¿Mbaʼérepa iñimportantete Jehová réra Jesúspe g̃uarã?

1, 2. a) ¿Mbaʼépa ojapo vaʼekue Jesús pe pyhare omano mboyvemi? b) ¿Mbaʼépa jahecháta ko artíkulope?

EÑEIMAHINAMÍNA la oiko vaʼekue. Peteĩ jueves pyhare 14 de Nisán áño 33-pe, Jesús omoñepyrũ vaʼekue pe Séna del Señór umi ijapostolkuéra ifiélvandi. Haʼe oikuaa vaʼekue upe riremínte oñetraisionáta, ojetorturáta ha ojejukataha chupe. Upévare ojapopa rire hikuái upe séna, Jesús heʼi ijapostolkuérape unas kuánta kósa omokyreʼỹtava chupekuéra. Osẽmba mboyvemi hikuái pe lugár oĩhágui, Jesús oñemboʼe ha la heʼi vaʼekue upe ñemboʼépe iñimportanteterei vaʼekue. Upe ñemboʼe koʼág̃a ikatu jatopa Juan kapítulo 17-pe.

² Ko artíkulope ñaanalisáta unas kuánta kósa Jesús heʼi vaʼekue iñemboʼépe. Péicha jahecháta mbaʼépa la oipyʼapyve vaʼekue chupe omano mboyvemi, ha avei mbaʼépa la iñimportanteve vaʼekue chupe g̃uarã oĩrõ guare ko yvy ape ári.

“CHE AIKUAAUKA CHUPEKUÉRA NDE RÉRA”

3. ¿Mbaʼépa Jesús heʼi vaʼekue iñemboʼépe, ha mbaʼépa heʼise vaʼekue upérõ? (Juan 17:​6, 26).

³ Jesús iñemboʼépe heʼi vaʼekue Jehovápe: “Che aikuaauka chupekuéra nde réra”. Jaʼekuaa upéva iñimportanteterei hague Jesúspe g̃uarã pórke haʼe heʼi vaʼekue la mísma kósa 2 vése voi (elee Juan 17:​6, 26). ¿Mbaʼépa heʼise vaʼekue upérõ Jesús? ¿Tekotevẽpa raʼe omombeʼu idisipulokuérape Ñandejára heraha Jehová? Nahániri. Jesús disipulokuéra ningo judío vaʼekue, upévare haʼekuéra oikuaa porã Ñandejára réra. Upe téra ningo hetaiterei vése ojeskrivi vaʼekue umi Escrituras Hebréaspe. Upévare jaʼekuaa Jesús ndahaʼéi hague ku omboʼéva chupekuéra Ñandejára heraha Jehová, síno haʼe omboʼe vaʼekue idisipulokuérape mbaʼeichagua Dióspa hína Jehová. Jesús oipytyvõ vaʼekue idisipulokuérape oikuaa porãve hag̃ua Jehovápe. Por ehémplo oikuaa hag̃ua ivolunta, umi mbaʼe ojapóva ha umi kualida Ñandejára orekóva. Legálmente ndaipóri ótro ikatúva peichaite peve oexplika koʼã mbaʼe Jehovágui, pórke Jesús oikuaa porãiterei Itúape.

4, 5. a) ¿Mbaʼéichapa peteĩ persóna réra ikatu ou iñimportanteve ñandéve g̃uarã? b) ¿Mbaʼéichapa Jesús disipulokuéra ou oikuaa porãve Jehovápe?

⁴ Ñamoĩ peteĩ ehémplo. Eñeimahinami ne kongregasiónpe oĩha peteĩ ansiáno hérava David. Ko ermáno haʼe avei doktór ha nde heta áñorema reikuaa chupe. Peteĩ vuéltape eju nderasyete ha reikotevẽ urhénte nepytyvõ peteĩ doktór. Upévare reveve reho ospitálpe, ha pe ospitál rehohápe ombaʼapo pe ermáno ha haʼe ojapo la ikatumíva nepytyvõ ha ndesalva hag̃ua. Koʼág̃a katuete rehayhuvéntema pe ermánope, ha rehendúvo héra nemanduʼáma umi mbaʼe haʼe ojapo vaʼekuére nderehehápe. David ymaite guivéma haʼe ne ansiáno, péro koʼág̃a ndéve g̃uarã haʼéma avei pe doktór ndesalva vaʼekue.

