¿Iñimportántepa ndéve g̃uarã Jehová réra?

1, 2. ¿Mbaʼérepa jaʼekuaa Jehová réra iñimportantetereiha Jesúspe g̃uarã?

JEHOVÁ réra ningo la iñimportantevéva Jesúspe g̃uarã. Ndaipóri ótro ojapóva hetaite mbaʼe ojekuaa hag̃ua Jehová réra. Jahecha haguéicha pe artíkulo ohasa vaʼekuépe Jesús omano vaʼekue ohechauka hag̃ua Jehová haʼeha peteĩ Dios Sánto ha entéro mbaʼe haʼe ojapóva oĩ porãha (Mar. 14:36; Heb. 10:​7-9). Ha opa rire igoviérno de 1.000 áño Jesús ontrega jeýta Itúape entéro autorida oñembotuicha hag̃ua Jehová réra (1 Cor. 15:​26-28). Entéro mbaʼe Jesús ojapo vaʼekue Jehová rehehápe ohechauka haʼe ohayhuetereiha chupe.

² Jesús ou vaʼekue ko yvy ape ári Itúa rérape (Juan 5:43; 12:13). Haʼe oikuaauka vaʼekue Itúa réra idisipulokuérape (Juan 17:​6, 26). Jesús omboʼe ha ojapórõ guare milágro, heʼi porã vaʼekue Jehová omeʼẽha chupe podér ojapo hag̃ua entéro umi mbaʼe (Juan 10:25). Ha Jesús ojerurérõ guare Jehovápe okuida hag̃ua idisipulokuérare heʼi chupe: “Eprotehemína chupekuéra nde réra rehehápe” (Juan 17:11). Péicha jahecha mbaʼeichaite pevépa iñimportánte vaʼekue Jesúspe g̃uarã Jehová réra. Upéicharõ ñapensa porãmína, ¿mbaʼéicha piko peteĩ persóna heʼíva haʼeha Cristo segidór ndoikuaamoʼãi térã ndoipurumoʼãi Ñandejára réra?

3. ¿Mbaʼépa jahecháta ko artíkulope?

³ Ñande ningo kristiáno verdadéro ha ñañehaʼã jasegi Jesús ehémplo, upévare ñamombaʼeterei Itúa réra (1 Ped. 2:21). Ko artíkulope jahecháta umi omombeʼúva “umi notísia porã oñeʼẽva Ñandejára Rréinore” oguerahaha Jehová réra (Mat. 24:14). Avei jahecháta mbaʼeichaite pevépa iñimportánte vaʼerã ñandéve g̃uarã Jehová réra.

‘PETEĨ PUÉVLO OGUERAHÁVA HÉRA’

4. a) ¿Mbaʼépa Jesús heʼi vaʼekue idisipulokuérape oho mboyvemi yvágape? b) ¿Mbaʼe porandúpa ñaanalisáta?

⁴ Jesús oho mboyvemi yvágape heʼi vaʼekue idisipulokuérape: “Oñemeʼẽta peẽme podér pe espíritu sánto ou vove pende ári, ha oikóta pendehegui che testígo Jerusalénpe, oparupiete Judéape, Samáriape ha umi lugár mombyryvehápe jepe ko yvy ape ári” (Hech. 1:8). Upéicharõ Jesús disipulokuéra omombeʼúta kuri umi notísia porã opárupi, ndahaʼéi Israélpe añónte. Kon el tiémpo umi hénte oikóva ko yvy tuichakuére orekóta kuri la oportunida oiko hag̃ua chuguikuéra Jesús disípulo (Mat. 28:​19, 20). Péro Jesús heʼi vaʼekue: “Oikóta pendehegui che testígo”. ¿Tekotevẽta piko upéicharõ umi disípulo pyahu oikuaa Jehová réra? ¿Térãpa oikóta chuguikuéra Jesús testígo añónte? Umi mbaʼe oñemombeʼúva Hechos kapítulo 15-pe ñanepytyvõta jaikuaa hag̃ua upéva.

