Juulioʼu

Nia Jeʼwaa chi eʼitaakai sukuwaʼipa süpüla nujuʼitinnüin wanee anoujashi naʼakajee na wawalayuukana. Naainjain tia Jeʼwaa süka alin nüpüla na wawalayuukana jee alin nüpüla chi kaainjalashikai. Eeshiijaʼa süpüla eein wawalayuu mojushiikana amüin tü naneekakat na laülaashiikana nojuʼitirapa wanee anoujashi naʼakajee na wawalayuukana. Nnojoleetpejeʼe naküjain naya wawalayuukana tü mojukat nutuma chi kaainjalashikai. Soto waaʼin nnojoluin watüjaain saaʼu kasain maʼin wayu tü alatakat. Shia anaka aluʼu jülüjale waaʼin anain tü naneekakat na laülaashii outkajaakana nümaa chi kaainjalashikai, süka jamüin, naaʼinrüin tia wanaapünaa sümaa tü sümakat tü Bibliakat jee jülüjasü naaʼin tü nüchekakat Jeʼwaa nüpüleerua chi kaainjalashikai (2 Crón. 19:6). Jüüjüüle pia sümüin tü kasa naneekakat na laülaashiikana eeshi süpüla pükaalinjain chi kaainjalashikai süpüla nüleʼejüinjachin nüchikuaʼa nünainmüin Jeʼwaa. Anuu sünüiki Elizabeth: «Mayaainjeʼe nütaralaaichin chi wachonkai, aisü maʼin wamüin nnojoliin waashajaain nümaa. Shiasaʼa nüleʼejapa nüchikuaʼa nünainmüin Jeʼwaa, nüküjain wamüin anain tü kasa naaʼinrakat na laülaashiikana nüka jee wainmain kasa nütüjaka suluʼujee tia». w21.09 28 püt. 11, 12

Wainmaleje nneerü sümaʼana tü wayuu outa aʼwayuusetkat, asülajüsüje wainma nümüin Jeʼwaa. Mayaapejeʼe palitchon nneerü eejatka sümaʼana süsülajüin shia nümüin Jeʼwaa, nnojotsü saapüin mojusheeka. Nütüjaa aaʼu Jesuu kojutuin maʼin nümüin Jeʼwaa tü saaʼinrakat tia wayuukot. ¿Kasa watüjaka sünainjee tia? Talateechi Jeʼwaa sümaa tü waapakat nümüin müleka waaʼinrüle shia süka süpüshuaʼa waaʼin (Mat. 22:37; Col. 3:23). Talatüshi Jeʼwaa sümaa tü waaʼinrakat müleka nnojorüle waaʼinrüin shia mojusheeka. Jaʼitairü palitchon tü oora waküjakalü oʼu pütchi kojutusia nümüin. Otta kojutusü nümüin Jeʼwaa tü waaʼinrakat süpüla woutkajaainjanain. ¿Kasa eeka süpüla waaʼinrüin sünainjee tü watüjakat süchiki tü wayuu outa aʼwayuusetkat? Jülüja waaʼin waneinnua wawalayuu atütülaajeenaka aaʼin waküjale namüin talatüin Jeʼwaa sümaa tü kasa naaʼinrakat. Watütüleʼera naaʼin na wawalayuu laülaayuu nnojoliikana kasain anain apüla naashin süka isaitpain nachiki nojuʼitüin sünain aküjaa pütchi. w21.04 6 püt. 17, 19, 20

Nütüjaa aaʼu Jeʼwaa tü kaʼi anakalü oʼu süpüla najaʼlajeʼerüin tü kasa mojusü aainjünakat mmapaʼa. Süka nütüjain maʼin aʼatapajaa, watta maʼin naalii na wayuu aʼyataakana nümüin jee aʼwaajakana nia. Kojutusü maʼin namüin naya wayuukana nüchecherüin naaʼin Jeʼwaa suulia najaʼlajeʼerüin tü kasa mojusükat. Sümaʼinruʼu naʼatapajüin tia Jeʼwaa joʼuushii naya, aishi nia napüla jee naneeküin naʼyataainjanain nümüin. Woʼtteʼennapa nutuma Jeʼwaa atüjaaneerü aaʼu anain maʼin tü naaʼinrakat Jeʼwaa sutuma nüchecherüin naaʼin. Ayatüsia talatüin naaʼin Jeʼwaa mayaainjeʼe niʼrüin tü kasa mojusü eekat nutuma Satanaa (1 Tim. 1:11, TNM). Akaʼaya wayakana, eesü süpüla talatüin waaʼin sümaʼinruʼu waʼatapajüin kojutuinjachin Jeʼwaa sümüin wayuu süpüshuaʼa, sümaʼinruʼu sütüjaanüinjatüin aaʼu niain anakai süpüla aluwatawaa otta sümaʼinruʼu sajaʼttinnüinjatüin tü mojulawaakat jee tü müliaa weʼrakat. Ayataʼaya wachecherüin waaʼin maʼaka nüchecherüin naaʼin Jeʼwaa. w21.07 13 püt. 18, 19

Wainma wayuu ayoutaka Jesuu paala sümaiwa. Eeshii eekai namüin: «Nüchoin nia wanee wayuu maʼletsesai aʼyataakai süka taapüla». Jamüsüjaʼa tü mmakat Nazaret, mojutusalii amüin na wayuu kepiakana suluʼu. Anuu nünüiki Natanael, wanee anoujakai nünain Jesuu mapa: «¿Jeratuairü ajuittüin kasa anasü sünainjee wayuu eekai müin aka saaʼin tü wayuuirua kepiakat Nazaret eekai nnojolüin kasain anain apüla?». Eesüjaʼa nüküjale tia saaʼujee tü pütchi ekeraajüinjatkat suluʼu Miqueas 5:2, eere süküjünüin joʼuuinjachin chi Mesíaskai chaa Belén, nnojoluinjachin joʼuuin nia Nazaret. Nüküjatüjülia Isaías, wanee nünüikimaajachi Maleiwa, sünain nnojoluinjachin kachipünaain saaʼin wainma wayuu jaralin kooʼuliwoʼuin chi Mesíaskai (Is. 53:8; noota). Jamüshiijaʼa nekirajaale naya wayuukana süchiki tü pütchi ekeraajüinjatkat nünain Jesuu, nayaawatüinjee aaʼu joʼuuinjachin Jesuu chaa Belén otta niain chi nülüinkai David (Luc. 2:4-7). Joʼuushi Jesuu suluʼu tü mma aküjünatüjütkalia suluʼu Miqueas 5:2. Sutuma nnojoluin nekirajaain maʼin süchiirua tü pütchi ekeraajüinjatkat nünain Jesuu, mojusü nanüiki nüchiki otta nnojotsü nanoujain anain niain chi Mesíaskai. w21.05 2 püt. 4-6

