Niʼiküin Jesús na nikirajüinkana sünain oʼuraajaa

Aainjashii neʼe kasa anasü na fariseokana süpüla neʼnnüin sutuma wayuu. Jamüshiijaʼa noʼuraajüle, naaʼinrüin shia suʼupala watta saalii wayuu. Neitirakuʼu namüsü tü nanüikikat sünain oʼuraajaa suluʼu tü ekirajüleekalüirua jee suluʼu tü wopukot süpüla saapünüin nanüiki sutuma wayuu. Süka müin nakuwaʼipa na fariseokana, ponusü saaʼin tü wayuukalüirua müin nünüiki Jesús: «Wanaa sümaa juchuntuin nümüin Maleiwa, nnojo müin aka jia nakuwaʼipa na fariseokana. Anasü maʼin tü nakuwaʼipakat nuʼupala Maleiwa naaʼinruʼu süka anain maʼin nanüiki. Nnojotpajaʼa anain tü naaʼinrakat noʼuluʼu Maleiwa. Wanaa sümaa juchuntuin nümüin Jehová, nia neʼe niakai chi juchuntajachikai amüin, nnojo jiitirakuʼu müin jünüiki. Jüküja nümüin Jehová tü suluʼukat jaaʼin».

Nüküjaleein Jesús namüin na wayuukana jamüinjatüin nanüiki noʼuraajapa. «Taata Maleiwa chakai sirumatuʼu, wule putuma tü pünüliakat. Wachuntuin pümüin puluwataainjachin saaʼu tü Mmakat. Saainjüna tü keeʼireekat paaʼin yaa mmapaʼa maʼaka saainjünüin chaa iipünaa», nümaka. Nüküjain Jesús nachuntajanain nümüin Maleiwa süpüla naapüin tü neküinjatkat otta süpüla motuinjatüin naaʼin naainjala otta nachuntajanain süpüleerua waneirua kasa.

Anuu sooʼomüin nünüiki Jesús: «Anakajaʼa müleka juchuntule kasa anasü nümüin chi Jüshikai Jehová waneepia. ¿Jamüsü jukuwaʼipa jiakana namüin jüchonnii? Maʼaka nuchuntule pümüin wanee pan chi püchonkai, ¿paapeerü wanee ipa nümüin? Nnojottaa. Jama nuchuntule wanee jime, ¿paapeerü wanee wüi nümüin? Nnojottaa».

Nüküjaka Jesús atüjeenain waya sünainjee tü nünüikikat: «Eerejeʼe neʼe wayuuin kaainjaralii jia, atüjashii jia asülajaa kasa anasü namüin na jüchooinkana. Nialeekajaʼa chi Jüshikai Maleiwakai chakai iipünaa, alanaʼaleeshia maʼin sünain anamiain jümüin. Naapeerü tü nüpülainkat jümüin müleka juchuntule nümüin», nümaka. ¿Paaʼinrüinche tü nümakat Jesús? ¿Kasa puchuntaka nümüin Jehová puʼuraajapa?