“Sai Neai Bọọ Lóó . . . Nen Eo É Fãi”

1. Éé ní ea bọ́ló kọ é naa kọbé è láá ié kà-kà ẹ́ẹ́-ẹẹ̀ nyíe ẽ́, vaá ló éé? (Àìzáíà 48:​17, 18)

BẸẸ Tẹ̀ ea di káála palàge vùlèi, vaá à gbĩ́ kọ é dé kpéè ló dùm kátogóí nè dì deèsĩ́. (Ẹ̀klì. 3:​12, 13) A beè dèmii vaá nèi kalì ge naamá gã́bug lé nu, sõò náa beè nèi kpóó kọ é bẹ̀l bẹẹ bá àbèè ge sà nú ea dú lé nè pọ́lọ́. (Ẹ̀klì. 8:9; Jèr. 10:23) À nyímá kọ kọbé è láá ié kà-kà ẹ́ẹ́-ẹẹ̀ nyíe, èé íè ge fã̀e vaá tõó boo gbò a nòòkúu.​—Bugi Àìzáíà 48:​17, 18.

2. Éé ní e Sétàn gbĩ́ kọ é ziga ló é, vaá éé ní e Jìhóvà beè naa ẽ́?

² Sétàn gbĩ́ kọ é zìgà kọọ̀ èé láá ié ẹ́ẹ́-ẹẹ̀ nyíe be née fãà Jìhóvà, vaá gbò nen é láá bẹ̀l ba bá leevè. (Jén. 3:​4, 5) Ge zogè kọọ̀ Sétàn dú neǹ kyáá bel, Jìhóvà beè sọ̀tọ́ deè kọ gbò nen á bẹ̀l ba bá mm̀ sìgà tṍó. È palàge mòn gbò pọ́lọ́ nu ea silà aa mm̀ bẹlbẹ̀l gbò nen. Boo dõona bá, Kpá Káí kọ́ nú ea kil ló gã́bug gbò e nyíé va beè ẹẹ boo béè kọ bà fã Jìhóvà. Enè nen e nyíée beè palàge ẹẹ ló gè fã̀ Jìhóvà dú Jíízọ̀s Kráìst. Mm̀ togó belí, èé ló bel boo nú ea náa vaá Jíízọ̀s à sà ge fã̀ Jìhóvà. Èé ló nágé bel boo nú ea náa vaá à bọ́ló kọ é fã̀ Jìhóvà. Dee-deè nvée, èé ló bel boo nú ea náa vaá è sà ge fã̀ Jìhóvà.

NÚ EA NÁA VAÁ JÍÍZỌ̀S À SÀ GE FÃ̀ JÌHÓVÀ

3. Éé ní e Sátàn beè kọ́ nè Jíízọ̀s e, vaá éé ní e Jíízọ̀s beè naa ẽ́?

³ Tṍó e Jíízọ̀s beè di boo kunukẽ̀í, a beè dú bíi kọ á sà nen ea é fã. Pọ́ì ńkem̀ tṍó aa ló tṍó e Jíízọ̀s ni diia múú lọ̀l, Sétàn beè kọ́ nèe kọ be à dọ́ kunukẽ̀ vaá kumìè sĩ́ kẽ neèe áá enè tóm, àé neèe kọ̀láá kà boǹ méné ea di boo bàlà booí. Jíízọ̀s beè aalá nèe kọọ̀: “Tení ààm sĩ́, e Sétàn, mè à ẽ́á mm̀ Kpá Káí kọọ̀, ʽKumí sĩ́ kẽ nè áá [Jìhóvà] ea dú o Bàrì, vaá ò tãagã̀ nàgé ló áá ẹlẹ!’” (Máát. 4:​8-10) Éé ní ea náa vaá Jíízọ̀s à sà ge fã̀ Jìhóvà ẹ? Èé ló bel boo sìgà bug ea náa.

4-5. Mókà gbò bug ní ea beè naa kọ Jíízọ̀s á sà ge fã̀ Jìhóvà ẹ?

