Jehová katuete ñanekonsoláta

1. ¿Mbaʼéichapa oiko vaʼekue umi judío Babilóniape?

HETAITEREI áñore umi judío naiñeʼẽrendúi vaʼekue Jehovápe. Upéicha rupi haʼe oheja umi babilonio oho ohundi hetãnguéra, ha ojegueraha chupekuéra prisionéroramo Babilóniape. ¿Mbaʼéichapa oiko vaʼekue upépe umi judío? (2 Crón. 36:​15, 16, 20, 21). Haʼekuéra ikatu vaʼekue oiko lívre ojapo hag̃ua ikosakuéra (Jer. 29:​4-7). Upéicharõ jepe, oĩ vaʼekue heta mbaʼe ijetuʼúva chupekuéra ha Babilonia ndahaʼéi kuri pe lugár haʼekuéra oikosehápe. ¿Mbaʼéichapa oñeñandu vaʼekue hikuái? Peteĩva umi judío heʼi vaʼekue: “Babilóniape ñande jaguapy vaʼekue pe rrío kóstape ha ñanerasẽ ñanemanduʼávo Sion rehe” (Sal. 137:1). Péicha jahecha umi judío oikotevẽ hague konsuélo, péro ¿mávaiko okonsoláta chupekuéra?

2, 3. a) ¿Mbaʼépa ojapo vaʼekue Jehová umi judío rehehápe? b) ¿Mbaʼépa jahecháta ko artíkulope?

² Jehová ningo “peteĩ Dios omeʼẽva konsuélo” (2 Cor. 1:3). Haʼe ohayhu ipuévlope ha okonsolase umi oñemoag̃uívape hese. Jehová oikuaa vaʼekue algúno umi judío ombyasytaha la ojapo vaʼekue ha odesiditaha oservi jey chupe haʼe oipotaháicha (Is. 59:20). Upéicha rupi, mas de 100 áño ojegueraha mboyve umi judíope Babilóniape, Jehová omeʼẽma vaʼekue peteĩ mensáhe Isaíaspe, upéva jatopa pe lívro haʼe voi oskrivi vaʼekuépe. ¿Maʼerãpa Jehová ojapo vaʼekue upéva? Isaías heʼi vaʼekue: “‘Pekonsolákena che puévlope. Pekonsolákena che puévlope’, heʼi pende Jára” (Is. 40:1). Pe proféta Isaías oskrivíva rupive Jehová okonsoláta kuri umi judíope oikotevẽvape konsuélo.

³ Umi judíoicha, ñande heta vése ñaikotevẽ avei konsuélo. Ko artíkulope jahecháta mbaʼéichapa Jehová okonsola vaʼekue umi judíope mbohapy hendáicha: 1) Haʼe opromete operdonataha umi oñarrepentívape, 2) omeʼẽ esperánsa ipuévlope, ha 3) oipytyvõ chupekuéra ani hag̃ua okyhyje. Avei ñaanalisáta mbaʼéichapa Jehová koʼág̃arupi ñanekonsola.

JEHOVÁ ÑANEPERDONA

4. ¿Mbaʼéichapa Jehová ohechauka haʼeha peteĩ Dios oporoporiahuverekóva? (Isaías 55:7).

⁴ Jehová ningo peteĩ “Túa ñanderayhúva ha ñandeporiahuverekóva” (2 Cor. 1:3). Haʼe ohechauka vaʼekue upeichaha oprometérõ guare operdonataha umi judío oñarrepentívape (elee Isaías 55:7). Jehová heʼi vaʼekue: “Che siémpre aporohayhueterei, upévare roiporiahuverekóta” (Is. 54:8). ¿Mbaʼéichapa Jehová ohechaukáta kuri oiporiahuverekoha chupekuéra? Tekotevẽramo jepe umi judío oĩ Babilóniape heta áñore naiñeʼẽrendúi haguére, Jehová opromete vaʼekue chupekuéra ndopytamoʼãiha upépe pára siémpre. Haʼekuéra oĩta kuri prisionéroramo un tiémporente (Is. 40:2). Ko mensáhe oiméne tuicha okonsola umi judío oñarrepentívape ha oservise jeývape Jehovápe.

5. ¿Mbaʼérepa ñande ikatu ñaĩve segúro umi judíogui Jehová oporoperdonaha?

