“Nde ningo peteĩ persóna Ñandejára ohayhuetereíva”

1, 2. ¿Mbaʼépa ñanepytyvõta ñaĩ hag̃ua segúro Jehová ñanderayhuha?

JEHOVÁ ningo ohayhueterei isiervokuérape, péro oĩ algúno opensáva ndovaleiha mbaʼeverã ha ndoroviái Jehová ovaloraha chupekuéra. ¿Mbaʼérepa oiméne oñeñandu hikuái péicha? Ikatu oime oĩ otrata vaíva raʼe koʼã ermánope ha upevakuére oñandu naiñimportanteiha hikuái. ¿Reñeñandúpa nde avei upéicha? ¿Mbaʼéichapa ikatu reĩ segúro Jehová nemombaʼetereiha?

² Tuicha ikatu nepytyvõ rehecháramo la Bíbliape mbaʼéichapa Jehová oipota ojetrata la héntepe. Por ehémplo Jesús orrespeta ha otrata porãiterei vaʼekue umi persónape, péicha ohechauka haʼe ha Itúa omombaʼetereiha umi hénte oñandúvape ndovaleiha mbaʼeverã (Juan 5:19; Heb. 1:3). Ko artíkulope jahecháta mbaʼéichapa Jesús oipytyvõ vaʼekue umi héntepe ontende hag̃ua Jehová omombaʼeha chupekuéra. Avei jahecháta mbaʼéichapa ikatu ñande voi ñañekonvense Ñandejára ñanderayhuetereiha (Ageo 2:7).

JESÚS OHECHAUKA VAʼEKUE UMI HÉNTEPE JEHOVÁ OMOMBAʼEHA CHUPEKUÉRA

3. ¿Mbaʼéichapa Jesús otrata vaʼekue umi hénte oikóvape Galiléape?

³ Jesús opredikárõ guare Galiléape hetaiterei persóna oho vaʼekue hendápe ohendu hag̃ua chupe ha oipotágui haʼe omonguera chupekuéra. Jesús ohechakuaa vaʼekue “mbaʼéichapa oñemaltrata umi héntepe ha isarambipaha hikuái”, haʼekuéra “ojogua umi ovecha ndorekóivape pastór” (Mat. 9:36; ehecha umi nóta de estúdio retopátava pe Traducción del Nuevo Mundo españólpe). Umi líder rrelihióso oapoʼi vaʼekue umi héntepe ha heʼi voi ‘nomereseiha Ñandejára oguerohory chupekuéra’ (Juan 7:​47-49; ehecha pe nóta de estúdio retopátava pe Traducción del Nuevo Mundo españólpe). Jesús katu idiferentete vaʼekue pórke otrata porãiterei umi héntepe, haʼe oñemotiémpo omboʼe hag̃ua chupekuéra ha omonguera hag̃ua umi hasývape (Mat. 9:35). Avei ikatu hag̃uáicha oñepytyvõ hetavépe Jesús ombokatupyry umi apóstolpe opredika hag̃ua ha omeʼẽ chupekuéra autorida omonguera hag̃ua umi héntepe (Mat. 10:​5-8).

4. Jesús otrata porã vaʼekue umi hénte ojeapoʼívape, ¿mbaʼépa ñaaprende upévagui?

⁴ Jesús otrata porã ha orrespeta vaʼekue umi hénte ohendusévape chupe. Péicha Jesús ohechauka haʼe ha Itúa omombaʼetereiha umi hénte normálmente ojeapoʼívape. Oimérõ nde reservi Jehovápe ha sapyʼánte reñandu nderevaleiha mbaʼeverã, epensákena mbaʼéichapa Jesús otrata vaʼekue yma umi hénte oaprendesévape chugui. Nemanduʼáramo upévare ehechakuaáta mbaʼeichaite pevépa Jehová nderayhu.

5. ¿Mbaʼe situasiónpepa oĩ vaʼekue pe kuña Jesús oikuaa vaʼekue Galiléape?