⁴ Pọ̀bkà bug ea náa vaá Jíízọ̀s beè sà ge fã̀ Jìhóvà dú boo béè vulè ea íe kilma ló Jìhóvà. (Jọ́ọ̀n 14:31) Gbá ló vó, Jíízọ̀s beè fã̀ Jìhóvà boo béè kọ níà nú ea lelà kọ á naa ẽ́. (Jọ́ọ̀n 8:​28, 29; Kùùà 4:11) A beè nyimá kọ Jìhóvà bọ́ló dẹ̀lẹ̀ nyíé boo vaá ẹlẹ ní ea beè dèmii vaá nèi kọ̀láá kà lé nu ẽ́. (Ps. 33:4; 36:9; Jém̀z 1:17) Jìhóvà ólò ló kà-kà bel nè Jíízọ̀s, vaá ẹlẹ ní ea beè nèe kọ̀láá kà nú ea íe é. (Jọ́ọ̀n 1:14) Sõò Sétàn palàge dú kele ló Jìhóvà, ẹlẹ ní ea náa kọ gbò nen á sí pọ́lọ́ vaá ù e. Sétàn dú neǹ kyáá bel nè neǹ gọ̀l òò, e áá nú ea léémáe ní ea ólò naa ẽ́. (Jọ́ọ̀n 8:44) Jíízọ̀s palàge nyimá ló Jìhóvà vaá nyimá ló Sétàn leevè, vó beè naa kọ á gá lọ̀l togó kèbá Jìhóvà belí Sétàn.​—Fíl. 2:​5-8.

⁵ Dõona kà nú ea náa vaá Jíízọ̀s à sà ge fã̀ Jìhóvà dú boo béè gbò lé nu ea é silà aa mm̀ a gè naa vó. (Híb. 12:2) A beè nyimá kọ be à bọ́ẹ̀ ló dẹ̀lẹ̀ nyíé boo àé náànìè kọ béè a Tẹ̀ á di káí, vaá vó é náa kọọ̀ náàkyọ̀ nè ú á gá dì nà.

NÚ EA NÁA VAÁ À BỌ́LÓ KỌ É FÃ̀ JÌHÓVÀ

6-7. Éé ní ea náa vaá gã́bug nen deè nieí náa ólò fã̀ Jìhóvà ẹ, sõò éé ní ea náa vaá à bọ́ló kọ é fã̀e ẽ́?

⁶ Gã́bug nen deè nieí náa ólò fã̀ Jìhóvà boo béè kọ bà náa nyímá ló gbò lé kpãa ea íe nè gã́bug lé nu ea ni náa nè va. Níà bé ea beè dì nàgé naa ló gã́bug gbò e bà náa beè nyimá ló Bàrì e Pọ́ọ̀l beè kọ́ kpẹ̀a nè va gbẹá Átènz e.​—Tóm 17:​19, 20, 30, 34.

⁷ Pọ́ọ̀l beè baatẽ́ nè gbò e bà géè pãanée tṍ ló kọ Bàrì ní ea ólò nè “dùm nè séi ea di mm̀ nen nè dénè nu e nen íe” é. A beè kpáá kọọ̀: “Boo kóì Bàrì ní e di dùm vaá kyãà vaá dú kọ̀láá nu e bélì e.” À bọ́ló kọ é fã̀ Bàrì boo béè kọọ̀ ‘Dénè gbò nen e Bàrì tú va sẹlẹ́ kele-kele ketõ̀ò ea di boo kunukẽ̀í aa mm̀ . . . tẽ̀ènè nen e ẹlẹ beè dèm.’​—Tóm 17:​25, 26, 28.

8. Éé ní e Jìhóvà náa é zigà ge naa ẽ́, vaá éé ní ea ni náa boo béè kọ à palàge vùlèi é?

