Ñane súmo saserdóte Jesús ñanentende porãiterei

1, 2. a) ¿Mbaʼérepa Jehová ombou vaʼekue Itaʼýra ohayhuetévape ko yvy ape ári? b) ¿Mbaʼépa jahecháta ko artíkulope? (Hebreos 5:​7-9).

OJAPÓMA 2.000 áñorupi Jehová ombou hague Itaʼýra ohayhuetévape ko yvy ape ári. ¿Maʼerãpa haʼe ojapo raʼe upéva? Heta mbaʼére. Por ehémplo oipeʼa hag̃ua la héntepe pekádo ha ñemano poguýgui, ha avei ikatu hag̃uáicha oñesolusiona entéro umi provléma Satanás omoñepyrũ vaʼekue (Juan 3:16; 1 Juan 3:8). Jehová oikuaa porã kuri Jesús oúramo ko yvy ape ári peteĩ umánoicha oĩvetaha preparádo oiko hag̃ua chugui ñane súmo saserdóte. Upéva tuicha oipytyvõta kuri chupe ñanembyasy, ñandeporiahuvereko ha ñanentende hag̃ua. Pe áño 29 guive, Jesús ojevautisa rire oñepyrũma vaʼekue oservi de súmo saserdóte.a

² Ko artíkulope jahecháta mbaʼéichapa Jesús ou rupi ko yvy ape ári ñanentende porã ha péicha ikatupyryve oservi hag̃ua de súmo saserdóte. Iñimportanteterei ñantende porã upéva, pórke péicha ifasilvéta ñandéve ñañemboʼe Jehovápe ha ñañemoag̃ui hese, koʼýte ñañembyasy jave jajavy haguére (elee Hebreos 5:​7-9).

ÑANDEJÁRA RAʼY OU KO YVY APE ÁRI

3, 4. ¿Mbaʼe kámbio tuichávapa Jesús ohasa vaʼekue oĩrõ guare ko yvy ape ári?

³ Oĩ heta ñande apytépe ohasámava heta kámbio. Por ehémplo oĩ ova vaʼekue peteĩ lugár ovyʼaitereihágui ha oheja ihénte ha iñamigokuéra ohayhuetévape. Upéva ningo ijetuʼueterei, péro ndaipóri ohasáva umi kámbio Jesús ohasa haguéicha. ¿Mbaʼérepa jaʼe upéva? Yvágape Jesús haʼe vaʼekue pe primer ánhel ha pe iñimportantevéva. Jehová ohayhueterei vaʼekue chupe ha Jesús ovyʼaiterei ombaʼapóvo Itúa ykerete (Sal. 16:11; Prov. 8:30). Upéicharõ jepe, heʼiháicha Filipenses 2:7 Jesús oheja vaʼekue “opa mbaʼe orekóva” yvágape ou hag̃ua oiko ko yvy ape ári umi hénte iñimperféktova apytépe.

⁴ Ñapensamína avei mbaʼéichapa Jesús oiko vaʼekue ko yvy ape ári michĩrõ guare. Por ehémplo haʼe onase vaʼekue peteĩ família imboriahúvape. Jaikuaa upéva pórke haʼe onasérõ guare ituakuéra oraha vaʼekue témplope peteĩ sakrifísio sensillomínte (Lev. 12:8; Luc. 2:24). Avei pe rréi Herodes iñañaitéva oikuaárõ guare Jesús onase hague, oñehaʼã vaʼekue ojuka chupe. Upémarõ Jesús tuakuéra oraha chupe Egíptope okañy hag̃ua hikuái ha oiko voi hikuái upépe un tiémpore (Mat. 2:​13, 15). Ajépa idiferentete la Jesús oiko lája ko yvy ape ári.

5. Jesús oĩrõ guare ko yvy ape ári, ¿mbaʼépa ohecha vaʼekue ha mbaʼéichapa upéva ombokatupyry chupe oservi hag̃ua de súmo saserdóte? (Ehecha pe taʼanga).