5. ¿Mbaʼéichapa umi apóstol ha ansiáno oĩva Jerusalénpe ohechakuaa vaʼekue entéro persóna oikuaa vaʼerãha Jehová réra? (Ehecha pe taʼanga).

⁵ Áño 49-pe umi apóstol ha umi ansiáno oñembyaty Jerusalénpe oñemongeta hag̃ua peteĩ mbaʼére. Haʼekuéra ohecha vaʼerã tekotevẽpa umi ndahaʼéiva judío oñesirkunsida oiko hag̃ua chuguikuéra kristiáno. Oñemongetapa rire, Santiago haʼéva Jesús médio ermáno heʼi: “Pedro omombeʼu porãma ñandéve mbaʼéichapa Ñandejára imanduʼa umi hénte ótro tetãyguáre, ha ijapyteguikuéra haʼe oñepyrũmaha oiporavo peteĩ puévlo ogueraha vaʼerã héra”. ¿Máva rérarepa oñeʼẽ vaʼekue Santiago? Haʼe omensiona la heʼi vaʼekue proféta Amós ha heʼi: “Ikatu hag̃uáicha umi hénte hembýva oheka Jehovápe ipyʼaite guive umi hénte entéro nasiongua ndive, umi oñehenóiva che rérarupi, heʼi Jehová” (Hech. 15:​14-18). Upéicharõ umi disípulo pyahu oikuaavéta kuri Jehovápe, péro ndahaʼéi upévante. Avei oñehenóita chupekuéra ‘Ñandejára rérarupi’. Upéva heʼise haʼekuéra oikuaaukáta hague ótrope Ñandejára réra ha la hénte oikuaataha haʼekuéra orrepresentaha upe téra.

6, 7. a) ¿Mbaʼérepa Jesús ou vaʼekue ko yvy ape ári? b) ¿Maʼerãpa avei Jesús ou vaʼekue, ha mbaʼérepa jaʼe upéva iñimportanteveha?

⁶ Jesús réra heʼise “Jehová oporosalva”, ha Jehová ojevale vaʼekue Jesús rehe osalva hag̃ua entéro umi ojeroviávape hese ha Itaʼýrare. Jesús ou vaʼekue ko yvy ape ári omeʼẽ hag̃ua hekove umi hénte rehehápe (Mat. 20:28). Haʼe omeʼẽ rupi pe rreskáte, umi persónape ikatu oñeperdona hembiapo vaikue ha ikatu oiko pára siémpre (Juan 3:16).

⁷ ¿Péro mbaʼérepa oñekotevẽ vaʼekue peteĩ rreskáte? La oiko vaʼekuére pe hardín de Edénpe. Jahecháma haguéicha pe artíkulo ohasa vaʼekuépe, ñande tuakuéra ypykue Adán ha Eva opuʼã vaʼekue Jehová kóntrape ha upéicha rupi haʼekuéra ndaikatuvéima oiko pára siémpre (Gén. 3:​6, 24). Upévare Jesús ou vaʼekue ko yvy ape ári osalva hag̃ua Adán ha Eva familiarépe, péro haʼe ou kuri ojapo hag̃ua peteĩ mbaʼe iñimportantevéntemava. Ñanemanduʼa vaʼerã Jehová réra oñemongyʼa hague (Gén. 3:​4, 5). Upéicharõ Adán ha Eva familiare tekotevẽ vaʼekue oikuaa Jehová ndojapói hague mbaʼeve ivaíva ha héra sagradoha. Jesús orrepresenta porãiterei vaʼekue Jehovápe, upévare ndaipóri ótro haʼeichagua ikatúva ombotuicha Jehová réra.

8. ¿Mbaʼépa tekotevẽ vaʼekue oikuaa entéro omoirũva Jesúspe?

