ̀s beè zogè kọ à vulèè Jìhóvà lọa bùlà ẹ?
“TÚ DÉNÈ o nyíe nè dénè o [dùm] nè dénè o kói nè dénè o bùlà vulmà [Jìhóvà], ea dú o Bàrì.” (Lúùk 10:27) Jíízọ̀s beè zogè kọọ̀, níá ní ea dú log ea palàge bọọ lọ̀l vaá à lee ea di mm̀ Log Mózìs e. Nvèè kpíí ló kọọ̀ à dú bíi kọ vulè e íè kilma ló Jìhóvà á ààí nyíe, ea bãàa mm̀ bé e nu tọaí ló naa nè tàn e íè. À bãàà nàgé mm̀ ge tú dénè bẹẹ nyíe, kói, nè dénè bẹẹ bùlà fã̀àmà Jìhóvà. Sõò kọbé è láá vùlè Jìhóvà leevè, à bọ́ló kọ é naa vó lọa bùlà, vaá àé tọ́á ló bé e bugì togó naa. À dú kà-kà kọọ̀, née é láá palàge dã́ ból ló dénè nú ea kil ló bé e Jìhóvà ólò bugi togó naa. Sõò ge nó nú ea kil ló ‘bùlà Kráìst’ é nveè bá nèi kọ é dã́ ból ló bé e Bàrì ólò bugi togó naa, boo béè kọọ̀ Kráìst beè palàge nó a Tẹ̀ leevè.—1 Kọ́r. 2:16 nè study note ea kọ́ọ̀ “we do have the mind of Christ” ea di mm̀ New World Translation Of The Holy Scriptures.
2 Jíízọ̀s beè vùlè Jìhóvà lọa bùlà. A beè nyimá nú e Jìhóvà gbĩ́ kọ á naa, vaá a beè di kpènà ló gè naa nú e a Tẹ̀ gbĩ́ bã̀àna tṍó ea nyímá kọọ̀ gè naa vó é náa kọ á monìè tã̀àgã̀. Jíízọ̀s náa beè zìgà kọọ̀ tọ́ọ̀ nu á maanàè a bùlà lọl boo gè naa nú ea léémá a Tẹ̀.
3. Éé ní e neǹ tóm Pítà beè nó lọl bá Jíízọ̀s e, vaá éé ní ea beè siè kpóó ló gbò e bà gé nyoone nvéè Kráìst kọ bàá naa ẽ́? (1 Pítà 4:1)
3 Pítà nè dõona kà gbò tóm beè ié nèà deè ge zọ̀ Jíízọ̀s siá tóm vaá nó bé ea ólò bugi togó naa. Tṍó e Pítà beè emí túá kà a kpá lẹ̀ẹ̀la tóm, a beè siè kpóó ló gbò e bà géè nyoone nvéè Kráìst kọ bàá ié nágé tẽ̀ènè kà bùlà e Kráìst íe.a (Bugi 1 Pítà 4:1.) Bà ólò tú moǹ bel e bà tab naamá: “Ié nágé” e Pítà lóómá bel mm̀ dọ̀ Kpá Káíá, loomá bel nyòòmà neǹ bé ea bọ́á nuù bé vaá di kpènà ló gè sí ól bé. Vóà naa, beè gbò e bà gé nyoone nvéè Kráìst nó gè ié bùlà Kráìst àbèè ge bugi togó belíe, bà é íe gbò nú ea dú bíi kọbé bà láá bé pọ́lọ́ tàn èlbá naa ní e bà náa é dọ́ bá gbò nú e bàlà boò Sétàní gé kyẹẹmà gbò nen.—2 Kọ́r. 10:3-5; Ẹ́fẹ. 6:12.
4. Mósĩ́ deè ní e nakà togó bel ge nòí é nveè bá nèi kọ é láá tú dùùlà bá deè tṍ Pítà siimá tóm ẽ́?
4 Èé ló bel boo bé e Jíízọ̀s ólò bugi togó naa nè sĩ́deè eé láá nóe. Èé nó nágé nu lọl ló bé eé láá (1) nó bé e Jìhóvà ólò bugi togó naa, kọbé bé e bugi togó naa gbááá ló a bùlà. (2) bé eé láá kìlmà kpá ló kẽ naa, nè (3) bé eé láá ié õ̀òa bug tení dú ló gè dẹ̀ẹ̀a boo Jìhóvà mm̀ tã̀àgã ló naa.