Eeshii wayuu namaiwajana aapaakana amaa tü achiaanakalü oulia naya, anakalaka nakuwaʼipa nutuma Maleiwa. Wekirajaa süchiki nukuwaʼipa Job. Mayaainjeʼe nnojoluin lotuin maʼin nukuwaʼipa, keeʼireesü naaʼin talatüinjachin Maleiwa nümaa. Soʼunnaa niʼrüin maʼin nümüliala niweetirüin pütchi nnojotka anain maʼin, müshijeseʼe nüchiaanüin nutuma Elihú otta nutuma Jehová. Naapaain amaa Job tü achiaanakalü oulia nia süka nnojoluin yaletüin naaʼin. Anuu nünüiki: «Nnojotsü tayaawatüin saaʼu tanüiki [...]. Mojutaʼaleesüjaʼa taaʼin saaliijee tü tamakat pümüin». Anakalaka nukuwaʼipa Job nutuma Jehová süka nnojoluin yaletüin naaʼin (Job 42:3-6, 12-17). Nnojotsü yaletüin naaʼin otta naapaa amaa tü achiaanakalü oulia nia nutuma Elihú mayaainjeʼe tepichin nia nuulia Job (Job 32:6, 7). Nnojorüle yaletüin waaʼin waaʼinreerü tü münakat wamüin mayaasüjeʼe nnojoluin choʼujaain wamüin shia waaʼinruʼu, jaʼitasüjaʼa nüküjale wamüin tia wanee wayuu tepichikai woulia. ¿Jaraikaʼa joo nnojoluin choʼujaain amüin ashatüin nukuwaʼipa Maleiwa jee nükaalinjünüin süpüla nütüjain ekirajaa? w22.02 11 püt. 8; 12 püt. 12

Anajiraainjana waya wapüshuaʼa jee aijiraainjana waya namaa na wawalayuukana. Waaʼinrüle tia nnojoleechi eein waʼaka eekai müin nümüiwaʼakai naaʼin waneepia. Atütülaajeerü naaʼin wanee wawala sünainjee tü waaʼinrakat nüpüleerua jee tü wamakat nümüin. ¿Kasa waaʼinrajatka süpüla natüjaain saaʼu na wawalayuu manoujainkana apüshi alin naya wapüla? Aleewajiraainjana waya namaa na jekenakana. Wasaküinjana na jekenakana outkajaain wamaa otta kamaneeinjana waya namüin (Roma 15:7). Nnojoliinjana wasaküin neʼe naya, keeʼireeinjatü waaʼin aleewajiraainjanain waya waneepia namaa. Süpüla tia kapülainjatü waaʼin nakuwaʼipa. Süpüla wayaawatüin saaʼu tü alatakat namüin eeshii süpüla wasakirüin naya waneirua kasa. Eejüinjatpejeʼe waaʼin suulia neʼrüin naya japülii watuma. Eeshii na kapüleekana amüin naküjain jamüin naaʼin, nnojoluinjatpejeʼe wapüleerua naaʼin süpüla naküjain wamüin tü alatakat namüin. Eeshii süpüla wasakirüin naya süpüla natüjaain saaʼu kapülain waaʼin nakuwaʼipa, maʼaka saaʼin wasakirüle naya jamakuwaʼipalüin süpüla nanoujain nünain Jeʼwaa. Süchikijee waaʼinrüin tia, waapaja nanüiki. w21.06 11 püt. 13, 14

Talatüsü maʼin waaʼin süka kottiraain waya namaa na wawalayuukana sünain aʼyatawaa nümüin Jeʼwaa otta nümüin Jesuu. Müsü tü karaloʼutakat Organizados para hacer la voluntad de Jehová suluʼu süpana 165: «Tü waaʼinrajatkat shia wachajaainjatüin sukuwaʼipa süpüla paaʼinwajiraain waya namaa na wawalayuukana». Anuu sooʼomüin sünüiki: «Anajiraweena waya waneepia namaa na wawalayuukana kojutule naya wamüin maʼaka kojutuin naya nümüin Jeʼwaa». Müshii aka saaʼin tepichi waya nümüin Jeʼwaa jee kojutushii waya nümüin, müinjatia wakuwaʼipa namaa na wawalayuukana. Kojutusü nümüin Jeʼwaa tü waaʼinrakat süpüla wakaalinjain jee waaʼinmajüin na wawalayuukana (Mat. 10:42). Aishii wapüla na wawalayuukana. Eejüinjatü waaʼin sünain tü waaʼinrakat suulia waaʼinrüin wanee kasa seemiajaweetka atuma nanoula (Roma 14:13). Kojutuinjana wamüin na wawalayuukana jee motuinjatüin waaʼin naainjala. Nnojo wooʼulaain suulia anoujaa saaʼujee tü kasa mojusü naaʼinrakat na waneinnua. Shia anaka aluʼu «wakaaliijiraale suulia aʼülüjaajirawaa, süpüla katsüinjatüin waaʼin wapüshua sünain tü wanoulakat» (Roma 14:19). w21.06 24 püt. 16, 17

