Ndajajuhúi jave ogajárare
1. Mbaʼépa jahasa jepi japredika jave ogaha rupi?
1 Oparupiete hasyve koʼág̃a jajuhu hag̃ua hentekuérare hógape. Ijetuʼuetereígui ko ñane tiémpope, heta tapicha ombaʼapo jejopy okaru hag̃uántema (2 Tim. 3:1). Oĩ avei osẽntéva hógagui ombaʼejogua térã ovyʼa hag̃ua. Mbaʼéichapa ikatúta ñamog̃uahẽ marandu porã koʼãvape?
2. Mbaʼépa ikatu jajapo oñeg̃uahẽ jey hag̃ua ndajajuhuihaguépe ogajárare?
2 Ñaanota porã vaʼerã. Ñaanotavaʼerã ndajajuhuihápe ogajárare. Koʼýte umi japredika pyʼỹiha rupi. Ñamoĩpañaína pe kálle réra, ñande território número, ñande réra ha pe fécha? Nañamyenyhẽmbaivaʼerã pe kuatia ikatu hag̃uáicha ñande voi térã ótro puvlikadór oiporu jey, oho vove ndojejuhuihaguépe ogajárare. Ojepredikapa rire ñameʼẽvaʼerã ñaanotavaʼekue pe território omoakãvape, ndajahamoʼãirõ ñande voi umi ogajára ndaiporihaguépe. Ha ñande voi jaha jeýtarõ katu ñaanotavaʼerã ótro kuatiápe.
3. Mbaʼe mbaʼépa ikatu jajapo ñamog̃uahẽ hag̃ua pe marandu porã umi tapicha ndaipórivape hógape?
3 Jaha oñeitaha órape. Umi osẽva ombaʼapo hag̃ua ikatu oĩ hógape kaʼaru pytũ térã sábado ha domingo jave. Ikatútapa jaha jatopataha órape hesekuéra? (1 Cor. 10:24.) Ndaikatumoʼãirõ jaha, ñameʼévaʼerã peteĩ ermáno ikatútavape oho. Ikatu avei jahai peteĩ kárta umi óga járape térã ñahenói chupekuéra telefóno rupive. Katuete ñanepytyvõséta umi ermáno hasykatúgui ndaikatúiva osẽ opredika.
4. Mbaʼe oikovaʼekuépa ohechauka iporãha jaha jey ndajajuhuihápe ogajárare?
4 Jahechamína peteĩ mbaʼe oikovaʼekue, ohechaukáva mbaʼérepa iporã jaha jey ndajatopaihaguépe ogajárare. Tres áño pukukue puvlikadorkuéra oho meme peteĩ ógape, ndojuhuihápe jepi avavére. Peteĩ árape ojuhu sapyʼa hikuái pe kuñakaraíre. Ha ningo ostudiáma voi raʼe la Biblia ova mboyve koʼág̃a oikohápe, ha ohaʼarõ oikóvo testigos de Jehová og̃uahẽ hógape, ostudia jey hag̃ua.
5. Mbaʼéicha javépa jaʼekuaa japredikapamaha ñande territóriope?
5 Ñambaʼapopákena ñande território. Mbaʼéicharõpa ikatu jaʼe japredikapamaha ñande territóriope? Ikatu jaʼe jajapo rire ikatumíva ñañeʼẽ hag̃ua opavave óga jára ndive. Ikatu jaheja peteĩ tratádo térã rrevísta itujamiẽmava ndajajuhuihápe ogajárare, koʼýte umi ndojepredikapyʼỹiha rupi. Cuatro mésepe oñembaʼapopamavaʼerã umi território. Upe rire oñemeʼẽmavaʼerã pe territóriore oñatendévape.
6. Mbaʼérepa iporã ñamog̃uahẽ marandu porã opavavetépe?
6 Hiʼãite ningo ñandéve heta hetave ñande rapicha oikuaa Jehovápe ha iñeʼẽrendu chupe ikatu hag̃uáicha ojesalva (Rom. 10:13, 14). Umíva apytépe oĩ hína umi ñande rapicha ndajajuhúiva hógape japredika jave. Pablo ojapohaguéicha ‘jajapose hekoitépe pe Jesucristo omeʼẽvaʼekue ñandéve: ñamombeʼu hag̃ua Ñandejára Marandu Porã’ (Hech. 20:24, JMP).