⁸ Entéro umi ojeroviáva Jesúsre, tahaʼe judío térã umi ndahaʼéiva, tekotevẽ vaʼekue oikuaa ojesalvataha Jesús Túa rupive, haʼéva hína Jehová (Juan 17:3). Avei Jesúsre oiko haguéicha ojekuaáta chupekuéra Jehová rérarupi. Haʼekuéra orrekonose vaʼerã kuri iñimportantetereiha oñembotuicha Jehová réra. Upéichamante ojesalváta hikuái (Hech. 2:​21, 22). Upévare entéro omoirũva Jesúspe oikuaa porã vaʼerã chupe ha Jehovápe. Ajeve voi ningo Jesús omohuʼãvo iñemboʼe heʼi vaʼekue la jatopáva Juan 17-pe. Upépe heʼi: “Che aikuaauka chupekuéra nde réra ha asegíta aikuaauka, ikatu hag̃uáicha haʼekuéra ohayhu umi héntepe nde cherayhu haguéicha, péicha che aiméta hendivekuéra” (Juan 17:26).

“PEẼ HÍNA CHE TESTÍGO”

9. ¿Mbaʼéichapa ikatu jahechauka Jehová réra iñimportantetereiha ñandéve g̃uarã?

⁹ Jahechaháicha, entéro omoirũva Jesúspe ombotuicha vaʼerã Jehová réra (Mat. 6:​9, 10). Ndaipóri vaʼerã ótra kósa iñimportantevéva ñandéve g̃uarã ha umi mbaʼe jajapóva rupive ojekuaa vaʼerã ñamombaʼetereiha Ñandejára réra. ¿Péro mbaʼépa ikatu jajapo ñambotuicha hag̃ua Jehová réra ha jahechauka hag̃ua la Satanás heʼi vaʼekue Jehováre japuha?

10. ¿Mbaʼépa oñemombeʼu ñandéve Isaías kapítulo 42 al 44-pe? (Isaías 43:9; 44:​7-9). (Ehecha pe taʼanga).

¹⁰ Isaías kapítulo 42 al 44 ohechauka mbaʼépa ñande ikatu jajapo ñambotuicha hag̃ua Jehová réra. Umi kapítulope oñeñeʼẽ la oikóvare oñepresenta jave peteĩ káso peteĩ hués renondépe. Upe kásope ojehechauka vaʼerã mávapa pe Dios verdadéro. Umi téxto heʼi Jehová ojerureha umi ndoadoráivape chupe tohechauka oexistípa añete idioskuéra. Jehová heʼi avei oimérõ oĩ testígo ohechaukáva siertoha upéva, toñepresenta hikuái. Péro ndaipóri ni peteĩ testígo ikatúva ojapo upéva (elee Isaías 43:9; 44:​7-9).

11. Ohechaukaháicha Isaías 43:​10-12, ¿mbaʼépa Jehová heʼi ipuévlope?

¹¹ (Elee Isaías 43:​10-12). Jehová heʼi ipuévlope: “Peẽ hína che testígo. Che hína pe Dios verdadéro”. Jehová oporandu ipuévlope: “¿Oĩ piko ótro Dios cheichagua?”, ha heʼi chupekuéra okontesta hag̃ua upéva (Is. 44:8). Ñande avei koʼág̃a jareko la oportunida ñakontestávo upe pregúnta ha upéva tuichaiterei mbaʼe ñandéve g̃uarã. Umi mbaʼe jaʼéva ha jajapóva rupive ikatu jahechauka Jehová añoite haʼeha pe Dios verdadéro. Ñandejára réra ningo iñimportanteve oimeraẽ ótro téragui. Tahaʼe haʼéva la Satanás ojapóva ñane kóntrape, ñande jaiko lájare jahechauka jahayhuha ñande pyʼaite guive Jehovápe ha ñaneñeʼẽrenduha chupe. Péicha jareko la oportunida ñambotuichávo Jehová réra.

12. ¿Mbaʼéichapa oñekumpli vaʼekue la heʼíva Isaías 40:​3, 5?