Müleka wekirajaʼawaire sünain tü Bibliakat jee waaʼinrawaire tü sümakat jee tü sümakat nupueulose Maleiwa, washateerü nukuwaʼipa Kürisüto otta weʼraajeerü maʼin nukuwaʼipa Maleiwa. Naashin Jesuu tü pütchi anasü waküjakat nüchiki Maleiwa, müsü aka saaʼin tü waüyee nüpünajakat wanee wayuu. Anuu nünüiki Jesuu: «Chi apünajüikai, wanaa sümaa naʼatapajüin, jaʼitaichi atunküin, maaʼaya aka katüle noʼu, osotüsia neʼe nujuuna tü nüpünajüinkat je müleʼosü shiaʼaya sünain nnojolüin nütüjaain saaʼu jamakuaippalüin. Eweetüsü shia sümüiwa süleʼeruʼujee mma. Osotüsü palajana tü süpanakat. Eweeta müsia tü süsiikat süchikijee. Je süchiki tü süsiikat, kachon müsia» (Mar. 4:27, 28). Tü nüküjeekalü achiki shia sükooʼomüinraain shiʼipaʼaya nunoula wanee wayuu aapaka nüchiki Maleiwa maʼaka saaʼin shimiyoʼulaain wanee pünajüt. Jamüshiijaʼa na wekirajüinkana sünain tü Bibliakat sümaʼinruʼu narütkaain nünainmüin Jeʼwaa, weʼreerü sunoutaain shiʼipaʼaya nakuwaʼipa (Éf. 4:22-24). Sotuinjatpejeʼe waaʼin niain Jeʼwaa miyoʼuka atuma nanoula. w21.08 8 püt. 4, 5

Chi wayuu talatakai aaʼin sümaa tü niʼrakat, kojutusü nümüin tü kasa eekat süpüla naaʼinrüin. Ichaatain jee iseetain nümüle wanee wayuu süpaʼa mma süchiirua wanee kasa keeʼireekat naaʼin nnojoleerü talatüin naaʼin. Müsüjeseʼe talateerüin waaʼin jülüjale waaʼin tü eekat süpüla waaʼinrüin sünain aʼyatawaa nümüin Jeʼwaa.Anasü waaʼin waaʼinrüle waneirua kasa naataka suulia tü kiʼrakalü anain waya. Sutuma müin wakuwaʼipa, ¿eesüche süpüla ayatüin talatüin waaʼin sümaa tü kasa waaʼinrawaikat? Aa, eesü süpüla ayatüin talatüin waaʼin. Süpüla watüjaain saaʼu jamüin eeka süpüla wountuin tia, jülüja waaʼin na achepchiee aapünakana amüin woʼot nneerümaajatü naashajaaka achiki Jesuu suluʼu Mateo 25:14-30. w21.08 21 püt. 5, 6

Kachipünaashii naaʼin Jeʼwaa na yüülakana aaʼin jee na nnojoliikana yaletüin aaʼin. Eeshii süpüla wakaalinjain na wawalayuu makana akuwaʼipa. Nnojoishii nayainjanain neʼe na laülaashii aaʼinrüinjanakana tia, waaʼinrajatü tia wapüshuaʼa. Süpüla waaʼinrüin tia kapülainjana naya waaʼin. Keeʼireesü naaʼin Jeʼwaa nayaawatüin saaʼu na wawalayuukana alin naya nüpüla wakajee (Prov. 19:17). Otta wane kasa wakaalinjaka anain naya shia nnojorüle yaletüin waaʼin. Nnojoluinjana waya aʼwaataain suluʼu wakuwaʼipa suulia nachumujüin aaʼin na wawalayuukana. Shia anaka aluʼu watütüleʼerüle naaʼin sükajee tü wamakat jee tü waaʼinrakat napüleerua (1 Ped. 4:10, 11). Süpüla watüjaain saaʼu tü wakuwaʼipainjatkat sümaa wayuu, anasü jülüjale waaʼin nukuwaʼipa Jesuu namaa na nikirajüinkana. Mayaainjeʼe niain chi kojutukai maʼin sutuma wayuu, wayuu anamia nia jee nnojotsü yaletüin naaʼin (Mat. 11:28-30). Mapüleesat nikirajia jee aashajaashi nia süchiki tü kasa eʼnnaajünakat sutuma wayuu süpüla süntajatüin suluʼumüin saaʼin tü pütchikat (Luc. 10:21). w21.07 23 püt. 11, 12

Wachajaa sukuwaʼipa süpüla yootuin waya namaa na wawalayuu laülaayuukana. Eeshiijaʼa moʼupainnale naya, isale nachiki nawarairaain jee nnojorüle jaʼyain nanüiki, ayatayütpejeʼe keeʼireein naaʼin jaloulin naya nümüin Jeʼwaa, akaʼaya naya kojutushii nümüin Jeʼwaa sutuma tü naaʼinrapuʼukat (Ecl. 7:1, noota). Jülüjainjatü waaʼin jamüin kojutukana naya nümüin Jeʼwaa otta kojutuinjana naya wamüinya. Washata nukuwaʼipa Eliseo, aʼalijiraashi nia süka nnojoluin nüpüteein Elías, müshijeseʼe nümüin nümüin apünüintua: «Shiimain nnojoijeechin takatalaain puulia» (2 Rey. 2:2, 4, 6). Wasakira na wawalayuu laülaayuukana süpüla kapülainjatüin waaʼin nakuwaʼipa, wayaawatüinjatpejeʼe saaʼu wanüiki waaʼinrapa tia (Prov. 1:5; 20:5; 1 Tim. 5:1, 2). Eeshii süpüla wasakirüin naya sünain tüü: «Jimaʼaliiwaʼaya pia, ¿kasa piyaawataka atuma shiimain tü pikirajaakalü anain suluʼu tü Bibliakat? ¿Kasa aleewaka anainjee pia nümaa Jeʼwaa? ¿Kasa paaʼinraka süpüla ayatüin piʼyataain nümüin Jeʼwaa sümaa talatüin paaʼin?» (1 Tim. 6:6-8). Sümaʼinruʼu naküjain tia wamüin, waapaja nanüiki. w21.09 5 püt. 14, 15