⁸ Boo béè kọ Jìhóvà ní ea bọọ lọ̀l vaá à lee é vaá ẹlẹ ní ea beè dèm dénè nu, à gáẹ̀ beè láá tú bá kpóó siimái kọ é fãèe. Sõò Jìhóvà náa é zigà ge naa vó. Tãa vó, à náa kọ é mòn gbò nú ea zógè kọ à diè, vaá à palàge vulèè buù bẹ̀ì. À gbĩ́ kọ kọ̀láá nen á duè a kóò dọ̀ dè-dè. (1 Tím. 2:​3, 4) Boo béè vó, Jìhóvà a búmái kọbé è láá kọ́ nú ea kil ló a tóm̀ bùlà nè gbò lé nú ea é beè naa nè gbò nen. (Máát. 10:​11-13; 28:​19, 20) A kólíi nvee mm̀ a bõ̀ònatõ̀ò kọbé è láá fã̀e leevè vaá ié nvèè bá lọl bá gbò kànen mm̀ bõ̀ònatõ̀ò.​—Tóm 20:28.

9. Mósĩ́ deè ní e Jìhóvà zógè kọ à vulèè dénè nen ẽ́?

⁹ Jìhóvà a zógè bé ea vulèi naa tení dú ló gè naa lé gbò e bà náa gé fã́e. Bugi togó boo níí: Mm̀ gã́bug gbáá, gbò nen a bééláfùl ge naa nú ea tan va tãa vó e bà gban tṍ ló Jìhóvà. Náa kal ló béè vó, Jìhóvà a né va gbò nú e bà íe bíi ló kọbé bà láá kilsĩ́ gè tõó dùm. (Máát. 5:​44, 45; Tóm 14:​16, 17) Jìhóvà a náa kọ bàá ié gbò kóò, pá tọ e bà vulè va, nè tóm e bà é sí kọbé bà láá dé kpéè ló dùm. (Ps. 127:3; Ẹ̀klì. 2:24) Gbò nú e Jìhóvà ni náaí zógè kọ à palàge vùlè dénè nen. (Ẹ́xọ. 34:6) Naanii èé ló bel boo nú ea náa vaá è sà ge fã̀ Jìhóvà, nè bé ea ólò tãanè dee bá gbò e bà fã́e naa.

NÚ EA NÁA VAÁ È SÀ GE FÃ̀ JÌHÓVÀ

10. (a) Éé ní ea náa vaá è sà ge fã̀ Jìhóvà ẹ? (Máátìù 22:37) (b) Mósĩ́ deè ní eo ni íe bélè lọl ló bé e Jìhóvà ólò di kpènà ló gè ia ló pọ́lọ́ naa ẽ́? (Psalm 103:​13, 14)

¹⁰ Dì belí Jíízọ̀s, è saà ge fã̀ Jìhóvà boo béè vulè nè tọa ló e íè kìlmàe ló. (Bugi Máátìù 22:37.) È ólò dũ̀ùà bã kpàn Jìhóvà tṍó e nóò nú ea kil ló gbò a kpãa. Dì belí nu dòòmà bá, à ólò di kpènà ló gè ia ló nèi. Tṍó e pá Ízrẹẹ̀l beè lọ̀lìe togó kèbá, Jìhóvà beè bàn va kọọ̀: “Sóo-sóo, ooaí kẽ aalíí ló bọọ pọ́lọ́ sĩ́deè tõ̀ò dùm.” (Jèr. 18:11) Jìhóvà nyímá kọ née gbõomà. (Bugi Psalm 103:​13, 14.) Tṍó eo bugì togó boo gbò lé kpãa e Jìhóvà íe nè gã́bug tṍó ea ni ia ló nè ni, é kọ náa kpáá palàge tàn ni gè fã̀e dọ̀ọ̀mà dè-dè?

11. Mókà dõona kà bug ní ea náa vaá è sà ge fã̀ Jìhóvà ẹ?

¹¹ À ólò tànii gè fã̀ Jìhóvà boo béè kọ níà nú ea lelà ge naa ẽ́. (Máát. 4:10) Gbá ló vó, è nyímà kọ be è kilsĩ́ gè bọ́ló dẹ̀lẹ̀ nyíé boo nè Jìhóvà, gã́bug lé nu é silà aa m. Tṍó e bọ́ọ̀ló dẹ̀lẹ̀ nyíé boo nè Jìhóvà, è náa kọ a bée á di káí, zogè kọ Sétàn dú neǹ kyáá bel, vaá naa kọ nyíè Jìhóvà á ẹẹ. Be è sa gè fã̀ Jìhóvà kátogóí, èé íe nèà deè ge fã̀e dọ̀ọ̀mà dè-dè!​—Jọ́ọ̀n 17:3.

