Vyʼapópekena ñamombaʼeguasu Jehovápe ñande aty guasu tres diaguápe
1. Mbaʼépepa ojojogua umi arete yma guare ha ñande aty guasu tres diagua?
1 José, María, ifamiliakuéra ha ambue Jehová rembiguái akóinte ohovaʼekue Jerusalénpe umi arete jave ojejapóva káda áño. Umícha jave omboyke hembiapo ha opa mbaʼe oipyʼapýva chupekuéra ojesareko porã hag̃ua Ñandejára rembipotáre. Haʼekuéra umi arete jave itiempove ohesaʼỹijo hag̃ua Jehová Léi ha ojepyʼamongeta hag̃ua mbaʼéichapa Haʼe ipyʼaporã hendivekuéra. Péicha avei ñande aty guasu tres diaguápe vyʼapópe ikatúta ñamombaʼeguasu Jehovápe.
2. Mbaʼe mbaʼépa jahechamavaʼerã koʼág̃a jaha hag̃ua ñande aty guasúpe?
2 Jajepreparákena. Jesús ha ifamiliakuéra oviahavaʼekue 200 kilómetro ou ha oho hag̃ua Nazaret guive Jerusalén peve. Ha ndajaikuaái añete mboýpa oĩrakaʼe hikuái, péro katuete heta ojepreparáneraʼe José ha María oguerahapa hag̃ua ifamiliakuérape umi aretépe. Upévare iporã ñañeporandumi: Ajepreparámapa aime hag̃ua umi tres día pe aty guasúpe? Aguenohẽvaʼerãpa vakasión térã ajeruréma permíso che patrónpe? Oimérõ che família oho mboʼehaópe, añeʼẽmapa umi profesór ndive ikatu hag̃uáicha oho avei hikuái pe aty guasúpe? Ahechámapa moõpa ikatu apyta upe aja? Ikatúnepa aipytyvõ umi hasýva térã ojejopy vaívape oĩ hag̃ua avei pe aty guasúpe? (1 Juan 3:17, 18.)
3. Mbaʼépa ikatuvaʼekue ojejapo Israélpe oiko jave umi arete?
3 Ñañomokyreʼỹkena. Umi arete yma guarépe Jehová rembiguaikuéra oñomokyreʼỹvaʼekue. Katuete ningo Jesús familiakuéra ohaʼarõjoáne umi arete ojotopa jey hag̃ua iñamigokuéra ndive. Umícha jave haʼekuéra ikatuvaʼekue oikuaa ótro hudío térã hudioʼỹvape, tahaʼe oĩ aja Jerusalénpe térã tapére.
4. Mbaʼéichapa ikatu jahechauka ñamombaʼeha pe jopói Jehová omeʼẽva ñandéve?
4 Ñapensamína, mbaʼérepa tembiguái jeroviaha nomeʼẽi ñandéve kuatiápente umi mbaʼe oñehesaʼỹijótava aty guasúpe? Oikuaágui ikatuha ñañomokyreʼỹ upépe (Heb. 10:24, 25). Upévare ñañehaʼãkena ñamohenda porã ñane tiémpo ha ñane rembiapo ikatu hag̃uáicha ñag̃uahẽ voi porã umi tres día ha péicha ñañemongeta hag̃ua ñane ermanokuérandi ipu peve pe músika. Iporãta avei jaguerahárõ ñane rembiʼurã ivevyimívante, ñasẽ rangue okápe jajogua. Upéicha ikatúta japyta hyepýpe ñañemongeta hag̃ua ñane ermanokuérandi ha jahechauka ñamombaʼeha pe jopói porãite Jehová omeʼẽva ñandéve (Miq. 2:12).
5. Mbaʼépa jajapovaʼerã jaaprovecha hag̃ua umi mbaʼe ojeʼéva ñande aty guasúpe?
5 Ñanepytyvõ ñaaprende hag̃ua. Imitãre Jesús oaprovechamavaʼekue umi arete oaprende hag̃ua heta mbaʼe Itúvagui (Luc. 2:41-49). Upéicha avei ñane família ha ñande ikatu ñaaprende heta mbaʼe pe aty guasúpe, péro upearã tekotevẽ jaguapy ha ñahendu, ani manterei ñañeʼẽ umi diskúrso aja. Ñañatendevaʼerã ponóike ñande selulár térã ambue mbaʼe ñanemolesta ỹrõ omolesta ótrope. Ñamaña pe diskursántere ha ñaanota mbykymi umi párte iñimportantevéva ñandéve g̃uarã. Umi mitã oguapyvaʼerã ituvakuérandi oñatende porãve hag̃ua umi diskúrsore. Ha pyharekue katu ñañemongetakuaa umi mbaʼe ñandegustávare ojeʼevaʼekue pe aty guasúpe.
