Ó Gá Pee Tṍó Ló Gè Nvèè Bá Nè “Gbò E Bà Íe Lé Bùlà Nyòòmà Ge Dã́ Moǹ Bel Bàrì”

1. Gbò nen é láá labví láb naa vàẹ tṍó e kọ́ọ̀ kpẹ̀a nè va ẹ́? (Tóm 13:​47, 48; 16:​14, 15)

NYÍÈ gbò e ba beè di mm̀ túá gbò gbááá beè palàge ẹẹ tṍó e gbò nyòòne nvéè Kráìst kọ́ kpẹ̀a nè va, vaá a beè tàn va gè dú gbò nyòòne nvéè Kráìst tẽ̀ènè tṍóá. (Bugi Tóm 13:​47, 48; 16:​14, 15.) Deè nieí, à íe nagé gã́bug gbò e nyíé va ólò palàge ẹẹ tṍó e bà dã́ lé kpẹ̀aí. À íe sìgà gbò e bà náa ólò ié lèèma túá tṍó e bà kọ́ kpẹ̀a nè va, sõò tṍó e tṍó téní, à ólò tàn va gè nó nú ea kil ló Jìhóvà. Éé ní eé náa tṍó e gé kọ́ kpẹ̀a vaá è mòn “gbò e bà íe lé bùlà nyòòmà ge dã́ Moǹ Bel Bàrì” e?

2. Éé ní ea náa vaá èé láá tú bẹẹ sìtóm kọ̀ kpẹ̀a doolé ló neǹ kìl ól é?

² Bugi togó boo nakà nu dòòle lóí. Èé láá tú bẹẹ sìtóm kọ̀ kpẹ̀aí doolé ló neǹ kìl ól. Be à íe sìgà nú ea di zẹ̀ẹ̀ gbò nú ea beè fó a ól ea ni léèvè, neǹ kìl ólá ólò bùùlà vaá kilsĩ́ gè ẹ̀b nú ea kil ló gbò nú ea di ólá ea gáà leevè. Mm̀ tẽ̀ènè sĩ́deèá, tṍó e monì nen ea di kpènà ló gè dã́ lé kpẹ̀aí, è ólò gbĩ́ gè nvèè bá nèe naa ní ea é dú nen ea gé nyoone nvéè Kráìst. Sõò è ólò kilsĩ́ gè nvèè nàgé bá nè gbò e bà gáà ie lèèma mm̀ ge dã́ lé kpẹ̀aí kọ bàá mòn nú ea náa vaá à dú bíi gè nó nú ea kil ló Bàrì lọl mm̀ Kpá Káí. (Jṍòn 4:​35, 36) Tàvẹ̀nù é nveè bá nèi kọ é nyimá kà lé bá gè loomá bel nè gbò e bà pãanéi tṍ ló. Naanii èé ló bel boo nú eé láá naa kọbé è láá nvèè bá nè gbò e bà pãanéi tṍ ló túá tṍó e kọ́ọ̀ kpẹ̀a nè va. Èé ló nágé bel boo bé eé láá nvèè bá nè va kọ bàá tõo bã ló Jìhóvà vaá fã̀e naa.

TṌÓ E MONÌ GBÒ E BÀ ÍE LÈÈMA MM̀ BẸẸ SÌTÓM KỌ̀ KPẸ̀A

3. Éé ní eé náa tṍó e gé kọ́ kpẹ̀a vaá è mòn nen ea íe lèèma ẽ́? (1 Kọ́rìnt 9:26)

³ Tṍó e gé kọ́ kpẹ̀a vaá è mòn gbò e bà íe lèèma mm̀ bẹẹ sìtóm kọ̀ kpẹ̀a, è ólò gbĩ́ gè nvèè bá nè va kọ bàá nó nú ea kil ló Jìhóvà vaá tõo bã̀e ló. Tṍó e monì nen ea íe lèèma mm̀ bẹẹ sìtóm kọ̀ kpẹ̀a, èé nóòmàe Kpá Káí tẽ̀ènè tṍóá, vaá kolíe domá nònù.​—Bugi 1 Kọ́rìnt 9:26.