⁵ Upéicha avei Jesús disipulokuéra oikuaáma vaʼekue Ñandejára heraha Jehová. Péro Jesús oipytyvõ vaʼekue chupekuéra oikuaa porãve hag̃ua Jehovápe. Upévare umi disípulo oñepyrũma upéi omombaʼeve pe téra. ¿Mbaʼéicha rupípa oiko vaʼekue upéva? Pórke Jesús ojoguaiterei Itúape umi mbaʼe ojapóvape ha heʼívape. Upévare umi disípulo ou vaʼekue oikuaa porãve Jehovápe ohendúrõ guare mbaʼéichapa Jesús oporomboʼe ha oporotrata (Juan 14:9; 17:3).

“NDE NINGO REMEʼẼ VAʼEKUE CHÉVE NDE RÉRA”

6. Jesús heʼírõ guare Jehovápe: ‘Nde remeʼẽ vaʼekue chéve nde réra’, ¿mbaʼépa heʼise vaʼekue? (Juan 17:​11, 12).

⁶ Jesús iñemboʼépe ojerure avei idisipulokuérare. Haʼe heʼi vaʼekue Jehovápe: “Eprotehemína chupekuéra nde réra rehehápe, nde ningo remeʼẽ vaʼekue chéve nde réra” (elee Juan 17:​11, 12). ¿Upévapa heʼise upe guive Jesúspe oñehenói vaʼerãha Jehová? Nahániri. Upe ñemboʼépe jahecha Jesús heʼi hague Itúape “nde réra”. Upéicharõ Jesús ndahaʼéi ku okambiáva la héra ha oñepyrũva oñehenói Jehová. ¿Péro mbaʼépa la heʼise vaʼekue Jesús heʼírõ guare iñemboʼépe: ‘Nde remeʼẽ vaʼekue chéve nde réra’? Primeroite voi heʼise Jesús ou hague orrepresenta hag̃ua Jehovápe ha oñeʼẽ hague hérape. Haʼe ou vaʼekue ko yvy ape ári Itúa rérape ha ojapo heta milágro Itúa réra rehehápe (Juan 5:43; 10:25). Ha segundo, Jesús réra heʼise voi “Jehová oporosalva”. Upévare la Jesús réra heʼiséva ñanemomanduʼa avei Jehová rérare.

7. ¿Mbaʼérepa Jesús ikatu vaʼekue oñeʼẽ Jehová rérape? Emombeʼu peteĩ ehémplo.

⁷ Ñamoĩmína peteĩ ehémplo ñantende hag̃ua mbaʼérepa jaʼe Jesús oñeʼẽ hague Itúa rérape. Por ehémplo, peteĩ presidénte peteĩ paispegua ikatu omondo peteĩ persónape oñeʼẽ hag̃ua hérape orrepresenta hag̃ua chupe umi hénte renondépe. Upévare pe persóna oñeʼẽ jave oreko la mísma autorida orekóva pe presidénte. Upéicha avei Jesús oreko vaʼekue autorida oñeʼẽ hag̃ua Itúa rérape, pórke Jehová voi omondo vaʼekue Jesúspe orrepresenta hag̃ua chupe (Mat. 21:9; Luc. 13:35).

8. ¿Mbaʼérepa ikatu jaʼe Jesús ojapo hague entéro mbaʼe Itúa rérape ou mboyvéma voi ko yvy ape ári? (Éxodo 23:​20, 21).