6. Mbaʼéichapa ñañemondevaʼerã?
6 Mbaʼéichapa ñañemondevaʼerã. Yma ningo umi komersiánte ambue tetãygua oviaháva Jerusalén rapére, pyaʼeterei oikuaa umi hudíope ohóva térã oúva pe aretégui. Mbaʼérepa? Umi hudío omboflekovaʼekue ijao ruguái ha upéva arimi omoĩ jey peteĩ kordón hovy (Núm. 15:37-41). Upéicha avei koʼág̃a rupi umi hénte pyaʼeterei ñandekuaa, ndahaʼéi ku ñañemonde haguére peteĩchapa, síno ñanepotĩ ha ñañemonde rupi hekopete. Avei iporã ñañemonde upéicha javiahátarõ jaha hag̃ua pe aty guasúpe térã jajukuévo upégui ỹrõ ñaimérõ ijerére. Ñasẽ vove ñande aty guasúgui ha tekotevẽrõ ñakambia ñande ao, ñañemondevaʼerã hekopete ha jaiporu ñande solápa. Jajapóramo koʼã mbaʼe umi hénte ndahaʼéiva Testígo ohechakuaáta ñanediferenteha ha oñeʼẽ porãta ñanderehe.
7. Mbaʼérepa iporã ñaipytyvõ umi tembiapópe ojejapo hag̃ua hekopete pe aty guasu?
7 Oñekotevẽ avei ombaʼapovaʼerã. Ojejapo hag̃ua hekopete ñande aty guasu oñekotevẽ heta ombaʼapovaʼerã. Ikatúpa nde avei reipytyvõ ojejapo hag̃ua umi tembiapo? (Sal. 110:3.) Ñanemanduʼavaʼerã umi tembiapo ojejapoha Jehovápe g̃uarã ha ambue tapicha ikatuha oñeʼẽ porã hese upe haguére. Pór ehémplo, opa rire peteĩ aty guasu peteĩ gerente omombaʼeterei mbaʼéichapa umi ermáno oheja potĩ asy upe lokál, ha heʼi: “Ojeʼemivaʼekue chéve umi testígo de Jehová idiferenteha umi ótro tapichágui ha ore emprésape herakuã porãiterei hikuái oheja potĩve rupi pe lokál. Peẽ ningo pemoporãve ko lugár ha torýpe pembaʼapo, peichagua hénte hasy jatopa hag̃ua. Aagradeseterei peẽme pe aty guasu pejapovaʼekuére”.
8. Mbaʼéichapa ikatu jaaprovecha ha japredika pe aty ojejapoha jerére?
8 Jaaprovechákena ha japredika. Umi oikóva pe aty guasu ojejapoha jerére ohecháta mbaʼéichapa entéronte ñañemonde porã ha jaiporu ñande solápa, upévare katuete oikuaaséta hikuái mbaʼérepa ñañemonde upéicha. Iporãta avei jajapóramo peteĩ mitãʼi orekóva 4 áño ojapo haguéicha. Haʼe ningo ogueraha peteĩ rrestaurántepe pe puvlikasión oñenohẽ ramóva upe aty guasúpe ha ohechauka pe mósape. Upémarõ itúva ha isy oaprovecha ha oinvita ko kuñáme oho hag̃ua hendivekuéra pe aty guasúpe.
9. Mbaʼéichapa ikatu ñamombaʼe pe jopói oúva Jehovágui, Jesús ha ifamiliakuéra ojapo haguéicha?
9 Umi hudío oĩ porãva Ñandejára renondépe ohaʼarõ kyreʼỹ vaʼekue umi arete ojejapóva Israélpe ha ovyʼa umícha jave (Deu. 16:15). Pór ehémplo Jesús ha ihentekuéra, omboykéramo jepe heta mbaʼe, ovyʼavaʼekue oĩ jave umi aretépe ikatúgui oikuaave heta mbaʼe Ñandejáragui. Ñande avei ñamombaʼeterei ñande aty guasu tres diagua jaikuaágui ñande Ru ñanderayhuetéva omeʼẽha ñandéve ko jopói (Sant. 1:17). Upévare ñañembosakoʼíkena koʼág̃a guivéma ñaime hag̃ua ñande aty guasu tres diaguápe ha vyʼapópe ñamombaʼeguasu Jehovápe.