¿Jameetche sukuwaʼipa wayuu watta kaʼi?
Eeshii eekai namüin:
«Ayateeria müinña neʼe».
«Mojuleejeeria maʼin».
«Aneerü sukuwaʼipa wayuu mapa».
¿Jamüsüjaʼa saaʼin pümüin?
TÜ SÜMAKAT TÜ BIBLIAKAT
«Nülaʼateerü [Maleiwa] suʼwuira noʼu. Müiria nnojoluin ouktaa, aʼyalajaa, mojuu aaʼin otta saalii ayuulii. Süka jamüin, sülatüitpain tia kasakalüirua» (Apocalipsis 21:3, 4, Traducción del Nuevo Mundo).
¿JAMÜSÜ ANEETKA WAKUWAʼIPA WATÜJAALE SAAʼU TIA?
Aneerü maʼin tü waʼyataainjatkalü anain otta talateena maʼin waya sümaa (Isaías 65:21-23).
Nnojoleena müliain jee ayuulin waya (Isaías 25:8; 33:24).
Talateena maʼin waya waneepia sümaa wapüshi jee namaa waʼaleewainyuu (Salmo 37:11, 29).
¿JAMÜSHII WANOUJÜINJANAKA SÜNAIN TÜ SÜMAKAT TÜ BIBLIAKAT?
Eesü piamasü kasa wanoujainjatka atuma tia:
Nikeraajeerü Maleiwa tü nümakat süka Pülashin nia. Chi «Pülashikai maʼi», müsü tü Bibliakat nüchiki Maleiwa (Apocalipsis 15:3). Makalaka wanoujüinjanain sünain tü nümakat süka nikeraajeerüin tü nümakat sünain aneerüin maʼin sukuwaʼipa tü mmapaʼakat nutuma. Saashin tü Bibliakat nnojotsü eein wanee kasa eeka «kapüleein nümüin Maleiwa» (Mateo 19:26).
Nikeraajeerü Maleiwa tü nümakat süka shiainña keeʼireein naaʼin. Saashin tü Bibliakat, nüsoʼireʼerüinjatü Jehová naaʼin na wayuu outakana süka shiain keeʼireein naaʼin (Job 14:14, 15).
Süküjainña tü Bibliakat nüchiki Jesús sünain niiyajüin na wayuu ayuuikana. Naainjain tia süka nücheküin süpüleerua anainjanain naya (Marcos 1:40, 41). Tia naaʼinrakat Jesús sümüin wayuu, shiaʼaya neʼe naaʼinreeka Maleiwa namüin na wayuu müliakana (Juan 14:9).
Shiimain sünain keeʼireein naaʼin Jehová otta Jesús anain maʼin tü wakuwaʼipakat watta kaʼi (Salmo 72:12-14; 145:16; 2 Pedro 3:9).
PÜSAKIREʼERA PAAʼIN
¿Kasa naaʼinrajatka Maleiwa süpüla anain maʼin sukuwaʼipa tü mmapaʼakat nutuma?
Puusüteerü anain tü susoutiakat suluʼu MATEO 6:9, 10 otta DANIEL 2:44