⁸ La Biblia heʼi Jesús haʼeha pe Ñeʼẽ. ¿Mbaʼérepa? Pórke Jehová ojevale vaʼekue Jesús rehe heʼi hag̃ua umi ánhelpe térã umi persónape la Jehová oipotáva, térã avei omeʼẽ hag̃ua chupekuéra instruksión (Juan 1:​1-3). Provávlemente Jesús haʼe vaʼekue pe ánhel Jehová omondóva oñangareko hag̃ua umi israelítare pe desiértope. Jehová oipota vaʼekue umi israelita iñeʼẽrendu upe ánhelpe. Upévare voi heʼi vaʼekue chupekuéra: “Haʼe che rérape ojapo hína opa mbaʼe” (elee Éxodo 23:​20, 21).a Jehová heʼírõ guare upéva ohechauka porãiterei Jesús orrepresentaha chupe. Ndaipóri ningo ótro odefendéva ha omopotĩva Jehová réra Jesús ojapoháicha.

“CHE RU, EMBOTUICHÁNA NDE RÉRA”

9. ¿Mbaʼeichaite pevépa iñimportánte vaʼekue Jesúspe g̃uarã Itúa réra? Emyesakã.

⁹ Angetete jahecha haguéicha Jesúspe g̃uarã Itúa réra iñimportanteterei ou mboyvéma voi ko yvy ape ári. Ha ou rire ko yvy ape ári, haʼe ohechauka avei entéro umi mbaʼe ojapóvare mbaʼeichaitépa iñimportánte chupe g̃uarã Itúa réra. Upéi omohuʼãvo hembiapo ko yvy ape ári haʼe heʼi vaʼekue Itúape: “Che Ru, embotuichána nde réra”. Upe javete hatã oñehendu Itúa ombohovaiha chupe yvága guive heʼívo: “Ambotuicháma ha ambotuicha jeýta” (Juan 12:28).

10, 11. a) ¿Mbaʼéichapa Jesús ombotuicha vaʼekue Jehová réra? (Ehecha pe taʼanga). b) ¿Mbaʼérepa tekotevẽ vaʼekue oñembotuicha ha oñemopotĩ Jehová réra?

¹⁰ Jesús avei ombotuicha vaʼekue Itúa réra. ¿Mbaʼéichapa? Por ehémplo haʼe omombeʼu vaʼekue la héntepe entéro umi kualida porã Jehová orekóva ha umi mbaʼe ijojahaʼỹva haʼe ojapóva. Péro Jesús ojapo vaʼekue avei ótra kósa. Haʼe tekotevẽ vaʼekue ohechauka Jehová ojapo lája entéro mbaʼe oĩ porãha ha héra sagradoha. Jesús omboʼe vaʼekue iñimportantetereiha Itúa réra oñembotuicha ha oñemopotĩ. Haʼe ohechauka vaʼekue upéva heʼírõ guare idisipulokuérape mbaʼéichapa oñemboʼe vaʼerã. Haʼe heʼi: “Ore Ru reiméva yvágape, toñembotuicha nde réra” (Mat. 6:9).

¹¹ ¿Mbaʼérepa tekotevẽ vaʼekue oñembotuicha ha oñemopotĩ Jehová réra? Pe hardín de Edénpe Satanás oñeʼẽ vai vaʼekue Jehová kóntrape. Por ehémplo heʼi vaʼekue Jehová ijapuha ha nomeʼẽseiha Adán ha Évape la iporãvéva (Gén. 3:​1-5). Hiʼarive Satanás ontendeka avei Jehová ojapoháicha entéro mbaʼe ndahaʼeiha la iporãvéva. Umi japu Satanás heʼi vaʼekue oheja vaieterei Jehovápe pórke omongyʼa héra. Upe rire Job tiémpope, Satanás heʼi vaʼekue entéro umi oservíva Jehovápe ojapoha upéva onohẽ hag̃uánte chugui provécho. Hiʼarive ijapuetereígui heʼi ndaiporiha ni peteĩ ohayhu añetéva Jehovápe, ha upévare ndajaservimoʼãiha chupe jahasa jave umi provléma ijetuʼúvare (Job 1:​9-11; 2:4). Legálmente oraháta kuri tiémpo ojehechauka hag̃ua pe ijapúva haʼeha Satanás ha ndahaʼeiha Jehová.

“CHE ANTREGA CHE REKOVE”

12. ¿Mbaʼépa Jesús ojapo vaʼekue Jehová réra rehehápe?