¹² Ñadefende jave Jehová réra jasegi hína Jesucristo ehémplo. Proféta Isaías heʼi vaʼekue oĩta hague álgien ‘opreparáva Jehová rape’ (Is. 40:3). ¿Mbaʼéichapa upéva oñekumpli vaʼekue? Juan el Bautista oprepara vaʼekue pe tape Jesúspe g̃uarã, péro legálmente oprepara vaʼekue Jehová rape pórke Jesús ou vaʼekue Jehová rérape ha oñeʼẽ Itúa rérape (Mat. 3:3; Mar. 1:​2-4; Luc. 3:​3-6). Upe profesía heʼi vaʼekue avei: “Umi hénte renondépe Jehová ohechaukáta tuicha ha ipoderosoha” (Is. 40:5). ¿Mbaʼéichapa oiko vaʼekue upéva? Jesús oúrõ guare ko yvy ape ári, orrepresenta porãiterei vaʼekue Jehovápe, upévare haʼete voi Jehová mbaʼe la oúva ko yvy ape ári (Juan 12:45).

13. ¿Mbaʼéichapa ikatu jasegi Jesús ehémplo?

¹³ Jesús ningo Jehová testígo ha ñande avei. Ñande jaraha Jehová réra ha jaʼe enterovépe umi mbaʼe porãite haʼe ojapóva. Ñakumpli porã hag̃ua ñande traváho kómo testígo jaikuaauka vaʼerã avei entéro umi mbaʼe Jesús ojapo vaʼekue ombotuicha hag̃ua Jehová réra (Hech. 1:8). Haʼe ningo pe testígo iñimportantevéva Jehová orekóva ha ñande jasegi iñehémplo (Apoc. 1:5). ¿Péro mbaʼéichapa avei jahechauka vaʼerã Jehová réra iñimportantetereiha ñandéve g̃uarã?

¿MBAʼÉICHAPA JAHECHAUKA JEHOVÁ RÉRA IÑIMPORTANTEHA ÑANDÉVE G̃UARÃ?

14. Ohechaukaháicha Salmo 105:​3, ¿mbaʼéichapa ñañeñandu ikatu haguére ñamombaʼeguasu Jehová réra?

¹⁴ Ñandeorgullóso jaraha haguére Jehová réra (elee Salmo 105:3). Jehová ovyʼaiterei ohechávo ñandeorgullosoha ikatu haguére ñamombaʼeguasu héra porãite (Jer. 9:​23, 24; 1 Cor. 1:31; 2 Cor. 10:17). Tuichaiterei mbaʼe ñandéve g̃uarã ñamombaʼe Jehová réra ha ñamombeʼu entéro mbaʼe haʼe ojapóva oĩ porãha. Ni mbaʼevéicharõ nañatĩri vaʼerã jaʼe hag̃ua ñaime ñaimehápe ñande haʼeha testígo de Jehová, tahaʼe ñande travahohápe, eskuéla térã koléhiope ha jaikohápe. Satanás ndoipotái ñande ñañeʼẽ Jehováre umi héntepe (Jer. 11:21; Apoc. 12:17). Satanás ha umi omosarambíva japu oipota voi la hénte hesarái Jehová réragui (Jer. 23:​26, 27). Péro ñande ñamombaʼeterei rupi Jehová réra, ñamombaʼeguasuse chupe “tódo el tiémpo” (Sal. 5:11; 89:16).

15. ¿Mbaʼépa heʼise jajerovia Jehová rérare?

¹⁵ Jasegi jajerovia Jehová rérare (Joel 2:32; Rom. 10:​13, 14). Jajerovia Jehová rérare ndeʼiséi sólamente jaikuaaha ha jaipuruha Ñandejára réra. Upéva rangue heʼise jaikuaaha mbaʼeichaguápa hína Jehová, ñakonfia hese ha jajerure chupe tañanepytyvõ ha tañandegia (Sal. 20:7; 99:6; 116:4; 145:18). Jajerovia Jehová rérare heʼise avei ñamombeʼuha la héntepe mbaʼéichapa haʼe héra ha umi kualida porã haʼe orekóva. Avei ñaipytyvõ umi héntepe oñarrepenti ha okambia hag̃ua ikatu hag̃uáicha Jehová oguerohory chupekuéra (Is. 12:4; Hech. 2:​21, 38).