Wanaa sümaa püchajaain sukuwaʼipa süpüla püküjain pütchi jee pikirajüin wayuu, jaʼyasü paaʼu alin püpüla Maleiwa (1 Juan 5:3). Sutuma alin püpüla Maleiwa puuntuin püküjain pütchi sainküinpünaa piichi mayaainjeʼe kapüleepuʼuin shia pümüin paala. Eesü mmorüle paaʼin soʼu tü palajatkat pukua sünain aküjaa pütchi nipialuʼu wanee wayuu. Mayaainjeʼe müin tia, ayatüshia pia aküjain pütchi süka pütüjaain saaʼu shiain tü nuluwataakalü anain pia Jesuu. Jee maaʼulu yaa, mapüleeitpa pümüin aküjaa pütchi nüchiki Maleiwa, eepejeʼe süpüla kapüleein pümüin pikirajüin wayuu sünain tü Bibliakat. Puchunta kaalinwaa nümüin Jeʼwaa süpüla pikirajüin wayuu, nükaalinjeechi pia süpüla pükaalinjain wayuu süpüla noushikajaain süchiirua nukuwaʼipa Jesuu. w21.07 3 püt. 7

Sümaiwa paala, eʼitaanapuʼusü wanee jeerü nünain wanee achepchiee süpüla sütüjaanüin aaʼu jaralin chi nülaamainkai. Müsia sukuwaʼipa tü aainjünajatkat maaʼulu, na sülaülashiikana mma müsü neʼitaakai saaʼin wanee jeerü nanain napüshuaʼa na wayuukana süpüla sütüjaanüin aaʼu namaajanain naya. Atüjaaneerü saaʼu tia sükajee tü naaʼinrakat jee tü jülüjakat naaʼin na wayuukana. ¿Wachekeetche müin shiʼitaanakai saaʼin wanain tia jeetkat? ¿Wachekeetche namaain waya na sülaülashiikana mma? Na ayoutakana müin shiʼitaanakai saaʼin nanain tü jeetkat, mülieena naya atumawaa. Saashin tü karaloʼuta Alateetkat Mapeena, nnojoleerü taashin napüla «oikkaa je ayalajaa wane kasa» (Alat. Map. 13:17). Natüjaapejeʼe saaʼu na aʼyataashiikana nümüin Maleiwa tü naaʼinrajatkat Maleiwa naka na wayuu kanainkana tia jeetkat (Alat. Map. 14:9, 10). Süka nnojoluin naneeküin shiʼitaanüin tia jeetkat nanain, müsü süshajünakai saaʼin sünain najapü: «Nümaajachi taya Jeʼwaa» (Is. 44:5). Wayaawatüinjatü maʼin saaʼu maaʼulu müleka shiimainre waneepiain waya nümaa Jeʼwaa. Waneepiale waya nümaa Jeʼwaa, talateechi nia wamaa süka nümaain waya. w21.09 18 püt. 15, 16

Süpüla wekeraajüin tü waʼyataainkat atüjainjana waya sünainjee nakuwaʼipa na wawalayuukana. Nikirajüin chi aluwataaushikai Pablo Timoteo süpüla nütüjain aküjaa pütchi jee ekirajaa wayuu. Otta nüküjain nümüin Timoteo nikirajüinjanain na nuwalayuukana sünain tü nütüjakalü apüleerua (1 Cor. 4:17). Müinjana waya maʼaka naaʼin Timoteo sünain watüjain nanainjee na wawalayuu kakaliainnakana sünain anoujaa. Wachunta kaalinwaa nümüin Jeʼwaa. Süpülapünaa woʼunuin sünain aküjaa pütchi, anasü wachuntule nümüin Maleiwa chi naaʼinkai süpüla anainjatüin wakuwaʼipa sünain aküjaa pütchi (Sal. 127:1; Luc. 11:13). Pansaa wanüiki nümüin Jeʼwaa wachuntapa kaalinwaa nümüin. Eeshii süpüla wachuntuin kaalinwaa nümüin süpüla wantüin nanain na wayuu aapajeekana nünüiki jee na ekirajaweekana sünain tü Bibliakat. Wakatala kaʼi süpüla wekirajaain sünain tü Bibliakat. Anuu sünüiki Roma 12:2: «Juunteerü jiyaawatüin saaʼu tü nüchekakat [Maleiwa] jüpüleerua, je keeʼireejeerü jaaʼin jaaʼinreein tia». Wayaawatüle maʼin saaʼu tü shiimainkat nüchiki Maleiwa, yalayaleerü waaʼin sünain aküjaa pütchi. w21.05 18 püt. 14-16

Eeshiijaʼa wekirajüle wanee wayuu sünain tü Bibliakat sümaa nnojoluin naaʼinrayaain tü nikirajaakalü anain mayaainjeʼe wainmain kasa waaʼinraka süpüla wakaalinjain nia jee wachuntuin kaalinwaa nümüin Maleiwa. Sutuma müin nukuwaʼipa, ooʼulaashii waya suulia wekirajüin nia. Nnojoiyüire eein wanee wekirajüin woutiisaka, ¿wayache kasitka tia? ¿Nnojotsüche talatüin naaʼin Jeʼwaa sümaa tü waʼyataainkat sünain aküjaa pütchi sutuma tia? Kojutusü nümüin Jeʼwaa tü waʼyataainkat otta tü waaʼinrakat süpüla ayatüin waya sünain. Talatüsü naaʼin Jeʼwaa sümaa tü waaʼinrakat sünain aküjaa pütchi yalayarüle waaʼin sünain aaʼinraa shia jee waaʼinrüle shia süka alin nia wapüla, jaʼitasü shiyoutuin wayuu tü pütchi waküjakat namüin. Anuu nünüiki Pablo nüchiki Jeʼwaa: «Tatüjaa aaʼuchi nia sünain nnojoleerüin motüin naaʼin tü kasa anasü jaaʼinrakat jiiʼiyatakat aka nümüin tü naaliikat jüpüla. Sotüshii jia naaʼin sünain jiʼyataain paala je sünain ayatüin jia aʼyataain sünain akaalinjaa tü nüchooinkalüirua» (Heb. 6:10). Nnojoleerü motuin naaʼin Jeʼwaa tü kasa waaʼinrakat sutuma alin nia wapüla, jaʼitasüjaʼa nnojoluin eein wanee wayuu aapaaka sümaa tü pütchi waküjakat. Atütülaasü maʼin waaʼin sutuma tü pütchi nüküjakat Pablo sünain tü pütchi süpülajatkat soʼukai. w21.10 25 püt. 4-6

