Ñañembosakoʼímapa ñande Aty Guasurã?

1. Mbaʼe mbaʼépa ñaikotevẽ jajapo hag̃ua peteĩ karu guasu?

¹ Ajépa hetaite ñambaʼapo jajapóta jave peteĩ karu guasu? Pór ehémplo jajoguavaʼerã umi mbaʼe ñaikotevẽva ñakosina hag̃ua. Upe rire ñamopotĩ pe lugár ojejapotahápe, ñamoĩ mesa ha ñahaʼarõma ñane hénte ha amigokuérape. Péro ndahaʼéi ñandénte ñambaʼapo hetáva, ñane invitadokuéra oñembosakoʼivaʼerã avei ou hag̃ua, koʼýte oikórõ mombyry ha oviahátaramo. Hetaiterei ningo añete ñambaʼapo, péro ñanderesaraipa umi mbaʼégui ñaimemba vove oñondivepa tory ha vyʼápe, ha jaʼúvo umi tembiʼu hepa jepéva. Péicha avei ko múndo tuichakuére testigos de Jehová oñembyatýta oikumby hag̃ua umi mbaʼe iñimportantetereíva. Ñande Aty Guasu hérava: “Peñatende porãke”. Hetaitereíma ningo oñembaʼapo ojejapo hag̃ua ko Aty hekoitépe. Ha ikatu hag̃uáicha ñande ñaikumby porã, tekotevẽ avei ñañembosakoʼíma koʼág̃a (Pro. 21:5).

2. Mbaʼépa jajapovaʼerã ikatu hag̃uáicha ñaikumby porã umi mbaʼe ojeʼétava ñande Aty Guasúpe?

² Ñaikumby porãkena. Ñaikumby porã hag̃ua umi mbaʼe ojeʼétava ñande Aty Guasúpe, ñañembosakoʼimavaʼerã jahávo. Pór ehémplo jajerurekuaáma permíso ñane patrónpe ñaime hag̃ua viernes guive. Avei jaikóramo mombyry jahechamavaʼerã mbaʼéichapa jaháta ha moõpa japytáta. Umi ansiáno ohechavaʼerã avei mbaʼéichapa ikatu oñepytyvõ umi ermáno ijedáva térã hasykatúvape ha ambue ermáno oikotevẽvape (Jer. 23:4; Gál. 6:10).

3. Mbaʼérepa ndajahaivaʼerã peteĩ asambléa internasionálpe nañañeinvitáirõ?

³ Jaikuaaháicha ambue tetãme ojejapóta asambléa internasionál. Ñanemanduʼáke sukursál ohechapamaha mboýpa ikatu ija ojejapotahápe ko Aty Guasu, ha mboy lugárpa oĩ ojeke hag̃ua. Upévare ohovaʼerã umi ermáno oñeinvitavakueténte, upeichaʼỹrõ ikatu ofaltapa lugár.

4. Mbaʼe mbaʼépa ikatu jajapo oñepyrũ mboyve ñande Aty Guasu?

⁴ Ñañehaʼãkena ñag̃uahẽ voimi reheve jaheka hag̃ua ñane asientorã oñepyrũ mboyve ñande Aty. Ñaimévo upépe ikatúma jalee pe prográma jaikuaa hag̃ua mbaʼérepa oñeñeʼẽta ha péicha jarekóma ñande pyʼapýpe umi mbaʼe ojeʼétava upépe (Esd. 7:10). Ipu vove umi kántiko jaguapymavaʼerã. Upéicharõ pe ermáno omoñepyrũ vove ko Aty ikatúta ñaime oñondivepa japurahéi ha ñañemboʼe hag̃ua Ñandejárape.

5. Mbaʼéichapa ikatu ñañatende porãve ñande Aty Guasúpe?

⁵ Tuvakuéra oñehaʼãvaʼerã oguapy ifamíliandi, upéicha ikatúta oipytyvõ chupekuéra oñatende porãve hag̃ua umi diskúrsore (Deu. 31:12). Oñemokyreʼỹ enterovépe olee hag̃ua la Biblia pe diskursánte heʼi vove, ha avei ohai hag̃ua umi mbaʼe iñimportantevéva. Upéva ningo katuete ñanepytyvõta ñañatendeve ha ñanemanduʼa hag̃ua umi mbaʼe ñaaprendevaʼekuére. Ñañehaʼãmbaitékena avei ani ñañeʼẽ ñande rapichándi oimeraẽ mbaʼe reíre diskúrso aja, téra ñapuʼã manterei ñane asiéntogui. Ha jaguerekóramo selulár ñamoĩvaʼerã ani hag̃uáicha oporomolesta térã ñambogue voi. Ajépa iporãitéta ñañeʼẽramo ñane ermanokuérandi káda día opa rire ñande Aty umi mbaʼe ñandegustavevaʼekuére?

