Japredikákena kyhyjeʼỹme negosiohárupi
1. ¿Mbaʼérepa ndajajepyʼapyivaʼerã jakyhyjéramo japredika hag̃ua negosiohárupi?
1 Oĩ heta maranduhára okyhyjéva opredika hag̃ua negosiohárupi, ¿ndépa reñeñandu avei upéicha? Apóstol Pablo ningo ikatupyryvaʼekue opredika hag̃ua, upéicharamo jepe heta vése tekotevẽ kuri ipyʼaguasu ojapo hag̃ua upéva (1 Tes. 2:2). Koʼág̃a jahecháta mbohapy mbaʼe ñañeporandúva jepi ñasẽta jave japredika negosiohárupi, ha mbaʼépa ikatu ñanepytyvõ jajapo hag̃ua upe tembiapo.
2. ¿Mbaʼérepa jaʼekuaa umi ombaʼapóva negosiohápe ndaipochymoʼãiha reñeʼẽramo chupekuéra?
2 ¿Amolestátapa umi ombaʼapóvape? Heta negosiohárupi ojeʼe jepi umi ombaʼapóvape omboykevaʼerãha upe ojapóva oñatende hag̃ua umi héntere. Upévare, ikatuhína hory nendive oimoʼãgui nde haʼeha peteĩ kliénte. Ha reñemondéramo hekópe ha retrata porã chupekuéra, katuete ipasiensiavéta nderehe.
3. ¿Mbaʼépa ikatu rejapo ani hag̃ua remolesta umi kliéntepe?
3 ¿Apredikavaʼerãpa oĩ jave heta kliénte? Iporãta reiporavóramo peteĩ óra ndaiporihápe heta hénte, pór ehémplo ojeavrívo pe negósio. Avei rehaʼarõvaʼerã pe patrón térã pe ombaʼapóva opyta haʼeño, ha ani rembopukueterei pe eréva chupe.
4. ¿Mbaʼépa ikatu ere repredikáta jave negosiohárupi?
4 ¿Mbaʼépa ikatu haʼe? Peteĩ negósiope oĩramo heta ombaʼapóva, iporãta reñeʼẽ raẽramo pe enkargádondi. Ikatu ere chupe: “Peẽ pembaʼapóva negosiohárupi ningo heta penerembiapo ha ndapepytaguasúi pende rógape, upévare roju pene rendápe roñemongeta mbykymi hag̃ua penendive”. Ha ani hag̃ua opensa nde vendedorha, nderejerureintevaʼerã kontrivusión noporandúiramo ndéve mboýpa ovale umi puvlikasión. Avei reporandukuaa pe enkargádope ikatúpa reñeʼẽ mbykymi umi ombaʼapóvandi. Reñepyrũkuaa reñemongeta hendivekuéra rejapo haguéicha pe enkargádondi, ha hembiapoitereíramo rehejakuaánte chupekuéra peteĩ tratádo. Ha ndaikatúiramo reñemongeta avavéndi, eporandu ikatúpa reheja puvlikasión umi ombaʼapóva ohecha hag̃uáme.
5. ¿Mbaʼépa nepytyvõta ndepyʼaguasu hag̃ua repredikávo negosiohárupi?
5 Jesús ha Pablo ningo ipyʼaguasuvaʼekue opredika hag̃ua umi héntepe itravahohápe, ha nde avei ikatu rejapo upéicha (Mat. 4:18-21, 9:9; Hech. 17:17). Ejerurékena Jehovápe ikatu hag̃uáicha ndepyʼaguapy ha ndepyʼaguasu (Hech. 4:29). Umi negosiohárupi oĩ heta hénte ombaʼapóva ha oikuaaséva Ñandejára Ñeʼẽ heʼíva, ¿mbaʼérepa nereñehaʼãi repredika chupekuéra?