NÓ GÈ BUGI TOGÓ BELÍ BÉ E JÌHÓVÀ ÓLÒ BUGI TOGÓ NAA
5. Éé ní ea beè naaá tṍó e Pítà náa beè bugi togó belí bé e Jìhóvà ólò bugi togó naa ẽ́?
5 Bugi togó boo nú ea beè naaá enè tṍó e Pítà náa beè bugi togó belí bé e Jìhóvà ólò bugi togó naa. Jíízọ̀s beè kọ́ nè pá a gbò tóm kọ àé kilìè Jèrúsalẹ̀m, vaá gbò tẹ̀sĩ́ bõ̀ònaló fã̀ é síílìèe, boomàèe bàg, vaá fẹẹ̀ẹ. (Máát. 16:21) Pítà beè nyimá kọ Jíízọ̀s ní ea dú Mèsáíà e Bàrì beè zìgà kọ àé duulà pá a gbò e. Vó beè naa kọọ̀ á palàge tavala ló Pítà ge zigà kọọ̀ Jìhóvà é sọtọ́ deè kọ bàá fẹ́ Jíízọ̀s. (Máát. 16:16) Pítà beè gbóó tú Jíízọ̀s kilma kpògà kẽ vaá kọ́ nèe kọọ̀, “Á lọ̀! Bàrì á gá zìgà kọ nú ea tõ̀ò vó á naaá ní ló, e [Nen Ea Íéi].” (Máát. 16:22) Jíízọ̀s náa beè nvèè sãa kúm bel e Pítà lóá, boo béè kọọ̀ Pítà náa beè bugi togó belí bé e Jìhóvà ólò bugi togó naa.
6. Mósĩ́ deè ní e Jíízọ̀s beè zogè kọọ̀ bé ea bugìè togó naa gbááá ló níí Jìhóvà ẹ?
6 Jíízọ̀s beè nyimá bé e a Tẹ̀ ólò bugi togó naa, vó beè naa kọ á nó gè bugi togó belí e. Jíízọ̀s beè kọ́ nè Pítà kọọ̀: “Tení ààḿ sĩ́, e Sétàn! Ò dúù kpègà nù nèm, boo béè kọ bug togó nen ní eo lóòmà belá ẹ́, mè níì bùlà Bàrì nì.” (Máát. 16:23) Àé láá dú kọ Pítà beè ié lé bùlà, sõò Jíízọ̀s beè kìn a dùùlà bá deè tṍ boo béè kọ Jíízọ̀s beè nyimá kọọ̀ kọbé à láá naanìè bùlà Jìhóvà, àé dú bíi kọ á monìè tã̀àgã̀ vaá uè. Nú ea beè naaáá beè naa kọ Pítà á nó gè bugi togó belí bé e Jìhóvà ólò bugi togó naa. À dú bíi kọ beele é naa nagé vó.
7. Tṍó e tṍó téní, mósĩ́ deè ní e Pítà beè zogè kọ à gbĩ́ gè noè ge bugi togó belí Jìhóvà ẹ? (Ẹ̀b fòtó.)
7 Tṍó e tṍó téní, Pítà beè zogè kọ à gbĩ́ gè noè ge bugi togó belí Jìhóvà. A beè dú tṍó e Jìhóvà beè gbĩ́ kọ gbò e bà náa dú Júù á dù gé fãèe. Vó beè naa kọ á lẹ̀ẹ̀là Pítà kọ á gé kọ́ kpẹ̀a nè Kọnílìọ̀s, ea dú túá nen e náa dú Júù ea beè dú nen ea gé nyoone nvéè Kráìst. Pá Júù náa beè olòó zọ̀ gbò e bà náa dú Júù naaá nu. Vóà naa, a beè dú bíi kọ Pítà á nyaaná bé ea ólò ẹ̀b nu naa, kọbé à láá kọ́ kpẹ̀a nè gbò e bà náa dú Júù. Boo béè kọọ̀ Pítà beè nyaaná bé ea ólò ẹ̀b nu naa, lóóe beè taaá vaá náa beè “pee tṍó” ló gè sí tọọ̀ Kọnílìọ̀s tṍó ea kólíe kọ á duè a tọ. (Tóm 10:28, 29) A beè kọ́ kpẹ̀a nè Kọnílìọ̀s nè pá a tọ, naa ní e ba beè dììa múú.—Tóm 10:21-23, 34, 35, 44-48.
