Aty Japredika Hag̃ua

1. Mbaʼérepa ojejapovaʼerã pe Aty Japredika Hag̃ua?

¹ Jesús ndahaʼéi ku oimeháicha reíntema omondóva hemimboʼekuérape opredika hag̃ua, ojapo guei hekopete ikatu hag̃uáicha opaite mbaʼe osẽ porã. Ha heta ermáno ko múndo tuichakuére ohaʼanga chupe ha ojapo hekoitépe ko tembiapo porãite. Upévare káda kongregasiónpe ojejapo pe Aty Japredika Hag̃ua, ha ndahaʼéi ku péicha péichante ojejapóva (Mat. 24:​45-47; 25:21; Luc. 10:​1-7).

2. Mbaʼéichapa ojejapovaʼerã pe Aty Japredika Hag̃ua?

² Mbaʼérepa iñimportantete. Aty Japredika Hag̃ua ñanemokyreʼỹ ha ñanembokatupyry ñasẽ hag̃ua ñamyerakuã pe marandu porã. Ha ikatu hag̃uáicha ojejapo hekopete ko aty ojeporu heta puvlikasión. Pór ehémplo Jajepyʼamongetáke Ñandejára Ñeʼẽre ára ha ára, oñeʼẽramo predikasiónre, térã umi konsého osẽva jepi Razonamiento, Benefíciese ỹrõ Ñane Marandu Porãme. Umi omoakãva ko aty ojerure jepi ermanokuérape térã haʼekuéra voi ohechauka mbaʼéichapa ikatu oñekuaveʼẽ peteĩ puvlikasión oñesẽ mboyve. Umi omoakãva oñemboʼevaʼerã heʼipa rire máva mávandipa oñesẽta ha moõ gotyopa ojepredikáta. Aníkena ñanderesarái ko Aty Japredika Hag̃ua ojejapovaʼerãha diez térã quince minútopente, ha oñemohuʼãre enterovéva osẽmavaʼerã opredika.

3. Máva mávapa omoakãvaʼerã Aty Japredika Hag̃ua?

³ Mávapa oporomoakã. Superintendénte de servísio ohechavaʼerã moõpa ojejapóta umi aty ojepredika hag̃ua. Sábado ha domingokue umi superintendénte de grúpo térã umi oipytyvõva chupekuéra omoakãvaʼerã predikasión ha osẽ igrúpondi. Avei oñeʼẽvaʼerã pe superintendénte de servísiondi ani ág̃a ofalta território ojepredika hag̃ua. Éntre semána katu superintendénte de servísio ojerurekuaa umi ansiáno térã siérvo ministeriálpe omoakã hag̃ua umi aty ha avei ohechavaʼerã moõpa ojepredikáta.

4-6. a) Mbaʼérepa ojeporavo porã vaʼerã umi lugár ñandeatytahápe japredika hag̃ua? b)  Mbaʼéichapa ojehechakuaa moõ ha arakaʼépa ojejapovaʼerã pe Aty Japredika Hag̃ua?

⁴ Moõ ha arakaʼépa ñandeatyvaʼerã. Umi ansiáno ohechavaʼerã mbaʼépa ikatu ojejapo ojepredikapa hag̃ua pe território tuichakue. Ha upearã pe Aty Japredika Hag̃ua ojejapovaʼerã ag̃ui oñesẽtahágui ojepredika, tahaʼe ermáno rógape, Salónpe térã ambue lugár opyta porãvehápe enterovévape. Oĩ kongregasión ijatýva ohesaʼỹijo rire Ñemañaha ha osẽ opredika salón jerére. Ikatu hag̃uáicha oñembaʼapo porã ha ponoike ojepredika meme peteĩ hendápente ojehechavaʼerã vokoiete moõ moõpa ojepredikahikóni.

⁵ Avei ojehechavaʼerã mbaʼetekópa la território ojekuaa hag̃ua arakaʼe ha mbaʼe órapa iporãve ojepredika. Mbaʼéichapa ojehechakuaa moõ ha arakaʼépa ojejapovaʼerã pe Aty Japredika Hag̃ua? Umi porandu oĩva pe párrafo oúvape ñanepytyvõta jaikuaa hag̃ua.

⁶ Moõitépa tekotevẽ ojepredikave? Mbaʼe órapa iporãvéta oñesẽ hag̃ua ogahárupi? Tekotevẽpa oñesẽ ojepredika kaʼarukue térã ojevisita jey umi oikuaasevévape? Ojekuaa rire moõitépa ojepredikáta ojehaivaʼerã peteĩ kuatiápe ha oñemoĩ salónpe, oĩháme umi marandukuéra. Ñañehaʼãkena jajapo hekoitépe ñande rembiapo ha péicha ikatúta jaʼe Pablo heʼi haguéicha: ‘Péina amohuʼãma che rembiapo koʼárupi’ (Rom. 15:23).