⁵ ¿Mbaʼépa ñaaprende? Jehová oĩ operdonambaite hag̃uáicha ñane rembiapo vaikue. Koʼág̃a ñande ikatu ñaĩve segúro umi judíogui Jehová ñaneperdonaha. ¿Mbaʼérepa? Pórke jaikuaa porã la Jehová ojapo vaʼekue ikatu hag̃uáicha ñaneperdona. Heta tiémpo Isaías oñeʼẽ rire Jehová perdón rehe, haʼe ombou Itaʼýra ko yvy ape ári omeʼẽ hag̃ua hekove umi oñarrepentíva rehehápe. Jesús omano rupi ñanderehehápe, Jehová ikatu operdonambaite ñane rembiapo vaikue (Hech. 3:19; Is. 1:18; Efes. 1:7). ¡Ajépa javyʼaite ikatu haguére jaservi peteĩ Dios ñandeporiahuverekóvape!

6. ¿Mbaʼéichapa ñanekonsoláta ñapensa memérõ Jehová ñaneperdonáma hague? (Ehecha pe taʼanga).

⁶ Ikatu oime ñañeñandu gueteri kulpávle umi mbaʼe vai jajapo vaʼekuére yma, jepe ñañarrepentíma. Oimérõ upéicha, tuicha ñanekonsoláta avei la Jehová heʼi vaʼekue umi judíope Isaías 55:​7-pe. Ikatu oime ñambohovái hína koʼág̃a heta provléma jajapo haguére álgo ivaíva. Péro oimérõ ñamombeʼúma la ñande pekádo ha ndajajapovéi upe mbaʼe vai, ikatu ñaĩ segúro Jehová ñaneperdonáma hague. Ha Jehová operdonáma guive, odesidíma naimanduʼaveimaha ñande pekádore (ekompara Jeremías 31:34 heʼívare). Jehová ndoikói opensa umi mbaʼe jajavy vaʼekuére, upéicharõ natekotevẽi ñande avei ñapensa upévare. La jajapóva koʼag̃aite la iñimportánteva Jehovápe g̃uarã, ndahaʼéi hína umi mbaʼe vai jajapo vaʼekue yma (Ezeq. 33:​14-16). Pe múndo pyahúpe, ñande Ru ñandeporiahuverekóva oipeʼaitéta ñandehegui oimeraẽ provléma ikatúva jareko jajavy haguére.

7. Oimérõ japeka raʼe ha neʼĩra gueteri ñamombeʼu, ¿mbaʼépa ñanemomýita ñañeʼẽ hag̃ua umi ansiánope?

⁷ Ikatu oime japeka vai raʼe ha ñamokañy la jajapo vaʼekue, ¿mbaʼépa jajapo vaʼerã oimérõ ñañeñandu vai upévare? La Biblia heʼi jajerure vaʼerãha ajúda umi ansiánope (Sant. 5:​14, 15). Péro ndahaʼéi la ifasilpáva ñamombeʼu la jajapo vaʼekue. Upévare ñanemanduʼa vaʼerã Jehová ojevaleha umi ansiánore ñanepytyvõ hag̃ua. Tekotevẽ ñañarrepenti ha ñanemanduʼa Jehová ha umi ansiáno ñandetratataha mborayhúpe ha ñandeporiahuverekotaha. Péicha ifasilvéta ñañeʼẽ hag̃ua umi ansiánondi. Jahechamína mbaʼéichapa Jehová ojevale vaʼekue umi ansiánore oipytyvõ hag̃ua peteĩ ermáno héravape Arturo.a Haʼe oñeñandu vaieterei kuri ojapo haguére álgo ivaíva ha heʼi: “Un áñorupi ahecha pornografía, péro ahendu rire peteĩ diskúrso oñeʼẽva ñane konsiénsia rehe amombeʼu che rembirekópe ha umi ansiánope la ajapo vaʼekue. Upéva tuicha chembopyʼaguapy. Péro upéi asegi gueteri añeñandu vai la ajapo vaʼekuére. Upémarõ umi ansiáno chemomanduʼa Jehová nachemboykéi hague. Haʼe chekorrehínte cherayhu rupi. La umi ansiáno heʼíva chéve mborayhúpe, opokoiterei cherehe ha chepytyvõ antende hag̃ua Jehová cheperdonáma hague”. Koʼág̃a Arturo oservi de prekursór ha siérvo ministeriál. Tuicha ñanekonsola jaikuaávo Jehová siémpre oĩha ñaneperdona hag̃uáicha ñañarrepentíramo ñande pyʼaite guive.