Pítà ea gé bã́ tọọ̀ Kọnílìọ̀s (Ẹ̀b 7 kpò)
8. Mósĩ́ deè ní eé láá zogè kọ bé e bugì togó naa gbááá ló níí Jìhóvà ẹ? (1 Pítà 3:8)
8 Tṍó e sìgà gbáá ni téní, Pítà beè siè kpóó ló gbò e bà géè nyoone nvéè Kráìst kọ bàá naa kọọ̀ ba “bùlà á dú tẽ̀ènè kà.” (Bugi 1 Pítà 3:8) Beele é láá naa kọ bẹẹ bùlà nè níí pá vígà á dú tẽ̀ènè kà tení dú ló gè nó bé e Jìhóvà ólò bugi togó naa lọl mm̀ Kpá Káí. Dì belí nu dòòmà bá, Jíízọ̀s beè kọ́ nè pá a gbò nyòòne nvée kọ bàá tú gè gbĩ́ Boǹ Méné Bàrì naamá túá kà nú mm̀ ba dùm. (Máát. 6:33) Vóà naa, neǹ vígà é láá beeláfùl ge dú neǹ gyà deèsĩ́ tóm kọ̀ kpẹ̀a, àbèè ge tú dénè a tṍó siimá tóm nè Jìhóvà mm̀ dõona sĩ́deè. Tãa vó e kọ́ọ̀ nèe kọ á gá naa vó, èé nveè bá nèe vaá ló gbò bel ea é síèe kpóó ló.
IÉ DÙM KÌLMÀ KPÁ LÓ KẼ
9-10. Mósĩ́ deè ní e Jíízọ̀s beè zogè kọ à palàge kilmàè kpá ló kẽ ẽ́?
9 Bílá dee ea zilà besĩ́ bà kalá fẹ́ Jíízọ̀sa, Jíízọ̀s beè noomà Pítà nè dõona kà pá a gbò tóm kọ bàá kìlmà kpá ló kẽ. Besĩ́ à kalá dọ̀ tṍóá, Jíízọ̀s beè lẹ̀ẹ̀là Pítà nè Jọ́ọ̀n kọ bàá gé kpoogè dee ló kĩée ea é zọ́ va tõo deá gyã́á besĩ́ à kálá ù. Be à sẹlẹ a beè dú bíi kọ bàá kpoogè dee ló fẹ́ẹ́lẹ́ e bà é tṍ múú e bà é lógá m, nè kàn e bà é fãamà ló tṍó e ba ni lógá kpóó tọ lọ̀l besĩ́ bà kálá dé gyã́á. Sõò mée ní ea é dí kpènà ló gè kìlmà kpá ló kẽ vaá logí kpóó tọọ̀ dõona gbò e?