12-13. Éé ní e nóò lọl ló nú ea beè naaá ló Jane nè Pam ẽ?

¹² Èé láá nó gè vùlè Jìhóvà tṍó e di-dí ãa, kọbé vulè e íè kìlmàe ló palàge agaló tṍó e ni dú kànen mm̀ dee. Níà nú ea beè naaá ló bàà kà vígà pábia e bà dúá gbàà e ba bée kọlà Jane nè Pam ẽ.a Enè ọ̀và beè toolá 11 gbáá vaá na ọ̀vàa beè toolá 10 gbáá tṍó e ba beè dààmà togó gè nó Kpá Káí. Náa kal ló béè kọ náa beè tàn ba tẹ̀ nè ba kà ge nó Kpá Káí, ba beè sọ̀tọ́ deè kọọ̀ Gbò Neǹ Ditõ̀ò Jìhóvà é láá zọ̀ Jane nè Pam noá Kpá Káí sõò Jane nè Pam é kilsĩ́ gè zọẹ̀ va sí tọ Bàrì deè Sunday. Jane kọ́ọ̀: “Nú e Gbò Neǹ Ditõ̀ò Jìhóvà beè noomàm lọl mm̀ Kpá Káí beè nvèè bá nèm kọ ḿ láá kìn tã́gĩ̀ bá gè ṍ pọ́lọ́ biè nè ge bã mm̀ dùm kúnà gã̀ belí bé e gã́bug nen e gbáà dia tọọ̀ kpá ólò naa.”

¹³ Pálaa ọ̀và beè dììa múú tṍó e bà ni íná mm̀ ba òb nè sìgà gbáá. Tṍó e tṍó téní, ba beè gbóó dú gbò gyà deèsĩ́ tóm kọ̀ kpẹ̀a, vaá ba beè ẹ̀b nàgé nú ea kil ló ba tẹ̀ nè ba kà e ba ni ána. Jane kọ́ bé e nyíée ẹ́ẹ ló nú e Jìhóvà ni náa nè va naa, à kọ́ọ̀: “M mon kọọ̀ Jìhóvà palàge bọ́ló dẹ̀lẹ̀ nyíé boo vaá à ólò ẹ̀b nú ea kil ló pá a kóò, dì belí bé e 2 Tímotì 2:19 kọ́ naa, á kọ́ọ̀, Jìhóvà ‘nyímá ló pá ńlẹ.’” È agàlà boo kọọ̀ Jìhóvà ólò ẹ̀b nú ea kil ló gbò e bà sa gè vùlèe vaá fã̀e!

14. Mósĩ́ deè ní e bé e lóò bel vaá labví láb naa é láá naa kọọ̀ béè Jìhóvà á di õ̀òa ẽ́? (Ẹ̀b nàgé fòtó.)

¹⁴ È gbĩ́ì kọ gbò nen á nyimá kà-kà bel ea kil ló Jìhóvà. Dì belí nu dòòmà bá, dòòmà dẽe ló kọọ̀ ò íè ene kà o lé kóò ea ólò dú gbọ́ọ́-gbọọ̀ ló, dõo nu taalẹ bá vaá ia ló pọ́lọ́. Òé lábví láb naa vàẹ be ò dã́ tṍó e nen gé gbáẹ bel kọ à íe pọ́lọ́ nyíe vaá náa ólò ló kà-kà bel é? Òé ló bel tenmáé boo. Mm̀ tẽ̀ènè sĩ́deèá, tṍó e Sétàn nè gbò ea gé lẹẹlà bel ló kpọ́ kyáá bel ló Jìhóvà vaá kyọ̀ẹ bée, èé ló bel tenmáé boo tení dú ló gè noomà kà-kà bel ea kilíé ló. (Ps. 34:1; Àìz. 43:10) È zógè kọọ̀ è gbĩ́ gè tú dénè bẹẹ nyíe fã̀àmà Jìhóvà tení dú ló bé e lóò bel vaá labví láb naa.