JEHOVÁ OMEʼẼ ÑANDÉVE ESPERÁNSA

8. a) ¿Mbaʼe esperánsapa Jehová omeʼẽ kuri umi judíope? b) Ohechaukaháicha Isaías 40:​29-31, ¿mbaʼéichapa oipytyvõta kuri umi judíope pe esperánsa?

⁸ Umi judío ikatu kuri opensa ndaiporiveimaha esperánsa oho jeývo hikuái ivállepe. Babilonia ikonosído vaʼekue voi ndopoíri haguére ijesklavokuérape (Is. 14:17). Péro Jehová omeʼẽ kuri esperánsa ipuévlope. Haʼe opromete vaʼekue chupekuéra opyta jeytaha lívre ha ndaipóri avave ikatúva ojoko Jehovápe okumpli hag̃ua ipromésa (Is. 44:26; 55:12). Jehovápe g̃uarã Babilonia ndahaʼéi vaʼekue mbaʼeve, haʼete vaʼekue yvytimbo reínte eipejuʼimíva ha odesaparesémava (Is. 40:15). ¿Mbaʼéicha oipytyvõta kuri pe esperánsa umi judíope? Okonsoláta chupekuéra, péro ndahaʼéi upévante. Isaías oskrivi vaʼekue: “Umi orekóva esperánsa Jehováre imbarete jeýta” (elee Isaías 40:​29-31). Umi judío opuʼãta ha ‘ovevéta kuri ipeporamoguáicha peteĩ ágilaicha’, haʼekuéra imbarete jeýta oreko rupi esperánsa.

9. ¿Mbaʼérepa umi judío ikatu vaʼekue ojerovia Jehová promesakuérare?

⁹ Jehová avei ohechauka vaʼekue umi judíope mbaʼérepa ikatu ojerovia la haʼe oprometévare. Ñapensamíntena umi profesía haʼekuéra ohechámava oñekumpli hague. Por ehémplo, haʼekuéra oikuaa Asiria ojagarra hague pe goviérno de 10 trívu oĩva Israélpe, ha ogueraha hague chupekuéra esklávoramo (Is. 8:4). Ohecha vaʼekue avei Babilonia ohundi hague Jerusalén, ha ojegueraha hague umi judíope prisionéroramo (Is. 39:​5-7). Avei oikuaa vaʼekue ojehesaʼo hague rréi Sedequíaspe, ha ojegueraha hague chupe Babilóniape (Jer. 39:7; Ezeq. 12:​12, 13). Entéro koʼã mbaʼe oñekumpli vaʼekue Jehová heʼi hagueichaite (Is. 42:9; 46:10). Koʼã profesía oñekumplíva oiméne oipytyvõ umi judíope oguerovia hag̃ua Jehová olivera jeýta hague chupekuéra.

10. ¿Mbaʼépa ñanepytyvõta imbarete hag̃ua ñane esperánsa koʼã ára pahápe?

¹⁰ ¿Mbaʼépa ñaaprende? Ñañeñandu vaieterei jave, pe esperánsa jarekóva ñane renonderãme g̃uarã ikatu ñanemombarete jey. Amás día la situasión ivaive ko múndope, ha Ñandejára enemigokuéra oñemoĩ mbarete ñane kóntrape, péro ndovaléi ñañentrega. Jehová oprometéma ñandéve jaikotaha peteĩ paraísope pára siémpre, ha upépe ñaiméta pyʼaguapýpe ha segúro porã. Tekotevẽ ñapensa meme ñane esperánsa porãitére. Ndajajapóiramo upéicha haʼetéta ku jarekóva ñane renonderãme peteĩ paisáhe neporãva, péro ndaikatúiva jahecha porã pórke ñamaña peteĩ ventána ikyʼávarupi. ¿Upéicharõ mbaʼéichapa ikatu “ñamopotĩ pe ventána” ikatu hag̃uáicha jahecha porãvéntema ñane esperánsa? Upearã pyʼỹinte ñañemotiémpo vaʼerã ñapensa hag̃ua mbaʼeichaitépa javyʼáta pe múndo pyahúpe. Ikatu jalee umi artíkulo, jahecha vidéo ha ñahendu umi músika oñeʼẽva ñane esperánsare. Ha ñañemboʼe jave Jehovápe, ikatu ñamombeʼu chupe umi mbaʼe jaipotaitémava oñekumpli pe paraísope.