Kamaneeshi Jesuu namüin na nikirajüinkana jee aishii naya nüpüla. Nütüjaa aaʼu naatawalin tü kasa natüjakalü apüleerua jee tü nakuwaʼipakat. Müsüjeseʼe nütüjaain aaʼu Jesuu naatawalinjatüin tü aʼyatawaa aapünüinjatkat namüin jee tü kasa nountuinjatkat. Kojutupejeʼe nümüin Jesuu tü naaʼinrakat süka süpüshuaʼa naaʼin waneʼewai nakua. Wayaawata aaʼu tia sükajee tü nümakat Jesuu nachiki na achepchiee aapünakat amüin woʼot nneerümaajatü. Naatawaisü tü aapünakat namüin nutuma chi nalaamainkai, oʼunusü süchiirua tü nountakat. Naʼakajee na piamashii achepchieekana ekeraajaka tü aʼyatawaakat eeshi wanee wainmaka akanain nuulia chi wane. Wanaawapejeʼe tü nümakat chi nalaamainkai namüin piamale, müshi nia: «Tachepchiee, wayuujaʼa eera anashi pia» (Mat. 25:14-23). Akaʼaya Jesuu kamaneeshi nia wamüin jee aishii waya nüpüla. Nütüjaa aaʼu tü kasa watüjakalü apüleerua jee nnojoluin wanaawain wakuwaʼipa. Talatüshi nia wamaa sükajee tü kasa waaʼinrakat süka süpüshuaʼa waaʼin waneʼewai wakua. w21.07 23 püt. 12-14

Nnojoishi amüliajüin wayuu waneepia chi aluwataaikai David. Eejachi wanee wayuu Nabal nünülia, eʼrüijaashi wayumüin nümüin David. Jeʼiyeshi saaʼu eküülü nümüin David otta namüin na nümaajanakana. Naashichijaaka David saaliijee tia jee nuʼutee aaʼinchi Nabal. Nnojotsü wanaawain sukuwaʼipa Abigaíl nümaa Nabal, chi suʼwayuusekai, kamaneesü shia jee shiʼikajaamaatüin eküülü nümüin David. Sünainjee tü saaʼinrakat, nnojoishi nuʼutuin aaʼin David Nabal namaa na nümaajanakana (1 Sam. 25:9-22, 32-35). Jashichishi maʼin David soʼu nüküjain outuinjachin Nabal otta na nümaajanakana. Shiasaʼa nüküjapa Natán nümüin David nüchiki chi wayuu washitkai, nüküjamaatüin David nuʼutunajachin aaʼin chia wayuukai. Sünainjee tü nümakat nümüin Natán, eesüjaʼa jülüjale waaʼin jamüin naaʼinrajatka tia wanee wayuu anamia maʼaka naaʼin David. Sünainjee tü kasa mojusü naaʼinrakat David paala, nnojoishi aleewain maʼin nia nümaa Jeʼwaa. Weʼrüliire wayumüin süka wanüiki namüin na waneinnua, eesüjaʼa süpüla eein wanee kasa nnojotka anain sünain wakuwaʼipa noʼuluʼu Jeʼwaa. w21.10 12 püt. 17, 18; 13 püt. 20

Tü wayaawatakat sünainjee tü pütchi süpülajatkat soʼukai shia eein süpüla washatüin nukuwaʼipa Jeʼwaa chi Wulekai maʼin akuwaʼipa. Wuleinjatü wakuwaʼipa sünain süpüshuaʼa tü kasa waaʼinrakat jaʼitasü kapüleein shia wamüin. Wulesü nukuwaʼipa chi aluwataaushikai Pedro mayaainjeʼe wainmatuain mojukuwaʼipalüin nutuma wanee kasa. Watüjaa aaʼu sünainjee tia eein süpüla wulein wakuwaʼipa. Eeshii eeka jülüjain naaʼin matüjain akulemerawaa wanee wayuu eekai wulein nukuwaʼipa otta shia nünainka waneepia süsheʼin wayuu anoujasü. Alawaapejeʼe tia. Süküjain tü Bibliakat niain Jeʼwaa chi wulekai akuwaʼipa jee «chi Maleiwa talatakai aaʼin» (1 Tim. 1:11, TNM). Saashin tü Bibliakat talatüsü naaʼin na wayuu aʼwaajakana nia (Sal. 144:15). Otta nüchiaain Jesuu na wayuu kasheʼinyaakana kuluulu anasü jee na aaʼinrayaakana kasa anasü shiiʼiree anain nakuwaʼipa suʼupala wayuu (Mat. 6:1; Mar. 12:38). Waya anoujashiikana watüjaa aaʼu tü sünainpünaakat wule akuwaʼipa süka süküjain tü Bibliakat süchiki tia. Watüjaa aaʼu nnojoluin nuchuntuin Maleiwa wamüin wanee kasa isaka wachiki waaʼinrüin. w21.12 2 püt. 1, 3

Tü alanaʼaleekat maʼin sünain anain saʼakajee tü kasa anasü naapakat Maleiwa wamüin shia eein süpüla waʼwaajüin nia. Shiimainre alin wapüla Maleiwa waaʼinreerü «tü nuluwataakat anain waya» (1 Juan 5:3). Wanee kasa nuluwataaka anain waya Jeʼwaa shia waaʼinrüinjatüin tü nümakat Jesuu süchiki wekirajüinjanain na wayuukana jee wakaalinjainjanain naya süpüla woutiisain naya (Mat. 28:19). Jee wane kasa waaʼinrajatka naashin Jesuu shia aijiraainjanain waya (Juan 13:35). Nüneekeena Jeʼwaa na wayuu oonookana waneepia nümaa süpüla naʼakain na aʼwaajakana nia sainküinpünaa tü mmakat (Sal. 15:1, 2). Alinjana wapüla na waneinnua. Tü aliikalü apüla wayuu shia tü nukuwaʼipa Jeʼwaa jaʼyakat maʼin nünain (1 Juan 4:8). Aitüjüliʼiya waya nüpüla Jeʼwaa nnojoliiwaʼaya weʼraajüin nia (1 Juan 4:9, 10, TNM). Washatüin nukuwaʼipa Jeʼwaa aire wapüla na waneinnua (Éf. 5:1). Wanee kasa waaʼinrajatka aire wapüla na wayuukana shia wekirajüle naya süpüla neʼraajüin nukuwaʼipa Jeʼwaa süpülapünaa süntüin sükalia süpüla sajaʼlajaain tü kasakalüirua (Mat. 9:36-38). Waaʼinrüle tia, wakaalinjeena naya süpüla naʼakainjanain na nüpüshikana Maleiwa. w21.08 5 püt. 13, 14