15. Mókà bélè ní e Pọ́ọ̀l beè ié boo béè kọ à nyááná bá ló bé ea beè tõó dùm naa ẽ́? (Fílipaì 3:​7, 8)

¹⁵ È ólò di kpènà ló gè nyaaná bá ló nu kọbé è láá naa nú ea é léémá Jìhóvà àbèè ge kpáá tú gã́bug tṍó siimá tóm nèe. Dì belí nu dòòmà bá, neǹ tóm Pọ́ọ̀l beè beeláfùl ge sọ̀bá pọ̀b dọ̀ ea beè ié kọbé à láá nyoone nvéè Kráìst vaá fã̀ Jìhóvà. (Gàl. 1:14) Vó beè naa kọ á tõó dùm ea bọ́ló vaá ié nèà deè ge zọ̀ Jíízọ̀s bẹ̀l gbẹá káála. Náa beè ọgá ló béèlàfùl ea beè nè ge fã̀ Jìhóvà, vaá beele née é ọ́gá nágé ló.​—Bugi Fílipaì 3:​7, 8.

16. Éé ní e nóò lọl ló nú ea beè naaá ló Julia? (Ẹ̀b nàgé fòtó.)

¹⁶ Be è tú Jìhóvà naamá túá kà nú mm̀ bẹẹ dùm, èé dé kpéè ló dùm kátogóí nè dì deèsĩ́. Bugi togó boo nú ea beè naaá ló ene kà vígà pábia e a bée kọlà Julia. Besĩ́ à kalà nó Kpá Káí, Julia beè olòó dàlà sọ́l gbẹá tọ Bàrì lọl tṍó ea beè di-dí pá nvín. A beè olòó palàge ọlí sọ́l naa ní e ba beè bumáe kọbé à dú neǹ ọ́lì sọ́l e gbò nen é palàge nyimá ló. Pọ́ì ńkem̀ tṍó aa ló tṍóá, ba beè palàge nyimá ló Julia naa ní e bà ólò kolíe kè sẹ̀lẹ̀nù e bà é kpẽ́ gã́bug kpègè nèe kọ á ọlí sọ́l. Tṍó ea bã́ tọọ̀ kpá e bà ólò nó gè ọlí sọ́l, ene kà nvín tọọ̀ kpáá beè ló bel ea kil ló Bàrì nèe, a beè kọ́ nèe kọọ̀ béè Bàrì kọlà Jìhóvà. Pọ́ì ńkem̀ tṍó aa ló tṍóá, Julia beè gbóó olòó nó Kpá Káí bàà tóm mm̀ enè sè. Tṍó e tṍó téní, a beè beeláfùl ge tú dénè a dùm fã̀àmà Jìhóvà taa vó ea ọ́lí sọ́l ea é náa kọ á ié gã́bug kpègè. Náa beè valíé ló gè nè béèlàfùla. À kọ́ọ̀, “Gã́bug nen beè kọ́ nèm kọ m̀ dúù ból boo béè kọ m̀ aà ló sọ́l ea gáẹ̀ beè naa kọ ḿ ié kpègè boo béè ge fã̀ Jìhóvà, sõò m beè gbĩ́ gè tú dénè nà dùm fã̀àmà Jìhóvà.” Mósĩ́ deè ní e béèlàfùl ea beè ne nú ea é sígá ló 30 gbáá ea kil nvéeá beè tọáẹ́ ló é? À kọ́ọ̀ “Nyíém ẹ́ẹ kọ m beè sà ge fã̀ Jìhóvà, vaá m̀ agàlà boo kọọ̀ Jìhóvà é ném gbò nú em íè bíi ló dì deèsĩ́.”​—Ps. 145:16.

KILSĨ́ GÈ FÃ̀ JÌHÓVÀ!