10 Jíízọ̀s beè zogè kọ à kilmàè kpá ló kẽ tení dú ló gè logí kpóó tọọ̀ pá a gbò nyòòne nvée. A beè palàge bọọ ló pá a gbò nyòòne nvée, tṍó e bà mon kọọ̀ Jíízọ̀s sí tóm e gbò gyóòlo ní e bà ólò sìe. Jíízọ̀s beè lọ̀à a pọ̀b kọ̀là ló ló, à gbóó tú báà kàn pììa ló, tṍ múú mm̀ fẹ́ẹ́lẹ́á, vaá dààmà togó gè tú múúá logmá va kpóó tọ. (Jọ́ọ̀n 13:4, 5) Gè logí kpóó tọọ̀ 12 nen ea ólò nyoonée nvée, bií ló níí Júdàs ea beè oóeá beè láá tú gã́bug tṍó bá Jíízọ̀s. Sõò, a beè kìlmà kpá ló kẽ vaá sí tóm ea palàge kil kẽ. Tṍó ea ni lógí va kpóó tọ lọ̀l, a beè gbóó kọ́ nè va kọọ̀: “É kọ ò nyímàì nú e m géè naaí lóá? Boolo ólò kolím mi Neǹ Dò Bá nè [Nen Ea Íéi], vaá nóo lọì, boo béè kọ níá nú em dúù e. Nda, [em dúù Nen Ea Íéi] nè bọọ Nen Dò Bá, géè logíi ká tọ. Boolo íè ge logi nai gé ká tọọ̀ ene.”—Jọ́ọ̀n 13:12-14.
Ge kìlmà kpá ló kẽ bãàa mm̀ bé e bugì togó kilma ló bẹẹ bá nè dõona gbò naa
11. Mósĩ́ deè ní e Pítà zógè kọọ̀ a beè noè gè kìlmà kpá ló kẽ ẽ́? (1 Pítà 5:5) (Ẹ̀b nàgé fòtó.)
11 Pítà beè nó nu lọl ló bé e Jíízọ̀s beè kìlmà kpá ló kẽ naa. Tṍó e Jíízọ̀s ni kil káála, Pítà beè sí tóm dũ̀ùnè vaá bó ene kà gbálà ea beè gbẹá kọ̀và lọl tã́gíní deé ea beè mèà. (Tóm 1:8, 9; 3:2, 6-8) Tóm dũ̀ùnè e Pítà síá beè bọọ ló gã́bug nen naa ní e bà bṍona ẽ́ ló. (Tóm 3:11) Pítà náa beè gbĩ́ kọ bàá tú ka ea dú ló tóm dũ̀ùnè e a síèa neèe, náa kal ló béè kọ a beè mea kĩée e gbò nen ólò gbĩ́ kọ bàá nveenìè va ka ló vaá neè va pọ̀b dọ̀. Tãa vó, Pítà beè kìlmà kpá ló kẽ, vaá kọ bàá tú ka ea dú ló tóm dũ̀ùnèa nè Jìhóvà nè Jíízọ̀s. A beè kọ́ nè gbòa kọọ̀: “Kói ea dú ló béè Jíízọ̀s ní e a náa kọ gbálà kọ̀và eo monììe vaá nyimaíe lóí á láá aa boo kyã̀à ẽ.” (Tóm 3:12-16) Gbò moǹ bel e Pítà beè emá kpá lẹ̀ẹ̀la tóm ea beè má gbò e bà géè nyoone nvéè Kráìst ea kil ló gè kìlmà kpá ló kẽ, kẽeí nyíe tṍó e Jíízọ̀s beè tú báà kàn pììa ló, vaá logí kpóó tọọ̀ pá a gbò nyòòne nvée.—Bugi 1 Pítà 5:5.
Tṍó e Pítà sí tóm dũ̀ùnè lọl, a beè kìlmà kpá ló kẽ tú ka ea dú ló nè Jìhóvà nè Jíízọ̀s. Beele é láá zogè nàgé kọ è kilmà kpá ló kẽ tení dú ló gè naa lé gbò nen e bè née é ẹb dẽesĩ́ kpẽ́ ea dú ló (Ẹ̀b 11-12 kpò)
12. Mósĩ́ deè ní eé láá nó gè kìlmà kpá ló kẽ belí Pítà ẹ?
12 Èé láá nó gè kìlmà kpá ló kẽ belí Pítà. Èé kẽea boo kọọ̀ níì áá gè ló lé bel ní ea zógè kọ è kilmà kpá ló kẽ ẽ́ nì. Moǹ bel e Pítà lóómá bel kilma ló gè kìlmà kpá ló kẽ mm̀ dọ̀ Kpá Káíá zógè kọọ̀ ge kìlmà kpá ló kẽ bãàa mm̀ bé e bugì togó kilma ló bẹẹ bá nè dõona gbò naa. È ólò sí tóm nè gbò nen boo béè kọ è vulè Jìhóvà nè gbò nen, níì boo béè kọ è gbĩ́ì kọ bàá lèèlài nì. È zógè kọ è kilmà kpá ló kẽ tṍó e túù ẹ́ẹ́-ẹẹ̀ nyíe siimá tóm nè Jìhóvà nè pá vígà bã̀àna tṍó e gbò nen náa nveè kpíí ló àbèè ge õái zaa ló nú e náà.—Máát. 6:1-4.