16. ¿Mbaʼéichapa ikatu jahechauka Satanás ijapuha?

¹⁶ Tekotevẽramo jahasa asýta ikatu hag̃uáicha oñemombaʼeguasu Jehová réra (Sant. 5:​10, 11). Jasegíramo ñaneñeʼẽrendu Jehovápe jasufríramo jepe, jahechauka Satanás ijapuha. Job tiémpope Satanás oñeʼẽ vai Jehová siervokuérare ha heʼi: “Peteĩ persóna oĩramo omano hag̃uáicha, omeʼẽta entéro mbaʼe orekóva osalva hag̃ua hekove” (Job 2:4). Satanás ontendeka vaʼekue Jehová siervokuéra oadorataha chupe oĩ porã ajánte la situasión, péro ijetuʼu jave hendivekuéra ohejataha Jehovápe. Ñande avei koʼág̃a ikatu jahechauka ni mbaʼevéicharõ ndajahejamoʼãiha Jehovápe, jepe Satanás oñemoĩ mbarete ñane kóntrape. Ikatu ñaĩ segúro Jehová osegitaha ñandeprotehe héra rehehápe (Juan 17:11).

17. Ohechaukaháicha 1 Pedro 2:​12, ¿mbaʼéichapa ikatu avei ñamombaʼeguasu Jehová réra?

¹⁷ Jahechauka jarrespetaha Jehová réra (Prov. 30:9; Jer. 7:​8-11). La hénte oikuaa ñande haʼeha testígo de Jehová, upévare la jajapóva ikatu omombaʼeguasu térã omongyʼa Ñandejára réra (elee 1 Pedro 2:12). Upéicha rupi ñande jajapo ikatúva guive ñamombaʼeguasu hag̃ua Jehovápe jaʼéva ha ñañekomporta lája rupive. Upéicha ñaneimperféktoramo jepe jasegíta ñamombaʼeguasu Ñandejára réra.

18. ¿Mbaʼéichapa avei ikatu jahechauka Jehová réra iñimportantetereiha ñandéve g̃uarã? (Ehecha pe nóta).

¹⁸ Ñande ñamombaʼeguasu Jehová réra tahaʼe haʼéva la hénte opensáva ñanderehe (Sal. 138:2). ¿Mbaʼérepa upéva iñimportánte? Pórke jajapo jave umi mbaʼe ombovyʼáva Jehovápe pyʼỹinte la héntepe ndogustái upéva ha oñepyrũ heʼi heta mbaʼe vai ñane kóntrape.a Por ehémplo Jesús omanótarõ guare la hénte heʼi vaʼekue hese haʼeha peteĩ kriminál ha odespresia chupe hikuái. Péro Jesús oaguanta vaʼekue upéva ikatu hag̃uáicha upéi oñemombaʼeguasu Jehová réra. Haʼe ‘notĩri vaʼekue omano hag̃ua pe yvyráre’ pórke ndoikói ojepyʼapyeterei la hénte opensávare hese (Heb. 12:​2-4). Jesús ojesareko meme vaʼekue ojapo hag̃ua Ñandejára volunta (Mat. 26:39).

19. ¿Mbaʼéichapa reñeñandu ikatu haguére remombaʼeguasu Jehová réra ha mbaʼérepa?

¹⁹ Ñande ñaĩ orgullóso jaservi haguére Jehovápe, ha tuichaiterei mbaʼe ñandéve g̃uarã ñañehenói testígo de Jehová. Upévare jasegi ñambotuicha chupe oĩramo jepe hénte ñandedespresiáva upe haguére. Jehová réra siémpre iñimportantevéta ñandéve g̃uarã tahaʼe haʼéva la hénte opensáva ñanderehe. Upévare jasegíkena ñambotuicha Jehová réra Satanás oñehaʼãramo jepe ñandejoko. Péicha jasegíta Jesús ehémplo ha jahechaukáta ndaiporiha ótra kósa iñimportantevéva ñandéve g̃uarã Jehová réragui.