Heta mbaʼe porã jahupyty oĩ rupi umi grúpo ojepredika hag̃ua
1. Ndajarekovéiramo jepe pe Estúdio de Lívro ñande grúpondi, ¿mbaʼépa ikatu jahupyty oĩ rupi umi grúpo oñesẽ hag̃ua ojepredika?
1 Yma ningo jajapovaʼekue pe Estúdio del Lívro ñande grúpondi, ¿rehechagaʼúpa upéva? Upérõ ningo nañanderetái káda grúpope, upévare itrankilove ha ikatu jaikuaa porãve umi ermánope (Prov. 18:24). Avei pe omoakãva ñande grúpo oikuaavaʼekue umi situasión jahasáva ha ñanepytyvõ ñaikotevẽhápe (Prov. 27:23; 1 Ped. 5:2, 3). Koʼág̃a avei ikatu hína jahupyty koʼã mbaʼe jareko rupi umi grúpo oñesẽ hag̃ua ojepredika.
2. ¿Mbaʼépa ikatu rejapo nde grúpope rekonsegi hag̃ua ne amigorã?
2 Nekyreʼỹkena nde grúpope. Umi grúpope noñemoĩri heta maranduhára ojejapo haguéicha avei ymave pe grúpo de estúdio de lívrope. Upévare, “ñambaʼapóvo oñondivepa” ñane ermanokuérandi predikasiónpe jajokuaave ha ikatu ñakonsegi ñane amigorã (Filip. 1:27). ¿Resẽmapa repredika enterove ermáno oĩvandi de grúpope? ¿Mbaʼépa ere reñehaʼãramo resẽ hag̃ua enterovévandi? (2 Cor. 6:13.) Ikatu avei reinvita peteĩ térã hetave ermánope okaru hag̃ua nde rógape térã penemoirũ hag̃ua pestudia vove pende rogayguándi. Heta kongregasiónpe umi grúpo ojopyru jepi oinvita hag̃ua pe ermáno oúvape ojapo diskúrso okaru hag̃ua hendivekuéra, ha ndaikatúiramo jepe opyta, umi ermáno pe grupopegua lomímonte oñembyaty ohasa porã hag̃ua oñondivepa.
3. ¿Mbaʼéichapa ñanepytyvõkuaa pe omoakãva ñande grúpo?
3 Koʼág̃a ningo jaha dos vése a la semánantema rreunionhápe, péro upéva ndeʼiséi umi ansiáno noñatendeporãmoʼãiha ñanderehe. Upévare, umi omoakãva káda grúpo omokyreʼỹvaʼerã umi ermánope, oipytyvõvaʼerã peteĩteĩme ha avei ombokatupyryvaʼerã chupekuéra predikasionrã. Oiméramo neresẽi gueteri repredika pe omoakãvandi nde grúpo, ¿mbaʼépa ere rejeruréramo chupe resẽ hag̃ua hendive? Pe superintendénte de servísio omboyke peteĩ fín de semána káda més ovisita hag̃ua diferénte grúpope. Ha umi kongregasión michĩvehápe katu dos vése al año rupi ojevisita umi grúpope. ¿Remohenda porãpa ne tiémpo resẽ hag̃ua predikasiónpe pe superintendénte de servísio ovisita jave nde grúpo?
4. a) ¿Mbaʼéichapa oñeorganisavaʼerã pe aty ojejapóva oñesẽ hag̃ua ojepredika? b) ¿Mbaʼérepa iporãta jaiporukáramo ñande róga ojejapo hag̃ua pe aty oñesẽ hag̃ua ojepredika?
4 Ojepredikáramo en grúpo fín de semanakue okonvenive heta mbaʼépe. Ñepyrũrã, ojejapo rupi pe enkuéntro diferénte óra ha hetave lugárpe, ndahasyive umi ermánope og̃uahẽ hag̃ua pe aty ojejapóvape oñesẽ mboyve ojepredika ha opyta porãve chupekuéra pe território. Avei pyaʼeve oñeasigna umi maranduhárape oñesẽma hag̃ua ojepredika. Ha umi omoakãva káda grúpo ikatu oñatende porãve hesekuéra. Sapyʼánte tekotevẽramo ikatu oñemoĩ mokõi térã hetave grúpo opredika hag̃ua oñondive. Ojejapóramo peteĩ enkuéntronte káda primer sábado del més térã opa rire pe Ñemañaha Ñehesaʼỹijo, umi maranduhára oguapyvaʼerã igrupopeguándi, ikatu hag̃uáicha pe omoakãva chupekuéra oasigna máva mávandipa osẽta. Ha upéva ojejapovaʼerã oñeñemboʼe mboyve oñesẽ hag̃ua ojepredika. (Ehecha pe rrekuádro “¿Ikatúpa reiporuka nde róga?”)
5. Ndajarekovéiramo jepe pe Estúdio de Lívro ñande grúpondi, ¿mbaʼe rehépa ikatu jajerovia?
5 Ndajarekovéiramo jepe pe Estúdio del Lívro ñande grúpondi, Jehová koʼag̃aite peve omeʼẽmbaite ñandéve ñaikotevẽva guive jajapo hag̃ua hembipota (Heb. 13:20, 21). Haʼe arakaʼeve nombofaltamoʼãi ñandéve mbaʼeve (Sal. 23:1). Heta mbaʼe porã ningo ikatu jahupyty jareko rupi ñande grúpo ñasẽ hag̃ua japredika. Upévare, ñanekyreʼỹkena ñande grúpope ha ani ñanderesarái “pe heta oñotỹva heta omonoʼõtaha” (2 Cor. 9:6).
[Nóta oĩva taʼanga ndive páhina 6]
¿Ikatúpa reiporuka nde róga?
Heta kongregasiónpe oñemoĩvaʼerã mokõi térã hetave grúpo oñondive ojepredika hag̃ua fín de semanakue, ndaipóri rupi peteĩ lugár ikatuhápe ojejapo pe aty oñesẽ hag̃ua ojepredika. Ko atýpe ningo Jehová ñanerekomboʼe ojapoháicha jepi rreunionhápe, upévare tuicha mbaʼe ojejapóramo ñande rógape. ¿Ikatúpa reiporuka nde róga? Michĩ térã isensillomíramo jepe, lomímonte ikatu reiporuka. Umi ansiáno ningo nomañamoʼãi upévare, síno ohecháta opyta porãtapa umi ermánope, ojapo haguéicha yma oiporavótarõ guare moõpa ojejapóta pe estúdio del lívro. Upéicharõ, reiporukaséramo nde róga, remombeʼuvaʼerã pe omoakãvape nde grúpo.