‘Ñañehaʼã ñaime hag̃ua siémpre peteĩ ñeʼẽme’

Pablo ohechauka porã ñande ñaimeha unído térã ‘peteĩ ñeʼẽme pe espíritu sánto rupive’. Upéva heʼise pe unida haʼeha peteĩ mbaʼe porã oúva Ñandejára espíritugui. Péro lomímonte Pablo heʼi vaʼekue ñañehaʼãmbaite vaʼerãha ñaime peteĩ ñeʼẽme. ¿Mávapa ojapo vaʼerã upéva? Péva otoka enterovépe, káda kristiáno jajapo vaʼerã ñande párte ñaime hag̃ua en unida pe espíritu sánto rupive.

Eñeimahinamína álgien orregalaha ndéve peteĩ áuto ipyahuetéva. ¿Mávapa oĩta rresponsávle pe áuto oñemantene porã hag̃ua? Jaikuaa porã la rrespuésta, ¿ajépa? Pe veíkulo oñembyaíramo ndaikatumoʼãi rekulpa pe orregala vaʼekuépe ndéve, pórke nde la nderekuidái vaʼekue hese.

Péicha avei, pe unida oĩva ermanokuéra apytépe haʼe peteĩ rregálo omeʼẽva ñandéve Ñandejára. Péro káda uno ñañehaʼãmbaite vaʼerã ñamantene pe unida. Upévare oimérõ ijetuʼu ñandéve jaiko porã hag̃ua peteĩ ermáno térã peteĩ ermánandi, iporãta ñañeporandumi: “¿Ajapópa hína ikatúva entéro oĩ hag̃ua unida kongregasiónpe ha asolusiona hag̃ua pe provléma?”.

“PEÑEHAʼÃMBAITE PEIME HAG̃UA SIÉMPRE PETEĨ ÑEʼẼME”

Pablo ohechauka haguéicha, sapyʼánte ñañehaʼãmbaite vaʼerã ñaime hag̃ua peteĩ ñeʼẽme ermanokuérandi. Koʼytevéntema tekotevẽta ñañehaʼã oĩ jave peteĩ ermáno térã ermána ñanembopochýva. ¿Péro jahámante vaʼerã piko ñañeʼẽ pe persónandi oimérõ ofalla raʼe ñanendive? Ndahaʼéi upéicha katuete. Péicha jave iporãta ñapensami: “Aikórõ ambotuichaiterei la oiko vaʼekue, ¿aipytyvõtapa hína oĩ hag̃ua unida, térãpa ambyaivéta hína pe káva raity?”. Avése iporãve ñambohasánte pe provléma ha ñaporoperdona (Prov. 19:11; Mar. 11:25).

Pablo heʼi ñandéve jasegi vaʼerãha ‘ñañoaguanta mborayhúpe’ (Efes. 4:2). Peteĩ lívro oexplika la idéa omeʼẽva koʼápe heʼiseha jaasepta vaʼerãha ñande rapichápe umi idefékto entéro reheve. Péva heʼise ñarrekonose vaʼerãha umi ñane ermáno haʼeha avei pekadór ñandéicha. Añetehápe, enterovete ñañehaʼã hína ñamonde “peteĩ aóicha pe kondúkta pyahu” (Efes. 4:​23, 24). Péro ni peteĩva ndaikatúi gueteri ñandeperfékto koʼág̃a (Rom. 3:23). Ñarrekonoséramo enterove ñaneimperfektoha, ifasilvéta ñandéve ñañoaguanta, ñañoperdona ha ‘ñaime peteĩ ñeʼẽme’.

Jaikóta “pyʼaguapýpe oñondivepa” kongregasiónpe ñaperdonáramo ha ñanderesaráiramo umi mbaʼe oikóvagui oĩ jave ofalláva ñanendive. Pe palávra griega ojetradusíva Efesios 4:​3-pe “peikókena pyʼaguapýpe oñondivepa”, ojetradusi “hajygue” Colosenses 2:​19-pe. Umi ñande rajygue ningo ijyeterei ha ombojoaju ojuehe umi ñane kangue. Upéicha avei pe pyʼaguapy ha mborayhu oĩva ermanokuéra apytépe, ñanepytyvõ ñaime hag̃ua unído sapyʼánte nañandegustáiramo jepe umi mbaʼe ojapóva hikuái.

Upévare, peteĩ ermáno ojapo jave álgo nañandegustáiva térã ñanembopochýva, ñañehaʼã vaʼerã jaiporiahuvereko chupe jaiko rangue ñañekonsentra umi ideféktorente (Col. 3:12). Enterove ningo ñaneimperfékto, upévare ñande avei oiméne en algún moménto jajapo raʼe álgo ombopochýva ótrope. Ñanemanduʼáramo upévare, katuete jajapóta avei ñande párte siémpre ‘ñaime hag̃ua oñondivepa peteĩ ñeʼẽme’.