4. Baatẽ́ nú ea beè naaá ló nen ea beè di kpènà ló gè nó Kpá Káí tṍó e bà kọ́ kpẹ̀a nèe.

⁴ Zọ̀ẹ noá Kpá Káí. Sìgà nen e kọ́ọ̀ kpẹ̀a nè ólò di kpènà ló gè nó Kpá Káí tẽ̀ènè tṍóá. Dì belí nu dòòmà bá, à íe enè deè Thursday e ene kà nvín ãa bia ea ólò tõó Canada beè kyã̀à iná ló nú e ólò lẹ́ kpá m kọọmá kpẹ̀a vaá tú bróshọ̀ ea kọlà Dé Kpéè Ló Dùm Dọ̀ọ̀mà Dè-dè! Vígà pábia ea beè di ló nu gè lẹ́ kpá m kọọmá kpẹ̀aá beè kọ́ nèe kọ è ólò zọ̀ gbò e bà tú kpáá noá Kpá Káí. Nvín pábiaá beè zìgà kọ bàá noomàèe Kpá Káí, vaá a beè tú a fóòn nombà nè vígà pábiaá. Pọ́ì ńkem̀ tṍó aa ló tṍóá, nvín pábiaá beè bĩiná vígà pábiaá tṍó ea é dú gé noomàèe Kpá Káí. Tṍó e vígà pábiaá kọ́ nèe kọ àé dúè dee-deè nvéè sèa, nvín pábiaá beè kọ́ nèe kọọ̀: “Nda é íe tṍó sṍóeá boo, é kọ òé láá dù gé noomàm Kpá Káí?” Ba beè dààmà togó gè noá Kpá Káí deè Friday. Nvín pábiaá beè sí nònù deè Sunday, vaá a beè sìm kilsĩ́.

5. Éé ní ea é láá nvèè bá nèi kọ é nyimá ló nu gè kọ̀ tṍó e gbĩ́ì gè zọ̀ nen noá Kpá Káí é? (Ẹ̀b nàgé fòtó.)

⁵ Níì dénè nen ní ea é bélí nvín pábiaá vaá di kpènà ló gè nó Kpá Káí tṍó e kọ́ọ̀ kpẹ̀a nè vaẹ́ nì. À ólò tú tṍó besĩ́ sìgà gbò kálá ié tàn ge nó Kpá Káí. Àé láá dú bíi kọ é dààmà togó gè zọ̀ nená loá bel boo togó bel ea léémáe. Gbá ló vó, be è kilsĩ́ gè labví lé láb kilma ló nená vaá zogè kọ è íèe lèèmá m, pọ́ì ńkem̀ tṍó èé láá dààmà togó gè noomàe Kpá Káí. Éé ní eé láá kọ̀ tṍó e gbĩ́ gè zọ̀ nen noá Kpá Káí é? Naanii èé ló bel boo nú e sìgà pá vígà e bà ólò palàge noomà Kpá Káí gbò nen kọ́.

6. Éé ní eé láá kọ́ nè nen e gbĩ́ gè zọ̀ noá Kpá Káí kọbé à mon bé e gè nó Kpá Káí é dọ bélè nèe naa ẽ́?

⁶ Pá vígà e ba beè bĩiná va nú e bà ólò kọ̀ tṍó e bà gbĩ́ gè zọ̀ nen noá Kpá Káí baatẽ́ kọọ̀, gbẹá sìgà bálásĩ́ náa dú lé gè kọ́ nè nen kọọ̀ “m̀ gbĩ́ gè zọ̀ ni noá Kpá Káí,” àbèè “m̀ gbĩ́ì ge noomà ni Kpá Káí,” tṍó eo gé zọ nen loá bel boo bé e ólò zọ̀ gbò nen noá Kpá Káí naa. Bà mon kọọ̀ ge kọ́ nè nená kọọ̀, “m̀ gbĩ́ì ge zọ̀ ni loá bel boo Kpá Káí” ólò naa kọ nená á ié lèèma mm̀ ge nó Kpá Káí. Kọbé ò láá zọ̀ nená loá bel dõona tṍó, òé láá kọ́ nèe kọọ̀, “Ge dã́ bé e Kpá Káí áálá sìgà bíb ea palàge dú bíi mm̀ dùm naa é palàge bọọ ní ló,” àbèè ò kọ́ọ̀ “Níì áá gè noomài bé eé fã Bàrì naa ní e Kpá Káí ólò naa ẽ́ nì, à ólò noomà nài gé bé eé tõó dùm naa.” Òé láá kọ nagé nèe kọọ̀: “Òé láá tú 10 àbèè 15 mínìt noomá nú ea é palàge dọ̀ bélè nè ní mm̀ dùm.” Ge kọ́ vó léè èl ge kọ́ nè nená kọ á noo tṍó eo é ólòó noomai Kpá Káí buù sè, boo béè kọ ge kọ́ vó é láá siimàe pọ̀.