Süka alin maʼin Jehová nüpüla Jesús, wainma kasa naaʼinraka nüpüleerua otta süpüleerua wayuu (Juan 14:31). Atüjaana aaʼu alin wayuu nüpüla Jesús saaʼujee tü nukuwaʼipakat yaa mmapaʼa. Aipürai jee amüliajüi nia, jaʼitashii namüin na eʼrüliikana wayumüin nümüin. Tü wane kasa anaʼleekat maʼin naaʼinraka Jesús shia nüküjain süchiki tü eeinjateetkat nuluwataapeena Maleiwa (Luc. 4:43, 44). Atüjaana aaʼu alin maʼin Maleiwa nüpüla Jesús otta na wayuukana saaʼujee nücheküin müliain nia otta nuʼutunuin aaʼin sutuma wayuu kaainjarannuu. Sükajee tü naaʼinrakat eeshii süpüla katüin woʼu süpüla kaʼikat süpüshuaʼa. Waapüin waaʼin nümüin Jehová otta woutiisashii waya süka alin nia wapüla. Atüjaaneerü aaʼu alin wapüla Jehová sünainjee tü wakuwaʼipakat namüin na waneinnua maʼaka naaʼinrüin shia Jesús. Anuu tü nümakat chi aluwataaushikai Juan: «Nnojoliireje alin nüpüla na nuwalayuukana nümaakana, nialeekaja aijeematüin Maleiwa nüpüla, nnojoishija niʼrüin» (1 Juan 4:20). w22.03 10 püt. 8, 9

Kamalainsü wamüin wakatarüle kaʼi nüpüla Jeʼwaa, eepejeʼe kaʼi kapüleejeetka oʼu tia wamüin. Sutuma wainmain kasa waaʼinraka, waʼyataain maʼin jee waaʼinmajüin wapüshi, eesü kapüleere wamüin wakatalüin kaʼi süpüla woʼuraajüin, waashajeʼerüin tü Bibliakat sümaa wasakireʼerüin waaʼin sünain. Eesü waneʼeya kasa eejüinjatka oulia waaʼin nnojoleetka wakatalüin atuma kaʼi nüpüla Jeʼwaa. Eeshii kupaale maʼin waya sünain aaʼinraa wanee kasa nnojotka mojuin, shiajaʼa neʼe nnojoleerüin apütaain kaʼi wapüla süpüla waaʼinrüin tü aleeweenakalü atuma waya nümaa Jeʼwaa. Anasü washaitüle otta waaʼinrüle wanee kasa soʼu wanee kaʼi, nnojotpejeʼe anain siraale kaʼi waaʼu sünain süka mapüseenain maʼin waya sutuma suulia woʼuraajüin jee wekirajaain sünain tü Bibliakat. Soto waaʼin nnojoluinjatüin sülanaʼaleein watuma tü ashaitaakat jee waaʼinrüin wanee kasa (Prov. 25:27; 1 Tim. 4:8). w22.01 26 püt. 2, 3

Wanaa sümaa nuluwataain Jeʼwaa na israeliitakana alinjatüin wayuu napüla, nnojotsü shiain nüküjeein achiki alinjanain napüla na wayuu wanaawakana eʼirukuu jee oumain namaa. Nüküjain namüin alinjanain napüla na wayuu suluʼujeejanakana wanee mma naatajatü kepiakana namaa, maʼaka süküjain Levítico 19:33, 34. Nüntüle wanee wayuu naatajachi naʼakamüin, müinjachi namüin maʼaka naaʼin na wayuu noumainpaʼakana, alinjachi nia napüla maʼaka alin naya napülajiraa. Jamüshiijaʼa naya nooʼulaainjatü nakotchojüin na wayuu suluʼujeejanakana wanee mma naatajatü jee na maʼletsesaliikana tü süpütaalakat naʼttia (Lev. 19:9, 10). Müinjatü nakuwaʼipa na anoujashiikana maaʼulu, alinjana napüla na suluʼujeejanakana wanee mma naatajatü (Luc. 10:30-37). Watta naalii wayuu sainküinjee mmakat kepiakana suluʼu mma nnojotka noumain, eeshiijaʼa eere na kepiakana püʼütpünaa. Kojutuinjana maʼin wamüin napüshuaʼa na naatakana oumain. w21.12 12 püt. 16

Wachajaale maʼin sukuwaʼipa süpüla nuʼunirüin wakuwaʼipa Jeʼwaa maaʼulu, weʼitaajeerü maʼin waaʼin sünain nükaalinjeenain waya mapeena. Jamüshiijaʼa waya weʼitaain waaʼin nünain Jeʼwaa wachuntapa kaʼi nümüin chi walaamainkai süpüla woʼunuinjanain sünain tü outkajawaakat jee sünain tü outkajawaakat miyoʼu jee süpüla waküjainjanain maʼin pütchi. Niyoutajaale walaamain sümaa tü wachuntakat nümüin jee nujutule waya suulia waʼyataain, ¿weʼitaajeetche waaʼin sünain naapeerüin Jeʼwaa tü choʼujaakat wamüin jee nnojoleenain nüpütüin waya wamüiwaʼa? (Heb. 13:5). Wainma na wawalayuu aʼyataakana waneepia nümüin Jeʼwaa aküjaka sünain nükaalinjain naya soʼu tü kaʼi choʼujaakalü oʼu shia namüin. Shiimainya eein Jeʼwaa wamaa. Nnojoliinjana waya mmoluin seema tü alatajatkat mapeena süka eein Jeʼwaa wamaa. Waaʼinmaale maʼin Jeʼwaa, nnojoleena nüpütüin waya wamüiwaʼa. w22.01 7 püt. 16, 17