¹² Jesús ohayhuetereígui Jehovápe, omano vaʼekue omopotĩ ha ombotuicha hag̃ua Itúa réra. Upévare haʼe heʼi vaʼekue: “Che antrega che rekove” (Juan 10:​17, 18).b Umi yvypóra ypykue Adán ha Eva opuʼã vaʼekue Jehová kóntrape ha oñemoĩ Satanás ládope. Péro Jesús idiferenteterei vaʼekue. Haʼe vyʼápe ou vaʼekue ko yvy ape ári ha ohechauka ohayhuetereiha Itúape, upearã iñeʼẽrendu vaʼekue chupe entéro mbaʼe ojapóvape ha heʼívape (Heb. 4:15; 5:​7-10). Jesús ningo osegi ifiél Jehovápe ‘omano meve pe yvyráre’ (Heb. 12:2). Péicha haʼe ohechauka vaʼekue ohayhuetereiha Jehovápe ha héra porãite.

13. ¿Mbaʼérepa jaʼekuaa ndaiporiha ótra persóna Jesúicha ohechaukáva Satanás ijapuha? (Ehecha pe taʼanga).

¹³ Entéro umi mbaʼe Jesús ojapóvape ohechauka vaʼekue Satanás hína la ijapúva ha ndahaʼeiha Jehová (Juan 8:44). Ndaipóri vaʼekue ótra persóna oikuaa porãvéva Jehovápe la Jesús oikuaaháicha chupe. Upévare oimérire siérto raʼe la Satanás heʼíva Jehová kóntrape, Jesús oikuaáta kuri upéva. Péro Jesús ojedesidiete vaʼekue odefende Itúa réra. Peteĩ moméntope haʼetérõ guare la Itúa oheja reíva chupe, haʼe ndohejái Itúape ha osegi iñeʼẽrendu chupe omano meve (Mat. 27:46).c

“CHE AJAPOPA PE TEMBIAPO NDE REMEʼẼ VAʼEKUE CHÉVE”

14. ¿Mbaʼéichapa Jehová omyengovia porã vaʼekue Jesúspe ifiél haguére?

¹⁴ Pe pyhare Jesús omano mboyvemi heʼi vaʼekue iñemboʼépe Itúape: “Che ajapopa pe tembiapo nde remeʼẽ vaʼekue chéve”. Jesús ndodudái vaʼekue ni michĩmi Jehová omyengoviataha chupe ifiél haguére, ha ndojavýi vaʼekue ojeroviávo Itúare pórke haʼe omano rire Jehová ndohejareíri chupe pe sepultúrape (Juan 17:​4, 5; Hech. 2:​23, 24). Jehová omoingove jey Jesúspe ha omeʼẽ chupe yvágape peteĩ puésto ijyvatevéva (Filip. 2:​8, 9). Tiémpo rire Jesús oñepyrũma ogoverna Ñandejára Rréinope. ¿Mbaʼépa ojehupytýta upe Rréino rupive? Haʼe ombohovái vaʼekue upéva heʼírõ guare idisipulokuérape mbaʼéichapa oñemboʼe vaʼerã. Haʼe heʼi vaʼekue: “Tou ne Rréino, tojejapo ne volunta ko yvy ape ári ojejapoháicha yvágape” (Mat. 6:10).

15. ¿Mbaʼe mbaʼépa avei Jesús ojapóta?

¹⁵ Koʼẽrõitéma Jesús oñorairõta Ñandejára enemigokuéra kóntrape ha ohundíta entéro umi iñañávape Armagedónpe (Apoc. 16:​14, 16; 19:​11-16). Upe riremíntema Jesús omombóta Satanáspe pe yvykua pypukúpe. Upépe Satanás ndaikatumoʼãvéima ojapo mbaʼevete asy (Apoc. 20:​1-3). Upéi Jesús ogoverna aja 1.000 áñore, ko yvýpe oĩ jeýta pyʼaguapy ha entéro umi persóna haʼétama perfékto. Haʼe omoingove jeýta umi omano vaʼekuépe ha ko yvy kompletoitégui ojapóta peteĩ paraíso. Péicha oñekumplíta Jehová volunta (Apoc. 21:​1-4).