⁵ Jesús omboʼe vaʼekue umi héntepe por grúpo, péro avei ojesareko vaʼekue káda persónare. Por ehémplo opredika aja Galiléape Jesús ou vaʼekue oikuaa peteĩ kuña 12 áñorema oikóva iñemorráhia (Mar. 5:25). Asegún pe léi upe kuña ikyʼa vaʼekue ha oĩramo opokóva hese opytáta kuri ikyʼa avei. Oiméne pe kuña ndaikatúi vaʼekue oĩ trankílamente umi hénte apytépe ha provávlemente oiko vaʼekue haʼeño tódo el tiémpo. Hiʼarive oĩ rupi upe situasiónpe haʼe ndaikatúi vaʼekue oadora Jehovápe umi ótro héntendi pe sinagógape ni umi fiésta aja (Lev. 15:​19, 25). Oiméne anga hetaite osufri rakaʼe upe kuña, ndahaʼéi voi pe mbaʼasy káusarente síno oñandúgui avei ndaiporiha ohayhúva chupe (Mar. 5:26).

6. ¿Mbaʼépa ojapo raʼe pe kuña hasýva okuera hag̃ua?

⁶ Pe kuña ningo hetaitereíma osufri ha oipota vaʼekue Jesús omonguera chupe, péro haʼe ndohói derechoite ojerure Jesúspe upéva. ¿Mbaʼérepa? Ikatu oime upe kuña otĩ raʼe térã okyhyje Jesús ojaʼórõ g̃uarã chupe oĩ haguére umi hénte apytépe, siéndo ke haʼe ikyʼa hína asegún pe léi. Upévare pe kuña ohónte opoko Jesús aóre pórke oĩ vaʼekue segúra péichante jepe ojapórõ okueratamaha (Mar. 5:​27, 28). Upe kuña ojerovia mbareteterei rupi ojapo péicha ha okuera. Upéi Jesús oporandu mávapa opoko raʼe hese, upépe pe kuña naipohãi ha heʼímante haʼe ojapo hague upéva. ¿Mbaʼépa ojapo raʼe upémarõ Jesús?

7. ¿Mbaʼéichapa Jesús otrata vaʼekue pe kuña osufrietévape? (Marcos 5:34).

⁷ Jesús ohechakuaa vaʼekue upe kuña ‘oñemondýi ha oryrýi osusũha’. Upévare imbaʼeporã hendive ha ohechauka orrespetaha chupe (Mar. 5:33). Jesús oreko enkuénta mbaʼéichapa anga oñeñandu pe kuña ha upévare omokyreʼỹ chupe, heʼi voi upe kuñáme “che rajy”. Jesús oipurúvo upe palávra ohechauka orrespeta hague upe kuñáme ha avei ohechauka ohayhuha chupe ha imbaʼeporãha hendive (elee Marcos 5:34). Koʼápe añoite ningo la Biblia omombeʼu Jesús heʼi hague “che rajy” peteĩ kuñáme. Provávlemente Jesús oipuru raʼe upe palávra ko situasiónpe pórke ohecha mbaʼeichaitépa pe kuña okyhyje. ¿Mbaʼéichapa ndéverõ g̃uarã oiméne oñeñandu raʼe upe kuña Jesús oñeʼẽ rire chupe? Oiméne ovyʼaite rakaʼe. Ñamoĩ chupe Jesús noñeʼẽirire mborayhúpe upe kuñáme. Haʼe lomímonte okueráta kuri, péro ikatu opyta oñeñandu kulpávle oho haguére umi hénte apytépe ha opoko haguére Jesús aóre. Péro jahechaháicha Jesús ndoipotái vaʼekue upe kuña okueránte, upéva rangue oipota vaʼekue haʼe oikuaa Ñandejára ohechaha chupe itajyrami ohayhuetévaramo.

8. ¿Mbaʼépa ohasa vaʼekue peteĩ ermána oikóva Brasílpe?

⁸ Koʼág̃arupi avei Ñandejára siervokuéra apytépe oĩ umi hasykatúva, ha upéva káusare oñeñandu yvýre ha opensa voi ndovaleiha mbaʼeverã hikuái. Jahechamína Maríaa káso. Haʼe ningo peteĩ prekursóra rregulár oikóva Brasílpe ha onaséma vaʼekue voi hetymaʼỹre ha avei ndorekói vaʼekue ipo iskiérda. María heʼi: “Che kompañerokuéra eskuelapegua oñembohory meme vaʼekue cherehe ha omoĩ chéve hikuái umi markánte ivaietereíva. Sapyʼánte che hentekuéra apytépe avei oĩ vaʼekue chetrata vaíva ha upévare añandu vaʼekue ndavaleiha mbaʼeverã”.