⁵ Jesús oĩrõ guare ko yvy ape ári ohecha mbaʼeichaitépa umi hénte oĩva ijerére ohasa asy. Oiméne chugui voi omano vaʼekue umi ohayhúva, umíva apytépe oĩne raʼe ituanga José. Opredikaha tiémpope katu Jesús ohecha vaʼekue umi leprósope, umi siégope, umi paralítikope ha avei umi tuakuéra oñembyasývape omano haguére chuguikuéra ifamília. Jesús oiporiahuverekoiterei vaʼekue entéro koʼã persónape (Mat. 9:​2, 6; 15:30; 20:34; Mar. 1:​40, 41; Luc. 7:13). Jaikuaa ningo Jesús oĩrõ guare yvágape ohecha hague avei mbaʼéichapa la hénte osufri, péro oiko rire chugui peteĩ yvypóra ontende porãvéntema mbaʼépa la ñañandúva jasufri jave (Is. 53:4). Jesús ohecha porãvéntema kuri mbaʼéichapa la hénte oñeñandu umi diferénte situasiónpe ha mbaʼeichaitépa ohasa asy umi provléma káusare. Jesús oiko rupi peteĩ umánoicha ontende porã vaʼekue mbaʼépa heʼise ñanekaneʼõ, jajepyʼapy ha ñañembyasy.

JESÚS OHECHAUKA VAʼEKUE ONTENDEHA UMI HÉNTEPE

6. ¿Mbaʼépa ñanemboʼe pe profesía oĩva Isaíaspe? (Isaías 42:3).

⁶ Jesús oĩ aja ko yvy ape ári ohechauka vaʼekue ontende porãitereiha mbaʼéichapa osufri umi hénte ojetrata vaívape. Péicha oñekumpli vaʼekue pe profesía Jehová omeʼẽ vaʼekue proféta Isaías rupive. Umi Escrituras Hebréaspe oñeñeʼẽ jave umi hénte iñimportánte ha irríkovare, sapyʼánte heʼi ojoguaha hikuái umi hardín ojerrega porãvape térã umi yvyramáta guasu guasúpe (Sal. 92:12; Is. 61:3; Jer. 31:12). Péro umi hénte imboriahúvape ha ojetrata vaívape oñekompara umi takuarílla opẽ mbotávare ha umi lámpara ogue potávare. Ko múndope oñepensa jepi koʼãichagua persóna ndaideprovechoiha avavépe (elee Isaías 42:3). Jehová oipuru vaʼekue koʼã ehémplo ohechauka hag̃ua mbaʼeichaitépa Jesús ohayhúta ha oiporiahuverekóta kuri umi hénte ojedespresiávape.

7, 8. ¿Mbaʼéichapa oñekumpli vaʼekue Jesús rehe pe profesía oĩva Isaíaspe?

⁷ Mateo ohechauka vaʼekue oñekumpli hague Jesús rehe Isaías profesía heʼíva: “Haʼe nomopẽmoʼãi ni peteĩ takuarílla opẽ mbotáva, nomboguemoʼãi ni peteĩ lámpara ogue potáva” (Mat. 12:20). Umi hénte ojeapoʼíva ha ojetrata vaívape oiméne oñeñandu rakaʼe peteĩ takuarílla opẽ mbotávaicha ha peteĩ lámpara ogue potávaicha, péro Jesús ojapo vaʼekue heta milágro oipytyvõ hag̃ua koʼãichagua héntepe. Por ehémplo Jesús omonguera vaʼekue peteĩ kuimbaʼe henyhẽvape lépragui, oiméne pe kuimbaʼe ni nopensavéima kuri okuerataha ha ikatu jeytaha oĩ ifamília ha iñamigokuéra apytépe (Luc. 5:​12, 13). Térã ñanemanduʼamíntena pe kuimbaʼe nohendúiva ha ndaikatúivare oñeʼẽ porã, ñapensamíntena mbaʼéichapa oiméne haʼe oñeñandu rakaʼe ohechávo la hénte oñemongeta kyreʼỹha ha haʼe katu nontendéi la oikóva (Mar. 7:​32, 33). Péro ndahaʼéi upévante.

