Jeremias
10 Izraelachea ghorannea, Jehovan tumchea add kitem sondex dila to aik. 2 Jehova oxem mhunntta:
“Raxttranchea lokancheo vatto xikom nakat,
Mollba voileo khunna polloun,
Raxttram bhietat mhunn tumi bhienakat.
3 Karonn veg-vegllea desachea lokancheo riti-rivazo kainch upeogacheo nant.
Kola aslolo ek kamdar ranant vochon zhadd katrun haddtta,
Ani aplim sadhonam uzar korun taka murtecho akar dita.
4 Te tika chandi ani bhangar ghalun nettoitat,
Ani ti poddona zaunk, hatodden khille marun tika ghott bosoitat.
5 Tovxeachea xetant ubo kelʼlea bavlea sarkeo teo ulounk xokonant,
Tankam uklun vhorchem poddtta karonn teo cholonk xokonant.
Tankam bhienakat, karonn teo kainch vaitt korunk xokonant,
Toxench teo kainch borem pasun korunk xokonant.”
6 Jehova Deva, tujea sarko konnuch na.
Tum vorto, ani tujem nanv vortem ani xoktivont asa.
7 Raxttranchea Raza tuka konn bhieunchona, karonn tuji bhirant dhorop sarkem zaun asa.
Karonn raxttramnim ani tanchea soglea rajeamnim jitle zannar asat,
Tanchea modlo eklo-i tujea sarko na.
8 Te sogle somjikai naslole ani murkh.
Eka zhadda koddlean melltta ti xikounn kainch upeogachi na.
9 Tanchea pasot Tarshisha thaun chandi ani Ufaza thaun bhangar haddttat,
Jem kola aslolo kamdar ani dhatucher kam korpi kamdar lakddachea murtecher bhailean laitat.
Te tankam nillea sutache ani zambllea vulache kopdde ghaltat.
Heo sogleo murteo bori kola aslolea kamdaramnim toiar keleat.
10 Punn Jehovach khoro Dev zaun asa.
To jivo Dev ani sasnacho Raza zaun asa.
Tachea ragak lagon prithum haltoli,
Ani tachea krodha mukhar khoinchench raxttr ttikon urchem na.
11 *Tum tankam oxem sang:
“Jea devamnim mollob ani prithum rochunk na,
Te prithume voile ani mollba voile nanch zatole.”
12 Tannench aple xokten prithum rochli,*
Aplea zannvaien borem pik dita tosli zomin toiar keli,
Ani aplea somjikaien mollob posrailem.
13 To avaz korta tednam
Mollba voilem udok uchamboll zata,
Ani to prithumechea konnxea-konnxeam thaun kupam voir choddom-xim korta.*
To pausa pasot zoglam marum-xim korta,*
Ani tachea gudanvantlean vadoll bhair haddtta.
14 Dor ek munis somjikai ani ginean naslolea porim vagta.
Dhatucher kam korpi dor eka munxak apnnem kantoun kelʼlea murtek lagon loz bhogchi poddttoli.
Karonn tachi dhatuchi murti* ek fott zaun asa,
Ani tankam jiv* na.
15 Teo kainch upeog nasloleo,* fokot fokannam kori-sarkeo asat.
Tanche koddlean hixob gheuncho dis ietolo tednam, tancho nas zatolo.
16 Jakobacho Vantto hea vostum bhaxen nhoi,
Karonn tannench dor ek vost ghoddlea,
Ani Izrael tachea daizacho danddo.
Tachem nanv fouzancho Dev Jehova.
17 Age gherav ghatlole baile,
Tuji khattli-pottli ubar.
18 Karonn Jehova oxem mhunntta:
“Hea vellar, hanv hea desant ravpi lokank bhair kaddun uddoitolom,
Ani hanv tancher sonkoxtt ieum-xem kortolom.”
19 Mhojer hai, karonn mhaka mar lagla!*
Mhozo ghavo pekonk xokona.
Ani hanvem mhunnttlem: “Hem mhojem duens ani hanvem tem sosunkuch zai.
20 Mhojea tombucho nas zaun gela, ani tacheo dorio katrun uddoileat.
Mhojea putamnim mhaka soddun dila.
Mhozo tombu ubo korunk vo tachem lugott posraunk konn na.
21 Karonn gonvlli okʼkol naslolea bhaxen vagle,
Tannim Jehovachi khuxi zannam zaun gheunk na.
Taka lagon, te kholaieche somjikaien vagonk nant,
Ani tanche sogle hindd hevtten-tevtten ximpoddleat.”
22 Aikat! Ek khobor mellʼllea! Dusman ieta!
Utʼtorechea desa thaun tachea panvlancho vhodd avaz aikonk ieta,
To Judachea xarank padd korun koleanchi* dhol korunk ieta.
23 Jehova Deva, apli vatt vinchun kaddunk munxachea hatant na mhunn hanv zannam.
Aplim panvlam nitt vatter ghalunk pasun taka tank na.
24 Jehova Deva, nit korun mhaka sudhrai,
Punn ragan nhoi, na zalear mhozo nas zaun voitolo.
25 Tujea krodhacho pelo tea raxttrancher votoi, jim tuji beporva kortat,
Tea familincher votoi, jeo tujem nanv gheun tuka ulo marinant.
Karonn tannim Jakobak gillun uddoila,
Hoi, tacho purnn toren nas zai meren tannim taka gillun uddoila,
Ani tacho des padd korun soddla.