7. Mó tṍó ní e sìgà gbò beè zẹ́ẹ́ dã́ kà-kà bel ea di mm̀ Kpá Káí é? (1 Kọ́rìnt 14:​23-25)

⁷ Kólí gbò eo ólò noomà Kpá Káí domá nònù. À bélí kọọ̀ mm̀ deè Pọ́ọ̀la, túá tṍó e sìgà gbò beè dã́ kà-kà bel ea di mm̀ Kpá Káí beè dú tṍó e bà sí nònù. (Bugi 1 Kọ́rìnt 14:​23-25.) Níà bé ea dì nàgé naá deè nieí é. Gã́bug gbò e kólì domá nònù ólò vàlẹ̀bá ié lé gbaa ló kilma ló Jìhóvà. Mó tṍó ní ea dú bíi kọ é kolí va domá nònù ẽ? À íe kpò ea di mm̀ 10 nu gè nò ea di mm̀ kpá ea kọlà Dé Kpéè Ló Dùm Dòòmà Dè-dè! e ólò kolmá nen domá nònù, sõò náa dú bíi kọ ó elá dọ̀ọ̀mà tṍó eo é nói kpáá iná kĩá besĩ́ ò kálá kolí nená domá nònù. Lọ̀l gé túá tṍó eo kọ́ọ̀ kpẹ̀a nè nen, òé láá kolí nená domá nònù dee-deè nvéè sè. Be à válí, kòl béè togó bel lòbèl kèsĩ́ gbò nen, àbèè ò kọ́ nú ea di mm̀ Kpá Tọ Kùdẽe Ló e bà é nó sèa nèe.

8. Éé ní eé kọ́ nè nen e gé kólí domá nònù ẽ? (Àìzáíà 54:13)

⁸ Tṍó eo kólì nen eo ólò noomà Kpá Káí domá nònù, baatẽ́ bé e bẹẹ gbò nònù dú kele ló ba bõ̀ònaló fã̀ naa nèe. Túá tṍó e enè nen ea ólò nó Kpá Káí beè sí nònù tṍó e bà gé nó Kpá Tọ Kùdẽe Ló, a beè bĩiná nen ea ólò noomàe Kpá Káí kọọ̀, “É kọọ̀ nen ea gé sẹlẹ nònù Kpá Tọ Kùdẽe Lóá nyímá béè kọ̀láá nen?” Vígà pábiaá beè baatẽ́ nèe kọọ̀ dì belí bé e ólò nyimá béè kọ̀láá nen ea di bẹẹ tọ naaá, níà bé e ólò gbĩ́ gè nyimá béè kọ̀láá nen ea di mm̀ bẹẹ bõ̀ònatõ̀ò naa ẽ́. Nen ea ólò nó Kpá Káíá beè gbóó kọ́ nè vígà pábiaá kọọ̀, baala náa ólò nyimàè béè kọ̀láá nen ea diè ba tọ Bàrì. Èé láá kọ nagé dõona kà nú ea náa vaá bẹẹ gbò nònù à dú kele ló ba bõ̀ònaló fã̀ nè va. (Bugi Àìzáíà 54:13.) È ólò bõoná nè fã̀ Jìhóvà, nó nú ea kilíé ló vaá siè kpóó ló ene. (Híb. 2:12; 10:​24, 25) Níà nú ea náa vaá bẹẹ gbò nònù ólò kyãa boo kúu, vaá nvèè bá nèi ẽ́. Née ólò nyoone nvéè nàànù kunukẽ̀. (1 Kọ́r. 14:40) Bẹẹ Kíndòm Họ́ọ̀l ólò dú gbõ̀ònà ló, vaá ba beè tìb mm̀ sĩ́deè ea é náa kọ á valíí ló gè nó nu. Boo béè kọ è ólò tõó kele, née ólò nvèè sãa kúm tọ́ọ̀ kà bìlà bẹlbẹ̀l, vaá née ólò zọ̀ gbò nen tala boo bel e bà ló. Àé dú lé be ò zẹ́ẹ́ tú vídiò ea kọlà Éé Ní Ea Ólò Naaá Kingdom Họ́ọ̀l Lẹ? zogè nená. Ge naa vó é náa kọ nená á nyimá ló nú ea é mon tṍó ea é íná nònù.

