સંમેલન માટેનાં સૂચનો
કાર્યક્રમનો સમય: હૉલના દરવાજા દરરોજ સવારે ૮:૦૦ વાગ્યે ખુલશે. ત્રણેય દિવસ કાર્યક્રમ શરૂ થતા પહેલાં સવારે ૯:૨૦ મિનિટે સંગીત વગાડવામાં આવશે. એ સમયે બધાએ પોતાની જગ્યાએ બેસી જવું જોઈએ, જેથી કાર્યક્રમ સારી રીતે શરૂ થઈ શકે. શુક્ર-શનિનો કાર્યક્રમ આશરે સાંજે ૫:૦૦ વાગ્યે અને રવિવારે સાંજે ૪:૦૦ વાગ્યે પૂરો થશે.
‘ગીતોથી યહોવાની ઉપકારસ્તુતિ કરીએ’: પ્રાચીન સમયમાં ઈશ્વરના લોકો ગીતોથી યહોવાની સ્તુતિ કરતા. આજે પણ સંગીત આપણી ભક્તિનો મહત્ત્વનો ભાગ છે. (ગીત. ૨૮:૭) આપણા મહાસંમેલનના દરેક સત્રની શરૂઆત સંગીતથી થાય છે. એ કંઈ સામાન્ય સંગીત નથી. પરંતુ, યહોવા વિશે શીખવા અને તેમની ભક્તિ કરવા માટે તૈયાર કરવામાં આવ્યું છે. એટલે, ચૅરમૅન જ્યારે જાહેરાત કરે કે, સંગીત શરૂ થવાની તૈયારીમાં છે, ત્યારે આપણે પોતાની જગ્યા પર બેસી જઈએ. તેમ જ, વાતચીત કરવાને બદલે સંગીતને ધ્યાનથી સાંભળીને એના માટે કદર બતાવીએ. એમ કરીને, આપણે વોચટાવર ઑરકેસ્ટ્રાના સભ્યોની મહેનત માટે કદર બતાવીએ છીએ. આપણે મધુર સંગીતનો આનંદ માણી શકીએ માટે આ ભાઈ-બહેનો પોતાને ખર્ચે વર્ષમાં બે વાર પેટરસન, ન્યૂ યૉર્ક જાય છે. સંગીત સાંભળ્યા પછી, દરેકે યહોવાની સ્તુતિ કરવા ગીતો ગાવામાં જોડાવવું જોઈએ.
પાર્કિંગ: સંમેલનના દરેક સ્થળે આપણે જ પાર્કિંગની સંભાળ રાખીએ છીએ. તેમ જ, પાર્કિંગ ફ્રી છે. જેઓ ત્યાં વહેલા પહોંચશે, તેઓને જગ્યા મળશે. પાર્કિંગની જગ્યા મોટા ભાગે ઓછી હોવાથી, કારમાં ફક્ત એક-બે વ્યક્તિ આવવાને બદલે કાર ફુલ હોય તો વધારે સારું.
વધારે સીટ ન રોકો: રોજ સવારે હૉલનો દરવાજો ખૂલે ત્યારે મનપસંદ સીટો રોકવા માટે હરીફાઈ કરતા હોય એમ દોડશો નહિ. બીજાનું ભલું ઇચ્છતા હોઈશું તો આપણે એ રીતે વર્તીશું. એનાથી ઓળખાઈ આવશે કે આપણે ઈસુનાં પગલે ચાલીએ છીએ અને બહારના લોકો એ જોઈને ઈશ્વરને મહિમા આપશે. (યોહા. ૧૩:૩૪, ૩૫; ૧ કોરીં. ૧૩:૫; ૧ પીત. ૨:૧૨) તમારાં કુટુંબીજનો અથવા તમારી જોડે વાહનમાં આવતા હોય કે હાલમાં તમારી સાથે બાઇબલ અભ્યાસ કરતા હોય તેઓ માટે જ સીટ રોકી શકો. ખાલી સીટ પર તમારી કંઈ પણ વસ્તુ રાખશો નહિ. એનાથી બીજાઓને બેસવા જગ્યા મળશે. વૃદ્ધ અને અપંગો માટેની મર્યાદિત સીટ હોય છે. તેથી, કુટુંબના બધા જ તેમની સાથે બેસી શકે એ શક્ય ન પણ હોય. જોકે, તેઓને મદદ કરનાર એક કે બે લોકો તેમની સાથે ત્યાં બેસી શકે.