Müleka nujuʼitinnüle wanee anoujashi nnojoikai waʼaleewain jee wapüshin, eesüjaʼa süpüla anain wamüin tü naaʼinrakat na laülaashiikana. ¿Jama nujuʼitinnüle chi eekai alin maʼin wapüla? Eesüjaʼa süpüla wainmajüin waaʼin süchiki tü naaʼinrakat na laülaashiikana süpüla nojuʼitirüin nia. Eesüjaʼa jülüjale waaʼin naaʼinrüin tü keeʼireekat naaʼin namüiwaʼa, nnojoluin shiain tü jülüjakat naaʼin Jehová. ¿Kasa waaʼinrajatka süpüla anain wamüin tü naaʼinrakat na laülaashiikana? Jülüjainjatü waaʼin niʼitaain Jehová sukuwaʼipa nujuʼitinnüin wanee anoujashi kaainjalakai naʼakajee na wawalayuukana süpüla wulein nakuwaʼipa otta süpüla niyaawajaain suulia naainjala (Gal. 5:9). Nnojoire nujuʼitinnüin wanee anoujashi nnojoikai ayaawajaain suulia naainjala, nnojoleerü niyaawatüin aaʼu mojuin maʼin tü naainjakat, nnojoleerü nunouteʼerüin nukuwaʼipa otta tü jülüjakat naaʼin süpüla aleewain nia nüchikuaʼa nümaa Jehová (Ecl. 8:11). Müsüjeseʼe wayaawatüin saaʼu nnojoluin ashaitaain namüin na laülaashiikana naneeküinjachire nojuʼitirüin wanee kaainjalashi naʼakajee na wawalayuukana. w22.02 5 püt. 13, 14

Mojule nümüin wanee wawala tü achiaanakalü oulia nia sükajee tü Bibliakat otta nnojorüle naaʼinramaatüin tü münakat nümüin, nnojoluinjana akulajaain waya nümaa, kamaneeinjana waya. Nnojoliinjana jashichin na laülaashiikana nümüin. Eesü süpüla nuchuntuin wanee laülaashi nümüin Jehová süpüla nükaalinjain chi wawalakai süpüla niyaawatüin saaʼu jamüin choʼujaaka nüchiaanüin otta jamüin anaka naapaale sümaa. Eesüjaʼa choʼujaale sülatüin kojuya kaʼi süpüla niyaawatüin saaʼu tü achiaanakalü oulia nia. Nnojorüle kuʼlajaain naaʼin chi laülaashikai nümaa otta kamaneere nia nümüin jülüjeerü naaʼin chi wawala achiaanakai tü münakat nümüin suulialeʼeya sukuwaʼipa süküjia nümüin. Nnojoluinjatü motuin naaʼin na laülaashiikana nachiaainjachin wanee wawala wanaapünaa sümaa tü sümakat tü Bibliakat. Tü keeʼireekat maʼin waaʼin shia talatüinjatüin naaʼin na wawalayuukana sutuma tü pütchi wamakat namüin jee naaʼinrüinjatüin shia (Prov. 27:9). w22.02 18 püt. 17; 19 püt. 19

Wachuntule nümüin Jeʼwaa süpüla nüchecherüin waaʼin soʼunnaa wanee kasa alataka wamüin jee shiale süpüla wooʼulaain suulia waaʼinrüin wanee kasa nnojotka anain nuʼupala, eesüjaʼa jülüjale waaʼin nnojoluin nusoutamaatüin sümüin tü kasa wachuntakat nümüin. ¿Jamüshiche nnojoikai nusoutamaatüin Jeʼwaa sümüin süpüshuaʼa tü kasa wachuntakat nümüin? Nütüjaa aaʼu kanoulain waya nünain süka woʼuraajüin nümüin (Heb. 11:6). Anasü nümüin Jeʼwaa wachuntapa kaalinwaa nümüin jee niʼreein waaʼinrüin tü keeʼireekat naaʼin wapüleerua (1 Juan 3:22). Süpüla wooʼulaainjatüin suulia waaʼinrüin wanee kasa nnojotka anain noʼuluʼu Jeʼwaa, nnojoliinjana waya kashapajaaraliin jee pansaainjatü wakuwaʼipa wanaapünaa sümaa tü wachuntakat nümüin. Anuu nünüiki Jesuu: «Anakaja müleka juchuntüle nümüin Maleiwa waneepia süka süpüshua jaaʼin. Maa aka wane wayuu nuchuntüle, aapüna amüinchi. Maa aka wane wayuu mekeerüle, nünta anainrü tü nüchajaakat achiki. Maa aka wane wayuu nütaletüle miichoʼu, ajutanna apüleechi». Tü nüküjeekalü achiki Jesuu shia eein süpüla nnojoluin nusoutamaatüin Jeʼwaa sümüin tü wachuntakat nümüin (Mat. 7:7, 8). w21.08 8 püt. 1; 10 püt. 9, 10

Ayatüinjachia pia ekirajaain sünain tü Bibliakat süpüla pükooʼomüinrüin punoula nünain chi Kakumalakai kasa süpüshuaʼa (Jos. 1:8). Pikirajaapa sünain tü Bibliakat jülüjainjatü paaʼin süchiki tü alatüinjatkat otta jamüin wanaawaka tü aküjünakat suluʼu. Paaʼinrüle tia, katchinjeerü punoula sünain niain Maleiwa kakumalain waya jee kekiin maʼin nia sümaa alin waya nüpüla. Otta piyaawateerü aaʼu niain Maleiwa kashajiralain tü Bibliakat (2 Tim. 3:14; 2 Ped. 1:20, 21). Paashajeʼerapa tü Bibliakat, jülüja paaʼin jamüin jalouika tü sümakat. Süküjatüjülia tü Bibliakat mojeerüin nukuwaʼipa wanee wayuu kachiiruale naaʼin washirüü (1 Tim. 6:9, 10; Prov. 28:20; Mat. 6:24). Makalaka anain maʼin tü sümakat tü Bibliakat suulia kachiiruain waaʼin washirüü. ¿Sotusüche paaʼin wane pütchi jalouijeetka pümüin suluʼuka tü Bibliakat? Jülüjale waaʼin anain maʼin tü süchiaakalü oulia waya tü Bibliakat, wayaawateerü aaʼu keeʼireein naaʼin Jeʼwaa anainjatüin wakuwaʼipa (Sant. 1:5). Talateetkalaka maʼin waaʼin sutuma tia (Is. 48:17, 18). w21.08 17 püt. 12, 13