9-10. Tṍó e gé kólí nen domá nònù, éé ní eé kọ́ nèe kọbé pọ̀ náa sííe é? (Ẹ̀b nàgé fòtó.)

⁹ Pọ̀ ólò sii sìgà gbò ge sí bẹẹ gbò nònù boo béè kọọ̀ bà doomà kọ bà é kọ́ bàá duè Neǹ Ditõ̀ò Jìhóvà. Vóà naa, naa kọ nená á nyimá kọ nyíéi ólò ẹẹ tṍó e dõona gbò sí bẹẹ gbò nònù, vaá née ólò tú bá kpóó siimá tọ́ọ̀ nen kọ á dú Neǹ Ditõ̀ò Jìhóvà. Òé láá naa nagé kọ á nyimá kọọ̀ è ólò zaava ló kọ̀láá nen, kọbèè pá tọ e bà íe gbò pá nvín. Nè ge kọ gbẹá bẹẹ gbò nònù, gbò pá nvín nè gbò kànen ólò gbá ĩìtẽ́ tẽ̀ènè ketõ̀ò nó nu. Vó ólò naa kọ gbò tẹ̀ nè kà á nyimá kĩée e ba nvín dì, nè nú e bà gé nó. (Dìt. 31:12) Née ólò kọ gbò e bà dú bẹẹ nònù á tẹlẹ̀ kpègè, tãa vó è ólò tõó boo dùùlà bá deè tṍ Jíízọ̀s ea kọ́ọ̀: “O beè iei pọ́ì, nei pọ́ì.” (Máát. 10:8) Òé láá kọ nagé nèe kọ náa dú bíi kọ á nvèà nú ea palàge sí kpègè domá nònù, boo béè kọ Bàrì ólò ẹ̀b nú ea di mm̀ nyíè nen, níì bé e nen meà naa nì.​—1 Sám. 16:7.

¹⁰ Be nená dú nònù, pììgà ge naa nú ea é náa kọ lóóe á dĩ̀ìnà. Dòe bá nè gbò kànen, bií ló pá vígà. Àé láá tàn nená gè dú dõona tóm, be à mon kọọ̀ pá vígà tú lé bá tuumàèe. Be náa íe Kpá Káí, ẹ̀ẹ̀là o Kpá Káí naa ní ea é zọ́ ni ẹ̀b dẽe, vaá ò nveè bá nèe kọ á dã́ ból ló bel e nen ea gé ne lòbèla gé ló, nè bé e ólò nó nu naa.

NÚ EO É NÁA TṌÓ EO GÉ DAAMÀ TOGÓ GÈ NOOMÀ KPÁ KÁÍ NEN

11. Mósĩ́ deè ní eé láá zogè kọ è nyímà kọọ̀ nen e gé nóòmà Kpá Káí náa íe gã́bug tṍó ẽ́?

¹¹ Éé ní eé sẹẹa bùlà tṍó e gé zọ nen noá Kpá Káí é? Nyimá kọ nen eo gé nóòmà nuá náa íe gã́bug tṍó. Dì belí nu dòòmà bá, be o beè bilai ló tṍó eo é nóomai nu, iná kĩá boo tṍó kọbèè à gá náa vaá gbò e bà di bálásĩ́ kĩée eo dì náa ólò naa nú boo tṍó. Gbá ló vó, àé dú lé be ò tú bọọ nònù naamá ńkpulu dẽe túá tṍó eo gé zọ́ẹ noá nu. Sìgà pá vígà e bà ni nóòmà Kpá Káí gã́bug nen kọ́ọ̀ à palàge dú lé gè tú bẹẹ nònù naamá ńkpulu dẽe, kọbèè à gá náa vaá à tàn nen e gé nóòmà Kpá Káíá gè nó kilma sĩ́. Ó gá ló gbele tõ̀ò bel, sọ̀tọ́ deè kọ nen eo gé nóòmà nuá á kọ́ a bùlà.​—Pró. 10:19.

12. Éé ní eé piiga boo gè naa tṍó e daamà togó gè noomà Kpá Káí nen ẽ́?