17. Mósĩ́ deè ní e gè kọọ̀ e di mm̀ dee-deè nvéè tṍó tọ́á ló gbò e ba ni sa gè fã̀ Jìhóvà nè gbò e bà gáà naa vó é?

¹⁷ È di mm̀ dee-deè nvéè tṍó. Neǹ tóm Pọ́ọ̀l beè emí kọọ̀: “Gbálà ńkem tṍó ea sígá, vaá nen ea é dúá gbóó dù. Náa é pee tṍó.” (Híb. 10:37) Éé ní e níá tõó dọ̀ kilma kĩée e beele dì e? À tõó dọ̀ kọọ̀ pọ́ì ńkem̀ tṍó ní e gbò nen íe ge sà ge fã̀ Jìhóvà ẹ. (1 Kọ́r. 7:29) Vaá be e sa gè fã̀ Jìhóvà, èé nyímá kọ náa kal ló béè kọ èé kpeesĩ́ ló tàvàlà dìtõ̀ò, àé dú mm̀ “gbálà ńkem tṍó.”

18. Éé ní e Jìhóvà nè Jíízọ̀s gbĩ́ kọ é naa ẽ́?

¹⁸ Jíízọ̀s beè siè kpóó ló pá a gbò nyòòne nvée kọ bàá kilsĩ́ gè biiàẹ̀ẹ́ nvée. (Máát. 16:24) Vóà naa be e tú gã́bug gbáá fã̀àmà Jìhóvà, à dú bíi kọ lóói á gá ọọ. Èé sí tóm agẹlẹ bá kọbé è láá kilsĩ́ gè fã̀ Jìhóvà. Ge naa vó náa é bọọgẹ̀ valí, sõò bã̀àna kátogóí, Jìhóvà é náa kọ é ié tã́áná dee bá nè dĩ̀ìnè ló bùlà!​—Ps. 35:27.

19. Éé ní e nóò lọl ló nú ea beè naaá ló Gene ẽ?

¹⁹ Sìgà gbò ólò tuumá kọọ̀ ge fã̀ Jìhóvà é náa kọ bàá gá láá deè kpéè ló dùm. Be ọ̀ọ̀ nvín ãa, é kọ à ólò tõó ní ló belí kọọ̀ ge fã̀ Jìhóvà é náa kọ ó gá láá dé kpéè? Ene kà vígà págbálà ea di mm̀ a deè ãa e a bée kọlà Gene kọ́ọ̀: “A beè tõoḿ ló belí kọọ̀ be m̀ dú enè Neǹ Ditõ̀ò Jìhóvà, ním é láá ié dì pọ́ì. Gbò e beè gbá bọọ aa kẽ géè sí ketõ̀ò ge ṍ míí, bã mm̀ dùm kúnà gã̀, vaá bìlà vídío gem̀ ea nveè sãa kúm dùm gboo-gboo ló. A beè tõo ḿ ló belí kọọ̀ bà géè dé kpéè ló gbò nuá, boo tṍó e áá gè sí nònù nè ge kọ́ kpẹ̀a ní e nda géè naa ẽ́.” Mósĩ́ deè ní e gè bugi togó naa vó beè tọá ló Gene ẽ? À kọ́ọ̀: “M beè gbóó dààmà togó gè gũá sí pọ́lọ́. Túá ból, m beè dé kpéè ló gbò nú em géè naaá sõò ním beè ié kà-kà ẹ́ẹ́-ẹẹ̀ nyíe. M beè gbóó dààmà togó gè bugi togó boo bélè ea di ló gè tõó boo gbò nòòkúu ea di mm̀ Kpá Káí vaá beeláfùl ge tú dénè nà nyíe fã̀àmà Jìhóvà. Lọl tṍóá ààmà, à bélí kọ Jìhóvà ólò aalá kọ̀láá kà nà tã̀àgã ló.”

20. Éé ní eé bééláfùl ge naa ẽ́?

²⁰ Enè neǹ ọ́lì sọ́l beè emí kọọ̀: “Ẹ́ẹ́-ẹẹ̀ nyíe á di ló nen e olo saà vaá túe nvea ló, kọbé à láá tõó mm̀ o gba be.” (Ps. 65:4) Naanii èé bééláfùl ge kilsĩ́ gè fã̀ Jìhóvà, vaá dì belí Jóshùà èé kọ́ọ̀: “Kilma ló nda nè pá ńdáà tọ, beele é fã Jìhóvà.”​—Jós. 24:15.