⁸ Jesús tiémpope heta judío heʼi vaʼekue umi hénte hasýva térã orekóva algúna diskapasida oĩha péicha opeka haguére térã ituakuéra opeka haguére (Juan 9:2). Upe enseñánsa japu káusare pyʼỹinte oñemaltrata vaʼekue umi hénte hasývape ha haʼekuéra oñandu vaʼekue ndovaleiha mbaʼeverã. Péro Jesús omonguera vaʼekue umi héntepe ha oipytyvõ chupekuéra oikuaa hag̃ua Ñandejára oñeinteresaha hesekuéra. Péicha Jesús okumpli vaʼekue pe profesía oĩva Isaíaspe, ¿mbaʼépa ñanemboʼe upéva ñandéve avei?

9. ¿Mbaʼéichapa Hebreos 4:​15, 16 ohechauka ñane súmo saserdóte ontendeha umi umáno imperféktope?

⁹ (Elee Hebreos 4:​15, 16). Ñande avei ikatu ñaĩ segúro Jesús siémpre ontendetaha umi mbaʼe ñañandúva. ¿Mbaʼépa ojapo peteĩ persóna ontendéva hapichápe? Peichagua persóna ombyasyeterei voi ohecha jave oĩha osufríva ha opokoiterei hese umi ótro oñandúva. Pe palávra griega ojetradusíva “ñanentende” heʼise ñañanduha pe dolór térã pe sufrimiénto ótro ohasáva. Iporã jareko enkuénta Pablo oipuru hague avei upe palávra griega Hebreos 10:​34-pe ohechauka hag̃ua ñande ñambyasy ha ñantendeha umi oĩvape préso. Jalee jave la Bíbliape la Jesús ojapo vaʼekue umi hénte rehehápe, ikatu jahecha mbaʼeichaitépa haʼe ombyasy vaʼekue chupekuéra. Haʼe nomonguerái vaʼekue umi héntepe ojapo vaʼerãgui reínte upéva, síno pórke añetehápe ojepyʼapy hesekuéra ha ohecha voi mbaʼéichapa ikatu oipytyvõ chupekuéra. Por ehémplo Jesús omonguerárõ guare pe leprósope natekotevẽi kuri opoko katuete hese, péro haʼe ojapo upéicha. Provávlemente heta áño haguépe oĩ jey kuri la opokóva primera ves pe kuimbaʼére. Avei omonguerátarõ guare pe kuimbaʼe nohendúivape, Jesús mborayhúpe oraha raẽ chupe mombyry umi héntegui peteĩ lugár itrankilohápe ha upépe ae omonguera chupe. Avei ñanemanduʼamína pe kuña oñarrepenti vaʼekuére hembiapo vaígui, haʼe ningo hesaýpe ojohéi Jesúspe la ipy ha omokã iñakãranguépe. Upérõ guare peteĩ fariséo odespresia vaʼekue upe kuñáme, péro Jesús pyʼaguasúpe odefende vaʼekue chupe (Mat. 8:3; Mar. 7:33; Luc. 7:44). Péicha jahecha Jesús núnka nomboykéi hague umi hénte hasývape ha umi opeka vai vaʼekuépe, upéva rangue haʼe siémpre orresivi porã vaʼekue umi héntepe ha ohechauka ohayhuha chupekuéra. Koʼág̃a avei ikatu ñaĩ segúro Jesús ñanentendeha ha ñandeporiahuverekoha.

ÑANDE JASEGI ÑANE SÚMO SASERDÓTE EHÉMPLO

10. ¿Mbaʼe mbaʼépa ikatu jaipuru koʼág̃a ñaipytyvõ hag̃ua umi nohendúiva ha ndohecháivape? (Ehecha pe taʼanga).