¹² Tṍó e daamà togó gè noomà Kpá Káí nen, èé piiga boo gè nvèè bá nèe kọ á palàge nyimá ló Jìhóvà nè Jíízọ̀s vaá vùlè va. Kọbé è láá naa vó, àé dú bíi kọ é zogè va dọ̀ Kpá Káí e gbò nú e gé nóòmà vaá aa m. (Tóm 10:​25, 26) Neǹ tóm Pọ́ọ̀l beè zogè kà lé nu dòòmà bá kilma ló níí tṍó ea géè noomà nuù gbò nen, a beè kolí va bùlà nyòòmà Jíízọ̀s Kráìst e Bàrì beè lẹ̀ẹ̀là kọ á nvèè bá nèi naa ní eé nyímàèe ló vaá vulèèe. (1 Kọ́r. 2:​1, 2) Pọ́ọ̀l beè naa kọ bàá nyimá kọ à dú bíi kọ bàá nvèè bá nè gbò e bà ã́àa nyoone nvéè Kráìst kọ bàá toní gbò lé kpãa eé láá doolé ló ẹ́ẹ́ kpé, nóò kpé, nè kpòdem ea sí kpègè. (1 Kọ́r. 3:​11-15) Gbò kpãaá dú zìgà, nyìmànù, tàvẹ̀nù, nè síìà pọ̀ Jìhóvà. (Ps. 19:​9, 10; Pró. 3:​13-15; 1 Pít. 1:7) Òé láá nó bé e Pọ́ọ̀l beè noomà nu naa tení dú ló gè nvèè bá nè nen eo gé nóòmà Kpá Káí kọ á ié agẹ zìgà, nè kà lé gbaa ló kilma ló a Tẹ̀ Jìhóvà ea íe vulè.​—2 Kọ́r. 1:24.

13. Mósĩ́ deè ní eé láá ié ĩ̀ìmà vaá zogè kọ è dã́à ból ló gbò e gé nóòmà Kpá Káí é? (2 Kọ́rìnt 10:​4, 5) (Ẹ̀b nàgé fòtó.)

¹³ Nó bé e Jíízọ̀s beè ié ĩ̀ìmà vaá dã́ ból ló gbò nen naa tṍó eo gé nóòmà Kpá Káí nen. Ó gá bĩináe bíb ea é síìmàe kẹ́ẹ. Be à válí, òé láá zẹ́ẹ́ aalíí ló kĩée ea tavàlàẹ ló gè dã́ ból ló, vaá ò kólíe bùlà nyòòmà dõona tṍó. Tãa vó eo bénìe kọ á zìgà gbò nú eo gé nóòmàe, sọ̀ẹ tọ́ deè kọ á tú tṍó bùgmà togó boo gbò nú ea gé nó. (Jṍòn 16:12; Kọ́l. 2:​6, 7) Kpá Káí tú kyáá nòòmànù e gé bé boo gè lọa m doolé ló gbele agẹ gbọọ ea “élí lóó boo vaá kpega deè gbò nen kọ bàá gá nyimá ló Bàrì,” vaá à dú bíi kọ é ‘tãa bá uú kẽ.’ (Bugi 2 Kọ́rìnt 10:​4, 5) Àé láá tavala ló nen eo gé nóòmà Kpá Káí gè sọ̀bá nú ea ni ziga ló mm̀ gã́bug gbáá. Vóà naa, èé láá nvèè bá nè nen e gé nóòmà Kpá Káíá kọ á dẹlẹ nyíé boo Jìhóvà.​—Ps. 91:9.

NVÈÈ BÁ NÈ NEN EA Ã́ÀA SÍ NÒNÙ

14. Móbá ní eé sẹẹmà gbò e bà ã́àa sí nònù ẽ?

¹⁴ Jìhóvà gbĩ́ kọ é tú lé bá sẹ̀ẹ̀mà dénè nen e bè náa dẹẹa boo kĩée e bà aà, ba nàànù kunukẽ̀, àbèè bé e bà íe kpègè naa. (Jém̀z 2:​1-4, 9) Vóà naa, mósĩ́ deè ní eé láá zogè kọ è vulè gbò e bà ã́àa sí nònù ẽ?

15-16. Mósĩ́ deè ní eé láá naa kọ lóó nen ea ã́àa sí nònù á dĩ̀ìnà ẽ?