Laülaaichire pia soto paaʼin nnojoluin motuin naaʼin Jeʼwaa tü kasa anasü paaʼinrapuʼukat maʼaka saaʼin püküjain pütchi sümaa talatüin paaʼin. Püchecherüin paaʼin soʼunnaa kasa kapüleesü, kojutuin pümüin tü nümakat Maleiwa süchiki wuleinjatüin sukuwaʼipa wayuu nuʼupala, anasü putuma tü aʼyatawaa aapünakat pümüin suluʼu nupueulose Maleiwa jee pikirajüin na waneinnua süpüla natüjain. Jüüjüüshi pia sümüin tü anoutunakat sutuma nupueulose Maleiwa. Otta müsia pükaalinjain jee pütütüleʼerüin naaʼin na wawalayuu aʼyataakana waneepia nümüin Jeʼwaa. Aishi maʼin pia nüpüla Jeʼwaa, nnojoleena niyüülajüin na waneepiakana nümaa (Sal. 37:28). Anuu nünüiki Jeʼwaa: «Jaʼitairü kasuuin puʼwala, ayateechi takaalinjain pia» (Is. 46:4). Nnojo jülüjain paaʼin nnojolin jaloulin pia namüin na wawalayuukana, choʼujaashi pia namüin. w21.09 3 püt. 4

Nütüjaa aaʼu Jeʼwaa kasa süpüshuaʼa, müsüjeseʼe nüneeküin tü kasa anainjatkalü atuma sukuwaʼipa wayuu. Saashin tü Bibliakat chi wayuu kekiikai nutuma Maleiwa amüliajeechi nia wayuu otta aainjeechi kasa anasü süpüleerua (Sant. 3:17). Wanee wayuu aipürai nütüjaa aaʼu aneerüin sukuwaʼipa nüchonnii nümüliajüle naya. Akaʼaya Jeʼwaa, nütüjaa aaʼu aneerüin wakuwaʼipa nümüliajüle waya (Is. 49:15). Anasü maʼin waaʼin süka nümüliajeenain waya Jeʼwaa mayaainjeʼe nnojoluin lotuin wakuwaʼipa. Süka kekiin maʼin Jeʼwaa nütüjaa aaʼu eere süpüla nümüliajüin wanee wayuu, naaʼinrüin tia wanaapünaa sümaa nukuwaʼipa chia wayuukai. Nütüjaapejeʼe saaʼu Jeʼwaa jaralin chi wayuu nnojoikai anain süpüla nümüliajüin. ¿Kasa aainjünaka nüka wanee anoujashi macheʼere nia süchiirua kaainjalaa? Naashin chi aluwataaushikai Pablo, akatalaainjana waya nuulia (1 Cor. 5:11). Na nnojoliikana ayaawajaain suulia naainjala ojuʼitinnüshii naya naʼakajee na wawalayuukana. Aainjünüsü tia suulia sumojujaain nakuwaʼipa na waneepiakana nümaa Maleiwa otta süpüla kojutuinjatüin wamüin tü nuluwataakalü anain Jeʼwaa. w21.10 9 püt. 7, 8

Waʼwaajüin Jehová wanaa sümaa wasülajüin wanneetse süpüla süküjünüin tü pütchikat sainküin mma. Nnojoliinjana antüin na israelitakana majapüitpain nümaʼanamüin Jehová (Deut. 16:16). Asülajüinjana naya nümüin Maleiwa wanaapünaa sümaa tü eekat namaʼana. Naaʼinrüle tia, jayasü naaʼu kojutuin namüin tü naaʼinrakat Maleiwa napüleerua. ¿Jama wayakana?, ¿kasa waaʼinrajatka aire wapüla Maleiwa otta kojutule wamüin tü naaʼinrakat wapüleerua? Wanee kasa waaʼinrajatka shia wasülajüle wanneetse süpüla tü kasa choʼujaakat sümüin tü piichi eere woutkajaain otta müsia süpüla tü aküjaakat pütchi sainküin mma wanaapünaa sümaa tü eekat wamaʼana. Anuu nünüiki Pablo süchiki tia: «Müleka keeʼireere jaaʼin jüsülajeein, talateechi chi Maleiwakai jümaa, nümaa eekai washirüin müleka naapüle kojuya, je nümaa eekai müliain jaʼitashi aapüin palit» (2 Cor. 8:4, 12). Kojutusü nümüin Maleiwa wasülajüle nümüin süka süpüshuaʼa waaʼin jaʼitairü palirüin shia (Mar. 12:42-44). w22.03 24 püt. 13

Na laülaashiikana nnojotsü süpüla nasünneʼerüin süpüshuaʼa tü kasa mojusü alatakat, keeʼireepejeʼe naaʼin Jehová natütüleʼerüin waaʼin jee naaʼinmajüin waya. Süka wainmain maʼin tü kasa naaʼinrajatkat, ¿kasache naaʼinrajatka süpüla nakaalinjain na wawalayuukana? Washata nukuwaʼipa chi aluwataaushikai Pablo. Nüchajaapuʼuin sukuwaʼipa süpüla nüküjain pütchi analuʼut namüin na nuwalayuukana jee nütütüleʼerüin naaʼin. Anasü nashatüle nukuwaʼipa Pablo na laülaashiikana wanaa sümaa naküjain pütchi analuʼut namüin na wawalayuukana (1 Tes. 2:7). Nüküjain Pablo namüin na nuwalayuukana alin naya nüpüla Jehová otta alin naya nüpüla (2 Cor. 2:4; Éf. 2:4, 5). Naʼaleewainyuu naya Pablo jee nümaashii naya, nüküjain namüin tü mmotkalü eema nia otta tü kasa mojukat nutuma (2 Cor. 7:5; 1 Tim. 1:15). Nnojotsü shiain naaʼinmaain tü alatakat nümüin, shia naaʼinmaaka nükaalinjain na nuwalayuukana. w22.03 28 püt. 9, 10