Asakinnaka Anain

◼ ¿Jaralii achuntüinjanaka sükajee karaloukta jee suluʼupünaa Internet nawaraijaanüin aaʼu jee suluwataanüin karaloukta namüin?

Süsapoʼujee süpüshi tü karaloukta weitajakat, eesü süpüla nashajüin nanülia na wayuukana shiiʼiree suluwataanüin karaloukta namüin jee shiale shiiʼiree nawaraijaanüin aaʼu nutuma wanee aküjüi pütchi. Otta müsia eeshii na ashajakana suluʼu www.watchtower.org shiiʼiree nekirajünüin. Wainma na wayuu anoujakana sutuma tia. Akatsaʼa eein süpüla sülatüin kasa mojusü müleka nepirajüle shia na wawalayuukana nooʼopünaa na naʼaleewainkana otta na napüshikana.

Süntapa wanee karaloukta suluwataala Weteet namüin na wayuukana sümaa nnojoluin nachuntalain shia, mojushiisü namüin süka süpüleeruaanüin naaʼin naashin otta süshajünüin jalain eere kepiain naya. Jee eeshii wawalayuu eʼraka japülii nawaraijaapa naaʼu na wayuukana sutuma jashichin na machuntüinkana nawaraijaanüin aaʼu. Müsüjeseʼe nnojoluinjatüin nipirajüin tia wanee aküjüi pütchi nooʼopünaa wanee wayuu, nayainjana epirajaka shia na achekakana tü pütchikat. Waküjeein jümüin nnojoluin jamajatüin sümüin Weteet tia müleka jaʼyale saaʼu shipirajuushin sooʼopünaa wanee wayuu.

¿Kasakaʼa paainjüinjatüin müleka pükaaliinjeere süpüla nunoujüin wanee püpüshi jee niale wanee piʼraajüin? Keeʼireere paaʼin saapünüin nümüin wanee karaloukta, püsülaja shia nümüin. Eere wanee wayuu kamalainka amüin tü pütchikat sümaa keeʼireein naaʼin nuwaraijaain naaʼu wanee aküjüi pütchi, paashajaa namaa na laülaashii aküjakana pütchi eepünaale nia. Isale püchiki tia, pipiraja tü karalouktakat Sírvase visitar (S-43) otta paapa shia nümüin chi seküretaariokai eere puutkajaain süpüla nünaʼlüin otta nüjütüin shia Weteetmüin. Nnojo püshajüin sümüin Weteet nooʼopünaa wanee wayuu püreesakai jee pitaaraluʼukai. Püma nümüin naashajaai namaa na wawalayuu awaraijaakana eere nia jee nüshajai sümüin Weteet.