7. Mbaʼéichapa oñemoakãvaʼerã pe Aty Japredika Hag̃ua?

⁷ Mbaʼéichapa oñemoakãvaʼerã. Umi omoakãva pe Aty Japredika Hag̃ua oñembosakoʼi porã vaʼerã. Péicha ohechauka omombaʼeha pe tembiapo Jehová omeʼẽva chupe. Mbaʼéichapa omoakãvaʼerã? Ñepyrũrã tekotevẽ oikuaa porã moõpa ojepredikáta. Upéi omoñepyrũ oraitépe pe aty, ipukuvaʼerã diez térã quince minútonte ha ojapovaʼerã oipytyvõ hag̃uáicha umi ermánope. Opáre upe aty enterovéva osẽmavaʼerã opredika. Natekotevẽi ojepyta oñehaʼarõ umi nog̃uahẽvoírivape, péro iporãta jaavisa moõ gotyopa ñasẽta. Ojejapo porãramo pe Aty Japredika Hag̃ua oipytyvõta enterovévape ojapo hag̃ua hekopete ko tembiapo iñimportantetéva (Pro. 11:14).

8. Mbaʼéichapa ikatu ñaipytyvõ umi omoakãvape?

⁸ Ñañemoĩkena umi omoakãva poguýpe. Iñimportanteterei ningo ñaneñeʼẽrendu ha ñaipytyvõ umi ñanemoakãvape (Heb. 13:17). Ñasẽta vove japredika upe omoakãva heʼi máva mávandipa ñasẽta. Umi ermáno ikatupyrýva osẽ meméramo ikatúta oipytyvõ umi ipyahumiévape Jehová servísiope. Upévare iporã ñasẽ opaichagua ermánondi ñañopytyvõmba hag̃ua (Pro. 27:17; Rom. 15:​1, 2). Péro upearã tekotevẽ ñag̃uahẽ voi. Ñamombaʼéramo ñane rembiapo ha ñane ermanokuérape ñañehaʼãmbaitéta jajapo hekopete koʼã mbaʼe (2 Cor. 6:​3, 4; Fili. 2:4).

9. Mbaʼéichapa ikatu oipytyvõ umi prekursór ojejapo jave pe Aty Japredika Hag̃ua?

⁹ Prekursorkuéra tuicha oipytyvõ. Opavavénte ovyʼajoa oĩ jave umi prekursór pe Aty Japredika Hag̃uáme. Péro ñanemanduʼavaʼerã umi prekursór hembiapo hetaha, pór ehémplo ombaʼapovaʼerã, ojapo ijestúdio, ovisita jey umi oikuaasevévape ha oñangareko ifamíliare. Upévare ndaikatúi ñahaʼarõ chuguikuéra osẽ ára ha ára predikasiónpe térã káda ojejapo ko aty. Upéicharamo jepe jahechakuaa haʼekuéra osẽ memeha. Pe Aty Japredika Hag̃ua haʼete peteĩ eskuéla ñanembokatupyrýva ha umi prekursór tuicha ñanepytyvõkuaa jajapo porãve hag̃ua ñane rembiapo. Haʼekuéra ningo opredika meme ha ivale, upéicha rupi ikatu ñaaprende chuguikuéra heta mbaʼe omombeʼúvo ohasavaʼekue predikasionháre ojejapo aja ko aty. Ajépa javyʼaite umi prekursór akóinte osẽ haguére opredika! Añetehápe ningo ehémplo neporãva opavavépe g̃uarã.

10. Mbaʼérepa jajapovaʼerã ikatumíva guive ñaime hag̃ua ñande Aty Japredika Hag̃uáme?

¹⁰ Jesús ha hemimboʼekuéra ojapo haguéicha ñande avei japredika ogahárupi. Ha ikatu hag̃uáicha ñañomokyreʼỹ ha ñandekatupyryve ojejapo pe Aty Japredika Hag̃ua. Upévare opavave osẽva opredika oĩvaʼerã upe atýpe (Hech. 5:42; 20:20). Ñañehaʼãkena jajapo oñekotevẽmíva guive ñaĩ hag̃ua upépe, ha upéicha Jehová ohovasáta ñane rembiapo ha ñambovyʼáta ñande ruvicha Jesucrístope (Mat. 25:​34-40; 28:​19, 20).