Jeremias
43 Jeremiasan soglea lokank tim soglim utram sanglim, jim tancho Dev Jehovan taka sanglolim. Jednam tannem tankam tem dor ek utor sanglem jem Jehova Devan taka sangonk dhaddlolo, 2 tednam Hoshaiacho put Azarian, Kareacho put Johananan, ani soglea gorvixtt munxamnim Jeremiasak mhunnttlem: “Tum jem sangta tem fott zaun asa! ‘Ejipttant ravonk vochom nakat,’ oxem sangonk Jehova amchea Devan tuka dhaddunk na. 3 Punn ami Kaldeikaranchea hatant poddche, tannim amkam jivexim marche, vo amkam koidi korun Babilonant vhorche mhunn Neriacho put Baruk tuka amchea add uksaita.”
4 Tor Judantuch ravonk Jehovan dilʼli adnea, Kareacho put Johananan, soglea senapotimnim ani soglea lokamnim aikonk na. 5 Tachea bodlek, Kareacho put Johananan ani soglea senapotimnim Judachea urlolea lokank aplea sangata vhele. He veg-vegllea raxttramnim ximpddolʼle lok asle, je Judant ravonk porot ailʼle. 6 Tannim aplea sangata dadleank, bailank, bhurgeank, ani razachea dhuvank ani tea sogleank vhelim, zankam rakhonndaracho mukheli Nebuzaradanan, Ahikamacho put ani Shafanacho natu Gedaliachea odhikara khala dovorlolim. Tea bhair, tannim Jeremias provadeak ani Neriacho put Barukak pasun aplea sangata vhelo. 7 Ani te Jehovachi adnea moddun Ejiptt desant gele. Te pois, Tafanes meren gele.
8 Magir, Tafanesant Jehovacho ho sondex Jeremiasak mellʼllo: 9 “Tum tujea hatant vhoddle-vhoddle fator ghe ani te Tafanesant, Faraoh-chea ghorachea bhitor sortat thoim, vitteamnim toiar kelʼlea paim-vatter lipoi ani voilean chuno lai. Judev munxanchea nodre mukhar te lipoi. 10 Uprant tum tankam oxem sang, ‘Izraelacho Dev, fouzancho Dev Jehova oxem mhunntta: “Atam hanv mhozo sevok, Babilonacho raza Nebukadnezarak* apoun haddttam. Hanv tachem xinvason, heach fatrancher dovortolom je hanvem lipoileat, ani to tancher aplo tombu* ubartolo. 11 To ietolo ani Ejipttacher akromonn kortolo. Zanchea pasot jiv gheta tosli pidda nemlea te jiv gheupi pidden mortole, zanchea pasot gulamponn nemlam te gulamponnant voitole, ani zanchea pasot tolvar nemlea te tolvarin mortole. 12 Hanv Ejipttachea devanchea ghorank* uzo laitolom. To tim ghoram lasoun uddoitolo ani tanchea devank koident vhortolo. Jitle sompeponnim ek gonvlli aplo lamb kopddo apleak guttlaita ani thoinchean voita, titlech sompeponnim to Ejiptt des aplea tabeant ghetolo, ani surokxit* porot voitolo. 13 To Ejipttant aslolea Beth-shemeshachea* khambeanche kuddkean-kuddke korun uddoitolo, ani Ejipttantlea devanchim ghoram* lasoun uddoitolo.”’”