16. ¿Mbaʼépa oikóta opa rire Jesús goviérno de 1.000 áño?

¹⁶ ¿Mbaʼéichapa jaikóta ág̃a opa vove Jesús goviérno de 1.000 áño? Pe pekádo opáta ha ni peteĩ persóna ndahaʼemoʼãvéima imperfékto. Avave natekotevẽmoʼãvéima ojerure perdón ipekadokuérare pe rreskáte rupive. Upévare ñañemoag̃ui hag̃ua Jehováre nañaikotevẽmoʼãvéima Jesús oservi de súmo saserdóte ñanderehehápe ni umi 144.000 oservi de saserdóte. Avei “ñane enemígo ultimoite oñehundítava haʼe hína pe ñemano”. Umi sementério opytáta nandi vera pórke umi omano vaʼekuépe oñemoingove jeýta. Ko yvy tuichakuére umi persóna haʼétama perfékto (1 Cor. 15:​25, 26).

17, 18. a) ¿Mbaʼépa oikóta opa rire Jesús goviérno de 1.000 áño? b) ¿Mbaʼépa Jesús ojapóta opa vove igoviérno ? (1 Corintios 15:​24, 28). (Ehecha pe taʼanga).

¹⁷ ¿Mbaʼe ótra kósapa oikóta opávo Jesús goviérno de 1.000 áño? Upe tiémpope oikóta peteĩ mbaʼe ndaijojaháiva. Arakaʼeve ndaiporimoʼãvéima ni peteĩ odudáva Jehová haʼeha peteĩ Dios Sánto ha ihustoha. ¿Mbaʼérepa jaʼe upéva? Ñanemanduʼami jeýna la oiko vaʼekuére hardín de Edénpe. Upépe Satanás heʼi vaʼekue Jehová ijapuetereiha ha la ogoverna lája ohechaukaha ndohayhuiha la héntepe. Upe tiémpo guive Jehová réra oñembotuicha, pórke umi oservíva chupe ohechauka jey jey haʼe ojapo lája entéro mbaʼe iporãveha. Upévare opa rire Jesús goviérno de 1.000 áño, Jehová réra oñemopotĩetétama. Jehová ningo ohechauka porãtama haʼe haʼeha ñande Ru yvagapegua ñanderayhuetereíva.

¹⁸ Opa rire Jesús goviérno de 1.000 áño enterovetéva oikuaáta japuha la Satanás heʼi vaʼekue Jehováre. ¿Upéicharõ mbaʼépa Jesús ojapóta opávo igoviérno? ¿Ojapótapa avei haʼe la Satanás ojapo vaʼekue ha opuʼãta Itúa kóntrape? ¡Ni mbaʼevéicharõ! (elee 1 Corintios 15:​24, 28). Jesús omeʼẽ jeýta pe Rréino Itúape ha haʼe voi oñemoĩta Itúa Rréino poguýpe. Jesús ndojoguaiete Satanáspe, upévare vyʼápe ontregáta pe autorida orekóva pórke ohayhueterei Jehovápe.

19. ¿Mbaʼépa ñaaprende Jesúsgui ko artíkulope?

¹⁹ Ñantende porãiterei koʼág̃a mbaʼérepa Jehová omeʼẽ Itaʼýrape héra, pórke Jesús ohechauka vaʼekue orrepresenta porãitereiha Itúape. ¿Upéicharõ mbaʼeichaite pevépa iñimportánte Jesúspe g̃uarã Jehová réra? Ñaaprende ndaiporiha voi ótra kósa iñimportantevéva chupe g̃uarã. Haʼe omano vaʼekue Itúa réra rehehápe ha amo gotyove ontregáta Itúape pe Rréino opa rire pe igoviérno de 1.000 áño. ¿Mbaʼéichapa ñande ikatu jasegi Jesús ehémplo? Upéva jahecháta pe artíkulo oúvape.