9. ¿Mbaʼéichapa oñepytyvõ vaʼekue Maríape ontende hag̃ua Jehová ohayhuha chupe?

⁹ Kon el tiémpo Maríagui oiko vaʼekue testígo de Jehová ha umi ermáno ha ermána kongregasionpegua okonsola vaʼekue chupe. Koʼã ermáno oipytyvõ Maríape ontende hag̃ua mbaʼéichapa Jehová ohecha chupe ikatu hag̃uáicha haʼe avei ojevalora. María heʼi: “Ndaikatúi ningo akontapa mboy ermáno ha ermánapa chepytyvõ. Che pyʼaite guive aagradese Jehovápe omeʼẽ haguére chéve peteĩ família iporãitéva kongregasiónpe”. Umi ermáno ha ermána oipytyvõ vaʼekue Maríape ohechakuaa hag̃ua Jehová ohayhuetereiha chupe.

10. ¿Mbaʼe provlémapa oreko vaʼekue María Magdalena? (Ehecha pe taʼanga).

¹⁰ Jahechamína mbaʼéichapa Jesús oipytyvõ vaʼekue avei María Magdalénape, haʼe ningo oreko vaʼekue 7 demónio (Luc. 8:2). Upe tiémpope, oiméne umi demónio ojapoka rakaʼe María Magdalénape heta mbaʼe iñextráñova ha upévare oiméne umi hénte omboyke raʼe chupe. María Magdalena heta osufri vaʼekue ha provávlemente okyhyje, haʼe oiméne opensa ndaiporiha ohayhúva chupe ha ndoikuaáine raʼe mbaʼépa ojapóta. Upéi ojepeʼa vaʼekue María Magdalénape umi demónio poguýgui ha oiko chugui Jesús disípula. ¿Mbaʼe ótra kósapa Jesús ojapo vaʼekue María Magdalena rehehápe haʼe ontende hag̃ua Ñandejára ohayhuha chupe?

11. ¿Mbaʼéichapa Jesús ohechauka vaʼekue María Magdalénape Jehová omombaʼetereiha chupe? (Ehecha pe taʼanga).

¹¹ Jesús omeʼẽ vaʼekue avei María Magdalénape peteĩ oportunida iporãitereíva. Jesús oinvita chupe oho hag̃ua hendive ha umi disípulondi opredika aja hikuái umi puevlohárupi.b Upéicha rupi María Magdalena ikatu vaʼekue osegi ohendu mbaʼéichapa Jesús omboʼe umi héntepe. Avei Jesús orresusitaha díapema voi ojechauka vaʼekue María Magdalénape. Upérõ Jesús primeroite oñeʼẽ vaʼekue unos kuánto disípulopente, ha María Magdalena oĩ vaʼekue umíva apytépe. Hiʼarive Jesús ojerure vaʼekue chupe oho hag̃ua oavisa umi apóstolpe haʼe orresusitáma hague. Entéro koʼã mbaʼe Jesús ojapóva oipytyvõ vaʼekue María Magdalénape ontende hag̃ua Jehová omombaʼetereiha chupe (Juan 20:​11-18).

12. ¿Mbaʼérepa Lidia opensa vaʼekue ndovaleiha mbaʼeverã?

¹² Koʼág̃arupi avei oĩ heta oñeñandúva María Magdalena oñeñandu haguéicha ha opensa hikuái ndaiporiha ohayhúva chupekuéra. Por ehémplo Lidia, peteĩ ermána oikóva Espáñape, omombeʼu la haʼe ohasa vaʼekue. Haʼe heʼi isy hyeguasúrõ guare chugui opensáma vaʼekue voi oitykávo la imemby. Lidia imanduʼa haʼe michĩetérõ guare isy nopenái hague hese ha heʼími hague chupe heta mbaʼe ivaíva. Lidia omombeʼu: “Che sy ndohechaukái rupi chéve cherayhuha, che siémpre aipota vaʼekue la hénte cheasepta ha cherayhu. Mama káusare apensa vai vaʼekue chejehe ha akyhyje vaʼekue ndaipórirõ g̃uarã núnka avave cherayhúva”.