¹⁰ Ñande jasegise Jesús ehémplo ha upévare ñañehaʼãmbaite jahechauka jahayhuha ha jaiporiahuverekoha la héntepe (1 Ped. 2:21; 3:8). Jaikuaa ndaikatuiha ñamonguera umi ndohecháiva térã nohendúivape, péro ikatu ñaipytyvõ chupekuéra oñemoag̃ui hag̃ua Jehováre. Por ehémplo koʼág̃a jareko umi puvlikasión bíblica mas de 100 lenguáhe de séñaspe. Avei mas de 60 idiómape oĩ umi puvlikasión bráillepe ikatu hag̃uáicha oipuru umi ndohechaporãiva térã isiégova, ha mas de 100 idiómape umi ñande vidéo oreko umi áudio deskripsión. Entéro koʼã mbaʼe oipytyvõ umi ndohecháiva ha nohendúivape oñemoag̃ui hag̃ua Jehováre ha Itaʼýrare.

11. ¿Mbaʼéichapa Jehová organisasión ohechauka osegiha Jesús ehémplo ha oñeinteresaha opaichagua héntere? (Hechos 2:​5-7, 33). (Ehecha pe taʼanga).

¹¹ Jehová organisasión oñehaʼãmbaite oipytyvõ opaichagua persónape. Ñanemanduʼami la oiko vaʼekuére Jesús orresusita rire. Pe Fiésta del Pentekostéspe haʼe omeʼẽ vaʼekue espíritu sánto umi disípulope opredika hag̃ua entéro umi hénte oñembyatývape upépe, péicha umi hénte ohendu umi notísia porã “iñidióma teépe” (elee Hechos 2:​5-7, 33). Koʼág̃a avei Jehová organisasión osegi Jesús gía, upévare onohẽ umi puvlikasión bíblica mas de 1.000 idiómape, hiʼarive algúno koʼã idióma saʼieterei hénte la oñeʼẽva. Por ehémplo América del Norte ha América del Súrpe oĩ umi idióma indíhena ndahetáiva la oñeʼẽva, péro lomímonte umi puvlikasión bíblica osẽ mas de 160 idióma indíhenape. Péicha entéro umi hénte oñeʼẽva umi idiómape ikatu oreko la oportunida ohendúvo umi notísia porã. Ñane puvlikasionkuéra osẽ avei mas de 20 idióma romanípe. Hetaiterei hénte oñeʼẽva koʼã idiómape oñepyrũma oservi Jehovápe.

12. ¿Mbaʼéichapa avei Jehová organisasión oporopytyvõ koʼág̃arupi?

¹² Péicha jahecha Jehová organisasión oipytyvõha la héntepe oikuaa hag̃ua umi notísia porã. ¿Péro ojapópa avei ótra kósa? Si, Jehová organisasión oipytyvõ avei umi ohasa asývape umi desástre naturál káusare. Upearã hetaiterei ermáno ha ermána ojeofrese jepi de voluntário oipytyvõ hag̃ua umi ermáno oikotevẽvape. Avei Jehová organisasión oipytyvõ oĩ hag̃ua umi lugár isensillomíva ikatuhápe ojeadora Jehovápe, upépe la hénte ikatu oñembyaty oaprendeve hag̃ua Ñandejáragui ha oikuaa hag̃ua haʼe ohayhuha chupekuéra.

PE SÚMO SASERDÓTE IKATU NEPYTYVÕ

13. ¿Mbaʼéichapa Jesús ikatu ñanepytyvõ?