“IÉ Õ̀ÒA BUG”
13. Éé ní e gè ié “õ̀òa bug” tõó dọ̀ ẹ?
13 Éé ní e gè “ié õ̀òa bug” tõó dọ̀ ẹ? (1 Pít. 4:7) Nen ea gé nyoone nvéè Kráìst ea íe õ̀òa bug ólò pììgà bé ea kpóó sim tùlà naa kọbé à láá nè béèlàfùl ea gbááá ló bùlà Jìhóvà. À ólò nyimá nágé kọọ̀ náa íe nú ea bọọ èl ge ié lé gbaa ló kilma ló Jìhóvà. À ólò ẹ̀b a bá boo bá ea bọ́ló, vaá nyimá kọ náa nyímàè dénè nu. À ólò zogè kọ à kilmàè kpá ló kẽ tení dú ló gè olòó tã̀àgã ló Bàrì vaá bàn tùle lọ̀lie bá.b
14. Mó tṍó ní e Pítà náa beè dẹ̀ẹ̀a boo Jìhóvà ẹ?
14 Bílá dee ea zilà besĩ́ bà kalá fẹ́ Jíízọ̀sa, a beè kọ́ nè pá a gbò nyòòne nvée kọọ̀: “Dénè bọ̀ì é teai aalíí mí ló bílá deeí.” Sõò Pítà beè kọ́ nè Jíízọ̀s kọọ̀: “Kọbèè dénè na gbòa téá àà ní ló, nda ním é àà ní ló!” Bílá deè deeá, Jíízọ̀s beè dùùlà bá deè tṍ pá a gbò nyòòne nvée kọọ̀: “Kuai dẽe ló vaá ò tãagãi ló Bàrì.” (Máát. 26:31, 33, 41) Be Pítà á tú dùùlà bá deè tṍá siimá tóm, à gáẹ̀ beè ié agẹló vaá náa gáẹ̀ beè àmà sàn Jíízọ̀s. Sõò boo béè kọ Pítà náa beè tú dùùlà bá deè tṍá, a beè àmà sàn Jíízọ̀s vaá a beè palàge ọgá tṍó e tṍó téní.—Máát. 26:69-75.
15. Éé ní ea beè nvèè bá nè Jíízọ̀s kọ á ié õ̀òa bug bílá dee ea zilà besĩ́ bà kalá fẹ́ẹ ẹ́?
15 Jíízọ̀s beè dẹ̀ẹ̀a boo Jìhóvà. Náa kal ló béè kọ a beè gbõoma, a beè olòó tã̀àgã ló Bàrì. Vó beè nvèè bá nèe kọ á ié agẹló vaá naa nú ea gbááá ló bùlà Jìhóvà. (Máát. 26:39, 42, 44; Jọ́ọ̀n 18:4, 5) Bé e Jíízọ̀s beè tú tã̀àgã ló Bàrì kolmá nu naa, náa beè tá nyíè Pítà.