11. ¿Mbaʼépa oipytyvõ peteĩ ermána hasykatúvape imbarete hag̃ua?

¹¹ Jahechamína mbaʼépa okonsola ha omombarete peteĩ ermána héravape Jeni. Haʼe oreko peteĩ mbaʼasy igravetereíva ha omombeʼu: “Añekevrantaiterei jave, amombeʼupaite Jehovápe la añandúva pórke aikuaa haʼe ontendeha la che ahasáva. Upéi añandu mbaʼéichapa Jehová omeʼẽ chéve ‘pe podér umi ótra hénte ndorekóiva’” (2 Cor. 4:7). Ko ermána avei oñeimahina oĩmaha pe múndo pyahúpe, pórke upépe avave ndeʼimoʼãvéima: “Cherasy hína” (Is. 33:24). Ñande avei ñamombeʼupaitérõ Jehovápe la ñañandúva ha ñapensa memérõ ñane esperánsare, ñanembaretéta ñaaguanta hag̃ua umi provléma jahasáva.

12. ¿Mbaʼérepa ikatu jajerovia Jehová promesakuérare? (Ehecha pe taʼanga).

¹² Yma Jehová ohechauka umi judíope mbaʼérepa ikatu vaʼekue ojerovia ipromesakuérare, ha upéicha ojapo avei koʼág̃arupi. Ñapensamíntena umi profesía jahechávare ñande resa teérupi oñekumpliha. Por ehémplo jahecha pe poténsia mundiál ‘en párte imbarete ha en párte ikangyha’ (Dan. 2:​42, 43). Avei ñahendu oĩha “yvyryrýi ápe ha pépe” ha japredika umi notísia porã “entéro tetãrupi” (Mat. 24:​7, 14). Ñande jahecha mbaʼéichapa oñekumpli koʼã ha hetaiteve profesía, ha upévare ñaĩ segúro entéro umi mbaʼe porã Jehová oprometéva oñekumplitaha katuete.

JEHOVÁ ÑANEPYTYVÕ ANI HAG̃UA JAKYHYJE

13. a) ¿Mbaʼe situasión ijetuʼúvapa ohasáta kuri umi judío ojelivera potaitépe? b) Ohechaukaháicha Isaías 41:​10-13, ¿mbaʼéichapa Jehová okonsola vaʼekue umi judíope?

¹³ Jehová opromete vaʼekue umi judío oikóvape Babilóniape osẽtaha lívre. Péro haʼe oikuaa vaʼekue amáske hiʼag̃ui upe día, ijetuʼutaha hendivekuéra. Jehová heʼi vaʼekue oĩta hague peteĩ rréi poderóso oñepyrũtava oataka umi siuda oĩva Babilonia jerére, ha upéi oatakataha Babilóniape (Is. 41:​2-5). ¿Tekotevẽpa raʼe umi judío okyhyje? Ojapóma kuri unos kuánto áño Jehová okonsola hague chupekuéra, ha heʼíma vaʼekue voi ipuévlope: “Ani rekyhyje pórke che aĩ nde ykére. Che ningo nde Jára, upévare ani rejepyʼapy” (elee Isaías 41:​10-13). ¿Mbaʼérepa Jehová heʼi vaʼekue ipuévlope: “Che ningo nde Jára”? Ndahaʼéi omomanduʼa hag̃ua umi judíope oadora vaʼerãha chupe, pórke upéva haʼekuéra oikuaáma voi ojapo vaʼerãha. Upéva rangue, Jehová ontendekase vaʼekue chupekuéra haʼe oĩha ijykerekuéra oipytyvõ hag̃ua ipuévlope (Sal. 118:6).

14. ¿Mbaʼe ótra kósapa Jehová ojapo oipytyvõ hag̃ua umi judíope pono okyhyje?