6. Mbaʼe ijojahaʼỹvapa ikatu jahupyty ñande Aty Guasúpe, ha mbaʼéichapa ikatu jajokuaave?

⁶ Ñande Aty Guasúpe ningo ikatu ñaime oñondive torypápe, upéva peteĩ mbaʼe ijojahaʼỹva! (Sal. 133:​1-3; Mar. 10:​29, 30.) Ha ikatu hag̃uáicha javyʼave ñañehaʼãvaʼerã jaikuaave ótro ermánope. Pór ehémplo japytuʼu aja ikatu ñaporandu upe oguapývape ñande ypýpe mbaʼéichapa héra ha péicha ñañemongeta hendive. Upévare iporã jagueraha ñane rembiʼurã ha japyta upépente jakaru, ñasẽ rangue jajogua okápe. Ñañomokyreʼỹkena akoieténte javyʼave hag̃ua ñande Aty Guasúpe (Rom. 1:​11, 12).

7. Mbaʼérepa ñañemondevaʼerã hekópe porã jaháta vove ñande Aty Guasúpe?

⁷ Ñañemondékena hekópe porã. Jehová ojerurevaʼekue umi Isrraelguápe ombofléko hag̃ua ijao ruguái ha upéva arimi omoĩ hag̃ua peteĩ kordón hovyʼi (Núm. 15:​37-41). Maʼerãpa ojapo hikuái upéva? Omomanduʼa hag̃ua chupekuéra idiferenteha umi ótro puévlogui ha omombaʼeguasuha Jehovápe. Péicha avei koʼág̃a rupi, ñande aóre ojekuaavaʼerã ñandediferenteha umi ótrogui. Pór ehémplo jaháta vove ñande Aty Guasúpe térã ñasẽ rire upégui, entéro ohechakuaavaʼerã ñañemonde lájare ñande testigo de Jehováha. Upévare iñimportanteterei ñañemonde hekópe porã.

8. Mbaʼéichapa ikatu japredika ñande Aty Guasu ojejapoha jerére?

⁸ Japredikákena. Ikatu avei jaaprovecha ha japredika ñande Aty Guasu ojejapotaha jerére. Pór ehémplo peteĩ ermáno ohókuri osena hag̃ua hembirekóndi peteĩ rrestaurántepe asambléa opa rire. Ko ermáno ohechauka pe mósope isolápa ha heʼi chupe: “Oiméne rehecháma heta orekoha kóva ijehe, ajépa?”. Pe móso heʼi ohecha hague péro ndoikuaaiha mbaʼépa upéva. Upémarõ pe ermáno oñepyrũ oñemongeta kyreʼỹ ko karaíndi ha oinvita chupe oho hag̃ua ñande Aty Guasúpe.

9. Mbaʼéichapa ikatu jahechauka jaagradeseha Jehovápe ko Aty Guasúre?

⁹ Igustoiterei ningo ñahendu umi diskúrso, demostrasión ha entrevísta iporãmba jepéva. Hiʼarive Jehová voi hína upe ñaneinvitáva ko Aty Guasurã (Isa. 65:​13, 14). Upévare jahechauka hag̃ua jaagradeseha chupe, ñañembosakoʼimavaʼerã jaha hag̃ua viernes guive. Ha péicha javyʼáta ñahendúvo umi diskúrso porãita ojepreparáva ñandéve g̃uarã.

[Rrekuádro oĩva páhina 6 ha 7-pe]

Marandukuéra Aty Guasu rehegua

◼ Mbaʼe órapa oñepyrũta. Pe portón ojeavríta las 8:​00, ha las 9:20 oñepyrũta ñande aty guasu káda pyhareve. Ipu vove umi kántiko, enterove jaguapymavaʼerã. Viernes ha sábado ñande aty guasu opáta kaʼaru 4:​55, ha domingo opáta las 4:00. Asambléa internasionál katu oñepyrũta jueves kaʼaru 1:20 ha opáta 4:55.

