¿Jarai chi aluwataakai saaʼu wayuu sainküin mmaka?
Eeshii eekai namüin:
«Nia Maleiwa».
«Naya na wayuukana».
«Nia chi Yolujaakai».
¿Jamüsüjaʼa saaʼin pümüin?
TÜ SÜMAKAT TÜ BIBLIAKAT
«Aluʼusaʼa tü wayuukalüirua sainküinpünaa mmakat süpüshuaʼa, nia aluwataaka saaʼu chi kamaʼüraikai» (1 Juan 5:19, Traducción del Nuevo Mundo).
«Müshijeseʼe nüntüin chi Nüchonkai Maleiwa süpüla najaʼttirüinjatüin tü kasa mojusü naainjakat chi Yolujaakai» (1 Juan 3:8, Traducción del Nuevo Mundo).
¿JAMÜSÜ ANEETKA WAKUWAʼIPA WATÜJAALE SAAʼU TIA?
Watüjaajeerü aaʼu jamüin joutka kasa mojusü sainküin mma (Apocalipsis 12:12).
Waʼatapajeerü sunoutaain nakuwaʼipa na wayuukana (1 Juan 2:17).
¿JAMÜSHII WANOUJÜINJANAKA SÜNAIN TÜ SÜMAKAT TÜ BIBLIAKAT?
Eesü apünüinsü kasa wanoujainjatka atuma tia:
Ajaʼttajatü nuluwataaya Satanás. Ajaʼttinnajachi Satanás nutuma Jehová süpüla nnojolinjachin nuluwataain naaʼu na wayuukana. Naashin Jehová, najaʼttirajachin chi Yolujaakai otta nunouteʼerüinjatü tü kasa numojujakat (Hebreokana 2:14).
Nia Jesucristo nüneekaka Maleiwa süpüla aluwatawaa. Nia aluwataaka Satanás saaʼu tü wayuukalüirua; mojulaashi maʼin otta eʼrüi maʼin wayumüin. Aluʼujasaʼa Jesús nnojotsü müin nukuwaʼipa. Müsü nünüiki Maleiwa nüchiki Cristo: «Amülialaajeerü naaʼin naalin chi nnojoikai yaletüin aaʼin jee naalin chi maʼletsekai [...]. Nükaalinjeena naya suulia müliain naya atumawaa» (Salmo 72:13, 14, Traducción del Nuevo Mundo).
Matüjainsai aküjaa alawaa Maleiwa. Lotusü maʼin sünüiki tü Bibliakat nüchiki Maleiwa: «Matüjainsai nia aküjaa alawaa» (Hebreokana 6:18, Traducción del Nuevo Mundo). Makalaka nikeraajeerüin Maleiwa tü nümakat (Isaías 55:10, 11). Müshi nia: «Ojutuneechi anooipaʼamüin chi aluwataashikai saaʼu wayuu» (Juan 12:31, Traducción del Nuevo Mundo).
PÜSAKIREʼERA PAAʼIN
¿Jameerü nakuwaʼipa na wayuukana nnojoitpa niain aluwataain Satanás?
Puusüteerü anain tü susoutiakat suluʼu SALMO 37:10, 11 otta APOCALIPSIS 21:3, 4.