¹⁴ ¿Mbaʼe ótra kósapa ojapo Jehová oipytyvõ hag̃ua umi judíope pono okyhyje? Omomanduʼa chupekuéra haʼe ipoderosoitereiha ha oikuaaha heta mbaʼe. Jehová ojerure umi judíope omaña hag̃ua yvága gotyo umi estréllare. Haʼe heʼi chupekuéra okrea hague umíva ha hiʼarive ohenoiha káda estréllape hérarupi (Is. 40:​25-28). Jehová oikuaárõ káda estréllape hérarupi, koʼytevéntema oikuaáta káda uno isiervokuérape. Ha Jehová orekórõ pe podér okrea hag̃ua umi estrélla, katuete orekóta podér oipytyvõ hag̃ua ipuévlope. Legálmente umi judío natekotevẽi kuri ojepyʼapy ni okyhyje.

15. ¿Mbaʼéichapa Jehová oprepara vaʼekue umi judíope umi mbaʼe oikótavape g̃uarã?

¹⁵ Jehová avei oprepara vaʼekue ipuévlope umi mbaʼe oikótavape g̃uarã. Isaías rupive Jehová heʼi vaʼekue pe puévlope: “Tapeho peike pende kotýpe, pemboty porã pene rokẽ. Pekañy sapyʼaite ohasa peve pe ára pochy” (Is. 26:20). Ko profesía oiméne oñekumpli rakaʼe en párte rréi Ciro ohórõ guare oataka Babilóniape. Peteĩ istoriadór griego yma guare omombeʼu Ciro oikérõ guare Babilóniape, omanda hague isoldadokuérape ojukapaite hag̃ua umi hénte noĩrivape hóga ryepýpe. Ñañeimahinamíntena mbaʼeichaitépa oiméne oñemondýi ha okyhyje umi hénte oiko vaʼekue Babilóniape. Péro umi judío ojesalváne raʼe ojapo haguére umi mbaʼe Jehová heʼíva chupekuéra.

16. ¿Mbaʼérepa ndovaléi jakyhyjeterei la ikatúvagui oiko pe jehasa asy guasúpe? (Ehecha pe taʼanga).

¹⁶ ¿Mbaʼépa ñaaprende? Koʼẽrõitéma oñepyrũta peteĩ jehasa asy guasu núnka ndoikóiva gueteri ko múndo oñepyrũ guive. Upe moméntope umi hénte ko mundopegua okyhyjetereíta ha nontendemoʼãi la oikopáva. Péro Jehová puévlore ndoikomoʼãi upéva. Pórke ñande jaikuaa Jehová haʼeha ñande Jára ha ñandepyʼaguasúta jaikuaágui ‘pe tiémpo Ñandejára ñandesalva hag̃ua hiʼag̃uimbaitemaha’ (Luc. 21:28). Jasegíta jajerovia Jehováre ñandeataka vove pe grúpo de nasión. Ñandejára ojevaléta hiʼanhelkuérare ñandeprotehe hag̃ua, ha avei oñemeʼẽta ñandéve instruksión jajesalva hag̃ua. ¿Mbaʼéichapa og̃uahẽta ñandéve umi instruksión? Ndajaikuaái gueteri. Péro provávlemente og̃uahẽta ñandéve umi ñane kongregasionkuéra rupive. Upévare ikatu jaʼe umi kongregasión ojoguataha umi “koty” ikatutahápe ñañemboty ani hag̃ua ojehu ñandéve mbaʼeve. ¿Mbaʼéichapa ikatu jajeprepara la oikótavape g̃uarã? Koʼág̃ama voi tekotevẽ ñañemoag̃ui ñane ermanokuérare, jasegi umi instruksión omeʼẽva Jehová organisasión, ha ani jaduda Jehová ogiaha iñorganisasiónpe (Heb. 10:​24, 25; 13:17).

17. ¿Mbaʼépa ikatu rejapo Jehová nekonsola hag̃ua?

¹⁷ Jahecha haguéicha, umi judío situasión ijetuʼu vaʼekue Babilóniape, péro Jehová okonsola chupekuéra, ha haʼe ojapóta avei upéva ñanderehehápe. Upévare toiko la oikóva esegíkena eñemoag̃ui Jehováre haʼe nekonsola hag̃ua. Ani reduda haʼe ndeporiahuvereko ha neperdonataha, epensa meme ne esperánsa porãitére, ha ani nderesarái Jehová haʼe rupi nde Jára natekotevẽiha rekyhyje.