13. ¿Mbaʼépa oipytyvõ Lídiape ohecha hag̃ua Jehová omombaʼetereiha chupe?

¹³ Heta mbaʼe okambia Lídiape g̃uarã ostudia rire la Biblia. Haʼe oñepyrũ oñemboʼe Jehovápe, olee la Biblia ha umi ermáno ha ermána heʼi chupe umi mbaʼe iporãva. Koʼã mbaʼe oipytyvõ Lídiape ohechakuaa hag̃ua Jehová omombaʼetereiha chupe. Haʼe heʼi: “Che ména pyʼỹinte heʼi chéve cherayhuha ha siémpre chemomanduʼa umi kualida porã arekóva. Umi che amigokuéra péicha avei chetrata”. Jahecha rire ko káso epensamíntena, ¿oĩpa avei ne kongregasiónpe álgien ikatúvape reipytyvõ ohechakuaa hag̃ua Jehová ohayhuetereiha chupe?

EPENSA PORÃKENA NDEJEHE JEHOVÁ OPENSAHÁICHA

14. ¿Mbaʼéichapa 1 Samuel 16:7 ñanepytyvõ ñapensa hag̃ua ñandejehe Jehová opensaháicha? (Ehecha pe rrekuádro “¿Mbaʼérepa Jehová ohayhuete isiervokuérape?”).

¹⁴ Nemanduʼákena Jehová opensa lája nderehe idiferenteha ko múndo opensávagui nderehe (elee 1 Samuel 16:7). Umi hénte ko mundopegua opensa peteĩ persóna iñimportánte hag̃ua tekotevẽha ipínta porã, ipláta heta ha ijestúdio porã, péro Jehová idiferentete (Is. 55:​8, 9). Upévare ejegia rangue ko múndo opensávare, eñehaʼãna epensa ndejehe Jehová opensaháicha nderehe. La Biblia omombeʼu yma oĩ hague avei umi sapyʼánte opensáva ndovaleiha mbaʼeverã, por ehémplo Elías, Noemí ha Ana. Elee jave la haʼekuéra ohasa vaʼekue eñehaʼãna ehecha mbaʼeichaitépa Jehová ohayhu vaʼekue chupekuéra. Ideprovechoitereíta avei ndéve reskrivíramo umi mbaʼe rehasa vaʼekue ohechaukáva Jehová nemombaʼetereiha. Avei ikatu eheka ñane puvlikasionkuérape umi informasión nepytyvõtava rejevalorave hag̃ua.c

15. ¿Mbaʼérepa Daniel haʼe vaʼekue “peteĩ persóna Ñandejára ohayhuetereíva”? (Daniel 9:23).

¹⁵ Nemanduʼákena Jehová nderayhuha ndefiél haguére chupe. Proféta Daniel orekórõ guare provávlemente mas de 90 áño, ou vaʼekue ‘ikangy, ikaneʼõiterei’ ha oñedesanima (Dan. 9:​20, 21). ¿Mbaʼépa ojapo Jehová omokyreʼỹ hag̃ua chupe? Haʼe ombou ánhel Gabriélpe heʼi hag̃ua Daniélpe haʼeha “peteĩ persóna Ñandejára ohayhuetereíva”. Avei pe ánhel heʼi Daniélpe Jehová ohendu hague iñemboʼe (elee Daniel 9:23). Daniel ohayhu vaʼekue umi mbaʼe iporãva ha ifiél, upévare Ñandejára ohayhueterei vaʼekue chupe (Ezeq. 14:14). Koʼág̃a avei ikatu ñanemokyreʼỹ la upe ánhel heʼi vaʼekue Daniélpe, upévare voi Jehová oñenkarga opyta hag̃ua upéva la Bíbliape (Rom. 15:4). Nde avei ndefiél ha rehayhu rupi umi mbaʼe iporãva ikatu reĩ segúro Jehová nderayhuetereiha. Avei Jehová ohendu haguéicha Daniel ñemboʼe, katuete nerendu reñemboʼe jave chupe (Miq. 6:8; Heb. 6:10).

16. ¿Mbaʼépa nepytyvõkuaa epensa hag̃ua Jehová haʼeha nde Ru nderayhuetéva?