શોભતો પહેરવેશ: સંમેલનમાં યહોવાના સેવકોને શોભે એવો પહેરવેશ હોવો જોઈએ. આપણો પહેરવેશ વધુ પડતો ફેશનેબલ ન હોવો જોઈએ. (૧ તીમો. ૨:૯) હોટલમાં આવીએ કે બહાર જઈએ, અથવા સંમેલન પહેલાં કે પછીના સમયે પણ આપણો પહેરવેશ લઘરવઘર ન હોય એનું ધ્યાન રાખીએ. આમ, આપણને સંમેલનનું બેજ કાર્ડ પહેરી રાખવામાં શરમ નહિ આવે. તેમ જ, તક મળે ત્યારે લોકોને સાક્ષી આપતા અચકાઈશું નહિ. આપણા દેખાવ અને વાણી-વર્તનથી નમ્ર દિલના લોકો પર જીવન બચાવનાર સંદેશાની ઊંડી અસર થશે. એટલું જ નહિ, યહોવાના દિલને પણ આનંદ થશે.—સફા. ૩:૧૭.
ઇલેક્ટ્રોનિક સાધન વાપરતી વખતે બીજાઓનું ધ્યાન રાખીએ: કાર્યક્રમ દરમિયાન, મોબાઇલ કે બીજા ઇલેક્ટ્રોનિક સાધનો એવી રીતે એડજેસ્ટ કરવા જોઈએ જેથી, બીજાઓને ખલેલ ન પહોંચે. તમે તમારી સીટ પરથી કૅમેરા, વીડિયો રેકોર્ડર કે ટેબ્લેટ જેવાં સાધનો વાપરી શકો. પરંતુ, કોઈને કાર્યક્રમ જોવામાં દખલ ન થાય એનું ધ્યાન રાખજો. કાર્યક્રમ દરમિયાન જરૂર વગર મૅસેજ કે ઈ-મેઇલ કરશો નહિ.
બપોરનું ભોજન: બપોરે જમવા માટે પોતાની સાથે કંઈક લઈને આવો, જેથી સંમેલન છોડીને બહાર જમવા જવું ન પડે. તમે નાની બેગમાં જમવાનું લઈ આવો, જેથી એ ખુરશી નીચે સહેલાઈથી આવી શકે. મોટાં ટિફિન કે ડબ્બા અને કાચનાં વાસણો લાવશો નહિ.
દાન: મહાસંમેલનના સ્થળે તમે રાજીખુશીથી દાન આપીને એ ગોઠવણ માટે કદર બતાવી શકો. એ જગતવ્યાપી કાર્ય માટે વપરાશે. તમે ચૅક લખવાના હો તો, “The Watch Tower Bible and Tract Society of India”ના નામે લખો. અમુક જગ્યાએ તમે ક્રૅડિટ અથવા ડેબિટ કાર્ડથી પણ દાન કરી શકો.
દવા: તમે કોઈ દવા લેતા હો તો સાથે લાવજો, કેમ કે એ સંમેલન સ્થળે મળશે નહિ. સંમેલનની કે હોટેલની કચરાપેટીમાં ડાયાબિટીસના ઇન્જેક્શન નાંખવા નહિ, કેમ કે એનાથી બીજાને નુકસાન થઈ શકે. એનો બરાબર રીતે નિકાલ કરો.
સાવચેતી રાખો: લપસીને કે ઠોકર ખાઈને પડી ન જવાય એનું ધ્યાન રાખજો. ઑડિટોરીયમ હૉલમાં બાળકો દોડાદોડી ન કરે એનું ધ્યાન રાખો. જોવા મળ્યું છે કે દર વર્ષે બૂટ-ચંપલ અને સૅન્ડલને લીધે કોઈને કોઈ અકસ્માત થાય છે, ખાસ કરીને ઊંચી એડીના. એટલે તમારા બૂટ-ચંપલ એવા ન રાખો કે ચાલવા કે ચઢવા-ઊતરવામાં તકલીફ પડે કે પડી જવાય.
બાબાગાડી અને આરામ ખુરશી: બાબાગાડી અને આરામ ખુરશી સંમેલનમાં લાવશો નહિ. નાના બાળકની સલામતી માટે પટ્ટાવાળી ખાસ પ્રકારની ખુરશી લાવો તો, તમારી બાજુમાં જ રાખો.
પરફ્યુમ: મોટા ભાગે સંમેલનો બંધ હૉલમાં રાખવામાં આવે છે, જ્યાં પંખા કે એ.સી. હોય છે. તેથી, આપણે તેજ પરફ્યુમ કે અત્તરનો ઓછા પ્રમાણમાં ઉપયોગ કરીએ તો સારું. એનાથી જેઓને ઍલર્જી કે શ્વાસની તકલીફ હોય તેઓને ઓછી મુશ્કેલી પડશે.—૧ કોરીં. ૧૦:૨૪.