¹³ Jesús ningo ñande “pastór imbaʼeporãva”, upévare haʼe ojasegura káda uno jarekoha umi mbaʼe ñaikotevẽva ani hag̃ua ñañemomombyry Jehovágui (Juan 10:14; Efes. 4:7). Sapyʼánte umi provlemakuéra káusare ikatu ñañandu jajoguaha peteĩ takuarílla opẽ mbotávape térã peteĩ lámpara ogue potávape. Ikatu oime ñañedesanima ñanderasykatu rupi, jajapo haguére álgo naiporãiva térã jajoavy haguére peteĩ ermánondi. Péicha jave ikatu jajesareko ñane provlémarente ha nañapensaguasuvéi umi mbaʼe porã ñaneraʼarõvare amo gotyove. Péro nemanduʼákena Jesús ohechaha umi mbaʼe rehasáva ha ontende porãitereiha la reñandúva. Haʼe ombyasy la oikóva nderehe ha nepytyvõse, por ehémplo ikatu oipuru pe espíritu sánto nemombarete jey hag̃ua (Juan 16:7; Tito 3:6). Avei Jesús ikatu ojevale umi ansiánore ha umi ermáno ha ermánare nepytyvõ ha nemokyreʼỹ hag̃ua (Efes. 4:8).

14. ¿Mbaʼépa ikatu jajapo ñañedesanimaiterei jave?

¹⁴ Oimérõ reñedesanimaiterei hína, nemanduʼákena Jesús haʼeha ñane súmo saserdóte ha epensa mbaʼépa heʼise upéva. Nemanduʼákena Jehová ombou hague chupe ko yvy ape ári ndahaʼéi omeʼẽ hag̃uánte hekove ñanderehehápe, síno Jehová oipota avei kuri Jesús ontende porãve umi provléma ohasáva umi umáno imperfékto. Oimérõ reñedesanima repeka haguére térã ereko haguére peteĩ devilida, aníkena nderesarái Jesús oĩmaha nepytyvõ hag̃uáicha pe reikotevẽve jave (Heb. 4:​15, 16).

15. ¿Mbaʼépa oipytyvõ vaʼekue peteĩ ermánope ou jey hag̃ua kongregasiónpe?

¹⁵ Jesús ogia avei Jehová siervokuérape haʼekuéra oipytyvõ hag̃ua umi oñemomombyry vaʼekuépe Jehovágui (Mat. 18:​12, 13). Jahechamína Stefanob káso. Chupe oñenohẽ vaʼekue kongregasióngui, ha 12 áño rire Stefano odesidi oho jeytaha peteĩ rreunionhápe. Haʼe heʼi: “Ndahaʼéi vaʼekue la ifasilpáva aha jey rreunionhápe, péro aĩse jey vaʼekue Jehová família apytépe. Umi ansiáno añembyaty vaʼekuéndi cherresivi porãiterei. Sapyʼánte añeñandu vaieterei aheja haguére Jehovápe ha añentregaséntema, péro umi ansiáno chemomanduʼa Jehová ha Jesús oipotaitereiha che asegi alucha. Upéi añerreadmiti jeýrõ guare, pe kongregasión kompletoite cherresivi mborayhúpe chéve ha che famíliape. Kon el tiémpo che rembireko oñepyrũ ostudia la Biblia ha koʼág̃a roservi Jehovápe en família”. Oiméne ovyʼaite ñane súmo saserdóte ñanderayhuetéva ohecha jave oñepytyvõha umi oñarrepentívape ou jey hag̃ua kongregasiónpe.

16. ¿Mbaʼérepa jaagradesete jareko haguére peteĩ súmo saserdóte ñanentende porãva?

¹⁶ Jesús oĩrõ guare ko yvy ape ári oipytyvõ vaʼekue hetaiterei héntepe oikotevẽve jave hikuái. Koʼág̃a avei ñande ndajadudái ni michĩmi haʼe ñanepytyvõtaha hiʼoraitépe. Ha koʼẽrõitéma pe múndo pyahúpe Jesús ñanepytyvõta jajeiete hag̃ua pe imperfeksión ha pekádo poguýgui. Jaagradesete ningo Jehovápe ñanderayhu haguére ha onombra haguére Itaʼýrape ñane súmo saserdoterã.