¹⁵ Sìgà gbò ólò dú nònù boo béè kọ bà gbĩ́ gè mòn bé e ólò sẹlẹ bẹẹ gbò nònù naa, àbèè kọ ba kóò, ba dúà ló, àbèè nen ea ólò tõó dõona ketõ̀ò beè siè va kpóó ló kọ bàá sí nònù. Vóà naa, à dú bíi kọ é zọ̀ ãa nen ea dú nònù loá bel, zààvà vá ló boo bá ea bọ́ló, kọ́ nè va kọ bàá ĩìitẽ́ kpàn, vaá è ẹẹlà bẹẹ Kpá Káí àbèè kpá e gé nó gbẹá nònù naa ní e bà é zọ́i ẹ̀b dẽe àbèè è né va ní e bà é ẹb dẽe. Nagé, bugi togó boo dõona kà gbò nú eo é láá naa kọbé lóó va dĩinà. Ene kà gbálà ea beè dú bẹẹ nònù beè kọ́ nè ene kà vígà págbálà ea beè zààvàẹ ló kọ kẹ́ẹ síìlìèe, boo béè kọ nú ea nveàè náa dú lé belí níí dõona gbò. Vígà págbálàa beè naa kọ lóóe á dĩ̀ìnà vaá kọ́ nèe kọọ̀, kọbèè à gá náa è nvèà lé nu dú nònù, tọ́ọ̀ kà kele á gé zẹ̀ẹ̀ gbò e bà náa nveà lé nu nè bẹ̀ì. Gbálàa beè sìm kilsĩ́ tṍó e tṍó téní vaá dììa múú, sõò bé e vígà págbálàa beè naa kọ lóóe á dĩ̀ìnà túá deé ea sí nònùa naa náa beè táẹ́ nyíe. Tṍó e gé zọ ãa nen ea dú nònù loá bel besĩ́ è kalá dààmà togó nònù àbèè tṍó e nònù ni zaalà, à dú bíi kọ é ọẹ̀ dẽe kọbé née bĩ́ìnàe gbò bíb ea é síìmàe kẹ́ẹ.​—1 Pít. 4:15.

¹⁶ Èé láá naa nagé kọ lóó gbò e bà ã́àa sí nònù á dĩ̀ìnà tṍó e zógè kọ è fãà va dẽe tení dú ló gbò bel e lóò tṍó e gé zọ́va loá bel, tṍó e gé áálá bíb, nè bá e lóòmà bel kilma ló nú e gbò e bà náa ólò sí nònù ziga ló. Née é ló gbò bel ea é nveè va súng naa ní e bà náa é dú ná nònù dõona tṍó. (Táítọ̀s 2:8; 3:2) Dì belí nu dòòmà bá, née é ló bel ea kil ló nú e bà ziga ló boo bá e bè náa bọ́ló. (2 Kọ́r. 6:3) Vóà naa, vígà págbálà ea gé ne lòbèl kèsĩ́ gbò nen á palàge ié ọ̀ẹ̀ dẽe ló bel ea é ló. À dú bíi kọ á sẹ̀ẹ̀a bùlà kọọ̀ àé láá ié gbò e bà náa ólò sí nònù e bà dìí zẹ̀ẹ̀, vóà naa, à bọ́ló kọ á baatẽ́ gbò moǹ bel ea é tavala ló gbò e bà náa ólò sí nònù ge dã́ ból ló.

17. Éé ní eé sẹẹa bùlà tṍó e gé gbĩ́ “gbò e bà íe lé bùlà nyòòmà ge dã́ Moǹ Bel Bàrì” tṍó e gé kọ́ kpẹ̀a ẹ́?

¹⁷ Bé e dee gé téní naa, níà bé ea kpáá dú bíi kọ é kọ́ kpẹ̀a nè gã́bug nen naa ẽ́. Vóà naa, èé kilsĩ́ gè gbĩ́ “gbò e bà íe lé bùlà nyòòmà ge dã́ Moǹ Bel Bàrì.” (Tóm 13:48) Tṍó e monì va, née é pee tṍó ló gè noomà va Kpá Káí àbèè ge kolí va domá nònù. Ge naa vó é nveè bá nè va kọ bàá tení boo “èèlè ea é náa kọ bàá ié dùm.”​—Máát. 7:14.