◼ Moõpa jahejakuaa ñane mbaʼyru. Peteĩ ermáno ohechaukáta moõpa ikatu ñamohenda ñane mbaʼyru. Sapyʼánte ndatuichái pe estasionamiénto, upévare ñañemongetakuaa ñane ermanokuérandi jaha hag̃ua ikatúva guive peteĩ áutopente. Aníkena jahejátei ñane mbaʼyru óga ahéno renondépe térã upérupi reínte.

◼ Jaguapy hag̃ua. Ñañongatukuaa lugár ñande rogayguakuérape térã umi ohóvape ñanendive ñane mbaʼyrúpe.

◼ Hiʼupyrã. Jaguerahákena ñane rembiʼurã, ani ág̃a ñasẽ jajogua. Upéicha jajapóramo ndaiporimoʼãi ombaʼevendéva ñande aty guasu jerére. Ikatu jagueraha ñane rembiʼurã peteĩ mbaʼyrúpe ñamoĩ hag̃uáicha ñane asiénto guýpe. Jaguerahákena peteĩ mbaʼyru michĩvante ha ñanemanduʼa avei ndovaleiha jagueraha votélla de vídrio.

◼ Ojepaga hag̃ua umi mbaʼe ojeporúvare. Ikatu jahechauka ñamombaʼeha ñande aty guasu ñamoĩvo ñane kontrivusión pe káha heʼihápe “Obra mundial”, oĩva Salón del Rréinope térã ñande aty guasu oikohápe. Oñemeʼẽtaramo cheque, ojejapovaʼerã “Asociación Torre de Vigía de Biblias y Tratados” rérape.

◼ Oĩramo hasýva térã oñeñandu vaíva. Umi ombaʼapóva emerhénsiape heʼi oñehenoiha chupekuéra umi provléma michĩvare. Oĩramo peteĩ hasyetéva asambleahápe oñehenoivaʼerã peteĩ akomodadórpe ha haʼe oavisáta pyaʼe porã Primeros Auxilios-pe. Haʼekuéra oñatendéta upe hasývare ha ndaikatúiramo oipytyvõ chupe heʼíta mbaʼépa ikatu ojejapo. Tekotevẽramo ohenóita hikuái peteĩ ambulánsia.

◼ Ñande pyrehegua. Jaguerahavaʼerã ñande pyrehegua jaguata porã hag̃uáicha heseve ha ani umi ñanembopyrasypáva.

◼ Umi nohenduporãivape g̃uarã. Ikatúta oiporu hikuái rrádio ohendu hag̃ua pe prográma. Oñepyrũvo pe aty guasu oĩta peteĩ marandu upéva rehegua. Umi nohenduporãiva oguerahavaʼerã peteĩ rrádio ha peteĩ audífono.

◼ Ojegrava hag̃ua. Ñande Aty Guasu oikohápe ndaikatumoʼãi oñenchufa mbaʼeveichagua gravadóra ni oñemoĩ pe sistéma de sonídore. Ha ndajaiporuivaʼerã oporomolestátaramo.

◼ Karríto mitãme g̃uarã ha sílla. Ndojeguerahaivaʼerã aty guasuhápe sílla ha karríto mitãme g̃uarã. Péro ikatu ojegueraha pe mitã oguapyha oñemoĩva sílla ári.

◼ Formulário Sírvase visitar. Oĩramo peteĩ oikuaasevéva la Biblia omboʼéva ñamyenyhẽvaʼerã pe formulário Sírvase visitar (S-43). Iporãta káda puvlikadór ogueraháramo peteĩ térã mokõi formulário ñande aty guasúpe. Upe rire oñemeʼẽvaʼerã Departamento de Publicaciones-pe térã sekretário ñane kongregasionguápe (ehecha Nuestro Ministerio del Reino febrero de 2005, páhina 6).

◼ Akomodadór. Oñemokyreʼỹ umi ermáno ikatupyrývape, koʼýte umi ansiáno ha siérvo ministeriálpe, ombaʼapo hag̃ua ko departaméntope ha oipytyvõ hag̃ua ermanokuérape.

◼ Ipotĩ hag̃ua ñande lokál. Iporãitereíta avei oĩramo ermáno ha ermána oñekuaveʼẽva omopotĩ hag̃ua váño térã pe aty guasu ojejapoha voi.

◼ Fóto. Ñanohẽtaramo fóto ani jaiporu flash pe prográma aja.

◼ Selulár. Ñamoĩvaʼerã ani hag̃uáicha oporomolesta térã ñambogue voi.