16. Mósĩ́ deè ní e Pítà beè zogè kọ à íèè õ̀òa bug é? (1 Pítà 4:7)
16 Tṍó e tṍó téní, Pítà beè gbóó nó gè dẹ̀ẹ̀a boo Jìhóvà. Tṍó e Jíízọ̀s kẽeà aa kemà ú, a beè kọ́ nè Pítà nè dõona kà pá a gbò tóm kọ bà é íe nyómá káí ea é nveè bá nè va mm̀ ba sìtóm kọ̀ kpẹ̀a. Náa kal ló béè vọ́, Jíízọ̀s beè kọ nè va kọ bàá kil Jèrúsalẹ̀m gé elá dọ̀ọ̀mà tṍó e bà é ié nyómá káí ea beè zìgà nè vaá. (Lúùk 24:49; Tóm 1:4, 5) Éé ní e Pítà beè tú tṍó ea gé élá bànà nú e Jíízọ̀s beè zìgàa naamá ẽ́? Pítà nè dõona gbò e bà géè nyoone nvéè Kráìst beè olòó “tã̀àgã ló Bàrì.” (Tóm 1:13, 14) Tṍó e tṍó téní, Pítà beè lẹ̀ẹ̀là túá kà a kpá lẹ̀ẹ̀la tóm má gbò e bà géè nyoone nvéè Kráìst, a beè siè va kpóó ló kọ bàá ié õ̀òa bug vaá dẹ̀ẹ̀a boo Jìhóvà tení dú ló gè olòó tã̀àgã̀e ló. (Bugi 1 Pítà 4:7.) Pítà beè nó gè dẹ̀ẹ̀a boo Jìhóvà, vó beè naa kọ á láá siè kpóó ló pá vígà vaá nvèè bá nè va.—Gàl. 2:9.
17. Éé ní ea dú bíi kọ é kilsĩ́ gè naa bã̀àna tṍó ea tõoí ló belí kọ è nyímà ló nú gè naa ẽ́? (Ẹ̀b nàgé fòtó.)
17 Kọbé è láá ié õ̀òa bug, à dú bíi kọ é olòó tã̀àgã ló Jìhóvà. Èé ólòó bàn tùle lọl bá Jìhóvà bã̀àna tṍó ea tõoí ló belí kọ è nyímà ló nu gè naa. Bọọ èlmà tõ̀ò, tṍó e gbĩ́ gè nè agẹbá béèlàfùl, èé ban tùle lọl bá Jìhóvà vaá agala boo kọ à nyímá nú ea é léeí ló.
Pítà beè nó gè dẹ̀ẹ̀a boo Jìhóvà tení dú ló gè tã̀àgã̀é ló. Beele é láá zogè nàgé kọ è bugì togó leevè tení dú ló gè olòó bàn nvèè bá lọl bá Jìhóvà bọọ èlmà tõ̀ò, tṍó e gbĩ́ gè nè kà agẹbá béèlàfùl (Ẹ̀b 17 kpò)c
18. Éé ní eé láá naa kọbé bé e bugì togó naa gbáá ló bùlà Jìhóvà ẹ?
18 Nyíéi palàge ẹẹ kọ Jìhóvà beè dèmii naa ní eé láá toní gbò kpãa ea íe. (Jén. 1:26) À dú kà-kà kọọ̀ née é láá nó Jìhóvà boo bá ea gbõoma. (Àìz. 55:9) Sõò dì belí Pítà, èé kilsĩ́ gè nó bé e Jìhóvà ólò bugi togó naa, ié dùm kìlmà kpá ló kẽ, vaá ié õ̀òa bug.
SỌ́L EA GÃ́BUG DÚ 30 Ńdáà Tẹ̀, Nà Bàrì Nè Nà Kóò
a Ge “ié nágé bùlà,” e bà lóómá bel mm̀ 1 Pítà 4:1, é láá tõo nagé dọ̀ “bẹẹ tóm̀ bùlà; bé e lábvì láb naa; nè bé e bugì togó naa.”
b Kọbé ò kpáá palàge dã́ ból ló nú e gè ié õ̀òa bug tõó dọ̀, bugi “Bible Verses Explained” nè “2 Tímotì 1:7 Explained—‘God Has Not Given Us a Spirit of Fear,’” ea di kè kẽè togó bel ea kọ́ọ̀ “Soundness of mind” ea di boo jw.org àbèè boo JW Library®.
c BÀÀTẼ́ EA KIL LÓ FÒTÓ: Ene kà vígà pábia ea gé tãagã ló Bàrì mm̀ a nyíé, boo tṍó ea gé élá bànà gbò e bà é bĩ́ínáe bel kọbé bà túe ló tóm.