પ્લીઝ ફૉલો અપ (S-૪૩) ફૉર્મ: સંમેલનના દિવસોમાં કોઈ પણ તકે પ્રચાર કરતા, તમને કોઈ રસ ધરાવતી વ્યક્તિ મળે તો પ્લીઝ ફૉલો અપ ફૉર્મ ભરો. ફૉર્મ ભરીને ત્યાં સાહિત્ય વિભાગના ભાઈઓને અથવા તમારા મંડળના સેક્રેટરીને આપો.
રેસ્ટોરન્ટ: યહોવાને મહિમા મળે એવાં વાણી-વર્તન રાખીએ. શોભતાં કપડાં પહેરીએ. રિવાજ હોય એ મુજબ ટીપ આપીએ.
હોટલ:
તમને જરૂર હોય એટલા જ રૂમ બુક કરો. મંજૂરી આપી હોય એનાથી વધારે લોકોને તમારા રૂમમાં રાખશો નહિ.
ઇમરજન્સી વિના હોટલનો રૂમ કેન્સલ ન કરવો અને કરવો પડે તો વહેલી તકે હોટલના મેનેજરને જણાવો, જેથી એ રૂમ બીજા કોઈને મળી શકે. (માથ. ૫:૩૭) રૂમ કેન્સલ કરવો પડે તો, કેન્સલ થયાનો નંબર મળે એની ખાતરી કરો.
જો તમે ડેબિટ કે ક્રૅડિટ કાર્ડથી હોટલનો રૂમ બુક કરવાના હો, તો આ બાબત ધ્યાનમાં રાખો: ઘણી હોટલમાં રૂમ બુક કરતી વખતે ભાડા સાથે અમુક વધારાની રકમ કાપી લેવામાં આવે છે. એટલા માટે કે તમારા રહેવા દરમિયાન જો કોઈ વધારાનો ખર્ચ થયો હોય કે પછી કોઈ નુકસાન થયું હોય, તો એ રકમમાંથી વસૂલ કરી શકે. હોટલનો હિસાબ ચૂકતે થયા બાદ તમને બાકીની રકમ પાછી મળશે, જે માટે હોટલ છોડ્યા પછી અમુક દિવસો પણ લાગી શકે.
કાઉન્ટર પરથી ટ્રૉલીમાં તમારો સામાન રૂમમાં લઈ જવો હોય તો જ એનો ઉપયોગ કરજો. પછી એને કાઉન્ટર પર તરત પાછી મૂકી આવો, જેથી બીજા પણ એનો ઉપયોગ કરી શકે.
તમારા વિસ્તારમાં ટીપ આપવાનો રિવાજ હોય તો, હોટલમાં સામાન ઉપાડનારને ટીપ આપો અને રૂમની સફાઈ કરનાર માટે રોજ ટીપ રાખો.
રૂમમાં રસોઈ બનાવવાની મનાઈ હોય તો એમ કરશો નહિ.
અમુક માલિકો, પોતાની હોટલમાં રહેનારાઓ માટે મફત ચા-નાસ્તો, કૉફી અને બરફની વ્યવસ્થા કરે છે. એનો ખોટી રીતે ફાયદો ન ઉઠાવો.
હોટલના સ્ટાફે ઘણા લોકોની સંભાળ રાખવાની હોય છે. તેથી, હંમેશાં સારા ગુણો બતાવો. જેમ કે, માયાળુ બનો, ધીરજ રાખો અને સમજી-વિચારીને વર્તો.
હોટલની દરેક જગ્યાએ માબાપે પોતાનાં બાળકોની દેખરેખ રાખવી જોઈએ. જેમ કે, લિફ્ટ, સ્વિમિંગ પૂલ, લૉબી અને એક્સર્સાઇઝ રૂમ કે બીજી કોઈ પણ જગ્યાએ.
હોટલના લિસ્ટમાં આપેલા રૂમના ભાવ એક આખા દિવસ માટે છે. એ ઉપરાંત એના પર થતો ટૅક્સ આપવાનો રહેશે. તમારા બીલમાં બીજો કોઈ વધારે ચાર્જ કર્યો હોય તો, એ આપશો નહિ. રૂમીંગ વિભાગને એના વિશે શક્ય એટલું જલદી જણાવો.
હોટલના રૂમને લઈને તમને કોઈ મુશ્કેલી હોય તો સંમેલનમાં જ રૂમીંગ વિભાગને એ વિશે જણાવો, જેથી તેઓ જરૂરી મદદ પૂરી પાડી શકે.
સ્વયંસેવા વિભાગ: સંમેલનના સ્વયંસેવા વિભાગને જણાવો કે તમે કોઈ કામમાં મદદ કરવા માંગો છો. ૧૬ વર્ષથી નાનાં બાળકો પણ માબાપ કે અન્ય જવાબદાર વ્યક્તિ અથવા માબાપે જવાબદારી સોંપી હોય એવી વ્યક્તિની દેખરેખ હેઠળ કામ કરી શકે.