¹⁶ Epensa memékena Jehová haʼeha nde Ru nderayhuetéva. Jehová ningo nepytyvõse ha haʼe ndoikói okontrola hína umi mbaʼe vai rejapóva (Sal. 130:3; Mat. 7:11; Luc. 12:​6, 7). Upéva tuicha oipytyvõ umi oñandúvape sapyʼánte ndovaleiha mbaʼeverã. Por ehémplo peteĩ ermána hérava Michelle oikóva Espáñape, omombeʼu iména heta áñore otrata vai hague chupe, upévare haʼe oñandu ndojehayhuiha chupe ha ndovaleiha mbaʼeverã. Michelle heʼi: “Añeñandu jave yvýre añehaʼã añeimahina Jehová cheguerahaha hína ijyva ári oñangareko hag̃ua cherehe ha péicha ohechaukaha cherayhuha” (Sal. 28:9). Lauren, peteĩ ermána oikóva Sudáfricape opensa péicha: “Jehová ningo chemoag̃uíma ijehe ha oipuru peteĩ piólaicha pe mborayhu chegueru hag̃ua hendápe. Entéro koʼã áñope chepytyvõ ani hag̃ua añemomombyry chugui ha ojevale voi cherehe amboʼe hag̃ua ótrope. Upéicharõ ningo Jehová cherayhúmante vaʼerã ha chedeprovécho chupe” (Os. 11:4).

17. ¿Mbaʼépa ikatu nepytyvõ ani hag̃ua reduda Jehová ndeguerohoryha? (Salmo 5:12). (Ehecha pe taʼanga).

¹⁷ Aníkena reduda Jehová ndeguerohoryha (elee Salmo 5:12). David heʼi vaʼekue Jehová oguerohoryha umi hembiapo porãvape, ha heʼi avei upéva haʼeteha voi “peteĩ eskúdo oprotehéva chupekuéra”. Reĩramo segúro Jehová ndeguerohoryha ha nepytyvõha, upéva ikatu ndeprotehe ani hag̃ua repensa vai ndejehe. ¿Mbaʼéichapa ikatu reĩ segúro Jehová ndeguerohoryha? Jahecháma haguéicha Jehová oasegura ndéve upéva Iñeʼẽ rupive. Avei Jehová ojevale umi ansiánore, umi ne amígore ha hetave isiérvore nemomanduʼa hag̃ua mbaʼeichaitépa haʼe nderayhu. ¿Péro mbaʼépa ere térã rejapo vaʼerã oĩ jave ndeguerohorýva?

18. Oĩ jave ndeguerohorýva, ¿mbaʼérepa eguerovia vaʼerã la heʼíva ndéve?

¹⁸ Umi nderayhúva ha ndekuaa porãva heʼi jave ndéve umi mbaʼe porã erekóva, aníkena epensa ndahaʼeiha siérto la heʼíva hikuái. Ikatu oime Jehová ojevale hína hesekuéra rehechakuaa hag̃ua haʼe ndeguerohoryha. Michelle, pe ermána ñañeʼẽma vaʼekuére heʼi: “Saʼi saʼípe aaprende ahávo aguerovia vaʼerãha oĩ jave cheguerohorýva. Chéve ningo ndahaʼéi la ifasilpáva aguerovia hag̃ua oĩ jave omoporãva álgo cherehe, péro aikuaa Jehová oipotaha ajapo upéva”. Umi ansiáno mborayhúpe oipytyvõ vaʼekue avei ko ermánape ohechakuaa hag̃ua Jehová omombaʼeha chupe. Koʼág̃a Michelle oservi de prekursóra ha de voluntária rremóta Betélpe g̃uarã.

19. ¿Mbaʼérepa ikatu reĩ segúro Ñandejára nderayhuha?

¹⁹ Jesús ningo mborayhúpe ñanemomanduʼa ñande Ru yvagapegua oñeinteresaha ñanderehe (Luc. 12:24). Upévare ikatu ñaĩ segúro Jehovápe g̃uarã ñaneimportanteha. Aníkena núnka ñanderesarái upévagui ha ñañehaʼãkena avei ñaipytyvõ ótrope ohechakuaa hag̃ua Ñandejára ohayhuetereiha chupe.